Le ka máan wa jaypʼéel kʼiinoʼob xiʼik Jesús tu kʼiinbesajil le pascua tu jaʼabil 30, kʼaʼal cárcel Juan Bautista. Letiʼeʼ u kʼáat ka tsaypachtaʼak Jesús tumen u disipuloʼob, baʼaleʼ desde kʼaʼalak carceleʼ maʼ tuláakloʼob tsaypachtikiʼ.

Le táan u náatsʼal u kʼiinil le pascua tu jaʼabil 31, jujuntúul tiʼ u disipuloʼob Juaneʼ taaloʼob tu yiknal Jesuseʼ ka tu yaʼaloʼobtiʼ: «¿Baʼaxten toʼon yéetel le fariseoʼoboʼ k-ayunar, baʼaleʼ a disipuloʼobeʼ maʼatech u ayunaroʼob?» (Mateo 9:14). Le fariseoʼoboʼ ku táakbeskoʼob u ayunaroʼob ichil u adoracionoʼob. Juntéenjeakileʼ Jesuseʼ tu beetaj junpʼéel kettʼaan tuʼux tu chʼaʼchiʼitaj juntúul fariseo noj baʼal u yuʼubikuba, ka orarnajeʼ tu yaʼalaj: «In Dios, kin tsʼáaiktech gracias tumen maʼ beyen jeʼex le uláakʼ máakoʼob[oʼ] [...]. Kin ayunar kaʼatéen tiʼ junpʼéel semana» (Lucas 18:11, 12). Maʼ xaaneʼ u disipuloʼob Juaneʼ ku ayunaroʼob jeʼex suukil u beetik u maasil judíoʼoboʼ. Wa maʼ xaaneʼ ku ayunaroʼob tumen yaj tu yóoloʼob úuchik u kʼaʼalal cárcel Juan. Uláakʼ jujuntúul máakoʼobeʼ joʼopʼ u kʼáatkoʼob xan baʼaxten maʼatech u ayunar u disipuloʼob ­Jesús utiaʼal u yeʼeskoʼob yaj tu yóoloʼob xan úuchik u kʼaʼalal cárcel Juan.

Jesuseʼ tu núukajtiʼob yéetel junpʼéel kettʼaan: «U amigoʼob le noviotsiloʼ minaʼan baʼax oʼolal u yaatal u yóoloʼob le tiaʼan le noviotsil tu yiknaloʼoboʼ, ¿máasaʼ? Baʼaleʼ yaan u kʼuchul u kʼiinil u luʼsaʼal le noviotsil tiʼoboʼ; tiʼ túun kun ayunaroʼobiʼ» (Mateo 9:15).

Juaneʼ tsʼokaʼaniliʼ u yáax ketik Jesús yéetel juntúul noviotsileʼ (Juan 3:28, 29). Le tiaʼan Jesús yiknal u disipuloʼoboʼ maʼatech u ayunaroʼob. Baʼaleʼ le ka kíimeʼ yaachaj u yóoloʼob, le oʼolal ayunarnajoʼob. Baʼaleʼ kiʼimakchaj u yóoloʼob le ka kaʼa kuxkíintaʼaboʼ. Bey túunoʼ minaʼan baʼax oʼolal u seguer u ayunaroʼob.

Ka tsʼoʼokeʼ Jesuseʼ tu yaʼalajtiʼob uláakʼ kaʼapʼéel kettʼaanoʼob: «Mix máak ku pakʼakoktik junpʼéel úuchben nookʼ yéetel junxéetʼ túumben nookʼ, tumen ken u motsuba le túumben nookʼoʼ jeʼel u maas jenkʼesik u jaatlil le úuchbenoʼ. Mix máak xan ku tsʼáaik túumben vino tiʼ úuchben bolsaʼob de kʼéewel. Tumen wa ku tsʼáaikeʼ le bolsaʼoboʼ ku xíikloʼob yéetel ku wéekel le vinooʼ, le bolsaʼob túunoʼ ku kʼastaloʼob. Baʼaxeʼ le túumben vinooʼ ku tsʼaʼabal tiʼ túumben bolsaʼob de kʼéewel» (Mateo 9:16, 17). ¿Baʼax tu yóotaj u kaʼans Jesús yéetel lelaʼ?

Letiʼeʼ táan u yáantik u disipuloʼob Juan u naʼatoʼobeʼ mix máak unaj u yaʼalik tiʼ u disipuloʼob Jesús wa unaj u beetkoʼob le baʼaxoʼob suuk u beetik le judíoʼob, jeʼex le u ayunaroʼoboʼ. Letiʼeʼ maʼ taal u yutskíint mix u yaʼal ka seguertaʼak le úuchben bix u adorartaʼal Diosoʼ, tumen u yojel taʼaytak u xuʼulsaʼal. Le adoración tu kaʼansaj Jesusoʼ mix baʼal yaan u yil yéetel le baʼax suuk u beetik le judíoʼoboʼ. Letiʼeʼ maʼ taal u pakʼakokt junpʼéel úuchben nookʼ yéetel junxéetʼ túumben nookʼiʼ mix u tsʼáa túumben vino tiʼ úuchben bolsaʼob de kʼéeweliʼ.