¿Bix unaj u kaʼansaʼaloʼob? Le baʼaxoʼob jeʼel u meyajtiʼoboʼ

«Tʼilkúunt ta tuukul tuláakal le baʼaxoʼob tsʼoʼok in waʼaliktech bejlaʼaʼ. Kaʼanbes mantatsʼ tiʼ a paalal; kʼaʼajes tiʼob jeʼel bix ichil a wotocheʼ, bey tiʼ le bejoʼ, bey xan le ken chilakech bey le ken líikʼikech.» (DEUTERONOMIO 6:6, 7)

LE TAATATSILOʼOBOʼ jach ku lúubul u yóoloʼob tumen ku tuklikoʼob maʼ tu páajtal u kaʼansik u paalaloʼob. Yéetel ken u yiloʼob bukaʼaj tsolnuʼukoʼob yaan jejeláas tuʼuxoʼobeʼ maas jeʼel u chiʼichnaktaloʼobeʼ. Le láakʼtsiloʼob wa le amigoʼoboʼ ku yilik xan u yaʼalikoʼob tiʼ le taatatsiloʼob bix jeʼel u kaʼansik u paalaloʼobeʼ. Tsʼoʼoleʼ yaan libroʼob revistaʼob bey xan kúuchiloʼob ich Internet ku tsʼáaikoʼob tsolnuʼukoʼob, yéetel maʼ junpʼéeliliʼ baʼax ku kaʼanskoʼobeʼ.

Baʼaleʼ le Bibliaoʼ maʼ chéen ku yaʼalik baʼax unaj u kaʼansaʼal tiʼ le paalaloʼoboʼ, baʼaxeʼ ku yaʼalik bix unaj u beetaʼal. Le teksto ku chíikpajal teʼ kaʼanloʼ ku yeʼesikeʼ le taatatsiloʼ unaj u yilik u kaʼansik tiʼ u paalal baʼaloʼob yaan yil yéetel Dios sáamsamal. Teʼ xookaʼ yaan k-ilik kanpʼéel baʼaloʼob ku yaʼalik le Biblia tsʼoʼok u yáantik yaʼab taatatsiloʼoboʼ.

1. Meyajnaktech le baʼaxoʼob u beetmaj Diosoʼ. Le apóstol Pablooʼ, tu tsʼíibtaj: «Le baʼax maʼ tu páajtal u yilaʼal tiʼ Jajal Diosoʼ ku páajtal u kʼaj óoltaʼal tu yoʼolal le baʼaloʼob u beetmajoʼ. Chuʼunpaj u yilaʼal jach sáasil le ka beetaʼab yóokʼol kaabeʼ, letiʼeʼ Jajal Dios yéetel yaan páajtalil mantatsʼ tiʼ» (Romailoʼob 1:20). Le taatatsiloʼoboʼ jeʼel u páajtal u yáantik u paalaloʼob utiaʼal ka u yiloʼob jach tu jaajil yaan Diosoʼ. Utiaʼal lelaʼ jeʼel u páajtal u meyajtiʼob le baʼaxoʼob u beetmoʼ yéetel jeʼel u páajtal u yáantik u paalaloʼob tuukul tiʼ le jatsʼuts modosoʼob ku yeʼesik Diosoʼ.

Jesuseʼ bey tu beetil utiaʼal u kaʼansik u disipuloʼoboʼ. Jeʼex le ka tu yaʼalaj lelaʼ: «Pakteʼex le chʼíichʼoʼob ku xikʼnaloʼoboʼ, maʼ tu paakʼaloʼob mix tu joochoʼob, mix tech u líikʼesikoʼob u yich paakʼal tiʼ chʼiiloʼob, baʼaleʼ a Taataʼex yaan teʼ kaʼanoʼ letiʼ tséentkoʼob. ¿Maʼ wa [maas] yaʼab a tojoleʼex tiʼ le chʼíichʼoʼoboʼ?» (Mateo 6:26). Yéetel lelaʼ Jesuseʼ tu yeʼesaj tiʼ u disipuloʼob bukaʼaj nojchil u yaabilaj yéetel u chʼaʼ óotsilil Jéeoba, tsʼoʼoleʼ tu beetaj xan u tuukuloʼob tiʼ bix u yeʼesik Jéeoba le jatsʼuts modos tiʼ u paalaloʼ.

Le rey Salomonoʼ tu kaʼansaj junpʼéel baʼal jach kʼaʼanaʼan le ka tʼaanaj tiʼ le naʼat u tsʼaamaj Dios tiʼ le síinkoʼoboʼ: «Maʼakʼóol, pakt le síinikoʼ; ilawil baʼax ku beetik utiaʼal ka kaanbanakech: Kex tumen minaʼan máax tusik u beeloʼobeʼ mix máak aʼaliktiʼ baʼax bíin u beete,  ku kaxtik u janal tu kʼiiniloʼob yáax kʼiin ku taʼakbesik tu kʼiiniloʼob jooch» (Proverbios 6:6-8). Yéetel lelaʼ Salomoneʼ tu yeʼesaj u kʼaʼanaʼanil u tsʼáaik máak metaʼob maʼalobtak ichil u kuxtal yéetel u yilik u beetik.

Taatatsileʼex, ¿bix jeʼel u páajtal a beetkeʼex jeʼex Jesús yéetel Salomón ken a kaʼans a paalaleʼexoʼ? Yáaxeʼ, kʼáat tiʼ a paalal baʼax pakʼaliloʼob yéetel baʼalcheʼob maas jatsʼuts u yilkoʼob. U kaʼapʼéeleʼ, kaxteʼex baʼaxoʼob ku yaʼalaʼal tu yoʼolal le baʼaloʼob uts tu yichoʼobaʼ. Yéetel u yóoxpʼéeleʼ múul tsikbalteʼex baʼaxoʼob ku kaʼansik tu yoʼolal Dios.

2. Beeteʼex jeʼex Jesús ken tsikbalnakeʼexoʼ. Tiʼ tuláakal le máaxoʼob tsʼoʼok u kuxtaloʼob way luʼumeʼ chéen Jesús tsʼoʼok u kaʼansik baʼaloʼob jach kʼaʼabéettak. Baʼaleʼ letiʼeʼ maases tu beetaj kʼáatchiʼob tumen jach u kʼáat u yojéelt baʼax ku tuklik yéetel baʼax ku yuʼubik le máaxoʼob uʼuyoʼ (Mateo 17:24, 25; Marcos 8:27-29). Le taatatsiloʼob xanoʼ yaʼab baʼaloʼob jeʼel u páajtal u kaʼansik tiʼ u paalaloʼobeʼ, baʼaleʼ utiaʼal lelaʼ kʼaʼabéet u beetkoʼob jeʼex Jesuseʼ yéetel u yáantik u paalal utiaʼal u yaʼalikoʼob baʼax ku tuklikoʼob.

Baʼaleʼ ¿kux túun wa le paalal maʼ u kʼáatoʼob wa talam u yilkoʼob u kaanbaloʼob tiʼ Diosoʼ? Ilawileʼex bix tu tratartil Jesús u apostoloʼob. Yaan kʼiineʼ ku baʼateltʼaanoʼob kaʼach yéetel maʼ tu naʼatkoʼob baʼaxten unaj u yeʼeskoʼob kabal óolal. Baʼaleʼ Jesuseʼ chúukpaj u yóol tiʼob yéetel mantatsʼ tu kaʼansajtiʼob u yeʼesoʼob kabal óolal (Marcos 9:33, 34; Lucas 9:46-48; 22:24, 25). Le taatatsiloʼob ku beetkoʼob jeʼex Jesuseʼ láayliʼ bey u kaʼansik u paalaloʼoboʼ yéetel wa ku kʼaʼabéettaleʼ, ku yantal u kaʼa tsolkoʼob tiʼ u paalaloʼob utiaʼal u naʼatkoʼob.

3. Kaʼansajneneʼex yéetel baʼaxoʼob ka beetkeʼex. Le taatatsiloʼoboʼ jach maʼalob ka u beetoʼob le baʼax tu yaʼalaj le apóstol Pablo tiʼ le máaxoʼob yanoʼob Romaoʼ: «Teech ka kaʼansik uláakʼoʼobeʼ ¿maʼ ta kaʼansikaba teech? Teech ka tseʼektik maʼ unaj u yúuchul ookoleʼ. ¿Maʼ ta wookol teech?» (Romailoʼob 2:21).

Jach maʼalob ka tuukulnak máak tiʼ lelaʼ tumen le paalaloʼoboʼ maas ku yilkoʼob le baʼaxoʼob ku beetik u taataʼoboʼ, maʼ le baʼax ku yaʼalikoʼoboʼ. Le taatatsiloʼob ku yilik u yáantik u paaloʼob yéetel le baʼaxoʼob ku beetkoʼoboʼ maas ku yuʼubaʼal u tʼaanoʼob.

4. Kaʼanseʼexoʼob desde tu chichniloʼob. Úuchjeakileʼ jach yaʼab baʼaloʼob maʼalobtak ku yaʼalaʼal yoʼolal Timoteo, máax tu láakʼintaj Pablo kʼaʼaytaj (Beetaʼanoʼob [Hechos] 16:1, 2). Ku yaʼalaʼal baʼaloʼob maʼalobtak tu yoʼolal tumen desde tu chichnil kaʼansaʼabtiʼ le baʼax ku yaʼalik le «Kiliʼich Tsʼíiboʼoboʼ». U maama yéetel u abuelaeʼ, maʼ chéen ku xokikoʼob le Kiliʼich Tsʼíiboʼob tiʼoʼ, baʼaxeʼ ku yáantkoʼob utiaʼal ka u beet le baʼaxoʼob ku yaʼalikoʼ (2 Timoteo 1:5; 3:14, 15).

Tuʼux jeʼel u kaxtaʼal áantajeʼ

U j-jaajkunajoʼob Jéeobaeʼ (testigos de Jehová) tsʼoʼok u jóoʼskoʼob yaʼab publicacionoʼob jach maʼalobtak utiaʼal u kaʼansaʼal tiʼ le paalaloʼob u jaajil yoʼolal Diosoʼ. Yanoʼobeʼ beetaʼanoʼob utiaʼal u kaʼansaʼal le mejen paalaloʼ yéetel uláakʼoʼobeʼ utiaʼal u kanik múul tsikbal le táankelem paalaloʼob yéetel u taataʼoboʼ. *

Utiaʼal u kaʼansaʼal tiʼ le paalaloʼob tiʼ Diosoʼ unaj u yojéeltaʼal u núukil jujunpʼéel kʼáatchiʼob jeʼel u beetkoʼobeʼ. ¿Baʼax jeʼel a núukik wa ku kʼáataʼaltech baʼaxten ku chaʼik Dios u yantal muʼyajil, baʼax ku tuklik u beetik yéetel le Luʼumaʼ yéetel tuʼux yaan le kimenoʼoboʼ? U j-jaajkunajoʼob Jéeobaeʼ jeʼel u yáantkechoʼob a wil u núukil le kʼáatchiʼobaʼ yéetel uláakʼ baʼaxoʼob taak a wojéeltik, beyoʼ teech yéetel a familiaeʼ yaan u béeytal a náatsʼleʼex yiknal Dios (Santiago 4:8).

[Tsolajil]