1-3. ¿Baʼaxoʼob tu yilaj Pedro u beetik Jesús, yéetel baʼaxoʼob úuch ka áakʼabchaji?

 PEDROEʼ jach táan kaʼach u remar yéetel tuláakal u muukʼ ichil le éeʼjochʼeʼeniloʼ. Chéen ka tu jáan ilaj yaan baʼax ku manakʼ juul desde teʼ náachiloʼ. ¿Táan wa ta tʼaan u taal u sáastal? Letiʼeʼ tsʼoʼok kaʼach u sen yaatal u xiichʼeloʼob u puʼuch bey xan u keléembaloʼob tumen sáam káajak u remar. Le kʼaʼamkach iikʼ jatsʼik u yich Pedrooʼ táan kaʼach u beetik u woʼoltikuba u Kʼáaʼnáabil Galilea. Le olasoʼoboʼ kʼaʼam u pʼuʼupʼuchkubaʼob teʼ barcooʼ, le oʼolal Pedroeʼ tsʼoʼok u sen popoʼchʼuʼulul yéetel u síis jaʼil le kʼáaʼnáaboʼ, kex beyoʼ maʼ tu xuʼulul u remar.

² Kex yaan uláakʼ disipuloʼob yéetel Pedroeʼ, Jesuseʼ minaʼan tu yéeteloʼobiʼ. Teʼ kʼiin jeʼel xanoʼ, tu yiloʼob bix úuchik u tséentik Jesús u milesil máakoʼob wiʼijoʼob chéen yéetel junpʼíit waaj yéetel jujuntúul kayoʼob. Lelaʼ le péeks le máakoʼob utiaʼal ka taakchajak u beetkoʼob reyiloʼ, baʼaleʼ Jesuseʼ maʼ tu yóotaj u yoksuba tiʼ politicaiʼ. Úuchik u beetik beyaʼ tu kaʼansaj tiʼ u disipuloʼob baʼax xan maʼ unaj u beetkoʼobiʼ. Letiʼeʼ tu yilaj bix u púutsʼul tiʼ le yaʼabkach máakoʼoboʼ yéetel tu yaʼalaj tiʼ u disipuloʼob ka xiʼikoʼob tak tuláakʼ u tséel le kʼáaʼnáaboʼ. Letiʼ túuneʼ bin tu juunal payalchiʼ tiʼ junpʼéel puʼuk (Mar. 6:35-45; xok Juan 6:14-17).

³ Le ka jóokʼ le disipuloʼoboʼ kaʼanal yanik le lunaoʼ, baʼaleʼ beoraaʼ táan u bin u tʼúubul teʼ chikʼinoʼ. Letiʼobeʼ maʼ páajchajak u náachtaloʼobiʼ. Tumen jach kʼaʼam le iikʼ yéetel kʼaʼam u juum u olasil le jaʼoʼ, maʼ tu páajtal u yuʼubikoʼob baʼax ku yaʼalikoʼob tu baatsiloʼob. Le oʼolaleʼ maʼ xaaneʼ Pedroeʼ joʼopʼ u tuukul kaʼach tiʼ yaʼab baʼaloʼob.

4. ¿Baʼaxten jach yaʼab baʼaloʼob jeʼel k-kanik tiʼ le apóstol Pedrooʼ?

⁴ Jach yaan baʼaxoʼob u tukle tumen tsʼoʼok kaʼapʼéel jaʼaboʼob u kʼaj óolt Jesús le Nazaretiloʼ. Kex tsʼoʼok u yaʼabtal baʼax u kaneʼ, u yojel xan yaʼab baʼaloʼob ku bineltiktiʼ. Letiʼeʼ u kʼáat u beetuba juntúul maʼalob disipuloil tiʼ Cristo, lelaʼ letiʼe baʼax áant utiaʼal u xuʼulul u kaʼapʼéeltal  u tuukul yéetel u chʼaʼik saajkiloʼ. Le baʼaxoʼob tu beetaj le apostoloʼ jach yaʼab baʼaloʼob ku kaʼansiktoʼon. Koʼox ilik baʼaxten k-aʼalik beyoʼ.

5, 6. ¿Bix kuxlik kaʼach Pedro?

⁵ Pedroeʼ mix bikʼin tu tuʼubsaj le kʼiin ka tu kʼaj óoltaj Jesusoʼ. Andrés, u yíitsʼin Pedroeʼ, letiʼ le yáax máax aʼaltiʼ le tʼaanoʼobaʼ: «Tsʼoʼok k-kaxtik le Mesíasoʼ». Maʼ tu tuklaj wa jach yaan u kʼexpajal u kuxtal desde teʼ kʼiin jeʼeloʼ (Juan 1:41).

⁶ Pedroeʼ kajakbal kaʼach tu kaajil Capernaum, junpʼéel noj kaaj yaan tu jáal u Kʼáaʼnáabil Galilea, junpʼéel nuxiʼ áakʼal chʼujuk u jaʼil. Letiʼ yéetel Andreseʼ, chuk kay ku beetkoʼob yéetel Santiago bey xan Juan, u paalal Zebedeo. Tu yotoch Pedro yéetel u yataneʼ, tiʼ kajaʼan xan u suegra bey xan Andresiʼ. Utiaʼal u tsʼáaikoʼob baʼax kʼaʼabéet tiʼ u láakʼtsiloʼobeʼ, le j-chuk kayoʼoboʼ kʼaʼabéet jach meeyjil máakoʼob, muʼukʼaʼanoʼob yéetel u yojloʼob le meyajoʼ. Chéen tukle, yaʼab u téeneleʼ ku yantal u pʼáatloʼob bul áakʼab utiaʼal u pulik u redoʼob yéetel u jóoʼskoʼob le kayoʼob ku chukikoʼob yéetel u yáantaj uláakʼ barcooʼ. Tsʼoʼoleʼ ken sáaschajak xaneʼ ku yéeyikoʼob le kayoʼob ken u konoʼoboʼ, ku limpiartik u redoʼob bey xan ku chuykoʼob le tuʼux jaataloʼ.

7. ¿Baʼax aʼalaʼab tiʼ Pedro tumen Andrés, yéetel baʼaxten jach kiʼimakchaj u yóol u yojéeltik?

⁷ Le Bibliaoʼ ku yaʼalikeʼ Andreseʼ u disipulo kaʼach Juan Bautista. Maʼ xaaneʼ Pedroeʼ uts tu tʼaan u yuʼubik le baʼaxoʼob ku tsikbaltik Andrés yoʼolal le baʼaxoʼob ku kaʼansik Juanoʼ. Junpʼéel kʼiineʼ Andreseʼ tu yilaj u tuchʼubtaʼal Jesús tumen Juan, le táan u yaʼalik: «¡Ileʼex, u Taman Dios!». Desde teʼ súutuk jeʼeloʼ Andreseʼ káaj u láakʼintik Jesús, tsʼoʼoleʼ tu séebaʼanil bin u yaʼal tiʼ Pedro tsʼoʼok u kaxtik le Mesíasoʼ (Juan 1:35-41). Kex cuatro mil jaʼaboʼob táanil tiʼ lelaʼ, le ka tu tsʼáajuba le yáax máakoʼob tu contra Jéeobaoʼ, letiʼeʼ tu yaʼaleʼ yaan u túuxtik juntúul máax jeʼel páajtal u salvartik tuláakal máakeʼ (Gén. 3:15). Andreseʼ tsʼoʼok u kʼaj óoltik máax kun beetik leloʼ, le Mesías aʼalaʼanoʼ. Le ka tu yojéeltaj Pedroeʼ áalkabil binik u yil xan.

8. ¿Baʼax u kʼáat u yaʼal le kʼaabaʼ tu tsʼáaj Jesús tiʼ Pedrooʼ, yéetel baʼax ku yaʼalik jujuntúul máakoʼob tu yoʼolal le kʼaabaʼoʼ?

⁸ Teʼ kʼiinoʼoboʼ Pedroeʼ kʼaj óolaʼan kaʼach bey Simón wa Symeón. Baʼaleʼ le yáax ka ilaʼab tumen Jesusoʼ, letiʼeʼ tu yaʼalaj: «‹Techeʼ Simonech u paal Juan; techeʼ yaan a kʼaabaʼtaʼal Cefas› (lelaʼ u kʼáat u yaʼaleʼ Pedro)» (Juan 1:42). Le kʼaabaʼ «Cefasoʼ» u kʼáat u yaʼal «tuunich». Le baʼax tu yaʼalaj Jesusoʼ tu chíikbesaj le meyaj ken u beet Pedrooʼ. Jesuseʼ u yojel Pedroeʼ jeʼel u kʼuchul u beetuba bey jeʼex junpʼéel tuunicheʼ tumen mix máak ken u beet u kʼexik u tuukul, yaan u muʼukʼaʼantal u fe yéetel yaan xan u yáantik uláakʼ máaxoʼob tsaypachtik Cristo. ¿Bey wa u yuʼubikuba Pedro jeʼex tu yaʼalil Jesusoʼ? Maʼ xaaneʼ maʼatech. Yaʼab máakoʼobeʼ ken u xokoʼob le Evangelioʼoboʼ ku  yaʼalikoʼobeʼ mix baʼal eʼesik wa Pedroeʼ bey jeʼex junpʼéel tuunicheʼ. Baʼaxeʼ jeʼex u yaʼalik uláakʼ máakoʼobeʼ le baʼaxoʼob ku yaʼalik le Bibliaoʼ ku yeʼeskoʼob Pedro bey juntúul máak kaʼapʼéel u tuukuleʼ, mantatsʼ chiʼichnak yéetel maʼ u yojel baʼax u kʼáatiʼ.

9. ¿Baʼaxoʼob ku yilik Jéeoba yéetel Jesús, yéetel baʼaxten mantatsʼ unaj k-kʼaʼajsik le bix u yilkoʼob máakoʼ?

⁹ Jesuseʼ u yojel yaan baʼaloʼob maʼ jach maʼalobtak ku beetik kaʼach Pedroiʼ. Baʼaleʼ jeʼex Jéeobaeʼ, Jesuseʼ mantatsʼ táan u yilik le baʼaxoʼob maʼalobtak ku beetik máakoʼ. Le oʼolal u yojel yaʼab baʼaloʼob maʼalobtak jeʼel u beetik Pedroeʼ yéetel u kʼáat u yáant utiaʼal ka u jach eʼes le maʼalob modosoʼ. Bejlaʼa xaneʼ Jéeoba yéetel Jesuseʼ ku yilkoʼob le baʼaloʼob maʼalobtak k-beetkoʼ. Maʼ xaaneʼ yaan kʼiineʼ jeʼel k-tuklik mix baʼal maʼalob k-beetkeʼ. Wa bey k-uʼuyikbaoʼ unaj u kʼaʼajaltoʼoneʼ letiʼobeʼ ku yilkoʼob le baʼaloʼob maʼalobtak k-beetkoʼ; tsʼoʼoleʼ unaj k-chaʼik u kaʼanskoʼonoʼob yéetel u yáantkoʼonoʼob k-maʼalobkíint k-modos jeʼex tu beetil Pedroeʼ (xok 1 Juan 3:19, 20).

10. ¿Baʼaxoʼob tu yilaj Pedro u beetik Jesús, yéetel baʼax tu beetaj letiʼ?

¹⁰ Le ka tsʼoʼok u kʼaj óoltik Jesuseʼ maʼ xaaneʼ Pedroeʼ bin kʼaʼaytaj tu yéetel. Le oʼolaleʼ maʼ xaaneʼ tu yilaj le yáax milagro tu beetaj Jesús le ka tu sutaj vinoil le jaʼ tiʼ junpʼéel tsʼoʼokol beel anchaj tu kaajil Canaoʼ. U maas jatsʼutsileʼ tu yuʼubaj xan u kʼaʼaytik le baʼaxoʼob yaan yil yéetel u Reino Diosoʼ. Kex jatsʼuts u yilik yéetel u yuʼubik tuláakaleʼ, xuʼul u tsaypachtik Jesús yéetel suunaj tu negocioil le chuk kayoʼ. Ka máan wa jaypʼéel mesoʼobeʼ, Pedroeʼ tu kaʼa iluba yéetel Jesús, ka túun aʼalaʼabtiʼ ka u tsaypacht tuláakal u kʼiiniloʼob u kuxtal.

11, 12. 1) ¿Bix úuchik u bin tiʼ Pedro le ka bin chuk kay de áakʼaboʼ? 2) Le táan u chʼenxikintik Jesusoʼ, ¿baʼax kʼáatchiʼiloʼob máan wal tu tuukul Pedroeʼ?

¹¹ Jach kʼaas bix binik tiʼ Pedro ichil tuláakal le áakʼab táan u chukik kayoʼ. Letiʼ yéetel u yéet meyajoʼobeʼ yaʼab u téenel tu puloʼob ichil le kʼáaʼnáab u redil u chuk kayoʼoboʼ, baʼaleʼ mix baʼal tu jóoʼsoʼobiʼ. Tumen Pedro úuch káajak u chuk kayeʼ, maʼ xaaneʼ jejeláas tuʼuxoʼob tu pulaj u red yéetel jejeláas baʼaxoʼob tu beetaj utiaʼal u chukik le kayoʼoboʼ. Maʼ xaaneʼ Pedroeʼ taakchaj wal u yilik jach tuʼux ku máan le yaʼabkach kayoʼob ichil le jaʼ utiaʼal ka u yil bix ken u chukiloʼoboʼ. U sen tuukul tiʼ lelaʼ le beet wal u maas lúubul u yóoleʼ. Tsʼoʼoleʼ maʼ chéen ku bin chuk kay chéen tumen uts tu tʼaaniʼ, baʼaxeʼ ku beetik utiaʼal u tsʼáaik baʼax kʼaʼabéet tiʼ u láakʼtsiloʼob. Jach lubaʼan u yóol ka suunaji tumen maʼ tu chukaj mix baʼaliʼ. Le táan u limpiartik u redil u chuk kay tu jáal le kʼáaʼnáaboʼ, kʼuch Jesús tu yiknal.

¹² Yaʼab máakoʼob binoʼob kaʼach tu paach Jesús tumen u kʼáat u yuʼuboʼob baʼax ku kaʼansik. Le beetik naʼak tu barco Pedro ka túun tu yaʼalajtiʼ ka u chan náachkuntuba tiʼ le u jáal le jaʼoʼ. Lelaʼ tu beetaj utiaʼal u yuʼubaʼal tak náachil le baʼax ku kaʼansikoʼ. Le máaxoʼob yanoʼob  teʼ jáal jaʼ bey xan Pedroeʼ jach maʼalob úuchik u chʼenxikintikoʼob. Pedroeʼ mix juntéen náak u yóol u yuʼub u kaʼansaj Jesús yoʼolal u Reino Dios, le baʼax maas tu kʼaʼaytoʼ. ¿Máasaʼ jach jatsʼuts u páajtal u táakpajal máak yéetel Cristo utiaʼal u kʼaʼaytaʼal le maʼalob péektsilil tuláakal tuʼuxoʼ? Baʼaleʼ ¿jeʼel wa u páajtal kaʼach u beetik Pedroeʼ? ¿Bix ken u tsʼáa baʼax kʼaʼabéet tiʼ u láakʼtsiloʼoboʼ? Maʼ xaaneʼ taal tu tuukul le bix biniktiʼ teʼ áakʼab máan le ka pʼáat maʼ tu chukaj mix juntúul kayoʼ (Luc. 5:1-3).

13, 14. ¿Baʼax milagro tu beetaj Jesús tu yoʼolal Pedro yéetel u láakʼtsiloʼob, yéetel baʼax tu beetaj letiʼ yoʼolal le baʼax úuchoʼ?

¹³ Ka tsʼoʼok u kaʼansaj Jesuseʼ, tu yaʼalaj tiʼ Pedro: «Bis le barco tak teʼ tuʼux taamoʼ, ka a puleʼex a redeʼexiʼ, utiaʼal ka chuuknakeʼex». Kex Pedro maʼ jach u kʼáat kaʼacheʼ, tu yaʼalajtiʼ: «J-Kaʼansaj, bul áakʼab meyajnajoʼon baʼaleʼ maʼ t-chukaj mix baʼaliʼ, baʼaleʼ tumen teech aʼalikeʼ nikaʼaj in pul le redoʼoboʼ». Pedroeʼ maʼ u kʼáat kaʼach u pul u redil u chuk kayiʼ tumen maʼ sáam u limpiartiʼ yéetel tsʼoʼok u máan u yorail u chuʼukul le kayoʼ. Kex beyoʼ tu beetaj le baʼax aʼalaʼabtiʼoʼ yéetel maʼ xaaneʼ tu béechʼkʼabtaj le máakoʼob yanoʼob teʼ tuláakʼ barco ka xiʼikoʼob tu yéeteloʼ (Luc. 5:4, 5).

¹⁴ Le ka káaj u jóoʼskoʼob le redoʼ tu yuʼuboʼobeʼ jach aal yéetel jach jaʼakʼ u yóoloʼob ka tu yiloʼob jach táaj yaʼab kay tu chukoʼob. Tu séebaʼanil ka tu jáan kʼáatoʼob ka áantaʼakoʼob tumen le máaxoʼob yanoʼob tuláakʼ barcooʼ. Letiʼobeʼ tu tsʼáajoʼob cuenta maʼ ken u tsʼáa chéen yéetel junpʼéel barco. Tu chupoʼob tu kaʼapʼéelal, baʼaleʼ joʼopʼ tak u búululoʼob yoʼolal u sen yaʼabil le kayoʼoboʼ. Pedroeʼ jach jaʼakʼ u yóol yoʼolal le baʼax úuchoʼ. Kex u yáax ilmaj u beetik milagroʼob Cristoeʼ, le milagroaʼ beetaʼab tu yoʼolal letiʼ yéetel u láakʼtsiloʼob. ¡Pedroeʼ tiʼ yaan kaʼach yéetel juntúul máax yaan u páajtalil tiʼ u beetik u yokol le kayoʼob teʼ redoʼ! Tumen jach sajakchajeʼ, xolaj tu táan Jesuseʼ ka tu yaʼalajtiʼ: «Yuumtsil, náachkuntaba tiʼ teen, tumen kʼeban wíiniken». Jeʼex k-ilkoʼ Pedroeʼ ku yuʼubik kaʼach maʼ tu náajmatik u yantal tu yiknal le máax tsʼaʼan páajtalil tiʼ tumen Diosoʼ (xok Lucas 5:6-9).

15. ¿Jesuseʼ baʼax tu yaʼalaj tiʼ Pedro utiaʼal u xuʼulul u kaʼapʼéeltal u tuukul yéetel u chʼaʼik saajkil u beet le meyajoʼ?

¹⁵ Baʼaleʼ yéetel yaabilajeʼ Jesuseʼ tu yaʼalajtiʼ: «Maʼ a chʼaʼik saajkil. Desde bejlaʼeʼ yaan u káajal a chukik máakoʼob kuxaʼanoʼob» (Luc. 5:10). Lelaʼ maʼ u súutukil kaʼach utiaʼal u kaʼapʼéeltal u tuukul wa u chʼaʼik saajkil Pedroiʼ. Jesuseʼ táan kaʼach u yaʼaliktiʼ ka táakpajak u kʼaʼayt le maʼalob péektsiloʼ, le meyaj maas kʼaʼanaʼan u beetaʼaloʼ. Pedroeʼ minaʼan baʼax oʼolal u sajaktal ikil u tuklik bix ken u tsʼáa baʼaxoʼob kʼaʼabéet tiʼ u láakʼtsiloʼob. Mix junpʼéel utsil jeʼel u taasik tiʼ u chiʼichnakkúuntkuba yoʼolal baʼaxoʼob maʼ maʼalobtak u beetmaj wa tumen yaan baʼaxoʼob maʼ tu páajtal u beetkeʼ. Letiʼeʼ táan kaʼach u meyajtik juntúul Dios jach  «nojoch u saʼatsaj» (Isa. 55:7). Jéeobaeʼ jeʼel u páajtal u tsʼáaik tuláakal le baʼax kʼaʼabéet tiʼ Pedrooʼ bey xan tiʼ u láakʼtsiloʼob, tsʼoʼoleʼ yaan xan u yáantik teʼ kʼaʼaytajoʼ (Mat. 6:33).

16. ¿Baʼax tu chʼaʼtuklaj u beetik Pedro, Santiago yéetel Juan, yéetel baʼaxten k-aʼalik letiʼe baʼax maas maʼalob tu yéeyoʼoboʼ?

¹⁶ Pedroeʼ tu séebaʼanil tu yaʼalaj jeʼel u tsaypachtik Jesuseʼ, lelaʼ bey xan tu beetil Santiago yéetel Juan. Le Bibliaoʼ ku yaʼalikeʼ letiʼobeʼ «suunajoʼob yéetel le barcoʼob teʼ jáal jaʼoʼ, tu pʼatoʼob tuláakaleʼ, ka binoʼob tu paach Jesús» (Luc. 5:11). Pedro túuneʼ tu tsʼáaj u fe tiʼ Jesús bey xan tiʼ Jéeoba, le máax túuxtoʼ. Lelaʼ letiʼe baʼax maas maʼalob tu chʼaʼtuklaj u beetkoʼ. Bejlaʼa xaneʼ yaʼab tiʼ le máaxoʼob meyajtik Dios ku chʼaʼikoʼob kaʼach saajkil yéetel ku tuklikoʼob maʼ kun béeytal u beetkoʼob baʼax ku yaʼalikoʼ, ku tsʼáaik u fejoʼob tiʼ Jesús yéetel tiʼ Jéeoba. Letiʼobeʼ u yojloʼob mantatsʼ kun áantbiloʼob tumen Jéeoba (Sal. 22:4, 5).

17. ¿Baʼaxoʼob tsʼoʼok u yilik yéetel u yuʼubik Pedro ichil le kaʼapʼéel jaʼaboʼob u kʼaj óolt Jesusoʼ?

¹⁷ Tsʼoʼok u máan kex kaʼapʼéel jaʼaboʼob kʼaj óoltaʼak Jesús tumen Pedro. Jeʼex t-ilil tu káajbal le xookaʼ, letiʼ yéetel uláakʼ disipuloʼobeʼ jach istikyaj u remaroʼob tumen yaan junpʼéel kʼaʼamkach iikʼ tu Kʼáaʼnáabil Galilea. U jaajileʼ maʼ k-ojel jach baʼax ku máan tu tuukul Pedroiʼ, baʼaleʼ k-ojleʼ yaʼab baʼaloʼob tsʼoʼok u máansik ichil u kuxtal yéetel táan u kʼaʼajsik. Letiʼeʼ tsʼoʼok kaʼach u yilik u beetik yaʼab milagroʼob Jesús, jeʼex le ka tsʼaʼak u suegraoʼ. U yuʼubmaj xan baʼaxoʼob tu tsolaj Jesús tu Kaʼansajil le Puʼukoʼ. Tuláakal le baʼaxoʼob u yuʼubmaj yéetel u yilmaj Pedroaʼ le áant u yil Jesuseʼ letiʼ le Mesías yéeyaʼan tumen Jéeobaoʼ. Jeʼex máanik kʼiineʼ Pedroeʼ bey binik u maas maʼalobkíintik u modos yéetel xuʼul u chʼaʼik saajkil bey xan u kaʼapʼéeltal u tuukul. Le oʼolal yéeyaʼab tumen Jesús utiaʼal ka u beetuba juntúul tiʼ u 12 apostoloʼob. Baʼaleʼ jeʼex ken k-il beoraaʼ yaan uláakʼ baʼax ku bineltiktiʼ utiaʼal u maas maʼalobkíintik u modos.

18, 19. 1) Tsol baʼax tu yilaj Pedro tu Kʼáaʼnáabil Galilea. 2) ¿Baʼax tu yaʼalaj Jesús yoʼolal le baʼax tu kʼáataj Pedrooʼ?

¹⁸ Maʼ xaaneʼ junpʼíit maanal tiʼ láas tres áakʼab tak tu taal u sáastaleʼ, Pedroeʼ tu jáan xulaj u remareʼ ka waʼalaj u yil baʼax le ku léembal yóokʼol le jaʼoʼ. ¿Maʼ wa ta tʼaan u juul le luna beetik u léembal u yóom le jaʼoʼ? Maʼatech, tumen bey yaan baʼax ku taal yóokʼol le jaʼoʼ. Ka tu jach ileʼ, ¡juntúul máak! Tsʼoʼoleʼ táan u taal u xíimbal tu tojiloʼob yóokʼol le jaʼoʼ. Le disipuloʼoboʼ jach sajakchajoʼob tumen tu tukloʼob juntúul jaʼasaj óoleʼ. Baʼaleʼ le máakoʼ tu yaʼalajtiʼob: «¡Maʼ a sajaktaleʼex! Teen; maʼ a chʼaʼikeʼex saajkil». Le máak tu yiloʼoboʼ Jesús (Mat. 14:25-28).

¹⁹ Pedro túuneʼ tu núukajtiʼ: «Yuumtsil, wa jaaj teecheʼ, aʼalten ka taalaken ta wiknal tu yóokʼol le jaʼoʼ». Le baʼax tu jáan aʼaloʼ tu yeʼesaj xuʼul u sajaktal. Tumen jach kiʼimak u yóol u yilik jeʼel u páajtal u xíimbal máak yóokʼol le jaʼoʼ, letiʼeʼ taakchaj u beetik xan beyoʼ utiaʼal u maas muʼukʼaʼankúuntik u fe. Yéetel yaabilajeʼ Jesuseʼ tu yaʼalaj tiʼ Pedro ka xiʼik tu yiknal. Letiʼeʼ éem teʼ barcooʼ ka waʼalaj xan yóokʼol le kʼáaʼnáab táan u woʼoltikubaoʼ. ¡Chéen tukult bix tu yuʼubiluba Pedro ka tu yilaj maʼ tu búulul ichil le jaʼoʼ! Maʼ xaaneʼ yaʼab baʼaxoʼob ku máan tu tuukul le táan u bin yiknal Jesusoʼ. Baʼaleʼ yaan uláakʼ baʼax úuchtiʼ (xok Mateo 14:29).

20. 1) ¿Baʼax xuʼul u beetik Pedro, yéetel baʼax úuchtiʼ yoʼolal leloʼ? 2) ¿Baʼax tu yaʼalaj Jesús tiʼ Pedro utiaʼal u yeʼesik maʼ maʼalob úuchik u sajaktaliʼ?

²⁰ Pedroeʼ maʼ unaj kaʼach u luʼsik u paakat tiʼ Jesusiʼ. Yéetel le páajtalil tsʼaʼantiʼ tumen Jéeobaoʼ tu beetaj u xíimbal Pedro ichil le kʼáaʼnáab táan u woʼoltikubaoʼ. Jesuseʼ tu beetaj beyaʼ utiaʼal u muʼukʼaʼankúuntik u fe Pedro. Baʼaleʼ xuʼul u paktik Jesús. Le Bibliaoʼ ku yaʼalik: «Le ka tu yuʼubaj jach kʼaʼam le iikʼoʼ sajakchaji». Le ka tu yilaj Pedro  tuláakal baʼax ku yúuchul tu baʼpach, bukaʼaj nuuktakil u olasil le jaʼ táan u pʼuchkubaʼob teʼ barcooʼ, sajakchaji. Maʼ xaaneʼ Pedroeʼ tu tuklaj yaan u búulul yéetel tiʼ kun kíimiliʼ. Jeʼex úuchik u sajaktaleʼ bey xan úuchik u saʼatal u fe. Pedro, le máax keʼet yéetel junpʼéel tuunich tumen jach jeetsʼel u tuukuloʼ, káaj u búulul jeʼex junpʼéel tuunich ku puʼulul ichil le jaʼoʼ. Kex jach u yojel báabeʼ, yoʼolal u saajkileʼ, káaj u yawtik: «¡Yuumtsil, salvarteniʼ!». Jesús túuneʼ tu machaj tu kʼabeʼ ka tu jóoʼsaj. Utiaʼal u yeʼesik tiʼ Pedro maʼ maʼalob úuchik u sajaktaleʼ, le láayliʼ waʼalakbaloʼob yóokʼol le jaʼoʼ, Jesuseʼ tu yaʼalajtiʼ: «Jach túun junpʼíit a fe, ¿baʼaxten kaʼapʼéelchaj a tuukul?» (Mat. 14:30, 31).

21. ¿Baʼaxten maʼ maʼalob u kaʼapʼéeltal u tuukul máakiʼ, yéetel baʼax kun áantkoʼon utiaʼal maʼ u yúuchultoʼon beyoʼ?

²¹ Le baʼax tu yaʼalaj Jesús tiʼ Pedrooʼ, ku kaʼansiktoʼon junpʼéel baʼax jach jaaj: U sajaktal máak yéetel u kaʼapʼéeltal u tuukuleʼ jeʼel u beetik u bin kʼaasil tiʼeʼ. Leloʼ jeʼel u beetik u bin u saʼatal jujunpʼíitil k-fejeʼ tak ken u náachkuntoʼon tiʼ Dios. Le oʼolaleʼ maʼ unaj k-chʼaʼik saajkil, mix u kaʼapʼéeltal k-tuukuliʼ, baʼaxeʼ unaj k-chʼikik k-paakat tiʼ Jéeoba yéetel tiʼ u Hijo. Wa chéen k-tuukul tiʼ baʼaloʼob ku beetik k-chʼaʼik saajkil yéetel tiʼ baʼaloʼob ku lúuʼsik k-óol utiaʼal maʼ k-meyajtik Dios yéetel Jesuseʼ, yaan u káajal u kaʼapʼéeltal k-tuukul. Baʼaleʼ wa k-tuukul chéen tiʼ baʼaxoʼob tu beetaj Jéeoba yéetel Jesús úuchjeakil, tiʼ baʼaxoʼob táan u beetkoʼob bejlaʼa yéetel tiʼ baʼaxoʼob ken u beetoʼob maʼ kun xáantal tu yoʼolal le máaxoʼob u yaabiltmoʼoboʼ, yaan u maas muʼukʼaʼantal k-fe.

22. ¿Baʼaxten maʼalob ka k-il u yantaltoʼon junpʼéel fe jeʼex le anchaj tiʼ Pedrooʼ?

²² Jeʼex úuchik u bin Pedro tu paach Jesús yéetel u naʼakloʼob teʼ barcooʼ, tu yilaj bix binik u jéetsʼel le kʼaʼamkach iikʼoʼ. Ka tsʼoʼokeʼ pʼáat jejetsʼkil u Kʼáaʼnáabil Galilea. Pedro yéetel uláakʼ disipuloʼobeʼ tu yaʼaloʼob tiʼ Jesús: «Jach tu jaajil u Paalech Dios» (Mat. 14:33). Le baʼax úuch tiʼ Pedro le táan u taal u sáastalaʼ tu péeksaj u puksiʼikʼal utiaʼal ka u maas kʼub u yóol tiʼ Jéeoba yéetel tiʼ Jesús. Letiʼeʼ tu kanaj mix baʼal unaj u beetik u kaʼapʼéeltal u yóol yéetel u chʼaʼik saajkil. Baʼaleʼ yaʼab baʼaloʼob ku bineltik kaʼach tiʼ Pedro utiaʼal u kʼuchul u beetuba bey junpʼéel tuunich jeʼex aʼalaʼabiktiʼ tumen Jesuseʼ. Letiʼeʼ maʼ xuʼul u tsʼáaik u yóol utiaʼal u maas kaanbal yéetel u maas muʼukʼaʼantal u fejiʼ. Kux túun toʼon, ¿yaan wa k-chʼaʼtuklik k-beetik jeʼex letiʼoʼ? Jeʼex túun k-ilkoʼ jach maʼalob ka k-il u yantaltoʼon junpʼéel fe jeʼex le anchaj tiʼ Pedrooʼ.