BAʼAXTEN MAʼ TU CREERTAʼAL: Yaʼab máakeʼ ku tuklikeʼ Dioseʼ chéen ku yilik le baʼaxoʼob kʼaastak ku beetik máakoʼ, le oʼolal maʼ tu náajmatik ka kʼaʼamak tumen Dios. Kendra, juntúul koʼolel yaan depresión tiʼeʼ, ku lúubul u yóol tumen maʼ tu páajtal u beetik tuláakal le baʼax ku yaʼalik Diosoʼ. ¿Baʼax túun tu beetaj? Letiʼeʼ ku yaʼalik: «Xuʼul in orar».

BAʼAX KU KAʼANSIK LE BIBLIAOʼ: Jéeobaeʼ ku naʼatik baʼaxten yaan horaeʼ k-beetik baʼax maʼ maʼalobiʼ. Le Bibliaoʼ ku yaʼalik: «Tumen letiʼeʼ [u] yojel yéetel baʼax beetaʼanoʼon: maʼalob u yojlil, toʼoneʼ maʼay luʼumoʼon». Tumen u kʼaj óoloʼoneʼ ku chʼaʼiktoʼon óotsilil yéetel ku perdonartikoʼon wa k-arrepentir tu jaajil k-óol (Salmo 103:10, 14).

Koʼox ilik baʼax úuch tiʼ rey David. Ichil junpʼéel oracioneʼ tu yaʼalaj tiʼ Dios: «A wichoʼobeʼ tu yilajoʼob in wíinklil le táan u chʼaʼik wíinklileʼ; tuláakal lelaʼ tsʼíibtaʼan yanil tiʼ a tsʼíibil juʼun [...]. In [Dios], xakʼalteniʼ, kʼaj óolt in puksiʼikʼal» (Salmo 139:16, 23). Kex tu beetaj baʼaloʼob kʼaastak —tak nukuch kʼebanoʼobeʼ—, u yojel yaan u naʼatik Dios jach tu jaajil u yóol arrepentirnaji.

U jaajileʼ chéen Jéeoba naʼatik bix u yuʼubikuba máak. Le Bibliaoʼ ku yaʼalik: «Le wíinikoʼ chéen ku paktik le wíinkliloʼ, baʼaleʼ teneʼ kin paktik le puksiʼikʼaloʼ» (1 Samuel 16:7). Dioseʼ u kʼaj óolech yéetel u yojel baʼaxten beyechoʼ. U yojel bixech desde ka síijech, bix líiʼsaʼabikech, baʼaxoʼob uchaʼantech yéetel baʼax modosil yaantech. Letiʼeʼ ku yilik bix a tsʼáaik a wóol a beet baʼax maʼalob kex yaan horaeʼ ku jóokʼoltech kʼaasil.

Jeʼex ilkoʼ Dioseʼ u kʼaj óolech yéetel ku naʼatkech. Baʼaleʼ ¿baʼax ku beetik utiaʼal u líiʼsik a wóol?