Ilawil a natsʼkaba tiʼ Dios

Jeʼel kin kʼubik tiʼ teech a paalaʼ

2 REYES 4:8-37

ICHIL u kuxtal máakeʼ óoliʼ mix baʼal jeʼel u keʼetel yéetel le muʼyajil ku taasik u kíimil utúul hijotsiloʼ. Baʼaleʼ, lelaʼ maʼ upʼéel baʼal minaʼan utskíinajil tiʼiʼ. ¿Baʼaxten k-aʼalik lelaʼ? Tumen le Bibliaoʼ ku yaʼalikeʼ úuchjeakileʼ Dioseʼ tu tsʼáaj páajtalil tiʼ yaʼab máakoʼob utiaʼal u kaʼa kuxkíintkoʼob máaxoʼob tsʼoʼok kaʼach u kíimloʼob. Utúul tiʼ letiʼobeʼ letiʼe profeta Eliseooʼ. Koʼoneʼex ilik baʼax ku yaʼalik 2 Reyes 4:8-37 utiaʼal k-ilik bix úuchik u kaʼa kuxkíintik utúul chan xiʼipal.

Teʼeloʼ ku yaʼalikeʼ tiʼ upʼéel kaaj ku kʼaabaʼtik Sunemeʼ kajakbal utúul íichamtsil yéetel u yatan, letiʼobeʼ jach suuk u kʼamkoʼob Eliseo tu yotochoʼob yéetel suuk xan u invitarkoʼob janal. Upʼéel kʼiineʼ tumen jach kiʼimak u yóol tu yoʼolal le utsil ku yeʼesaʼaltiʼoʼ le profetaoʼ tu yaʼalaj tiʼ le koʼoleloʼ: « Tiʼ le jaʼab ku taaloʼ, tiʼ le kʼiinoʼobaʼ, yaan a méekʼik juntúul a [paal]». Letiʼeʼ maʼ tu tuklaj wa jeʼel u béeytal lelaʼ tumen u yojel maʼ tu páajtal u yantal u paalal. Le baʼax jach ku tsʼíiboltik kaʼachaʼ béeychaj jach jeʼex tu yaʼalil Eliseooʼ. Baʼaleʼ jach maʼ xáanchaj le kiʼimak óolal ku yuʼubik kaʼach le koʼolelaʼ. Ka máan jujumpʼéel jaʼaboʼobeʼ, le bijaʼanoʼob ich kooloʼ, le chan xiʼipaloʼ kaaj u yuʼubik jach táaj yaj u pool. Tu jáan bisoʼob tu yotoch, baʼaleʼ le chan xiʼipaloʼ kíim le méekʼaʼan tumen u maamaoʼ (versiculoʼob 16, 19 yéetel 20). Le koʼolelaʼ jach yaachaj u yóol yéetel tu chaambel tsʼáaj le chan xiʼipal teʼ tuʼux ku chital wenel kaʼach le profetaoʼ.

Le koʼoleloʼ jáan tʼaanaj yéetel u yíichameʼ, ka jóokʼ u kaxt Eliseo. Ka tsʼoʼok u xíimbaltik 30 kilometroseʼ kʼuch tak tu puʼukil Carmelo tuʼux yaan kaʼach le profetaoʼ. Baʼaleʼ letiʼeʼ maʼ túupʼ u yokʼol ka tu yilaj Eliseoiʼ. Maʼ xaaneʼ letiʼeʼ maʼ okʼolnajiʼ tumen u yojel Elías, le máax tu beetaj u profetai táanil tiʼ Eliseooʼ, tu kuxkíintaj u hijo utúul x-kimen íicham (1 Reyes 17:17-23). ¿Ku creertik wa kaʼach jeʼel u páajtal u kaʼa kuxkíintaʼal u hijo tumen Eliseoeʼ? Le Bibliaoʼ maʼatech u yaʼalik lelaʼ. Baʼaleʼ ku yaʼalikeʼ le koʼolelaʼ pʼis úuchik u beetik u láakʼintaʼal tumen Eliseoeʼ ka suunaj tu yotoch.

Ka kʼucheʼ le profetaoʼ ook teʼ tuʼux suuk u pʼáatal wenel kaʼachoʼ. Teʼeloʼ tu yilaj le chan xiʼipal «tutsʼkíintaʼan tu yóokʼol le u kúuchil weneloʼ» (versículo 32). Ka tsʼoʼokeʼ tu beetaj upʼéel oración tiʼ Jéeoba. Tsʼoʼoleʼ noklaj yóokʼol le chan xiʼipaloʼ yéetel jujumpʼíitil «joʼopʼ u yokol kʼíinal tu wíinklil le paaloʼ». Teʼ súutukaʼ úuch upʼéel milagro: ¡u puksiʼikʼal le chan xiʼipaloʼ káaj u kaʼa síitʼ! Le koʼolel xanoʼ tu yuʼubaj bey kaʼa kuxlaj le ka tu yuʼubaj u yaʼalaʼal tiʼ tumen Eliseo: «Jeʼel kin kʼubik tiʼ teech a [paalaʼ]» (versiculoʼob 34 yéetel 36).

Le tsikbalaʼ jach jeʼel u líiʼsik u yóol tuláakal le máaxoʼob tsʼoʼok u kíimil utúul u hijoʼoboʼ. Lelaʼ ku yeʼesikeʼ Jéeobaeʼ ku naʼatik bix u yuʼubikuba le taatatsiloʼoboʼ. Le oʼolal u kʼáat u beet upʼéel baʼal utiaʼal u xuʼulul le muʼyajilaʼ (Job 14:14, 15). Tsʼoʼoleʼ letiʼeʼ tsʼoʼok u yaʼalik yaan u kaʼa kuxkíintik u millonesi máakoʼob. Jeʼex le tsikbalil tsʼoʼok k-ilkaʼ yaan uláakʼoʼob ku chíikpajal teʼ Biblia ku yeʼeskoʼob baʼax ken u beet Dios teʼ túumben luʼum ku yaʼalik u tsʼáaikoʼ. *

Baʼaleʼ le baʼax ku yaʼalik le Bibliaaʼ maʼ u kʼáat u yaʼal wa maʼ kun yaatal k-óol ken kíimik utúul máax k-yaabiltmiʼ. Utúul taatatsil ku meyajtik Dios kíim u juntúuliliʼ hijoeʼ ku yaʼalik: «Chéen jeʼel u xuʼulul u yaatal in wóol ken in kaʼa méekʼ in hijoeʼ». Kex beyoʼ k-tuukul tiʼ le kʼiin ken kaʼa kuxlak k-láakʼtsiloʼob yéetel k-amigoʼob tsʼoʼok u kíimloʼoboʼ jach jeʼel u líiʼsik k-óoleʼ. ¡Chéen tukult bix ken a wuʼuyaba le kʼiin ken a kaʼa méekʼoʼoboʼ! ¿Máasaʼ jach maʼalob ka náatsʼkoʼon tiʼ Jéeoba, le máax aʼalik u beetik le jatsʼuts baʼaloʼobaʼ?

[Tsolajiloʼob]