ILAWIL A NATSʼKABA TIʼ DIOS
Dioseʼ ku «yíiʼchuptik a puksiʼikʼaleʼex»
¿Jach wa tu jaajil u yaabiltmoʼon Jéeoba, wa chéen táan u yilik k-muʼyaj? Le baʼax ku yaʼalik le Bibliaoʼ jach ku líiʼsik k-óol. Dioseʼ tu jaajil u yaabiltmoʼon yéetel u kʼáat ka kuxlakoʼon ich kiʼimak óolal. Sáamsamal ku yeʼesik u yutsil tiʼ tuláakal máak, tak tiʼ le máaxoʼob maʼ kʼajaʼan Dios tiʼoboʼ. Ilawil baʼax tu yaʼalaj apóstol Pablo. (Xok Baʼaxoʼob 14:16, 17.)
Le ka tʼaanaj Pablo tu táan máakoʼob maʼatech u adorartikoʼob Dios tu kaajil Listraeʼ tu yaʼalajtiʼob: «Teʼ kʼiinoʼob tsʼoʼok u máanoʼoboʼ, letiʼeʼ tu chaʼaj tiʼ u kajnáaliloʼob tuláakal kaajoʼob ka u beetoʼob jeʼel baʼaxak u kʼáatoʼobeʼ, kex beyoʼ, Dioseʼ mantatsʼ tu yeʼesaj máax letiʼ yéetel le baʼaloʼob maʼalobtak ku beetkoʼ: u beetik u kʼáaxal jaʼ, u beetik u yichankil le cheʼoboʼ, bey xan u yíiʼchuptik a puksiʼikʼaleʼex yéetel janal bey xan yéetel kiʼimak óolal». ¿Naʼataʼab wa le baʼax tu yaʼalaj Pablooʼ?
U kajnáaliloʼob Listraeʼ tu séebaʼanil tu tsʼáajoʼob cuentaeʼ jaaj u tʼaan Pablo, tumen le tuʼux kajaʼanoʼoboʼ yaʼab jaʼ yaan yéetel jach ku meyajtaʼal le luʼumoʼ. Baʼaleʼ jeʼex kʼaʼajsaʼabiktiʼob tumen Pabloeʼ, Dios beetik u kʼáaxal jaʼ yéetel u tsʼáaik u yich le cheʼoboʼ. Le beetkeʼ cada ken joochnakoʼob yéetel cada ken u jaantoʼob junpʼéel kiʼikiʼ janaleʼ, u jaajileʼ táan u kʼamkoʼob u yutsil Dios.
Le baʼax tu yaʼalaj Pablo tiʼ le máakoʼobaʼ yaʼab baʼax ku kaʼansiktoʼon yoʼolal Jéeoba Dios.
Jéeobaeʼ u tsʼaamajtoʼon u páajtalil k-yéeyik baʼax ken k-beete. Jéeobaeʼ tu chaʼaj «tiʼ u kajnáaliloʼob tuláakal kaajoʼob ka u beetoʼob jeʼel baʼaxak u kʼáatoʼobeʼ». Junpʼéel libro ku meyaj tiʼ le máaxoʼob sutik le Bibliaoʼ ku yaʼalikeʼ le tʼaanaʼ u kʼáat u yaʼal «u kuxtaloʼob jeʼex u kʼáatoʼobeʼ» wa «u beetkoʼob jeʼex u tuklikoʼob maʼaloboʼ». Jéeobaeʼ maʼatech u obligartikoʼon utiaʼal ka k-adorarte. Letiʼeʼ u tsʼaamajtoʼon u páajtalil k-yéeyik baʼax ken k-beet yéetel k-kuxtal (Deuteronomio 30:19).
Jéeobaeʼ u kʼáat ka k-kʼaj óolte. Pabloeʼ tu yaʼaleʼ Dioseʼ «tu yeʼesaj máax letiʼ». Le libro tsʼoʼok k-yáax aʼalikoʼ ku yaʼalikeʼ le tʼaanoʼobaʼ jeʼel u páajtal u suʼutul beyaʼ: «Dioseʼ tsʼoʼok u yeʼesik tiʼ le máakoʼob jach bix u modos letiʼoʼ». Le baʼaxoʼob u beetmaj Diosoʼ jach ku chíikbesik u «jatsʼuts modos Dios maʼ tu páajtal u yilaʼaloʼ», jeʼex u yutsil, u naʼat, u páajtalil yéetel u yaabilaj (Romailoʼob 1:20). Ichil le Bibliaoʼ Jéeobaeʼ ku yaʼaliktoʼon jach bix letiʼ (2 Timoteo 3:16, 17). ¿Máasaʼ lelaʼ ku yeʼesiktoʼon jach u kʼáat ka k-kʼaj óolte?
Sáamsamaleʼ Dioseʼ ku yeʼesik u yutsil tiʼ tuláakal máak, tak tiʼ le máaxoʼob kʼasaʼanoʼoboʼ
Jéeobaeʼ u kʼáat ka yanaktoʼon kiʼimak óolal. Pabloeʼ tu yaʼaleʼ Dioseʼ ku «yíiʼchuptik [k-]puksiʼikʼaleʼex yéetel janal bey xan yéetel kiʼimak óolal». Tsʼoʼoleʼ tak le máaxoʼob kʼasaʼanoʼoboʼ ku páajtal u janaloʼob yéetel u yantal junpʼíit kiʼimak óolal tiʼob. Baʼaleʼ Dioseʼ u kʼáateʼ mantatsʼ ka yanaktoʼon le jaajil kiʼimak óolaloʼ. Leloʼ chéen jeʼel u páajtal wa k-kanik u jaajil tu yoʼolaleʼ bey xan wa k-tsʼáaik ichil k-kuxtal le baʼax k-kanikoʼ (Salmo 144:15; Mateo 5:3).
Tuláakloʼon k-ilik u yutsil Jéeoba sáamsamal. ¿A kʼáat wa a maas kan bix jeʼel a tsʼáaik u nib óolalil tiʼ Dios ikil ‹u yíiʼchuptik a puksiʼikʼal yéetel janal bey xan yéetel kiʼimak óolaleʼ›?
U xookil le Biblia utiaʼal juliooʼ:
