¿Yaan wa máax uʼuyik a payalchiʼ?

«Maʼ tin jach creertik kaʼach wa yaan Dios. Kex beyoʼ yaan kʼiineʼ kin payalchiʼ. Maʼ in wojel wa jach tu jaajil yaan máax uʼuyikiʼ, baʼaleʼ kin tsʼíiboltik kaʼach ka yanakeʼ. Maʼ kiʼimak in wóoliʼ yéetel minaʼan u biilal in kuxtal kaʼachi. Kin tuklik kaʼacheʼ chéen máaxoʼob séeb u tuʼusloʼob jeʼel u creertikoʼob Dioseʼ.» (PATRICIA, IRLANDA) *

¿KA WUʼUYIKABA xan wa jeʼex Patriciaeʼ? ¿Ka payalchiʼ wa kex maʼ ta jach creertik wa yaan Dios? Wa beyoʼ maʼ chéen teechiʼ.

▪ Le ka kʼáatchiʼitaʼab 2,200 máakoʼob kajaʼanoʼob Bretañaeʼ, ilaʼabeʼ chéen 22% ku creertik yaan juntúul Dios uʼuyik le payalchiʼoboʼ. Baʼaleʼ 55% ku payalchiʼ kex chéen wa baʼax kʼiin.

▪ Le ka kʼáatchiʼitaʼab 10,000 máakoʼob tiʼ jejeláas luʼumoʼobeʼ ilaʼabeʼ óoliʼ 30% tiʼ le ku yaʼalikubaʼob ateoʼoboʼ ku payalchiʼob.

¿Baʼaxten maʼ tu jach creertikoʼob?

Allan, juntúul máak kajaʼan Inglaterraeʼ, tu yaʼalaj: «Teneʼ kin waʼalik kaʼacheʼ maʼ tin creertik Dios tumen kin tuklikeʼ le religionoʼ chéen beetaʼab utiaʼal u tuʼusul máak wa utiaʼal u jóoʼsaʼal taakʼin tiʼ. Kin tuklikeʼ wa yaan Dioseʼ bejlaʼa maʼ táan k-ilik yaʼab kʼasaʼanileʼ. Baʼaleʼ yaan horaeʼ kin kutaleʼ, ku joʼopʼol in tʼaan yéetel ‹wa baʼax›. Kin tuklik xan: ‹¿Baʼaxten kuxaʼanen?›».

Cada máakeʼ yaan baʼax oʼolal maʼ tu jach creertik wa ku yuʼubaʼal u payalchiʼob. Yaʼab u téeneleʼ ku tuukuloʼob beyoʼ tumen maʼ u kaxtoʼob u núukil kʼáatchiʼob jeʼex leloʼobaʼ:

▪ ¿Yaan wa Máax beetmiloʼon?

▪ ¿Baʼaxten yaan kʼasaʼanil ichil le religionoʼoboʼ?

▪ ¿Baʼaxten ku chaʼik Dios k-muʼyaj?

Wa ka a wojéelt u núukil le kʼáatchiʼobaʼ, ¿jeʼel wa u maas taaktal a payalchiʼ yéetel u jaajil a wóoleʼ?

[Tsolajil]