Yaan kʼiineʼ le tʼaan eunucooʼ u kʼáat u yaʼal juntúul «máak capartaʼan». Úuchjeakileʼ bey u beetaʼal tiʼ le máaxoʼob ku castigartaʼaloʼoboʼ wa tiʼ le máaxoʼob ku chuʼukloʼob wa ku palitsiltaʼaloʼoboʼ. Wa le eunuco ku lúubul utsil tiʼ le reyoʼ ku tsʼaʼabal u kanáant le najoʼob tuʼux kajaʼan u yatanoʼob le reyoʼ. Jeʼex Hegai yéetel Saasgazeʼ, letiʼob kanáantik kaʼach u yatanoʼob yéetel le uláakʼ koʼoleloʼob kajkúuntaʼan tumen le rey persa Asuerooʼ; yaʼab máax aʼalikeʼ le reyaʼ láayliʼ letiʼe rey Jerjes I (Ester 2:3, 14).

Baʼaleʼ maʼ tuláakal le eunucoʼob ku yaʼalaʼal teʼ Biblia capartaʼanoʼoboʼ. Jujuntúul máakoʼob kaʼanchajaʼan u xookoʼobeʼ ku yaʼalikoʼobeʼ bey u yaʼalaʼal xan tiʼ jeʼel máaxak ku meyaj tu palacio juntúul reyeʼ. Letiʼe meyaj wal tu beetaj juntúul u amigo Jeremías ku kʼaabaʼtik Ebed-melec bey xan le etiopíail uʼuy u kʼaʼaytaj Felipeoʼ. Ebed-melekeʼ jach anchaj wal u páajtalileʼ, tumen jeʼel baʼaxak súutukil ku béeytal kaʼach u tʼaan yéetel rey Sedequíaseʼ (Jeremías 38:7, 8). Le etiopíailoʼ ku kanáantik kaʼach tuláakal u ayikʼalil le reinaoʼ, chéen «bijaʼan kaʼach Jerusalén u adorart Dios» (Baʼaxoʼob [Hechos] 8:27).

Le ka tʼaanaj Jesús tiʼ le juicio ku taal u kʼiinoʼ tu yaʼalaj: «Ken nojbeʼenkúuntaʼak u Paal máak[eʼ] [...] yaan u jatsik le máakoʼob jeʼex u beetik le j-kanan taman ku jatsik le tamanoʼob tiʼ le chivoʼoboʼ» (Mateo 25:31, 32). Le baʼax tu yaʼalaj Jesusoʼ jach suuk kaʼach u beetaʼal tumen le j-kanan tamanoʼoboʼ. ¿Baʼaxten bey u beetkoʼoboʼ?

U suukileʼ le tamanoʼob yéetel le chivoʼoboʼ junmúuchʼ u máanoʼob de kʼiin. De áakʼabeʼ ku kʼaʼalaloʼob tiʼ corraloʼob utiaʼal maʼ u jaantaʼaloʼob, u yoklaʼaloʼob wa u máanskoʼob keʼel (Génesis 30:32, 33; 31:38-40). Le j-kanan tamanoʼob xanoʼ junpáay u tsʼáaikoʼob le tamanoʼoboʼ, maases le yaan u mejniloʼoboʼ. Beyoʼ ku kanáantkoʼob tiʼ le chivoʼoboʼ, tumen le chivoʼoboʼ maas tsʼíiktakoʼob. Junpʼéel libroeʼ ku yaʼalikeʼ ku jaʼatsaloʼob xan utiaʼal u «méekʼaʼaloʼob tumen le xibil tamanoʼ, utiaʼal u poʼotsʼol u lecheʼob wa utiaʼal u kʼoʼosol u tsoʼotseloʼob» (All Things in the Bible). Le baʼax tu yaʼalaj Jesusoʼ jach ojéelaʼan tumen le judíoʼob uʼuyoʼ, tumen u maas yaʼabil tiʼ letiʼobeʼ kajaʼanoʼob tuʼux suuk u kanáantaʼal tamanoʼ.