1. ¿Baʼaxoʼob jeʼel u páajtal k-beetik utiaʼal k-múul meyaj yéetel Jéeobaeʼ?

 KA TU beetoʼon Jéeobaeʼ, u kʼáat ka múul meyajnakoʼon tu yéetel utiaʼal u béeykuntik baʼax u tukultmaj. Kex kʼebanoʼoneʼ láayliʼ jeʼel u páajtal k-múul meyaj tu yéetel sáamsamaleʼ. Le Bibliaoʼ ku yaʼalikeʼ «toʼoneʼ u yéet meyajoʼon Dios» kéen kʼaʼaytajnakoʼon yéetel kéen k-tsʼáa xook tiʼ wa máax (1 Cor. 3:5-9). Toʼoneʼ k-ilik junpʼéel nojoch privilegio k-múul meyaj yéetel le Máax beet tuláakal baʼaloʼ. Baʼaleʼ yaan uláakʼ baʼaloʼob jeʼel u páajtal k-beetik utiaʼal k-múul meyaj tu yéeteleʼ. Teʼ xookaʼ yaan k-ilik bix jeʼel k-múul meyaj tu yéetel kéen k-áant máaxoʼob yanoʼob ichil k-familia bey xan le sukuʼunoʼoboʼ, kéen k-kʼamoʼob t-otoch yéetel kéen maas áantajnakoʼon ichil u kaajal Jéeoba (Col. 3:23).

2. ¿Baʼaxten maʼ unaj k-ketik le bukaʼaj k-beetik yéetel le baʼaxoʼob ku beetik u maasil sukuʼunoʼoboʼ?

² Le táan k-xakʼaltik le xookaʼ, maʼ unaj k-ketik le bukaʼaj k-beetik yéetel le baʼaxoʼob ku beetik u maasil sukuʼunoʼoboʼ. Maʼ u tuʼubultoʼoneʼ cada juntúuleʼ ku beetik le ku páajtal yoʼolal u jaʼabil, u toj óolal, yoʼolal baʼaxoʼob ku aktáantik yéetel yoʼolal baʼaxoʼob u yojel u beete. Apóstol Pabloeʼ tu yaʼalaj: «Cada juntúuleʼ u xíixt baʼax ku beetik yéetel maʼ unaj u ketik  yéetel le baʼax ku beetik u yéet máakiloʼ. Beyoʼ yaan u kiʼimaktal u yóol yoʼolal le baʼaxoʼob tsʼoʼok u beetkoʼ» (Gal. 6:4).

3. ¿Baʼaxten k-aʼalik k-múul meyaj yéetel Jéeoba kéen k-tsʼáa baʼax kʼaʼabéet tiʼ máaxoʼob yanoʼob ichil k-familia?

³ Jéeobaeʼ ku yaʼalik ka k-kanáant máaxoʼob yanoʼob ichil k-familia. Yaan sukuʼunoʼobeʼ kʼaʼabéet u meyajoʼob utiaʼal u tsʼáaikoʼob baʼax kʼaʼabéet ichil u yotochoʼob. Yaʼab maamatsileʼ ku pʼáatloʼob tu yotochoʼob utiaʼal u kanáantik u mejen paalaloʼob. Yaan sukuʼunoʼob xaneʼ kʼaʼabéet u kanáantik u taataʼob tsʼoʼok u chʼíijloʼob. Tuláakal lelaʼ kʼaʼabéet u beetaʼal. Le Bibliaoʼ ku yaʼalik: «Wa yaan máax maʼ tu tsʼáaik baʼax kʼaʼabéet tiʼ u láakʼtsiloʼobeʼ, maases tiʼ le yanoʼob tu yotochoʼ, tsʼoʼok u mixbaʼalkúuntik le fejoʼ yéetel maas kʼaas yanil ke juntúul máak minaʼan u fe» (1 Tim. 5:8). Wa bey u yúuchultoʼonaʼ, maʼ xaaneʼ maʼ tu páajtal k-beetik u maasil utiaʼal k-meyajtik Jéeoba jeʼex k-kʼáateʼ. Dioseʼ ku kiʼimaktal u yóol kéen u yil k-kanáantik le máaxoʼob yanoʼob ichil k-familiaoʼ (1 Cor. 10:31).

4. Le taatatsiloʼoboʼ, ¿bix jeʼel u tsʼáaikoʼob táanil u Reino Dioseʼ, yéetel baʼax utsiloʼob ku taasik?

⁴ Le taatatsiloʼoboʼ ku múul meyajoʼob yéetel Jéeoba kéen u líiʼs u yóol u paalaloʼob utiaʼal u maas tsʼáaik u yóol u meyajtoʼob Dios. Kéen máanak kʼiineʼ, le mejen paalaloʼobaʼ ku joʼopʼol u xupkubaʼob u meyajtoʼob Dios yéetel ku náachtaloʼob tiʼ u láakʼtsiloʼob utiaʼal u yáantajoʼob. Yanoʼobeʼ misioneroʼob, yaan xaneʼ táan u beetik u precursoriloʼob tuʼux maas kʼaʼabéet áantaj yéetel yanoʼobeʼ tiʼ ku meyajoʼob Beteleʼ. Tumen náach yanoʼobeʼ maʼatech u jach ilaʼaloʼob tumen u láakʼtsiloʼob. Kex beyoʼ le taatatsiloʼob maʼatech u kaxtik chéen u yutsiloʼoboʼ, ku líiʼsik u yóol u paalaloʼob utiaʼal maʼ u pʼatkoʼob le meyaj ku beetkoʼoboʼ. ¿Baʼaxten? Tumen ku kiʼimaktal u yóoloʼob kéen u yiloʼob u paalaloʼobeʼ u tsʼaamoʼob táanil le Reino ichil u kuxtaloʼoboʼ (3 Juan 4). Yaʼab tiʼ le taatatsiloʼobaʼ ku yuʼubikubaʼob jeʼex Anaeʼ, letiʼeʼ tu yaʼaleʼ tu tsʼáaj Samuel, u hijo, utiaʼal u majáant Jéeoba. Le taatatsiloʼoboʼ unaj u yilkoʼob junpʼéel nojoch privilegio u múul u meyajoʼob yéetel Jéeoba (1 Sam. 1:28).

5. ¿Bix jeʼel k-áantik le sukuʼunoʼob teʼ múuchʼuliloʼ? (Ilawil le fotoʼob yaan tu káajbal le xookaʼ.)

⁵ ¿Baʼax jeʼel u páajtal k-beetik wa minaʼan mix máak jach kʼaʼabéet áantaj tiʼ ichil k-familiaeʼ? Maʼ xaaneʼ jeʼel u páajtal k-áantik le sukuʼunoʼob tsʼoʼok u yantal u jaʼabiloʼoboʼ, le kʼojaʼanoʼoboʼ wa uláakʼ sukuʼunoʼob kʼaʼabéet áantaj tiʼob. Jeʼel xan u páajtal k-áantik le máaxoʼob kanáantik le sukuʼunoʼob beyaʼ. Maʼalob ka tuukulnakoʼon tiʼ le máaxoʼob yanoʼob teʼ múuchʼulil utiaʼal k-ilik bix jeʼel k-áantkoʼobeʼ. Jeʼex wa juntúul kiik táan u kanáantik u taata tsʼoʼok u chʼíijleʼ, jeʼel u páajtal k-jóoʼsik tiempo utiaʼal k-áantikeʼ. Beyoʼ letiʼeʼ jeʼel u páajtal u beetik uláakʼ baʼaxoʼob kʼaʼabéeteʼ. Wa maʼ xaaneʼ jeʼel u páajtal k-bisik wa máax teʼ muchʼtáambaloʼ wa k-bisik u yil u láakʼtsil hospital, utiaʼal ka xiʼik maan wa ka u beet uláakʼ wa baʼax. Beyoʼ jeʼel k-múul meyaj yéetel Jéeoba utiaʼal u núukik u oración le sukuʼunoʼobaʼ (xok 1 Corintoiloʼob 10:24).

6. ¿Baʼax táakaʼan ichil k-kʼamik maʼalob k-uʼulaboʼob?

⁶ Le máaxoʼob ku múul meyajoʼob yéetel Diosoʼ suuk u kʼamik maʼalob u yuʼulaboʼob. Teʼ Kiliʼich Tsʼíiboʼob ich Griegooʼ, le tʼaan ku traducirtaʼal a «kʼamkeʼex yéetel utsil le uʼulaboʼob[oʼ]», ku tsʼáaik xan naʼatbil «u yeʼesaʼal utsil tiʼ yaanal máakoʼob» (Heb.  13:2). Le Bibliaoʼ ku tʼaan tiʼ yaʼab máakoʼob tu kʼamoʼob maʼalob u yuʼulaboʼob (Gén. 18:1-5). Maʼalob ka suukchajaktoʼon k-áantik u maasil kex ku meyajtikoʼob Jéeoba wa maʼ (Gal. 6:10).

7. ¿Baʼaxten unaj k-kʼamik maʼalob le sukuʼunoʼob xíimbaltik le múuchʼuliloʼ?

⁷ Uláakʼ bix k-múul meyaj yéetel Dioseʼ letiʼe k-kʼamik maʼalob le sukuʼun xíimbaltik le múuchʼuliloʼ (xok 3 Juan 5, 8). Le kéen u xíimbaltoʼob k-múuchʼulileʼ ku tsʼáaik tuʼux «k-paklan líiʼsik k-óol» (Rom. 1:11, 12). Koʼoneʼex ilik baʼax úuch tiʼ juntúul sukuʼun ku kʼaabaʼtik Olaf. Tu paalileʼ xíimbaltaʼab u múuchʼulil tumen juntúul superintendente tiʼ circuito maʼ tsʼokaʼan u beeliʼ, baʼaleʼ minaʼan tuʼux u pʼáatal kaʼachi. Olaf túuneʼ tu kʼáataj tiʼ u taataʼob maʼ j-Jaajkunajoʼob wa jeʼel u páajtal u kʼamkoʼob le sukuʼun tu yotochoʼoboʼ. Aʼalaʼabtiʼeʼ jeʼel u páajtaleʼ, baʼaleʼ Olafeʼ chéen yóoʼ sofá kun wenel. Le úuchik u pʼáatal le sukuʼun tu yotochoʼ jach tu taasaj yaʼab utsil tiʼ. Olafeʼ ku yaʼalikeʼ jach yaʼab baʼax tu kanaj teʼ semana jeʼeloʼ. Ku yaʼalik: «Teen yéetel le superintendente tiʼ circuitooʼ sáamsamal temprano k-líikʼil yéetel k-tsikbal tiʼ yaʼab baʼaloʼob jatsʼutstak le táan k-ukʼuloʼ. Le baʼaxoʼob t-tsikbaltoʼ tu yáanten utiaʼal ka taakchajak in maas xupkinba in meyajt Dios». Olafeʼ tsʼoʼok cuarenta años joʼopʼok u beetik u misioneroil tiʼ jejeláas luʼumiloʼob.

8. ¿Baʼaxten unaj k-eʼesik utsil kex maʼ tu tsʼaʼabaltoʼon u diosboʼotikil? Tʼaanen tiʼ baʼax uchaʼan.

⁸ U jaajileʼ yaʼab bix jeʼel k-eʼesik utsil tiʼ le máaxoʼob maʼ k-kʼaj óol, kex yaan kʼiin maʼ tu tsʼáaikoʼob u diosboʼotikiloʼ. Koʼoneʼex ilik junpʼéel baʼax úuch España. Juntúul kiik táan u tsʼáaik xook tiʼ Yésica, ku taal Ecuadoreʼ, chéen ka tu yilaj u káajal u yokʼol. Le kiik túunoʼ tu kʼáataj baʼax ku yúuchultiʼ, Yesicaeʼ tu yaʼalaj tiʼeʼ, táanil tiʼ u bin kajtal Españaeʼ jach táaj óotsil, junpʼéel kʼiineʼ pʼáat minaʼan baʼal u jaante. Chéen jaʼ ku tsʼáaik tiʼ u chan hija. Le táan u weensik u chan hijaoʼ, joʼopʼ u orar. Maʼ sáam tiʼ leloʼ tʼaanaj kaʼatúul kiikoʼob tu yotoch. Yesicaeʼ tu kʼeyoʼob yéetel tu jataj le revista tsʼaʼabtiʼoʼ, ka tu yaʼalaj: «¿Letiʼe baʼax wa ken in tsʼáa u jaant in hijaaʼ?». Le kiikoʼoboʼ joʼopʼ u yaʼalikoʼobtiʼ maʼ u seguer u kʼuuxil, baʼaleʼ maʼ tu beetiʼ. Maʼ sáam tiʼ leloʼ, le kiikoʼoboʼ tu pʼatoʼob tu jool u yotoch baʼal u jaante. Le oʼolal yaachaj u yóol ka kʼaʼajtiʼ le utsil eʼesaʼabtiʼ tumen le kiikoʼoboʼ, tumen letiʼ kʼáat u yáantaj Dios, baʼaleʼ maʼ tu yóotaj u beet u cuentail le ka núukaʼabtiʼoʼ. Baʼaleʼ u chʼaʼtukultmaj u meyajtik Jéeoba yoʼolal le utsil eʼesaʼabtiʼ tumen le kiikoʼoboʼ (Ecl. 11:1, 6).

9, 10. 1) ¿Baʼaxten kʼáataʼab u yáantaj le israelitaʼob úuchjeakiloʼ? 2) ¿Baʼax meyajiloʼob ku kʼaʼabéettal u beetaʼal teʼ múuchʼulil bejlaʼoʼ?

⁹ Le israelitaʼob úuchjeakiloʼ yaʼab u téenel kʼáataʼab u yáantajoʼob utiaʼal le meyajoʼob kʼaʼabéetoʼ (Éxo. 36:2; 1 Cró. 29:5; Neh. 11:2). Bejlaʼa xaneʼ yaʼab bix jeʼel k-xupik k-tiempo, baʼaxoʼob yaantoʼon bey xan k-áantaj yéetel le baʼaxoʼob k-ojel k-beet utiaʼal k-áantik le sukuʼunoʼoboʼ. Wa k-beetkeʼ yaan u kiʼimaktal k-óol yéetel yaan k-kʼamik yaʼab bendicionoʼob.

¹⁰ Le Bibliaoʼ ku yaʼalik tiʼ le xiiboʼob ka u tsʼáa u yóoloʼob meyaj utiaʼal ka tsʼaʼabak u beet u siervo ministerialiloʼob wa u ancianoiloʼob utiaʼal u múul meyajoʼob yéetel Jéeobaoʼ (1 Tim. 3:1, 8, 9; 1 Ped. 5:2, 3). Le sukuʼunoʼob beyaʼ jach ku yilik u yáantkoʼob le sukuʼunoʼob u maas meyajtoʼob Diosoʼ bey xan tiʼ uláakʼ baʼaloʼob kʼaʼabéettiʼob (Bax. 6:1-4). ¿Tsʼoʼok wa u kʼáatiktoʼon le ancianoʼob wa jeʼel u páajtal k-beetik k-acomodadoril, k-ilik le publicacionoʼob  ku meyaj tiʼ le sukuʼunoʼoboʼ, ka k-il tuʼux ku yúuchul kʼaʼaytaj, ka áantajnakoʼon utiaʼal u kanáantaʼal le Najil Reinooʼ wa utiaʼal k-beetik uláakʼ meyajoʼob? Le sukuʼunoʼob beetik le meyajoʼobaʼ jeʼel u yaʼalikoʼobtoʼoneʼ jach ku taasik kiʼimak óolal u yáantaʼal u maasil.

11. ¿Bix áantaʼabik juntúul kiik tumen le máaxoʼob tu kʼaj óoltaj le táan u beetaʼal u Najiloʼob Reinooʼ?

¹¹ Le máaxoʼob ku táakpajloʼob utiaʼal u beetaʼal le meyajoʼob ichil u kaajal Jéeobaoʼ ku yaʼabtal u amigoʼob. Lelaʼ bey úuchik tiʼ Margie, juntúul kiik tsʼoʼok dieciocho años joʼopʼok u meyaj utiaʼal u beetaʼal u Najiloʼob Reino. Ich yaʼab añoseʼ, tu kaʼansaj yaʼab kiikoʼob x-lóoʼbayanoʼob. Letiʼeʼ ku aprovechartik le súutukiloʼob bey utiaʼal u paklan líiʼsik u yóoloʼob u meyajtoʼob Diosoʼ (Rom. 1:12). Ka tu aktáantaj talamiloʼobeʼ, jach líiʼsaʼab u yóol tumen le kiikoʼob tu kʼaj óoltoʼ. ¿Tsʼoʼok wa a bin áantaj utiaʼal u beetaʼal u Najiloʼob Reino? Jeʼel u páajtal k-beetik kex maʼ k-ojel k-beet wa baʼax meyajileʼ.

12. ¿Bix jeʼel k-áantaj kéen úuchuk junpʼéel nojoch loobileʼ?

¹² Kéen úuchuk junpʼéel nojoch loobileʼ ku yantal tuʼux u múul meyaj máak yéetel Dios. Junpʼéel bixeʼ letiʼe u síik máak u taakʼin utiaʼal u yáantaʼal le sukuʼunoʼoboʼ (Juan 13:34, 35; Bax. 11:27-30). Uláakʼ bixeʼ letiʼe u táakpajal máak utiaʼal u limpiartaʼal wa u jel beetaʼal le najoʼob kʼaʼabéetoʼ. Gabriela, kajaʼan Poloniaeʼ, búul u yotoch. Baʼaleʼ jach kiʼimakchaj u yóol yoʼolal le áantaj tsʼaʼabtiʼ tumen le sukuʼunoʼoboʼ. Letiʼeʼ ku yaʼalik: «Maʼ in kʼáat tʼaan tiʼ le baʼaxoʼob tin peʼertoʼ, tumen yaniliʼ u kʼastaloʼobeʼ. Baʼaxeʼ maas taak in tʼaan tiʼ le utsiloʼob tin kʼamoʼ. Le baʼax úuchtenoʼ tu yeʼesajteneʼ u yantal máak ichil u kaajal Jéeobaeʼ letiʼe baʼax taasik kiʼimak óolaloʼ». Yaʼab sukuʼunoʼob áantaʼaboʼob le ka tsʼoʼok junpʼéel nojoch loobiloʼ, ku yaʼalikoʼobeʼ maas muʼukʼaʼanchaj u fejoʼob. Tsʼoʼoleʼ le sukuʼunoʼob áantajnajoʼob xanoʼ bey xan u yuʼubikubaʼoboʼ (xok Baʼaxoʼob 20:35; 2 Corintoiloʼob 9:6, 7).

13. ¿Bix u yáantkoʼon k-maas yaabilt Jéeoba le kéen k-áant u maasiloʼ? Aʼal junpʼéel baʼax uchaʼan.

¹³ Stephanie yéetel uláakʼ sukuʼunoʼobeʼ múul meyajnajoʼob yéetel Dios. Letiʼobeʼ tu  yáantoʼob le sukuʼunoʼob púutsʼoʼob tu luʼumoʼob yoʼolal junpʼéel baʼateltáambaloʼ ka binoʼob Estados Unidos. Tu kaxtoʼob najoʼob utiaʼal u pʼáatal le sukuʼunoʼoboʼ yéetel tu tsʼáajoʼob baʼaxoʼob kʼaʼabéet ichil. Letiʼeʼ ku yaʼalik: «Jach kiʼimakchaj k-óol ka t-ilaj bix u yuʼubikubaʼob yoʼolal le yaabilaj ku yeʼesaʼaltiʼob tumen u maasil máaxoʼob meyajtik Jéeobaoʼ. Letiʼobeʼ ku tuklikoʼob toʼon áantoʼob, baʼaleʼ u jaajileʼ maas yaʼab bix úuchik u yáantkoʼonoʼob. Le yaabilaj, le múuchʼ meyaj, le fe yéetel le bix u kʼubik u yóoloʼob tiʼ Jéeobaoʼ tsʼoʼok u yáantkoʼon k-maas yaabilt Dios. Tsʼoʼoleʼ tu yáantoʼon k-il u kʼaʼanaʼanil le baʼaxoʼob ku tsʼáaiktoʼon Jéeoba yoʼolal u kaajaloʼ».

14, 15. 1) ¿Baʼax tuukulil anchaj tiʼ profeta Isaías? 2) ¿Bix jeʼel k-beetik jeʼex tu beetil Isaíasoʼ?

¹⁴ ¿K-kʼáat wa k-maas múul meyaj yéetel Jéeoba? ¿Jeʼel wa u páajtal k-bin áantaj tuʼux maas kʼaʼabéeteʼ? U jaajileʼ le máaxoʼob meyajtik Diosoʼ maʼ tsaaj ka xiʼikoʼob náach tiʼ u yotochoʼob utiaʼal u yeʼesik u yutsiloʼobiʼ. Kex beyoʼ yaʼab sukuʼunoʼobeʼ ku páajtal u binoʼob táanxel tuʼux utiaʼal u maas meyajtikoʼob Jéeoba. Letiʼobeʼ ku beetkoʼob jeʼex profeta Isaíaseʼ. Jéeobaeʼ tu kʼáataj: «¿Máax bíin in túuxte? ¿Máax bíin u beetuba k-bisajtʼaan? Teneʼ tin núukaj: Jeʼelenaʼ, [túuxteniʼ]» (Isa. 6:8). ¿Jeʼel wa k-aʼalik jeʼex le profeta kéen kʼaʼabéetchajak k-áantik u maasiloʼ? ¿Baʼaxoʼob kʼaʼabéet u beetaʼal teʼ kʼiinoʼobaʼ?

¹⁵ Ka tʼaanaj Jesús tiʼ u kʼaʼaytaʼal le maʼalob péektsil yéetel u kaʼansaʼal uláakʼ máakoʼoboʼ tu yaʼalaj: «Le joochoʼ yaʼab, baʼaleʼ le máaxoʼob ku joochoʼoboʼ junpʼíitoʼob. Le oʼolaleʼ, kʼáat óolteʼex tiʼ u Yuumil le kool ka u túuxt uláakʼ máakoʼob utiaʼal le joochoʼ» (Mat. 9:37, 38). ¿Jeʼel wa u páajtal k-bin k-beet k-precursoril tuʼux maas kʼaʼabéet áantajeʼ? ¿Jeʼel wa u páajtal k-áantik wa máax u beeteʼ? Yaʼab sukuʼunoʼobeʼ ku yeʼeskoʼob u yaabiltmoʼob Jéeoba yéetel u yéet máakiloʼob kéen xiʼikoʼob áantaj tuʼux maas kʼaʼabéet. ¿Yaan wa uláakʼ baʼax jeʼel k-beetik utiaʼal k-maas xupikba k-meyajt Dioseʼ? Wa k-beetkeʼ jach yaan u kiʼimaktal k-óol.

16, 17. ¿Baʼax uláakʼ jeʼel u páajtal k-beetik wa k-kʼáat k-maas meyajt Jéeobaeʼ?

¹⁶ ¿Jeʼel wa u páajtal k-bin meyaj Betel wa utiaʼal u beetaʼal u Najiloʼob Reino ich wa jaypʼéel mes bey xan ichil wa jaypʼéel kʼiin tiʼ junpʼéel semanaeʼ? Jach kʼaʼabéet u yáantaj sukuʼunoʼob jeʼel u páajtal u beetkoʼob jeʼel baʼaxak meyajil ichil u kaajal Dioseʼ. Utiaʼal lelaʼ maʼ xaaneʼ yaan u tsʼaʼabal k-beet yaanal meyaj tiʼ le k-ojel k-beetoʼ. Baʼaleʼ Jéeobaeʼ ku kiʼimaktal u yóol yoʼolal le meyaj ku beetik le sukuʼunoʼob tuʼux kʼaʼabéet áantajoʼ (Sal. 110:3).

¹⁷ Wa k-kʼáat kaanbal utiaʼal k-maas meyajtik Jéeobaeʼ, maʼ xaaneʼ jeʼel u páajtal k-bin teʼ Escuela utiaʼal Máaxoʼob Kʼaʼaytik le Reinooʼ. Teʼ escuelaaʼ ku kaʼansaʼal sukuʼunoʼob yéetel kiikoʼob ku xupkubaʼob u meyajtoʼob Jéeoba utiaʼal u maas áantajoʼob jeʼel tuʼuxak ka túuxtaʼakoʼob tumen u kaajal Dioseʼ. Le máaxoʼob ku binoʼob xook teʼ escuelaaʼ unaj u yóotkoʼob bin jeʼel tuʼuxak ka túuxtaʼakoʼob kéen tsʼoʼokok le xookoʼ. ¿Jeʼel wa u páajtal k-bin teʼ escuela utiaʼal ka tsʼaʼabaktoʼon u maasil meyaj ichil u kaajal Jéeobaeʼ? (1 Cor. 9:23.)

18. ¿Baʼax utsiloʼob jeʼel k-kʼamik wa k-múul meyaj yéetel Jéeobaeʼ?

¹⁸ Toʼoneʼ k-ilik k-eʼesik utsil yéetel yaabilaj kéen k-áant u maasil sáamsamal. Lelaʼ ku taasiktoʼon kiʼimak óolal yéetel jeetsʼelil (Gal. 5:22, 23). Kex jeʼel baʼaxak ka páajchajak k-beetkeʼ, tuláakloʼon jeʼel u páajtal k-eʼesik utsil jeʼex u beetik Jéeobaeʼ yéetel k-múul meyaj tu yéetel (Pro. 3:9, 10).