«Tu yoʼolal chéen juntúul máak ook le kʼeban way yóokʼol kaab[oʼ], yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ» (ROMANOS 5:12).

Le wíinklil tu tsʼáaj Dios tiʼ Adán yéetel tiʼ Evaoʼ jach maʼalob, minaʼan kaʼach u kʼeban. Tu tsʼáaj tuʼux u kajtaloʼob, junpʼéel jatsʼuts paraíso tu kʼaabaʼtaj u jardínil Edén. Tu yaʼalaj xan tiʼob jeʼel u páajtal u jaantikoʼob u yich le cheʼob yaan teʼ jardínoʼ, chéen junkúul maʼ unaj u machkoʼobiʼ. Chéen baʼaleʼ Adán yéetel Evaeʼ maʼ tu beetoʼob le baʼax aʼalaʼabtiʼob tumen Diosoʼ, ka tu jaantoʼob u yich le cheʼ aʼalaʼabtiʼob maʼ u machkoʼoboʼ (Génesis 2:15-17; 3:1-19). Como maʼ tu yuʼuboʼob u tʼaan Dioseʼ jóoʼsaʼaboʼob teʼ jatsʼuts jardín tuʼux kajaʼanoʼob kaʼachoʼ. Desde teʼ kʼiin jeʼeloʼ jach yaachaj u kuxtaloʼob. Ka máan kʼiineʼ anchaj u paalaloʼob, letiʼobeʼ láayliʼ xan sufrirnajoʼobeʼ. Tsʼoʼoleʼ u paalaloʼob Adán yéetel Evaeʼ chʼíijoʼob yéetel kíimoʼob (Génesis 3:23; 5:5). Toʼon xaneʼ como u paalaloʼon Adán yéetel Evaeʼ, le oʼolal k-kʼojaʼantal, k-chʼíijil yéetel k-kíimil.

«U túulisil yóokʼol kaabeʼ tiaʼan yáanal u páajtalil le Kʼaasilbaʼaloʼ» (1 JUAN 5:19).

Le Kʼaasilbaʼal wa Satanásoʼ juntúul utsul ángel kaʼachi, pero tu tsʼáajuba tu contra Dios (Juan 8:44; Apocalipsis 12:9). Ka máan kʼiineʼ yaan ángeloʼob tu tsʼáajubaʼob xan tu tséel Satanás, tiʼ letiʼobeʼ ku yaʼalaʼal demonioʼob. Le kʼasaʼan demonioʼobaʼ ku usarkoʼob le poder yaantiʼoboʼ utiaʼal u tuskoʼob máak yéetel utiaʼal u beetkoʼob u creertaʼal minaʼan Dios.  Letiʼob xaneʼ ku túulchʼintkoʼob le máakoʼob utiaʼal u beetkoʼob baʼaloʼob kʼaastakoʼ (Salmo 106:35-38; 1 Timoteo 4:1). Satanás yéetel le demonioʼoboʼ jach ku kiʼimaktal u yóoloʼob kéen u yiloʼob bix u sufrir máak.

«Jeʼel baʼaxak ka u pakʼ máakeʼ le xan ken u joche» (GÁLATAS 6:7).

Tumen kʼebanoʼoneʼ yaan horaeʼ k-beetik baʼaloʼob maʼ maʼalobtakiʼ, le oʼolal yaan kʼiineʼ k-sufrir. Tsʼoʼoleʼ tuláakal máak ku sufrir tumen le yóokʼol kaabaʼ controlartaʼan tumen le Kʼaasilbaʼaloʼ yéetel yaan horaeʼ k-sufrir tu yoʼolal baʼaxoʼob k-beetik. Wa k-chʼaʼtuklik k-beetik baʼax maʼalobeʼ ku bintoʼon utsil pero wa k-chʼaʼtuklik k-beetik baʼax kʼaaseʼ ku bintoʼon kʼaasil. Por ejemploeʼ wa juntúul taatatsil ku beetik baʼax maʼalob, jach meeyjil yéetel u yaabiltmaj u yatan yéetel u paalaleʼ letiʼobeʼ yaan u kiʼimaktal u yóoloʼob. Pero wa le taatatsil maʼatech u kanáantik u taakʼin, ku káaltal yéetel maʼakʼóol meyajeʼ yaan u beetik u sufrir u familia tumen yaan u yóotsiltaloʼob. Le oʼolaleʼ wa k-kʼáat ka xiʼiktoʼon utsileʼ unaj k-chaʼik u nuʼuktikoʼon Dios. Letiʼeʼ u kʼáat ka xiʼiktoʼon utsil yéetel ka yanaktoʼon jeetsʼelil (Salmo 119:165).

«Tu tsʼook kʼiinoʼobeʼ [...] le máakoʼoboʼ yaan u kaxtikoʼob chéen u yutsiloʼob, yaan u yaabiltikoʼob taakʼin, [...] maʼ ken u yuʼuboʼob u tʼaan u taataʼob, [...] maʼ ken u kanoʼob u controlartubaʼob, jach yaan u tsʼíiktaloʼob, [yéetel] maʼ ken u yaabiltoʼob baʼax uts» (2 TIMOTEO 3:1-5).

Jeʼex u yaʼalmil le Bibliaoʼ tsʼoʼok u kʼastal u modos le máakoʼoboʼ, leloʼ ku yeʼesik kuxaʼanoʼon tu tsʼook u kʼiiniloʼob u kʼasaʼan yóokʼol kaab Satanás. Le Bibliaoʼ ku yaʼalik xaneʼ teʼ tu tsʼook kʼiinoʼoboʼ yaan u yantal guerraʼob, wiʼijil, jejeláas tuʼux ken u tíituba le luʼumoʼ yéetel yaan u yantal kʼaakʼas kʼojaʼaniloʼob (Mateo 24:3, 7, 8; Lucas 21:10, 11). Yoʼolal le baʼaxoʼob ku yúuchloʼobaʼ yaʼab máakoʼob ku sufriroʼob yéetel ku kíimloʼob.