Xeen tiʼ baʼax ku taasik

U testigoʼob Jéeoba

Yéey u idiomail maaya

Junpʼéel baʼal yáax u yilaʼal Manhattan

Junpʼéel baʼal yáax u yilaʼal Manhattan

Tu mesil noviembre tiʼ 2011, u j-jaajkunajoʼob Jéeobaeʼ káaj u beetkoʼob junpʼéel túumben baʼal utiaʼal u yojéeltaʼal le maʼalob péektsil tumen yaʼab máakoʼoboʼ. Letiʼobeʼ tu tsʼáajoʼob mostradoroʼob yéetel letreroʼob tu noojolil Manhattan, le kúuchil maas úuchben yéetel maas chochoʼkil tiʼ u noj kaajil Nueva Yorkoʼ.

Teʼeloʼ kanpʼéel tuʼux tsʼaʼab mostradoroʼob jatsʼutstak utiaʼal u yeʼesaʼal jejeláas libroʼob yéetel revistaʼob chʼaʼabaʼan tiʼ le Bibliaoʼ. U maas yaʼabil le mostradoroʼoboʼ tsʼaʼab naatsʼ teʼ tuʼux ku chʼaʼik camión wa tren u milesil máakoʼob sáamsamaloʼ. U j-jaajkunajoʼob Jéeoba ku kʼaʼaytajoʼob bul kʼiin teʼ kaajoʼ letiʼob atendertik le máakoʼoboʼ.

Le máaxoʼob ku náatsʼloʼoboʼ jeʼel u páajtal u kʼáatkoʼob jeʼel baʼaxak taak u yojéeltikoʼob yoʼolal le Bibliaoʼ. Baʼaleʼ wa minaʼan tiempo tiʼob utiaʼal u tsikbaloʼobeʼ jeʼel u páajtal u chʼaʼikoʼob junpʼéel jóoʼsaʼanil utiaʼal u bisik u xokoʼobeʼ.

Teʼ mostradoroʼoboʼ ku tsʼaʼabal jóoʼsaʼaniloʼob ich jejeláas idiomaʼob. Baʼaleʼ wa minaʼan ichil le idioma u kʼáat máakoʼ, jeʼel u páajtal u kʼubéentik utiaʼal ka taasaʼaktiʼeʼ, ken máanak wa jaypʼéel kʼiineʼ ku suut u chʼaʼe.

Yaʼab máakoʼobeʼ, tak le autoridadoʼoboʼ, maʼalob u yilkoʼob le baʼax ku beetaʼalaʼ. Juntúul policíaeʼ tu yaʼalaj: «¡Bejlaʼa úuch káajak a beetkeʼexeʼ! Lelaʼ letiʼe baʼax kʼaʼabéet tiʼ le máakoʼoboʼ».

Uláakʼ juntúul máakeʼ téek waʼalaj le ka tu yilaj le libro ¿Baʼax jach tu jaajil ku kaʼansik le Bibliaoʼ? Ku yaʼalikeʼ tu yilaj yaʼab máakoʼob táan u xokikoʼob le libro teʼ trenoʼ yéetel taakchaj u yojéeltik tuʼux tu chʼaʼajoʼob. Beoraaʼ tsʼoʼok u yilik tuʼuxiʼ.

Juntúul xiʼipaleʼ sáamsamal ken xiʼik tu meyajeʼ ku máan aktáan tiʼ le mostradoroʼ, baʼaleʼ mix juntéen waʼalaj u yil baʼax yaniʼ, tak ka máan seis semanaʼob. Waʼalajeʼ ka tu yaʼalaj: «¿Jeʼel wa a wáantkeneʼexeʼ?». Le j-Jaajkunajoʼoboʼ yéetel kiʼimak óolal tu yáantoʼob. Tu tsʼáajoʼob junpʼéel Biblia tiʼeʼ ka tu yeʼesoʼob bix jeʼel u jóoʼsik u yutsileʼ.

Yaʼab máakoʼob tsʼoʼok u waʼataloʼob tsikbal yoʼolal Dios, yéetel kiʼimak u yóoloʼob ken lukʼkoʼobiʼ. Yoʼolal le baʼax ku beetaʼalaʼ maʼ sen úucheʼ tʼoʼox 3,797 revistaʼob yéetel 7,986 libroʼob chéen ichil junpʼéel mes.