K-invitarkech utiaʼal ka láakʼintoʼon

¿MIX utéen wa taakak a wojéeltik baʼax ku beetik u j-jaajkunajoʼob Jéeoba (testigos de Jehová) teʼ tu Najil Reinooʼ? ¿A wojel wa jeʼel u páajtal a bin teʼ muchʼtáambaloʼob k-beetik cada semanaoʼ? Tuláakal máax u kʼáateʼ jeʼel u páajtal u bineʼ.

Maʼ xaaneʼ táanileʼ taak a wojéeltik baʼaxten k-muchʼikba, baʼax k-beetik yéetel baʼax ku yaʼalik le máaxoʼob tsʼoʼok u yáax binoʼoboʼ.

Muchʼkíint le kaajoʼ

Tak úuchileʼ le máakoʼoboʼ ku muchʼkubaʼob utiaʼal u adorartoʼob Dios yéetel utiaʼal u kaambaloʼob tiʼ. Óoliʼ tres mil quinientos jaʼaboʼob bejlaʼeʼ, aʼalaʼabtiʼ u kaajil Israel: «[Muchʼkíint] tuláakal le kaajoʼ, jeʼel bix xiiboʼobeʼ, bey koʼoleloʼob, mejen paalal yéetel le táanxel luʼumiloʼob kajnáaloʼob ta kaajaleʼexoʼobeʼ, utiaʼal ka u yuʼuboʼob u xoʼokol le aʼalmajtʼaan, tu yoʼolal u kanikoʼob u tsikoʼob Yuumtsil a [Dioseʼex] bey xan ka u tsʼoʼokbesoʼob tuláakal baʼax tsʼíibtaʼaniʼ» (Deuteronomio 31:12). Bey u kaʼansaʼal kaʼach le israelitaʼob utiaʼal ka u adorartoʼob yéetel ka u beetoʼob baʼax ku yaʼalik Jéeoba Diosoʼ.

Ka tsʼoʼok u máan yaʼab jaʼaboʼobeʼ, le cristianoʼob teʼ yáax siglooʼ, láayliʼ tu yiloʼob jach kʼaʼanan le muchʼtáambaloʼob ichil le adoración ku tsʼáaikoʼob tiʼ Diosoʼ. Apóstol Pabloeʼ tu yaʼalaj: «Unaj k-kaxantik bix jeʼel u páajtal k-áantikba t-baatsileʼ utiaʼal ka yanaktoʼon yaakunaj yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuktiʼob maʼ u taaloʼob muchʼtal t-éeteliʼ, baʼaleʼ unaj k-líikʼ óoltikba t-baatsil, [maas] unaj k-beetik [bejlaʼeʼ] tumen táan a wilikeʼex u náatsʼal u kʼiinil Yuumtsil» (Hebreob 10:24, 25). Jeʼex le máaxoʼob yanoʼob ichil upʼéel familiaoʼ, ¿máasaʼ wa maas yaʼab súutukil ku máanskoʼobeʼ ku kʼuchul u maas yaabiltubaʼob? Lelaʼ bey xan u yúuchul ichil le máaxoʼob ku muchʼkubaʼob utiaʼal u adorartoʼob Diosoʼ.

Jeʼex u beetaʼal úuchjeakiloʼ, toʼoneʼ k-muchʼikba utiaʼal k-xokik le Bibliaoʼ; lelaʼ k-beetik tiʼ upʼéel Najil Reino kaʼatéen tiʼ upʼéel semana yéetel u suukaʼanileʼ, le baʼax ku kaʼansaʼaloʼ letiʼe ku kaʼansaʼal xan tiʼ tuláakal yóokʼol kaaboʼ. Le muchʼtáambaloʼoboʼ ku yáankoʼon k-naʼat tubeel le baʼax ku yaʼalik le Bibliaoʼ, ka k-tsʼáa ichil k-kuxtal yéetel ku yeʼesiktoʼon le utsiloʼob jeʼel k-jóoʼsik wa k-beetikoʼ. Baʼaleʼ tiʼ cada upʼéeleʼ yaanal baʼax ku kaʼansaʼaliʼ. Táanil tiʼ u káajal yéetel ken tsʼoʼokok le muchʼtáambaloʼoboʼ, tuláakloʼoneʼ k-tsikbal tiʼ baʼaloʼob ku yáantkoʼon «utiaʼal ka paklan líikʼik k-óol» (Romailoʼob 1:12). Baʼaleʼ, ¿baʼax ku kaʼansaʼal tiʼ cada muchʼtáambal?

Tsoltʼaan jóoʼsaʼan teʼ Bibliaoʼ

Le u muchʼtáambal u j-jaajkunajoʼob Jéeoba tuʼux maases yaʼab máak ku binoʼ, letiʼe tuʼux ku máansaʼal upʼéel tsoltʼaan jóoʼsaʼan teʼ Biblia utiaʼal u yáantaʼal tuláakal máakoʼ, lelaʼ maases ku beetaʼal utiaʼal sábado wa domingo. Jesucristoeʼ tu máansaj tsoltʼaanoʼob tu táan yaʼab máakoʼob, upʼéel tiʼ le jach kʼaj óolaʼanoʼ letiʼe Sermón del Monteoʼ (Mateo 5:1; 7:28, 29). Apóstol Pablo xaneʼ tu máansaj upʼéel tsoltʼaan tu kaajil Atenas (Beetaʼanoʼob [Hechos] 17:22-34). Bejlaʼa xaneʼ le muchʼtáambal tuʼux ku máansaʼal upʼéel tsoltʼaanaʼ jeʼel u yáantik tuláakal le ku binoʼoboʼ, tak le máaxoʼob yáax u binoʼoboʼ.

Le muchʼtáambalaʼ ku káajal yéetel upʼéel kʼaay ku chʼaʼabal tiʼ le libro Canten alabanzas a Jehová. * Le máax u kʼáateʼ jeʼel u páajtal u waʼatal utiaʼal le kʼaayoʼ. Ken tsʼoʼokok u beetaʼal upʼéel oración maʼ sen chowakeʼ, ku máansaʼal upʼéel tsoltʼaan jóoʼsaʼan teʼ Bibliaoʼ, lelaʼ ku xáantal treinta minutos (ilaʼak le cuadro ku kʼaabaʼtik «Tsoltʼaanoʼob jeʼel u yáantik máakeʼ»). Le máax máanskoʼ ku yaʼalik tiʼ le muchʼukbaloʼob ka u kaxtoʼob yéetel ka u seguertoʼob u xookil jujumpʼéel tekstoʼob tiʼ le Bibliaoʼ. Techeʼ jeʼel u  páajtal a bisik a Bibliaeʼ wa a kʼáatik upʼéel tiʼ utúul J-jaajkunaj táanil tiʼ u káajal le muchʼtáambaloʼ.

U Xookil U Pʼíich Tulumil Kanan

U suukileʼ ken tsʼoʼokok le tsoltʼaanoʼ ku káajal u Xookil U Pʼíich Tulumil Kanan. Ichil upʼéel horaeʼ ku xoʼokol yéetel ku beetaʼal kʼáatchiʼob utiaʼal u xakʼaltaʼal upʼéel kaʼansaj ku taasik le Bibliaoʼ. Le muchʼtáambalaʼ ku beetaʼal jeʼex u beetik kaʼach le bereanoʼob «tu kʼamajoʼob le maʼalob péektsiloʼ yéetel kiʼimak óolal, táan u [xakʼaltkoʼob] [...] le Kiliʼich Tsʼíiboʼoboʼ» (Beetaʼanoʼob 17:11).

Le revistaaʼ chéen tiʼ le muchʼtáambaloʼob ku xoʼoklaʼ. Ku káajal yéetel upʼéel kʼaay, tsʼoʼoleʼ ku xakʼaltaʼal upʼéel tiʼ le xookoʼob ku taaskoʼ, wa minaʼan techeʼ jeʼel u páajtal a kʼáatik tiʼ utúul J-jaajkunajeʼ. Leloʼobaʼ jujumpʼéel tiʼ le xookoʼob maʼ úuch xakʼaltaʼakoʼoboʼ: «Taatatsileʼex, líiʼs a paalaleʼex yéetel yaabilaj», «Maʼ a boʼotikeʼex kʼaas yéetel kʼaas tiʼ mix máak» yéetel «Maʼ kun xáantal ken xuʼuluk le muʼyajiloʼ». Kex ku beetaʼal kʼáatchiʼobeʼ, mix máak unaj u yuʼubkuba jelaʼanil wa maʼ páajchaj u núukik mix upʼéeliʼ. Le máaxoʼob núukikoʼ u yáax xakʼalmoʼob le xookoʼ bey xan le tekstoʼob ku taasik utiaʼal u líiʼskubaʼob yéetel baʼaxoʼob ken u núukoʼoboʼ. Ken tsʼoʼokok u xookil le revistaaʼ ku yúuchul kʼaay yéetel ku beetaʼal upʼéel oración (Mateo 26:30; Efesoiloʼob 5:19).

U Xookil le Biblia teʼ Múuchʼuliloʼ

Ich semanaeʼ k-muchʼikba xan utéen tu Najil Reino. Le muchʼtáambalaʼ ku xáantal upʼéel hora yéetel cuarentaicinco minutos, jóoʼsaʼan óox jaats tiʼ. Le yáaxoʼ ku kʼaabaʼtik u Xookil le Biblia teʼ Múuchʼuliloʼ yéetel ku xáantal veinticinco minutos. Lelaʼ ku beetaʼal utiaʼal k-kʼaj  óoltik tubeel baʼax ku yaʼalik le Bibliaoʼ yéetel ka k-kʼex bix k-tuukul utiaʼal ka k-beetba maas maʼalob disipuloi tiʼ Cristo (2 Timoteo 3:16, 17). Teʼ jaatsaʼ ku beetaʼal kʼáatchiʼob jeʼex u beetaʼal tu xookil le revista U Pʼíich Tulumil Kananoʼ, yéetel le máax u kʼáateʼ jeʼel u páajtal u núukikeʼ. Le baʼax ku xakʼaltaʼaloʼ, u suukileʼ tiaʼan tiʼ upʼéel libro wa upʼéel folleto jóoʼsaʼan tumen u j-jaajkunajoʼob Jéeobaeʼ.

Maʼ xaaneʼ ka kʼáatik baʼaxten maʼ chéen le Biblia ku meyajtoʼon teʼ muchʼtáambaloʼoboʼ. U jaajileʼ, tak le máaxoʼob meyajt Dios úuchjeakiloʼ maʼ chéen tu xokoʼob le Kiliʼich Tsʼíiboʼoboʼ. Le Bibliaoʼ ku yaʼalikeʼ, ku xakʼaltkoʼob yéetel ku yilik «u yutsil naʼatikoʼob le xookoʼ» (Nehemías 8:8). Teʼ tu tsʼook jaʼaboʼobaʼ yéetel u yáantaj jujumpʼéel libroʼobeʼ tsʼoʼok k-xakʼaltik u tsʼíibil Isaías, Daniel yéetel Apocalipsis, lelaʼ tsʼoʼok u yáantkoʼon utiaʼal ka k-maas naʼat le kaʼansajoʼob yaan teʼ Bibliaoʼ.

Kaambalil utiaʼal Kaʼansaj

Ken tsʼoʼokok u Xookil le Biblia teʼ Múuchʼuliloʼ, ku káajal le Kaambalil utiaʼal Kaʼansajoʼ, lelaʼ ku xáantal treinta minutos yéetel teʼelaʼ ku yáantaʼal máak utiaʼal ka u maas maʼalobkíint bix u kaʼansaj (2 Timoteo 4:2). ¿Tsʼoʼok wa u beetaʼaltech upʼéel kʼáatchiʼ tumen a hijo wa amigo yaan yil yéetel Dios wa le Biblia, baʼaleʼ maʼ páajchaj a núukiktiʼiʼ? Teʼ jaatsaʼ ku kaʼansaʼal tiʼ máak bix jeʼel u núukik yéetel le Biblia le kʼáatchiʼob jach talamtakoʼoboʼ. Beyoʼ yaan u páajtal k-aʼalik jeʼex le profeta Isaíasoʼ: «Yuumtsileʼ tsʼoʼok u tsolxikintik tiʼ teen utiaʼal ka xiʼiken in choʼo u [jaʼi] u yich le máaxoʼob kaʼanaʼantakoʼob[,] yéetel u tʼaaniloʼob tsʼáa óolal» (Isaías 50:4).

Le jaatsaʼ ku káajal yéetel upʼéel chan tsoltʼaan ku chʼaʼabal tiʼ upʼéel wa maas capituloʼob tiʼ le Biblia xokaʼab teʼ semana jeʼeloʼ. Ken tsʼoʼokkeʼ le máax máansik le xóotʼolaʼ ku yaʼalik tiʼ le muchʼukbaloʼob ka u yaʼaloʼob baʼaxoʼob maʼalobtak tu kanoʼoboʼ. Tsʼoʼoleʼ ku máansaʼal xan uláakʼ xóotʼoloʼob tumen le máaxoʼob ku táakpajloʼob teʼ Kaambaliloʼ.

Desde teʼ plataformaoʼ le máaxoʼob ku táakpajloʼoboʼ ku xokikoʼob u jaats tiʼ le Bibliaoʼ wa ku yeʼeskoʼob bix jeʼel u tsolaʼal upʼéel baʼax ku kaʼansikeʼ. Ken tsʼoʼokkeʼ le máax nuʼuktik le jaatsaʼ  ku meyajtiʼ le libro Benefíciese de la Escuela del Ministerio Teocrático, utiaʼal u yaʼalik tiʼ cada utúul tiʼ le máaxoʼob tu máansoʼob le xóotʼoloʼob baʼax jach maʼalob tu beetoʼoboʼ. Ken tsʼoʼokok le muchʼtáambaloʼ jeʼel u páajtal u yaʼalik tiʼ cada utúul baʼax tu bineltajtiʼeʼ.

Le jaatsaʼ maʼ chéen ku yáantik le máaxoʼob ku táakpajloʼoboʼ, ku yáantik tuláakal le muchʼukbaloʼob utiaʼal ka u maas maʼalobkíint bix u xookoʼob, bix u tʼaanoʼob bey xan bix u kaʼansajoʼob. Ken tsʼoʼokok u Muchʼtáambalil Kaambalil utiaʼal Kaʼansajoʼ, ku káajsaʼal u Muchʼtáambalil Kʼaʼaytaj yéetel upʼéel kʼaay jóoʼsaʼan teʼ Bibliaoʼ.

U Muchʼtáambalil Kʼaʼaytaj

Le u tsʼook jaatsaʼ ku kʼaabaʼtik u Muchʼtáambalil Kʼaʼaytaj. Teʼelaʼ ku yeʼesaʼal bix jeʼel u kaʼansaʼal maas maʼalob le baʼax ku yaʼalik le Bibliaoʼ, utiaʼal leloʼ ku máansaʼal tsoltʼaanoʼob, ku yeʼesaʼal bix jeʼel u beetaʼaleʼ, ku kʼáataʼal u chiʼ jujuntúuliʼ yéetel ku táakpajal xan le muchʼukbaloʼoboʼ. Jesuseʼ táanil tiʼ u túuxtik u disipuloʼob kʼaʼaytajeʼ tu muchʼkíintoʼob utiaʼal u yaʼaliktiʼob bix unaj u beetikoʼob (Lucas 10:1-16). Lelaʼ le áantoʼob utiaʼal ka páajchajak u beetkoʼob jach maʼalob le meyajoʼ, yéetel ka tsʼoʼokeʼ tu tsikbaltoʼob tiʼ Jesús bix biniktiʼob (Lucas 10:17). Le Bibliaoʼ ku yaʼalik xaneʼ tak ichiloʼobeʼ ku múuchʼ tsikbaltikoʼob bix úuchik u bintiʼob (Beetaʼanoʼob 4:23; 15:4).

Le baʼax ku yilaʼal teʼ jaatsaʼ, ku chíikpajal tiʼ upʼéel chan juʼun ku jóoʼsaʼal cada mes ku kʼaabaʼtik K-meeyjil tiʼ le Reinooʼ. Jujumpʼéel tiʼ le xookoʼob maʼ úuch xakʼaltaʼakoʼobaʼ letiʼ leloʼobaʼ: «Familiaʼob ku múuchʼ adorarkoʼob Jéeoba», «Baʼaxten ku seguer k-xíimbaltik le máakoʼoboʼ» yéetel «Unaj k-kʼaʼaytaj jeʼex tu beetil Cristoeʼ». Le jaatsaʼ ku tsʼoʼokol yéetel upʼéel kʼaay bey xan yéetel upʼéel oración ku beetaʼal tumen utúul J-jaajkunaj.

Le baʼax ku yaʼalik le máaxoʼob tsʼoʼok u binoʼoboʼ

U j-jaajkunajoʼob Jéeobaeʼ ku yilik u maʼalob kʼamikoʼob le máaxoʼob ku binoʼob teʼ tuʼux ku muchʼkubaʼoboʼ. Andrew kaʼacheʼ yaʼab baʼaloʼob maʼ jaajtak u yuʼubmaj yoʼolal u j-jaajkunajoʼob Jéeobaiʼ. Le oʼolal ka yáax bin teʼ tuʼux ku muchʼkubaʼoboʼ jach jaʼakʼ u yóol ka tu yilaj bix úuchik u kʼamaʼal. Letiʼeʼ ku yaʼalik: «Jach jatsʼuts tin wilaj úuchik in bin teʼ Najil Reinooʼ yéetel jach jatsʼuts tin wilij bix u biskubaʼob bey xan le bix úuchik u tratartkenoʼoboʼ». Ashel, utúul x-chʼúupal kajaʼan Canadaeʼ bey xan úuchik u yuʼubikubaoʼ, letiʼeʼ tu yaʼalaj: «Jach jatsʼuts tin wuʼuyil le baʼax tsolaʼaboʼ. Maʼ talamchaj in naʼatkiʼ».

José kajaʼan Brasileʼ bey xan tu yuʼubilubaoʼ. Kex kʼaj óolaʼan bey utúul máak jach séeb u baʼateleʼ, invitartaʼab utiaʼal ka xiʼik tiʼ upʼéel muchʼtáambal tu Najil Reino. Letiʼeʼ tu yaʼalaj: «Le máaxoʼob yanoʼoboʼ u yojloʼob bix in modos, kex beyoʼ jach jatsʼuts úuchik u tratartkenoʼob». Atsushi, utúul japoneseʼ, ku yaʼalik: «U jaajileʼ ka yáax binen tuʼux ku muchʼkuba u j-jaajkunajoʼob Jéeobaoʼ óoliʼ chan jelaʼan tin wuʼuyimba. Baʼaleʼ tin wileʼ maʼ jelaʼan u modosoʼobiʼ yéetel u kʼáatoʼob xan ka in wuʼuyimba maʼalobil».

K-invitarkech

Jeʼex tsʼoʼok a wilkoʼ, jach maʼalob ka xiʼikech a wuʼuy le baʼax ku kaʼansaʼal teʼ tu Najil Reinooʼ. Le baʼaxoʼob ken a kanoʼ yaan u yáantkech a maas kʼaj óolt Jéeoba Dios yéetel letiʼeʼ yaan u kaʼansiktech baʼaloʼob jeʼel u yáantkech ichil a kuxtaleʼ (Isaías 48:17).

Teʼ tu Najiloʼob Reinooʼ tuláakal máak jeʼel u páajtal u yookleʼ yéetel maʼatech u máan kʼáatbil taakʼiniʼ. Wa taak a bineʼ k-invitarkech utiaʼal ka xiʼikechiʼ.

[Tsolajiloʼob]

[U tsolajil le oochel teʼ táan juʼun 21]

Tsoltʼaanoʼob jeʼel u yáantik máakeʼ

Yaan maas tiʼ ciento setenta tsoltʼaanoʼob chʼaʼabaʼanoʼob teʼ Bibliaoʼ. Le jeʼeloʼobaʼ chéen jujumpʼéel tiʼ letiʼobiʼ:

▪ ¿Yaan wa baʼax u yil yéetel k-kuxtal le bix úuchik u yantal wíinikoʼ?

▪ Unaj u yilaʼal le núupchital yéetel le tsʼoʼokol beel jeʼex u yilik Diosoʼ

▪ Dioseʼ yaan u xuʼulsik tiʼ le máaxoʼob kʼaskúuntik le Luʼumaʼ

▪ Bix jeʼel k-aktáantik u chiʼichnakiloʼob le kuxtalaʼ

▪ ¿Chéen wa letiʼe kuxtal yanaʼ?

[U tsolajil le oochel teʼ táan juʼun 21]

Tsoltʼaan jóoʼsaʼan teʼ Bibliaoʼ

[U tsolajil le oochel teʼ táan juʼun 21]

U Xookil U Pʼíich Tulumil Kanan

[U tsolajil le oochel teʼ táan juʼun 22]

U Xookil le Biblia teʼ Múuchʼuliloʼ

[U tsolajil le oochel teʼ táan juʼun 22]

Kaambalil utiaʼal Kaʼansaj

[U tsolajil le oochel teʼ táan juʼun 23]

U Muchʼtáambalil Kʼaʼaytaj