KÉEN ÚUCHUK JUNPʼÉEL NOJOCH LOOBEʼ, YAAN MÁAXEʼ KU YAʼALIK: «¿TUʼUX YAAN DIOS KA ÚUCHI?». WA KA ÚUCHUKTECH JUNPʼÉEL NOJOCH LOOBEʼ, MAʼ XAANEʼ JEʼEL A TUKLIKEʼ: «¿KU YILIK WA DIOS BAʼAX KU YÚUCHULTEN?».

Maʼ xaaneʼ jeʼel a wuʼuyikaba jeʼex Sheila, kajaʼan Estados Unidos yéetel líiʼsaʼab ichil junpʼéel familia jach ku creertikoʼob Dios, letiʼeʼ ku yaʼalik: «Tin paalileʼ uts tin tʼaan in kaanbal tiʼ Dios tumen in wojel letiʼ beetmiloʼon. Baʼaleʼ mix juntéen tin wuʼuyaj wa naatsʼ yanilen tiʼ Dios, teneʼ kin tuklik kaʼacheʼ jach náach yanil tiʼ teen. U jaajileʼ mix juntéen tin wuʼuyaj wa u pʼekmen, baʼaleʼ mix xan tin wuʼuyaj wa u yaabiltmeniʼ». ¿Baʼaxten bey tu yuʼubilubaoʼ? Letiʼeʼ ku yaʼalik: «In familiaeʼ jach yaʼab baʼaxoʼob tu muʼyajtaj, maʼ jach kiʼ tsʼoʼokok junpʼéeleʼ, tsʼoʼok u káajal uláakʼ. Teʼ súutukiloʼoboʼ tin wuʼuyaj bey maʼ tu yáantkoʼon Dioseʼ».

Jeʼex Sheilaeʼ, maʼ xaaneʼ ka creertik yaan juntúul Dios jach yaan u muukʼ. Baʼaleʼ jeʼel xan u taaktal a wojéeltik wa jach tu jaajil u yaabiltmecheʼ. Job, juntúul máax jach ku creertik kaʼach yaan Dios yéetel u yojel yaʼab u páajtalileʼ, láayliʼ bey tuukulnajikoʼ (Job 2:3; 9:4). Le ka joʼopʼ u muʼyajtik jejeláas baʼaloʼobeʼ, tu kʼáataj tiʼ Dios: «¿Baʼaxten ka taʼakbesikaba tiʼ teen? ¿Baʼaxten ka wilken beyen juntúul [máax a pʼekmajeʼ]?» (Job 13:24).

Chéen baʼaleʼ, ¿baʼax ku yaʼalik le Bibliaoʼ? ¿Dios wa beetik u yúuchultoʼon baʼaloʼob kʼaastak? ¿Yaan wa baʼax eʼesik Dioseʼ jach tu jaajil u yaabiltmaj wíinik bey xan cada juntúul tiʼ toʼon? ¿Ku yilik wa baʼax ku yúuchultoʼon? ¿Ku naʼatik wa bix k-uʼuyikba? ¿Jeʼel wa u yáantkoʼon kéen kʼaʼabéetchajkeʼ?

Teʼ xook ku segueroʼ yaan k-ilkeʼ Dioseʼ yaʼab baʼaxoʼob u beetmaj utiaʼal u kanáantkoʼon (Romailoʼob 1:20). Le Bibliaoʼ yaan u yáantkoʼon k-il bix u beetik. Jeʼex u bin a maas kʼaj óoltik Dios yéetel u yáantaj le Biblia bey xan yéetel le baʼaxoʼob u beetmoʼ, yaan a tsʼáaik cuenta ‹jach u tsʼaamaj u yóol u yáantech› (1 Juan 2:3; 1 Pedro 5:7).