U FAMILIA Johneʼ kajaʼan kaʼach tu chan kaajil Gujarat, India. U taataeʼ okjaʼanaj walajki sesenta años bey u j-jaajkunaj Jéeobaeʼ. Baʼaleʼ John, u maama, juntúul u kiik, kaʼatúul u yíitsʼinoʼob x-chʼúupalal yéetel kaʼatúul u yíitsʼinoʼob xiiboʼobeʼ jach catolicoʼob yéetel u pʼeekoʼob le religión yaan tiʼ u taataʼoboʼ.

Junpʼéel kʼiineʼ u taataeʼ tu yaʼalajtiʼ ka u bis junpʼéel juʼun tiʼ juntúul u amigo yaan tu múuchʼuliloʼ. Chéen baʼaleʼ teʼ kʼiinoʼ Johneʼ tu xotaj u dedo le táan u jeʼekʼabtik junpʼéel lataoʼ. Kex beyoʼ tumen u kʼáat u beet baʼax aʼalaʼabtiʼ tumen u taataeʼ, Johneʼ tu toʼaj u dedo yéetel junpʼéel nookʼeʼ ka bin teʼ tuʼux aʼalaʼabtiʼoʼ.

Ka kʼuch teʼ najoʼ chéen u yatan le sukuʼun kulaʼanoʼ, letiʼ xaneʼ x-Jaajkunaj, ka tu tsʼáajtiʼ le juʼunoʼ. Ka tu yilaj xootol u dedo Johneʼ tu jóoʼsaj baʼax kʼaʼabéet utiaʼal u pʼoʼik tiʼ, ka tsʼoʼokeʼ tu toʼaj. Tsʼoʼoleʼ tu tsʼáaj junpʼíit té u yukʼe. Teʼ súutukil xanoʼ tu tsikbaltajtiʼ le baʼax ku yaʼalik le Bibliaoʼ.

Le baʼax ku tuklik John yoʼolal u j-jaajkunajoʼob Jéeobaoʼ joʼopʼ u kʼexpajal. Le oʼolal tu beetaj kaʼapʼéel kʼáatchiʼob tiʼ le kiikoʼ. Letiʼeʼ ku creertik kaʼacheʼ Jesuseʼ Dios yéetel unaj u yúuchul rezar tiʼ María, baʼaleʼ u taataeʼ maʼ letiʼe baʼax ku creertikoʼ. Le kiikaʼ tu kanaj le idioma gujaratioʼ, le oʼolal meyajnajtiʼ le Biblia utiaʼal u tsolik tiʼ John ichil u idioma baʼax ku kaʼansik le Biblia yoʼolal le baʼax tu kʼáatoʼ. Ka tsʼoʼokeʼ tu tsʼáaj tiʼ John le folleto “Estas buenas nuevas del reino” ich Gujarati.

Le táan u xokik le folletooʼ, Johneʼ tu tsʼáaj cuenta le baʼax ku yaʼalikoʼ letiʼe u jaajiloʼ. Letiʼ túuneʼ bin u yil le curaoʼ ka tu beetaj xan tiʼ le kʼáatchiʼob tu beetaj tiʼ le kiikoʼ. Baʼaleʼ le curaoʼ tsʼíikilnaji, tu pulaj junpʼéel Biblia yiknal Johneʼ ka tu yawtajtiʼ: «¡Tsʼoʼok a suut Kʼaasilbaʼalil! ¿Tuʼux ku yaʼalik le Biblia maʼ Dios Jesusoʼ? ¿Tuʼux ku yaʼalik maʼ tsaaj u yúuchul rezar tiʼ Maríaiʼ? ¿¡Tuʼuxiʼ!?». Johneʼ maʼ tu tuklaj wa bey kun núukbil tiʼ tumen le curaoʼ, ka tu yaʼalajtiʼ: «Mix bikʼin in kaʼa peʼechakʼtik junpʼéel Iglesia católica». Lelaʼ jach bey tu beetiloʼ.

Johneʼ káaj u xokik le Biblia yéetel le j-Jaajkunajoʼoboʼ, maʼ xáanchaj ka káaj u meyajtik Jéeobaiʼ. Bey xan tu beetil jujuntúul tiʼ u láakʼtsiloʼoboʼ. Le ken u pakt John le cicatriz yaan tu x-noʼoj kʼaboʼ ku kʼaʼajaltiʼ bix eʼesaʼabik utsil tiʼ walajki sesenta añosoʼ, tumen yoʼolal leloʼ káaj u meyajtik Jéeoba (2 Cor. 6:4, 6).