Jéeobaeʼ ku yaʼalik «le baʼax bíin úuchuk séebaʼanoʼ»
«Lelaʼ letiʼ le sáasilkunaj tu tsʼáaj Jajal Dios tiʼ Jesucristo utiaʼal ka u tsʼáa u yojéelt tiʼ u palitsiloʼob Jajal Dioseʼ le baʼax bíin úuchuk séebaʼanoʼ.» (APO. 1:1)
¿BAʼAX JEʼEL A NÚUKIKEʼ?
¿Baʼax xóotʼolil tiʼ le nojoch estatua ku chíikbesik le potencia angloamericanaoʼ?
Jeʼex tu yilil le apóstol Juanoʼ, ¿baʼax yaan u yil le potencia angloamericana yéetel le Naciones Unidasoʼ?
Jeʼex tu yaʼalil Daniel yéetel Juanoʼ, ¿bix kun xuʼulsbil u gobierno wíinik?
1, 2. 1) ¿Baʼax k-naʼatik ken k-xakʼalxokt le profecíaʼob tu tsʼíibtaj Daniel yéetel Juanoʼ? 2) ¿Baʼax gobiernoiloʼob tu chíikbesaj le yáax seis u pooloʼob le baʼalcheʼoʼ?
LE PROFECÍAʼOB tu tsʼíibtaj Daniel yéetel Juanoʼ jach yaan baʼax u yiloʼob. Wa ka k-xakʼaltoʼobeʼ jeʼel k-naʼatik baʼax u kʼáat u yaʼal yaʼab tiʼ le baʼaxoʼob ku yúuchloʼob teʼ kʼiinoʼobaʼ bey xan le baʼaxoʼob ku taal u kʼiin u yúuchloʼoboʼ. ¿Tiʼ baʼax chíikaʼan le baʼalcheʼ tu yilaj Juan tiʼ junpʼéel náay yéetel le kʼaakʼas baʼalcheʼ yaan diez u baakoʼob tu tsolaj Danieloʼ? ¿Baʼax unaj u péeksikoʼon k-beet le k-naʼatik baʼax u kʼáat u yaʼal le profecíaʼobaʼ?
2 Yáaxeʼ koʼoneʼex tʼaan tiʼ le baʼalcheʼ tu yilaj Juanoʼ (Apocalipsis, capítulo 13). Jeʼex t-ilaj teʼ xook máanikoʼ, le yáax seis u pooloʼoboʼ ku chíikbesik Egipto, Asiria, Babilonia, Medopersia, Grecia yéetel Roma. Tuláakal le gobiernoʼobaʼ jach tu pʼektoʼob u chʼiʼibal le koʼoleloʼ (Gén. 3:15). Kex tsʼoʼok u máan yaʼab jaʼaboʼob u tsʼíibt Juan le baʼax tu náaytoʼ, Romaeʼ láayliʼ letiʼ le maas nojoch gobierno yaan kaʼach way Luʼumeʼ. Baʼaleʼ kʼuch u kʼiinil u káajal u gobernar le u siete pool le baʼalcheʼoʼ. ¿Baʼax nojoch gobiernoil lelaʼ, yéetel bix úuchik u tratartik u chʼiʼibal le koʼoleloʼ?
GRAN BRETAÑA YÉETEL ESTADOS UNIDOSEʼ KÁAJ U GOBERNAROʼOB
3. ¿Baʼax gobiernoil tu chíikbesaj le kʼaakʼas baʼalcheʼ yaan diez u baakoʼoboʼ, yéetel baʼax ku chíikbesik le diez u baakoʼoboʼ?
3 Utiaʼal k-ojéeltik baʼax gobiernoil ku chíikbesik le u siete pool le baʼalcheʼ ku yaʼalik le capítulo 13 tiʼ Apocalipsisoʼ, unaj k-ketik le baʼax tu yilaj Juan yéetel le kʼaakʼas baʼalcheʼ yaan diez u baakoʼob ilaʼab tumen Danieloʼ (xokaʼak Daniel 7:7, 8, 23, 24). * Le baʼalcheʼaʼ tu chíikbesaj u gobiernoil Roma (ilaʼak le cuadro yaan teʼ táan juʼun 12 yéetel 13). Óoliʼ 400 jaʼaboʼob tsʼoʼokok u taal Jesuseʼ, ichil le gobiernoaʼ káaj u jóokʼol uláakʼ gobiernoiʼ. Le oʼolal le diez baakoʼob yaan tiʼ le baʼalcheʼoʼ ku chíikbesik le gobiernoʼob jóokʼoʼob tiʼ le Imperio romanooʼ.
4, 5. 1) ¿Baʼax tu beetaj le chan baakoʼ? 2) ¿Baʼax gobiernoil ku chíikbesik le u siete pool le baʼalcheʼoʼ?
4 Tiʼ le baʼalcheʼ diez u baakoʼob tu wayakʼtaj Danieloʼ, jóokʼ junpʼéel chan baak, ku lakik óoxtsʼíit u baakoʼob. Lelaʼ béeychaj le ka joʼopʼ u yantal páajtalil tiʼ Gran Bretaña, yaan kaʼach ichil le luʼumoʼob ku gobernartik le Imperio romanooʼ. Tak teʼ siglo 17, maʼ jach nojoch u páajtalil u gobiernoiʼ. Yaan kaʼach uláakʼ óoxpʼéel gobiernoʼob yanoʼob kaʼach yáanal u páajtalil Roma maas yaan u páajtaliloʼob: España, Países Bajos yéetel Francia. Baʼaleʼ Gran Bretañaeʼ jujunpʼéelil úuchik u bin u luʼsik le páajtalil yaantiʼoboʼ. Tu chúumuk le siglo 18, kaaj u maas yantal u páajtalil tiʼ uláakʼ gobiernoʼob way Luʼumeʼ. ¿Bey wa túun chíikpajik le u siete pool le baʼalcheʼoʼ? Maʼatech.
5 Kex jach yanchaj u páajtalil Gran Bretañaeʼ, Estados Unidoseʼ lukʼ yáanal u páajtalil. Baʼaleʼ yoʼolal u yáantaj Gran Bretañaeʼ, jach yanchaj xan u páajtalil. Utiaʼal u jaʼabil 1914, le ka káaj u kʼiinil Yuumtsiloʼ, Gran Bretañaeʼ tsʼoʼok u nojoch gobiernochajal, yéetel Estados Unidoseʼ tsʼoʼok u maas ayikʼaltal tiʼ tuláakal le Luʼumaʼ. * Tu kʼiiniloʼob le yáax nojoch baʼateltáambaloʼ tu muchʼubaʼob. Bey chíikpajik le u siete pool le baʼalcheʼoʼ: le potencia angloamericanaoʼ. ¿Bix tu tratartil u chʼiʼibal le koʼoleloʼ?
6. ¿Baʼax tsʼoʼok u beetik tiʼ u kaajal Dios le u siete pool le baʼalcheʼoʼ?
6 Chéen pʼel káajik u kʼiinil Yuumtsileʼ, le u siete pool le baʼalcheʼoʼ líikʼ tu contra u kaajal Dios, wa le sukuʼunoʼob yéeyaʼanoʼob utiaʼal u binoʼob kaʼan pʼaatloʼob way Luʼumaʼ (Mat. 25:40). Jesuseʼ u yaʼalmeʼ, tu kʼiinil ken suunakeʼ, yaan u yilik táan u meyaj way Luʼum u yalab tiʼ le sukuʼunoʼob yéeyaʼanoʼoboʼ (Mat. 24:45-47; Gal. 3:26-29). Bey túunoʼ le potencia angloamericanaoʼ líikʼ «u baʼateʼelt le máaxoʼob kiliʼichoʼoboʼ» (Apo. 13:3, 7). Tu kʼiiniloʼob le yáax nojoch baʼateltáambaloʼ tu chʼaʼpachtaj u kaajal Dios, tu beetaj u xuʼulul u beetaʼal jujunpʼéel jóoʼsaʼaniloʼob yéetel tu kʼalaj cárcel jujuntúul tiʼ le máaxoʼob nuʼuktik le meyaj ku beetik le palitsil chúukpajaʼan u yóoloʼ. Tsʼoʼoleʼ tu beetaj tak u xuʼulul u yúuchul kʼaʼaytaj, jeʼex úuchik u yaʼalik Jéeoba tiʼ Juanoʼ. Baʼaleʼ Dioseʼ tu yaʼalaj tiʼ Juan xaneʼ, le u kaʼaj jaats tiʼ u chʼiʼibal le koʼoleloʼ yaan u kaʼa kuxtal yéetel yaan u maas yaʼabkuntik u meyaj (Apo. 11:3, 7-11). ¿Béeychaj wa le baʼax tu yaʼaloʼ? Le baʼax tu beetaj le máaxoʼob meyajtik Jéeoba teʼ tu tsʼook kʼiinoʼobaʼ ku yeʼesik béeychaji.
LE POTENCIA ANGLOAMERICANA YÉETEL U YOOK DE HIERRO YÉETEL KʼAT LE ESTATUAOʼ
7. ¿Baʼax yaan u yil le u siete pool le baʼalcheʼ yéetel le nojoch estatuaoʼ?
7 ¿Baʼax yaan u yil le u siete pool le baʼalcheʼ yéetel le nojoch estatuaoʼ? Gran Bretaña yéetel Estados Unidoseʼ tiʼ jóokʼoʼob tiʼ le Imperio romanooʼ. ¿Kux túun u yook le nojoch estatuaoʼ? Jeʼex eʼesaʼabik tiʼ Danieloʼ, beetaʼan yéetel hierro yéetel kʼat (xokaʼak Daniel 2:41-43). Lelaʼ jach bey úuchik le ka yanchaj le u siete pool le baʼalcheʼ, wa le potencia angloamericanaoʼ. Jeʼex junpʼéel baʼax beetaʼan yéetel hierro xaʼakʼtaʼan yéetel kʼat maʼ jach muʼukʼaʼaneʼ, le potencia angloamericanaoʼ maas minaʼan u muukʼ tu tséel le gobierno tuʼux u taaloʼ. Koʼoneʼex ilik baʼaxten maas minaʼan u muukʼ.
8, 9. 1) ¿Bix úuchik u yeʼesik le u siete pool le baʼalcheʼ yaan u páajtalil jeʼex le hierrooʼ? 2) ¿Baʼax tu chíikbesaj le kʼat yaan tu yookoʼob le estatuaoʼ?
8 Le u siete pool le baʼalcheʼoʼ yaan kʼiineʼ tu yeʼesaj yaan u muukʼ jeʼex le hierro, jeʼex le ka tu ganartaj tu kaʼapʼéelal le nojoch baʼateltáambaloʼoboʼ. * Tak le tsʼoʼok le kaʼapʼéel nojoch baʼateltáambaloʼobaʼ, yaan kʼiineʼ bey xan tu beetiloʼ. Baʼaleʼ desde tu káajbaleʼ, le hierrooʼ xaʼakʼtaʼan yéetel kʼat. ¿Bix úuchik u yúuchul?
9 Le máaxoʼob meyajtik Jéeobaoʼ úuch joʼopʼok u yilik u naʼatkoʼob baʼax ku chíikbesik u yook le nojoch estatuaoʼ. Daniel 2:41, ku yaʼalikeʼ le hierro xaʼakʼtaʼan yéetel kʼatoʼ ku chíikbesik chéen junpʼéel «reino». Tumen le kʼatoʼ ku chíikbesik le baʼaxoʼob táakaʼanoʼob ichil le potencia angloamericana beetik u pʼáatal minaʼan u muukʼ tu tséel le Imperio romano ku keʼetel yéetel hierrooʼ. Danieleʼ ku yaʼalikeʼ le kʼatoʼ u maasil máakoʼob (Dan. 2:43). Le máakoʼob yanoʼob ichil le potencia angloamericanaoʼ, ku muchʼkubaʼob utiaʼal u kʼáatkoʼob ka respetartaʼak u derechoʼob wa u derecho u maasil yéetel ku kʼáatkoʼob ka chaʼabak u beetkoʼob chéen baʼax u kʼáatoʼob. Bey túunoʼ chéen u maasil máakoʼob tsʼoʼok u luʼskoʼob u muukʼ le gobiernooʼ. Tsʼoʼoleʼ tumen maʼ junpʼéeliliʼ bix u tuukul le partidoʼob yéetel chéen yoʼolal junpʼíit ku ganar le máaxoʼob ku gobernaroʼoboʼ, maʼ tu páajtal u beetkoʼob le baʼax u tukultmoʼob kaʼachoʼ. Jach jeʼex úuchik u yaʼalik Danieloʼ: «Le [reinooʼ] junjaatseʼ muʼukʼaʼan[,] uláakʼ junjaatseʼ lubaʼan u muukʼ» (Dan. 2:42; 2 Tim. 3:1-3).
10, 11. 1) ¿Baʼax kun úuchul tiʼ u yookoʼob le imagenoʼ? 2) ¿Baʼax tsʼoʼok k-naʼatik yoʼolal u dedosil u yookoʼob le estatuaoʼ?
10 Teʼ siglo 21, Gran Bretaña yéetel Estados Unidoseʼ láayliʼ táan u múuchʼ meyajoʼobeʼ, lelaʼ maases bey u beetkoʼob tiʼ baʼaloʼob ku yúuchul tiʼ tuláakal le Luʼumaʼ. Le profecíaʼob ku tʼaan tiʼ le nojoch estatua yéetel le baʼalcheʼoʼ ku yeʼesikeʼ le potencia angloamericanaoʼ maʼ kun luʼsbil tumen uláakʼ u gobierno wíinik. Kex u gobierno maas minaʼan u páajtalil tiʼ le gobierno chíikbesaʼab tumen le tselek de hierrooʼ, maʼ kun saʼatal chéen tu juunal.
11 ¿Yaan wa baʼax ku chíikbesik u dedosil u yookoʼob le estatuaoʼ? Kʼaʼajaktoʼoneʼ Danieleʼ tu yaʼalaj jaypʼéel u baak jujuntúul baʼalcheʼob u yilmaj. Le jaypʼéel baakoʼob tu yiloʼ yaan baʼaxoʼob ku chíikbesik. Baʼaleʼ maʼ tu yaʼalaj jaypʼéel u dedosil u yook le estatuaoʼ. Lelaʼ ku yáantkoʼon k-ileʼ mix baʼal ku chíikbesik le jaypʼéel u dedosil u yook, jaypʼéel u kʼaboʼob, jaypʼéel u tselekoʼob yéetel jaypʼéel u yookoʼob. Baʼax ku yaʼalaʼal yoʼolal u dedosil u yookoʼobeʼ, beetaʼan yéetel hierro yéetel kʼat. Lelaʼ ku yáantkoʼon k-naʼateʼ le ken chʼiʼinik u yookoʼob le estatua tumen le tuunich chíikbesik u Reino Diosoʼ, letiʼe potencia angloamericana táan u gobernaroʼ (Dan. 2:45).
LE POTENCIA ANGLOAMERICANA YÉETEL LE BAʼALCHEʼ KAʼATSʼÍIT U BAAKOʼ
12, 13. ¿Baʼax gobiernoil ku chíikbesik le baʼalcheʼ kaʼatsʼíit u baakoʼ, yéetel baʼax tu beetaj?
12 Kex le potencia angloamericana de hierro xaʼakʼpajaʼan yéetel kʼatoʼ, Jesuseʼ tu yeʼesaj tiʼ Juaneʼ yaʼab baʼaxoʼob ken u beet teʼ tu tsʼook kʼiinoʼobaʼ. ¿Baʼaxoʼob ken u beete? Juaneʼ tu yilaj juntúul kʼaakʼas baʼalcheʼ yaan kaʼatsʼíit u baak yéetel ku tʼaan bey juntúul dragoneʼ. ¿Máax ku chíikbesik? Le kaʼatsʼíit baakoʼ ku yeʼesikeʼ kaʼapʼéel luʼumil ku múuchʼ gobernar: láayliʼ letiʼe potencia angloamericanaoʼ, baʼaleʼ yaanal meyaj ku beetik (xokaʼak Apocalipsis 13:11-15).
13 Le baʼalcheʼ kaʼapʼéel u baakoʼ ku yaʼalik ka beetaʼak u «yoochel» le baʼalcheʼ siete u pooloʼ. Juaneʼ tu yaʼaleʼ le u yoochel le baʼalcheʼoʼ yaan u chíikpajal, yaan u saʼatal yéetel yaan u kaʼa chíikpajal. Yaan junpʼéel baʼax jach bey úuchiktiʼaʼ. Gran Bretaña yéetel Estados Unidos aʼal ka beetaʼak utiaʼal u muchʼik yéetel ka tʼaanak tu yoʼolal tuláakal u gobiernoiloʼob yóokʼol kaab. * Lelaʼ letiʼe Sociedad tiʼ Nacionesoʼ, chíikpaj le ka tsʼoʼok le yáax nojoch baʼateltáambaloʼ yéetel saʼat le ka káaj le u kaʼapʼéel nojoch baʼateltáambaloʼ. Teʼ kʼiinoʼob jeʼeloʼ u kaajal Dioseʼ tu yaʼaleʼ u yoochel le baʼalcheʼoʼ yaan u kaʼa chíikpajal jeʼex u yaʼalik u libroil Apocalipsiseʼ. Lelaʼ jach bey xan úuchikoʼ, le ka kaʼa chíikpajoʼ tu kʼaabaʼtaj Naciones Unidas (Apo. 17:8).
14. ¿Baʼaxten tu yaʼalaj Juan le u yoochel le baʼalcheʼoʼ letiʼ le «ocho» reyoʼ?
14 Juaneʼ tu yaʼaleʼ u yoochel le baʼalcheʼoʼ letiʼe «u ocho» reyoʼ. Baʼaleʼ lelaʼ maʼ u kʼáat u yaʼal wa u ocho pool le yáax baʼalcheʼoʼ. U jaajileʼ lelaʼ chéen u «yoochel». Tumen u páajtalileʼ letiʼe luʼumiloʼob táakaʼanoʼob ichil tsʼáaiktiʼoʼ, maases tumen le potencia angloamericana, le potencia aʼal ka beetaʼakoʼ (Apo. 17:10, 11). Baʼaleʼ ¿baʼaxten túun Juaneʼ ku yaʼalikeʼ juntúul rey? Tumen tsʼaʼan u páajtalil u beetik junpʼéel meyaj, yaan u beetik u kʼexpajal tuláakal baʼal way Luʼumeʼ.
U YOOCHEL LE BAʼALCHEʼOʼ KU XEʼEXETʼIK LE «[X-]NÚUPKʼEBAN KOʼOLEL[Oʼ]»
15, 16. ¿Máax ku chíikbesik le «[x-]núupkʼeban koʼolel[oʼ]», yéetel baʼax tsʼoʼok u yúuchul tiʼ le «jaʼob» tuʼux yaan kaʼachoʼ?
15 Juaneʼ ku yaʼalikeʼ le chak baʼalcheʼoʼ natʼaʼan tumen juntúul «[x-]núupkʼeban koʼolel». U kʼaabaʼ le koʼolelaʼ «nojoch Babilonia», letiʼ nuʼuktik le baʼalcheʼoʼ (Apo. 17:1-6). ¿Máax ku chíikbesik le x-núupkʼeban koʼoleloʼ? Tuláakal le religionoʼob maʼatech u kaʼanskoʼob u jaajiloʼ, maases le ku yaʼalikoʼob táan u tsaypachtikoʼob Cristooʼ. Le maʼ jaajil religionoʼoboʼ tsʼoʼok u yáantkoʼob u yoochel le baʼalcheʼoʼ yéetel tsʼoʼok tak u yóotik u yaʼaloʼob baʼax unaj u beetik.
16 Baʼaleʼ tu kʼiinil Yuumtsileʼ, le Nojoch Babiloniaoʼ tsʼoʼok u yilik bix u bin u saʼapʼal le «jaʼob» wa le máakoʼob yanoʼob ichiloʼ (Apo. 16:12; 17:15). Le ka chíikpaj u yoochel le baʼalcheʼoʼ, le religionoʼob ku yaʼalikoʼob táan u tsaypachtikoʼob Cristo, le jaats maas yaan u páajtalil ichil le Nojoch Babiloniaoʼ, chéen letiʼob kaʼach yaan tu chikʼinil le Luʼumaʼ. Baʼaleʼ bejlaʼeʼ le máaxoʼob nuʼuktik le religionoʼobaʼ tsʼoʼok u pʼáatal maʼatech u yeʼesaʼal tsiikil tiʼob yéetel maʼatech u yáantaʼaloʼob. Baʼaxeʼ yaʼab máak aʼalikeʼ le religionoʼ chéen ku taasik talamiloʼob. Le máakoʼob kaʼanchajaʼan u naʼatoʼob kajaʼanoʼob tu chikʼinil le Luʼumaʼ ku yaʼalikoʼobeʼ maas maʼalob maʼ u yantal mix baʼal u yil máak yéetel religión.
17. ¿Baʼax kun úuchul tiʼ le maʼ jaajil religionoʼob maʼ kun xáantaloʼ, yéetel baʼaxten?
17 Baʼaleʼ le maʼ jaajil religionoʼoboʼ maʼ jujunpʼíitil kun saʼatloʼobiʼ. Le x-núupkʼeban koʼoleloʼ láayliʼ jach yaan u páajtalileʼ yéetel letiʼ nuʼuktik baʼax unaj u beetik le gobiernoʼoboʼ, baʼaleʼ yaan u xuʼulul le ken tsʼaʼabak tu tuukuloʼob tumen Dios ka u beetoʼob junpʼéel baʼal (xokaʼak Apocalipsis 17:16, 17). Maʼ kun xáantaleʼ Jéeobaeʼ yaan u péeksik le Naciones Unidas ku tʼaan tu kʼaabaʼ tuláakal le politicoʼob yaan tu yóokʼol kaab Satanás, utiaʼal ka u xuʼulsoʼob tiʼ u páajtalil yéetel tiʼ u ayikʼalil le religionoʼob minaʼan u jaajil tiʼoboʼ. Tak maʼ jach úucheʼ lelaʼ maʼ tu tuklaʼal wa jeʼel u yúuchleʼ. Baʼaleʼ bejlaʼeʼ jach chíikaʼan u yilaʼal táan u chʼeʼkʼalankil le x-núupkʼeban koʼolel natʼmil le chak baʼalcheʼoʼ. Baʼaxeʼ maʼ chaambelil kun éemliʼ. Chéen ken jáan lúubuk yéetel jach yaan u yaatal u pʼuchkuba (Apo. 18:7, 8, 15-19).
LE BIX KUN TSʼOʼOKOL TIʼ LE BAʼALCHEʼOBOʼ
18. 1) ¿Baʼax ken u beet le baʼalcheʼoʼ, yéetel bix kun tsʼoʼokol? 2) Jeʼex u yaʼalik Daniel 2:44, ¿baʼax gobiernoiloʼob kun xuʼulsbil tumen u Reino Dios? (Ilaʼak le cuadro yaan teʼ táan juʼun 17.)
18 Le ken tsʼoʼokok u xuʼulsaʼal tiʼ le maʼ jaajil religionoʼoboʼ, le baʼalcheʼ wa le gobiernoʼob nuʼuktaʼan tumen Satanasoʼ yaan u péeksaʼaloʼob utiaʼal ka líikʼkoʼob tu contra u Reino Diosoʼ. Baʼaleʼ tumen maʼ tu béeytal u kʼuchloʼob teʼ kaʼanoʼ, yaan u pʼektikoʼob le máaxoʼob kun gobernartbil tumen le Reino way Luʼumaʼ. Baʼaleʼ aʼalaʼan baʼax kun úuchul (Apo. 16:13-16; 17:12-14). Danieleʼ tu yaʼalaj baʼax kun úuchul teʼ baʼateloʼ (xokaʼak Daniel 2:44). Le baʼalcheʼ ku chʼaʼchiʼitik Apocalipsis 13:1, u yoochel yéetel le baʼalcheʼ kaʼatsʼíit u baakoʼ, yaan u xuʼulsaʼaltiʼob.
19. ¿Baʼax jach k-ojel, yéetel baʼax unaj k-beetik bejlaʼeʼ?
19 Toʼoneʼ kuxaʼanoʼon tu kʼiinil táan u gobernar le u siete pool le baʼalcheʼoʼ. Maʼ kun chíikpajal uláakʼ ken xuʼulsaʼak tiʼ le baʼalcheʼoʼ. Bey túunoʼ, le ken xuʼulsaʼak tiʼ le maʼ jaajil religionoʼoboʼ, letiʼe potencia angloamericana ku gobernaroʼ. Maʼ u tuʼubultoʼoneʼ le baʼaxoʼob tu yaʼalaj Daniel yéetel Juanoʼ tsʼoʼok u béeytal jach jeʼex úuchik u yaʼalikoʼoboʼ. Le oʼolal k-ojel jach taʼaytak u xuʼulsaʼal tiʼ le maʼ jaajil religionoʼoboʼ yéetel jach naatsʼ yanil le Armagedonoʼ. Jeʼex túun k-ilkoʼ, Dioseʼ tsʼoʼok u yaʼaliktoʼon baʼax kun úuchul. ¿Yaan wa k-chʼaʼik en cuentail le baʼax ku yaʼalik le profecíaʼoboʼ? (2 Ped. 1:19.) Bejlaʼeʼ u kʼiinil k-tsʼáaikba tu tséel Jéeoba yéetel tu tséel u Reino (Apo. 14:6, 7).
[Tsolajiloʼob]
^ xóot’ol 3 Teʼ Bibliaoʼ ku meyaj le número diez utiaʼal u yúuchul tʼaan tiʼ junpʼéel baʼal chúukaʼan. Teʼ jaatsaʼ táan u tʼaan tiʼ tuláakal le gobiernoʼob jóokʼoʼob tiʼ le Imperio romanooʼ.
^ xóot’ol 5 Kex desde teʼ siglo 18 yaan le kaʼapʼéel luʼumiloʼobaʼ, Juaneʼ tu yaʼaleʼ tu kʼiinil Yuumtsil ken káajak u múul gobernaroʼob. U jaajileʼ le baʼax ku yaʼalik u libroil Apocalipsisoʼ káaj u béeytaloʼob tu «kʼiinil Yuumtsil» (Apo. 1:10). Le oʼolal tu kʼiinil le yáax nojoch baʼateltáambaloʼ tiʼ káaj u gobernar le u siete pool le baʼalcheʼoʼ.
^ xóot’ol 8 Danieleʼ tu yaʼaleʼ le reyaʼ «bíin xuʼulsajnak yéetel jakʼ óolal», lelaʼ bey úuchik tu kʼiinil le nukuch baʼateltáambaloʼoboʼ (Dan. 8:24). Jeʼex Estados Unidoseʼ xuʼulsajnaj yéetel jakʼ óolal le ka tu pulaj kaʼapʼéel bomba atómica tu yóokʼol junpʼéel luʼum pʼekmil le potencia angloamericanaoʼ.
^ xóot’ol 13 Ilaʼak le libro Apocalipsis... ¡se acerca su magnífica culminación!, táan juʼun 240, 241 yéetel 253.
[U kʼáatchiʼiloʼob le xookoʼ]
[Cuadro yaan teʼ táan juʼun 17]
¿MÁAX LE ULÁAKʼ REYOʼOBOʼ?
Jeʼex u yaʼalik Daniel 2:44, u Reino Dioseʼ «yaan u xuʼulsik junpuliʼ tuláakal le uláakʼ [reyoʼoboʼ]». Le profecíaaʼ táan u tʼaan chéen tiʼ le gobiernoʼob ku chíikbesaʼaloʼob tumen le nojoch estatuaoʼ.
¿Kux túun u maasil gobiernoʼoboʼ? U profecíail Apocalipsiseʼ ku yaʼalikeʼ yaan u muʼuchʼul «tuláakal u [reyiloʼob] yóokʼol kaab» utiaʼal baʼateʼel tu contra Jéeoba tu «baʼatelil u nojoch kʼiinil [...] Jajal Dios, tiʼ máax yaan tuláakal páajtalil[oʼ]» (Apo. 16:14; 19:19-21). Bey túunoʼ teʼ Armagedonoʼ yaan u xuʼulsaʼal tiʼ tuláakal le gobiernoʼoboʼ, maʼ chéen le ku chíikbesik le nojoch estatua ilaʼab tumen Danieloʼ.
