Maʼalob decisiónoʼob: Le Bibliaoʼ jeʼel u yáantkecheʼ

PAX ICH

Kéen k-chʼaʼ junpʼéel decisióneʼ, wa chéen k-beetik baʼax k-tuklik maʼalob wa baʼax ku tuklik maʼalob u maasileʼ maʼ seguro wa jeʼel u bintoʼon maʼalobileʼ. Le Bibliaoʼ ku yaʼalik baʼaxten, tsʼoʼoleʼ ku tsolik xan baʼax jeʼel u yáantkoʼon utiaʼal u kiʼimaktal k-óoleʼ yéetel u yantal u biilal k-kuxtal. Tuláakal le baʼax ku yaʼalik le Bibliaoʼ jeʼel u páajtal k-confiar tiʼeʼ.

KʼAʼABÉETTOʼON U NUʼUKTAJ DIOS

Teʼ Bibliaoʼ, Jéeoba a Dioseʼ ku tsoliktoʼon baʼaxten kʼaʼabéettoʼon u nuʼuktaj, teʼeloʼ ku yaʼalikeʼ maʼ beetaʼanoʼon utiaʼal k-nuʼuktikba t-juunaliʼ (Jeremías 10:23). Le oʼolaleʼ u tsʼaamajtoʼon le Biblia utiaʼal k-nuʼuktikba kéen k-chʼaʼ decisiónoʼob ichil k-kuxtaloʼ. Como u yaabiltmoʼoneʼ letiʼeʼ maʼ u kʼáat ka sufrirnakoʼon ikil k-chʼaʼik decisiónoʼob maʼ maʼalobtakiʼ. (Deuteronomio 5:29; 1 Juan 4:8). Tsʼoʼoleʼ letiʼ beetmiloʼon yéetel jach yaan u naʼat, como jach u kʼaj óoloʼon tubeeleʼ chéen letiʼ jeʼel u tsʼáaiktoʼon le maas maʼalob consejoʼoboʼ (Salmo 100:3; 104:24). Chéen baʼaleʼ Dioseʼ maʼatech u obligartik mix máak ka u beet le baʼaxoʼob ku yaʼalikoʼ.

Jéeobaeʼ tu tsʼáaj tiʼ le yáax pareja, Adán yéetel Eva, tuláakal le baʼaxoʼob kʼaʼabéettiʼob utiaʼal ka kiʼimakchajak u yóoloʼoboʼ (Génesis 1:28, 29; 2:8, 15). Tu tsolaj xan tiʼob baʼaxoʼob kʼaʼabéet u beetkoʼob. Chéen baʼaleʼ tu chaʼajtiʼob ka u decidirtoʼob wa yaan u beetkoʼob wa maʼ (Génesis 2:9, 16, 17). U kʼaasileʼ Adán yéetel Evaeʼ tu chʼaʼtukloʼob u beetkoʼob chéen baʼax ku tuklikoʼob maʼalob, maʼ baʼax ku yaʼalik Jéeobaiʼ (Génesis 3:6). Kux túun teʼ kʼiinoʼobaʼ, ¿bix tsʼoʼok u bin tiʼ máak ikil u beetik chéen le baʼax ku tuklik maʼaloboʼ? ¿Tsʼoʼok wa u bin maʼalobil tiʼ wíinik? Maʼ. Leloʼ ku yeʼesikeʼ u desobedecertaʼal Jéeobaeʼ maʼatech u taasik kiʼimak óolal mix jeetsʼelil (Eclesiastés 8:9).

Le Bibliaoʼ jeʼel u nuʼuktikoʼon utiaʼal k-chʼaʼik maʼalob decisiónoʼob kex jeʼel tuʼuxak kajaʼanoʼoneʼ (2 Timoteo 3:16, 17; ilawil le cuadro « Junpʼéel libro utiaʼal tuláakal máak»). Koʼoneʼex ilik bix u nuʼuktikoʼon Dios yéetel le Bibliaoʼ.

Ilawil baʼaxten ku yaʼalaʼal le Bibliaoʼ «u Tʼaan Dios» (1 Tesalonicenses 2:13). Chaʼant teʼ jw.org le video ku kʼaabaʼtik: ¿Máax beet u tsʼíibtaʼal le Bibliaoʼ?

JUNPʼÉEL LIBRO UTIAʼAL TULÁAKAL MÁAK

Chéen juntúul Dios jach yaan u yaabilaj yéetel u naʼat jeʼel u beetik u kʼuchul le Biblia tiʼ tuláakal máak utiaʼal u nuʼuktik u kuxtaloʼoboʼ. Ilawil jujunpʼéel baʼaxoʼob eʼesik:

Maas tiʼ 3,500 Letiʼe bukaʼaj idiomaʼob tsʼoʼok u traducirtaʼal le Biblia tu chúukaʼanil wa chéen junjaatsoʼ, letiʼe libro tsʼoʼok u maas traducirtaʼal tiʼ tuláakal yóokʼol kaaboʼ.
Maas tiʼ 5,000 millones Letiʼe bukaʼaj Bibliaʼob tsʼoʼok u jóoʼsaʼaloʼ yéetel letiʼe libro maas kʼaj óolaʼan tiʼ tuláakal yóokʼol kaaboʼ.

Le Bibliaoʼ utiaʼal tuláakal máak. Maʼ chéen utiaʼal junpʼéel razaiʼ, luʼumiliʼ wa culturaiʼ.

Xok le Biblia ich Internetoʼ (jóoʼsaʼan ich maas tiʼ 250 idiomaʼob) teʼ sitio jw.org

BAʼAXTEN YAAN MÁAKOʼOB MAʼ TU CREERKOʼOB BAʼAX KU YAʼALIK LE BIBLIAOʼ

Yaan máaxoʼob aʼalikeʼ maʼ tu yáantaj le consejoʼob ku tsʼáaik le Bibliaoʼ. Yanoʼobeʼ ku yaʼalikoʼob beyaʼ:

Baʼax ku yaʼalaʼal: «Le Bibliaoʼ ku contradecirkuba».

U jaajil: Wa chéen ka jáajan xokik le Bibliaoʼ maʼ xaaneʼ jeʼel a tuklikeʼ le baʼaxoʼob ku yaʼalikoʼ ku contradecirkubaʼob. Pero wa k-chʼaʼik en cuenta tuláakal le baʼaxoʼob táakaʼanoʼ, le kʼiin ka tsʼíibtaʼaboʼ, le baʼax suuk u beetaʼal teʼ kʼiinoʼoboʼ, le baʼax ku tuklik le máaxoʼob tsʼíibtoʼ, yéetel uláakʼ baʼaloʼobeʼ, yaan k-ilkeʼ maʼ tu contradecirkuba.

Wa taak a wilik jujunpʼéel ejemploʼobeʼ ilawil le xook ich español ku kʼaabaʼtik: «¿Se contradice la Biblia?», lelaʼ tiaʼan teʼ sitio jw.org.

Baʼax ku yaʼalaʼal: «Le Bibliaoʼ maʼ maʼalob utiaʼal u nuʼuktikuba máakiʼ tumen tak le máaxoʼob xokikoʼ ku beetkoʼob baʼaloʼob kʼaastak».

U jaajil: Kex le máaxoʼob xokik le Biblia ku beetkoʼob baʼaloʼob maʼ maʼalobtakoʼ, maʼ u kʼáat u yaʼal wa maʼatech u tsʼáaik maʼalob consejoʼobiʼ. Le Bibliaoʼ u yaʼalmiliʼeʼ tak u nuuktakiloʼob le religiónoʼoboʼ yaan u beetkoʼob baʼaloʼob kʼaastak yéetel yaan u beetkoʼob «u yaʼalaʼal baʼal» tiʼ le Bibliaoʼ (2 Pedro 2:1, 2).

U nuuktakiloʼob le religiónoʼoboʼ tsʼoʼok u xuʼulul u beetkoʼob baʼax ku yaʼalik le Bibliaoʼ. Wa taak a wojéeltik uláakʼ baʼax tsʼoʼok u beetkoʼobeʼ ilawil le xook ich español ku kʼaabaʼtik: «La religión, ¿un gran negocio?», lelaʼ tiaʼan teʼ sitio jw.org.

Baʼax ku yaʼalaʼal: «Le Bibliaoʼ ku beetik k-pʼektik u maasil».

U jaajil: Le Bibliaoʼ ku kaʼanskoʼon k-respetart u maasil yéetel ku yaʼalik maʼ unaj k-beetik jujunpʼéel baʼaloʼob jeʼex lelaʼ:

Maʼ a creerkaba maas importante tiʼ u maasil (Filipenses 2:3)
Maʼ a ofendertik le máaxoʼob yaanal baʼax ku creerkoʼoboʼ (1 Pedro 2:17)
Maʼ a obligartik u maasil ka tuukulnakoʼob jeʼex techeʼ (Mateo 10:14)

Le Bibliaoʼ ku kaʼansikeʼ Dioseʼ ku yeʼesik u yutsil tiʼ tuláakal máak yéetel u kʼáat ka k-beet xan beyoʼ (Romanos 9:14).

Wa taak a wojéeltik u maasileʼ ilawil le xook ku kʼaabaʼtik: «¿Bix u yáantkoʼon le Biblia k-respetart u maasiloʼ?», lelaʼ tiaʼan teʼ sitio jw.org.

DIOSEʼ KU NUʼUKTIKOʼON YÉETEL LE BIBLIAOʼ

Le Bibliaoʼ ku tsolik bix u biskuba Dios yéetel wíinik desde úuchjeakil. Le kéen k-xokeʼ k-tsʼáaik cuenta baʼax maʼalob yéetel baʼax kʼaas u yilik Dios, baʼax jeʼel u beetik u bintoʼon utsileʼ wa u beetik u bintoʼon kʼaasileʼ (Salmos 19:7, 11). Le consejoʼob yanoʼob teʼ Bibliaoʼ maʼatech u kʼexpajal yéetel mantatsʼ ku yáantkoʼon ichil k-kuxtal.

Por ejemploeʼ ilawil le consejo yaan teʼ Proverbios 13:20: «Le máax ku máan yéetel máaxoʼob yaan u naʼatoʼobeʼ yaan u yantal u naʼat, pero le máax ku biskuba yéetel le j-maʼ naʼatoʼoboʼ yaan u bin kʼaasil tiʼ». Le consejoaʼ kex úuch tsʼíibtaʼakeʼ láayliʼ jach ku yáantaj teʼ kʼiinoʼobaʼ (ilawil le cuadro « Le consejoʼob ku tsʼáaik le Bibliaoʼ jeʼel u yáantkoʼoneʼ»).

Maʼ xaaneʼ ka tuklik: «¿Bix jeʼel in wojéeltik wa jach tu jaajil jeʼel u yáantken le consejoʼob ku tsʼáaik le Bibliaoʼ?». Teʼ xook ku segueroʼ yaan k-ilik bix tsʼoʼok u yáantik jujuntúul máakoʼob.

a U kʼaabaʼ Dioseʼ Jéeoba (Salmo 83:18).

BAʼAX KU YAʼALIK LE BIBLIAOʼ MAʼ TU MÁAN DE MODAIʼ

Kex tsʼoʼok u máan óoliʼ 2,000 años tsʼíibtaʼak le Bibliaoʼ láayliʼ ku meyajeʼ. Le baʼax ku tsʼíiboltik wíinikoʼ maʼ kʼexpajkiʼ, tuláakloʼon k-kʼáat ka yanaktoʼon kiʼimak óolal yéetel ka béeyak le baʼax k-tsʼíiboltikoʼ (Eclesiastés 1:9). Le Bibliaoʼ jeʼel u yáantkoʼoneʼ tumen le baʼax ku yaʼalikoʼ maʼ tu máan de modaiʼ.

Beet baʼax maʼalob

«K-kʼáat k-beet tuláakal baʼal tu nuʼuk» (Hebreos 13:18)
«Le máax ku yookoleʼ xuʼuluk u yookol, baʼaxeʼ ka u tsʼáa u yóol meyaj» (Efesios 4:28)

Bisaba yéetel u maasil

«Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintios 10:24)
«Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex» (Colosenses 3:13)

Chʼaʼ maʼalob decisiónoʼob

«Le máax maʼ jach yaan u naʼatoʼ ku creertik tuláakal baʼax ku yaʼalaʼal, pero le máax yaan u naʼatoʼ ku jach ilik tuʼux ku tsʼáaik u yook» (Proverbios 14:15)
«Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail» (Proverbios 22:3)

U testigoʼob Jéeoba