LE MÁAXOʼOB u yilmoʼob bix u kʼastal tuláakal baʼal kéen tsʼoʼokok junpʼéel nojoch loobiloʼ u yojloʼob bix u muʼyaj máak, yanoʼobeʼ hasta ku pʼáatal maʼ tu kaxtik baʼax u beetoʼob. Le máaxoʼob kajaʼanoʼob teʼ tuʼux suuk u yúuchul nukuch loobiloʼoboʼ jach ku yaatal u yóoloʼob, hasta ku yuʼubikoʼob minaʼan u biilal u kuxtaloʼob.

Wa tsʼoʼok u náakʼaltech úuchik a peʼertik tuláakal baʼax yaantecheʼ, maʼ xaaneʼ tsʼoʼok tak a tuklik minaʼan u biilal a kuxtal. Chéen baʼaleʼ le Bibliaoʼ ku yaʼalik yaan baʼax maʼalob ku taal u kʼiin, lelaʼ jeʼel u tsʼáaik u biilal a kuxtaleʼ.

Eclesiastés 7:8, ku yaʼalik: «Maas maʼalob u tsʼoʼokbal junpʼéel baʼal ke u káajbal». Wa yaʼab baʼaloʼob tsʼoʼok a peʼertik yoʼolal junpʼéel nojoch loob yéetel yaan u kʼaʼabéettal a jel káajaleʼ, maʼ xaaneʼ jeʼel tak a tuklik chéen kunel baʼax ka beetkeʼ. Chéen baʼaleʼ maʼ u lúubul a wóol, jujunpʼíitil kun bíin u kaʼa maʼalobtal a kuxtal.

Le Bibliaoʼ ku yaʼalik bix le kuxtal kun antal way Luʼumeʼ: «Maʼ kun kaʼa uʼuybil u yokʼol máakiʼ mix kun uʼuybil u yawat máak tu yoʼolal baʼax ku yúuchultiʼ» (Isaías 65:19). Le baʼax ku yaʼalik le tekstoaʼ chéen u Reino Dios kun béeykuntik (Salmo 37:11, 29). Teʼ kʼiinoʼoboʼ maʼ tun kaʼa antal nukuch loobiloʼob, tuláakal le baʼaxoʼob beetik k-muʼyajoʼ yaan u xuʼulsaʼaloʼob. Dioseʼ ku yaʼalik: «Le baʼaloʼob tsʼoʼok u yúuchloʼoboʼ maʼ kun kaʼa kʼaʼajsbiloʼob, mix ken u kaʼa chiʼichnakkúunt u puksiʼikʼal máak» (Isaías 65:17).

¡Tukult bukaʼaj baʼaloʼob tsʼoʼok u beetik Dios utiaʼal ka yanaktoʼon junpʼéel maʼalob kuxtal, letiʼeʼ u kʼáat ka kuxlakoʼon ich jeetsʼelil yáanal u Reino! (Jeremías 29:11). K-ojéeltik baʼaxoʼob ken u beet Dios maʼ tun xáantaleʼ jach jeʼel u yáantkoʼoneʼ. Sally, le máax tu peʼertaj yaʼab baʼaloʼob yoʼolal junpʼéel chak ikʼaloʼ, ku yaʼalik: «U tuukul máak tiʼ le baʼaloʼob ken u beet u Reino Diosoʼ jeʼel u yáantaj utiaʼal maʼ u sen tuukul tiʼ le baʼaxoʼob úuchtiʼoʼ».

¿A kʼáat wa a wojéelt baʼax uláakʼ ken u beet u Reino Dios? Wa beyoʼ, maʼ u xuʼulul a kaanbal tiʼ le Bibliaoʼ. Beyoʼ yaan a tsʼáaik cuenta jach yaan u biilal a kuxtal yéetel naatsʼ yanik u kʼiinil u xuʼulsaʼal tuláakal le baʼaxoʼob beetik a muʼyajoʼ. Chéen baʼaleʼ, le maʼ kʼuchuk le kʼiin jeʼeloʼ, koʼox ilik bix u yáantkoʼon le Biblia teʼ kʼiinoʼobaʼ.