Bisaba maʼalob yéetel u maasil
Yaʼab máakeʼ talam u yilik u biskuba yéetel u maasil. Koʼox ilik jujunpʼéel tekstoʼob tiʼ le Biblia jeʼel u yáantkoʼon k-bisba maʼalob yéetel u maasiloʼ.
MAʼ A KAXTIK CHÉEN A WUTSIL
BAʼAX KU YAʼALIK LE BIBLIAOʼ: «Cada juntúul tiʼ teʼexeʼ maʼ u kaxtik chéen u yutsil, baʼaxeʼ u kaxt xan u yutsil u maasil» (Filiposiloʼob 2:4).
BAʼAX U KʼÁAT U YAʼALE: Le máax u kʼáat u bisuba maʼalob yéetel u maasiloʼ maʼ unaj u kaxtik chéen u yutsiliʼ, baʼaxeʼ unaj u kaxtik xan u yutsil u maasil. U tuukul máak chéen tu yoʼolaleʼ mix junpʼéel utsil ku taasik. Wa juntúul máax tsʼokaʼan u beel yéetel uts tu tʼaan u kaxtik chéen u yutsileʼ, kéen máanak kʼiineʼ jeʼel tak u tusik u núup yéetel yaanaleʼ. Le máax ku creerkuba yoʼolal le baʼaxoʼob yaantiʼ wa yoʼolal le baʼax u yojloʼ, yaan u kʼuchul u kʼiinil u pʼáatal minaʼan u amigoʼob. Jeʼex u yaʼalik le libro El camino del carácter mix junpʼéel utsil ku taasik u tuukul máak chéen tu yoʼolal.
BAʼAX JEʼEL U PÁAJTAL A BEETKEʼ:
-
Áant u maasil. Juntúul maʼalob amigoeʼ mantatsʼ jeʼel u páajtal a confiar tiʼeʼ yéetel jeʼel u yáantkech kéen kʼaʼabéetchajkeʼ. Tsʼoʼok u yilaʼaleʼ le máaxoʼob suuk u yáantkoʼob u maasiloʼ kiʼimak u yóoloʼob yéetel maʼ tu jáan tsaʼayal depresión tiʼob.
-
Tsʼáaba tu lugar u maasil. U tsʼáaikuba máak tu lugar u maasileʼ ku yáantaj utiaʼal u naʼatik bix u yuʼubikubaʼob. Lelaʼ yaan u yáantkoʼon utiaʼal k-kanáantik bix k-tʼaan wa utiaʼal maʼ k-aʼalik baʼaloʼob jeʼel u beetkoʼob u yaatal u yóol u maasileʼ.
U tsʼáaikuba máak tu lugar u maasileʼ ku yáantaj xan utiaʼal maʼ u jáan kʼuuxil. Le máaxoʼob beetik beyaʼ uts tu tʼaan u biskubaʼob yéetel tuláakal máak, kex jejeláas tuʼux u taaloʼob.
-
Máans tiempo yéetel u maasil. Utiaʼal a kʼaj óoltik maʼalob u maasileʼ jach kʼaʼabéet a máansik tiempo tu yéeteloʼob. Le maʼalob amigoʼoboʼ ku jóoʼskoʼob tiempo utiaʼal u múul tsikbaloʼob. Chʼenxikint baʼax ku yaʼalik a amigoʼob yéetel ilawil a wáantkoʼob yéetel baʼax ku yúuchultiʼob. Tsʼoʼok u yilaʼaleʼ le máaxoʼob «suuk u tsikbaloʼoboʼ maas kiʼimak u yóoloʼob».
YÉEY TUBEEL A AMIGOʼOB
BAʼAX KU YAʼALIK LE BIBLIAOʼ: «U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak» (1 Corintoiloʼob 15:33).
BAʼAX U KʼÁAT U YAʼALE: Le máaxoʼob yéetel k-bisikbaoʼ jeʼel u péeksikoʼon k-beet baʼax maʼalobeʼ wa baʼax kʼaaseʼ. Le máaxoʼob ku xokikoʼob bix u kuxtal máak yéetel bix u biskuba wíinikeʼ ku yaʼalikoʼobeʼ le amigoʼoboʼ yaʼab baʼax ku péeksikoʼob máak u beete. Ku yaʼalikoʼobeʼ wa juntúul a amigo ku tsʼuʼutsʼ chamal wa u divorciarmubaeʼ kéen máanak kʼiineʼ jeʼel a beetik xan beyoʼ.
BAʼAX JEʼEL U PÁAJTAL A BEETKEʼ: Bisaba yéetel máaxoʼob uts u modosoʼob yéetel ilawil xan a kuxtal jeʼex u beetkoʼoboʼ. Jeʼel u páajtal a biskaba yéetel máaxoʼob ku kanáantik baʼax ku beetkoʼob, ku yeʼeskoʼob tsiikil, ku yáantkoʼob u maasil yéetel maʼ tsʼuʼutoʼobiʼ.
ULÁAKʼ BAʼAX KU YAʼALIK LE BIBLIAOʼ
Chaʼant le videoʼob jóoʼsaʼan teʼ Bibliaoʼ, lelaʼ beetaʼan utiaʼal u maas biskuba maʼalob le tsʼokaʼan u beeloʼoboʼ, le táankelmoʼoboʼ bey xan le paalaloʼoboʼ
KANÁANT BIX A TʼAAN
«Yaan máaxoʼob ku beetkoʼob loob yéetel u tʼaanoʼob, baʼaleʼ [u] tʼaanoʼob le j-ojéeloʼoboʼ ku tsʼáaikoʼob toj óolal» (PROVERBIOS 12:18).
EʼES A WUTSIL
«Le máax maʼ tsʼuʼuteʼ ku bin utsil tiʼ» (PROVERBIOS 11:25, TNM).
TRATART U MAASIL JEʼEX A KʼÁAT KA U TRATARTECHOʼOBEʼ
«Tuláakal le baʼaxoʼob a kʼáateʼex ka beetaʼakteʼex tumen le máakoʼoboʼ, teʼexeʼ bey xan kʼaʼabéet a beetkeʼextiʼoboʼ» (MATEO 7:12).
Maʼ xaaneʼ jeʼel u yutstal xan ta wicheʼ
DIBUJOʼOB KU PÉEKOʼOB
¿Bix juntúul maʼalob amigo?
Jeʼel máaxak jeʼel u yaʼalik a amigoeʼ chéen baʼaleʼ, ¿jach wa tu jaajil a amigo?
BAʼALOʼOB KU NÚUKAʼAL TEʼ BIBLIAOʼ
¿Baʼax ku yaʼalik le Biblia yoʼolal u yantal u amigoʼob máakoʼ?
Le máaxoʼob yaan u amigoʼoboʼ maʼ tu yuʼubikoʼob wa tu juunaloʼob yanoʼob tumen u yojloʼob yaan u yáantaʼaloʼob kéen kʼaʼabéetchajak.
