U yóoxpʼéel tuus: Tuláakal le utsoʼob ku binoʼob kaʼanoʼ

¿Bix úuchik u yantal le tuusaʼ? Teʼ siglo 2, ka tsʼoʼok u kíimil u apostoloʼob Jesusoʼ, káaj u yantal u jaats máakoʼob jach ku xokkoʼob baʼaxoʼob yaan yil yéetel Dios, le máakoʼobaʼ letiʼe káajs le Iglesiaoʼ. Le ka tʼaanaj upʼéel enciclopedia tu yoʼolaloʼobeʼ, tu yaʼalaj: «Ku kaʼanskoʼobeʼ ken kíimik máakeʼ ku bin kaʼan ken tsʼoʼokok u beetaʼal le baʼaxoʼob suukaʼan u beetaʼal ken kíimik wa máaxoʼ» (New Catholic Encyclopedia, 2003).

¿Baʼax ku kaʼansik le Bibliaoʼ? «Kiʼ u yóoloʼob le máaxoʼob kabal u yóol u puksiʼikʼaloʼoboʼ, tumen bíin utiaʼaltoʼob le luʼumaʼ.» (Mateo 5:5.)

Kex tu yaʼalaj Jesús tiʼ u disipuloʼob yaan u preparartik kúuchiloʼob teʼ kaʼan utiaʼal u yantaloʼoboʼ, maʼ tu yóotaj u yaʼal wa tuláakal le utsoʼob ku binoʼob kaʼanoʼ (Juan 3:13; 14:2, 3). Kʼaʼajaktoʼoneʼ ka orarnaj Jesuseʼ maʼ chéen tu kʼáataj ka beetaʼak baʼax u kʼáat Dios teʼ «kaʼanoʼ», tu kʼáataj xan ka beetaʼak baʼax u kʼáat «way luʼumeʼ» (Mateo 6:9, 10). U jaajileʼ kaʼapʼéel baʼax jeʼel u páaʼtik le utsoʼoboʼ. U jaatseʼ yaan u binoʼob reinar yéetel Cristo teʼ kaʼanoʼ, baʼaleʼ u maas yaʼabileʼ yaan u pʼáatloʼob kuxtal utiaʼal mantatsʼ way Luʼumeʼ (Apocalipsis 5:10).

Le baʼax ku creertik le Iglesia kaʼachoʼ, káaj u tuʼubskoʼob yéetel joʼopʼ u creertikoʼob tsʼaʼan uláakʼ meyaj u beetoʼob way Luʼumeʼ. Upʼéel enciclopediaeʼ ku yaʼalikeʼ letiʼobeʼ «káaj u tuklikoʼobeʼ letiʼob le u Reino Dios ku páaʼtaʼaloʼ» (The New Encyclopædia Britannica). Tsʼoʼoleʼ utiaʼal u maas yaʼabtal máaxoʼob creerkoʼobeʼ káaj u yokskubaʼob ich política, kex u yaʼalmaj Jesús le máaxoʼob meyajtikoʼ «maʼ yóokʼol kabiloʼobiʼ» (Juan 15:19; 17:14-16; 18:36). Le emperador romano Constantinooʼ, tu beetaj u kʼeʼexel jujumpʼéel baʼaxoʼob ku creertik kaʼachoʼ. Koʼox ilik upʼéel tiʼ le baʼaloʼobaʼ, lelaʼ yaan yil yéetel le baʼax ku creertaʼal yoʼolal Diosoʼ.

Xok le tekstoʼobaʼ: Salmo 37:10, 11, 29; Juan 17:3; 2 Timoteo 2:11, 12.

U JAAJIL:

Óoliʼ tuláakal le máaxoʼob utsoʼob kun kajtaloʼob way Luʼumeʼ, maʼ teʼ kaʼanoʼ.

[U tsolajil le oochel teʼ táan juʼun 6]

Art Resource, NY