1, 2. ¿Bix u kʼáat kaʼach Pedro ka kʼaʼamak tumen u yéet kaajaloʼob le baʼax ku kaʼansik Jesusoʼ, baʼaleʼ baʼax tu beetoʼob?

 PEDROEʼ jach chʼiikil u yil bix yanik u táan u yich le máaxoʼob uʼuyik baʼax ku kaʼansik Jesusoʼ. Tuláakloʼobeʼ tiʼ yanoʼob tu sinagogail Capernaumeʼ, teʼ kaajaʼ tiʼ yaan u yotoch Pedroiʼ yéetel tiʼ xan ku chuk kay tu jáal u xamanil u Kʼáaʼnáabil Galileaiʼ. Yaʼab xan tiʼ u amigoʼob, tiʼ u láakʼtsiloʼob yéetel tiʼ u yéet chuk kayoʼobeʼ tiʼ xan kajaʼanoʼobiʼ. Pedroeʼ u kʼáat kaʼach ka creertaʼak tumen u yéet kaajaloʼobeʼ, Jesuseʼ letiʼ le Mesíasoʼ bey xan ka u kʼamoʼob yéetel kiʼimak óolal u maʼalob péektsilil le Reino ku kʼaʼaytaʼal tumen le maas Nojoch j-Kaʼansajoʼ. Baʼaleʼ yaanal baʼax táan u beetik le máakoʼoboʼ.

² Yaʼab tiʼ letiʼobeʼ xuʼul u chʼenxikintikoʼob Jesús. Yaan xan tiʼ letiʼobeʼ joʼopʼ tak u yaʼalikoʼob kʼaas le baʼax ku kaʼansik Jesusoʼ. Baʼaleʼ le baʼax beet u maas péek u yóol Pedrooʼ letiʼe u yilik yaan tak tiʼ le máaxoʼob tsaypachtik Jesús káaj u tʼaanoʼob kʼaas xanoʼ. Chíikaʼan maʼ kiʼimak u yóoloʼob ikil u kankoʼob u jaajiliʼ. Chíikaʼan xan u yilaʼal tsʼoʼok u pʼuʼujuloʼob. Tu yaʼaloʼobeʼ jach kʼaas u yuʼubaʼal le baʼax ku kaʼansik Jesusoʼ yéetel maʼ tu páajtal u kʼaʼamal. Maʼ tu yóotoʼob u seguer u chʼenxikintikoʼob Jesusiʼ, lukʼoʼob teʼ sinagogaoʼ yéetel xuʼul u tsaypachtikoʼob (xok Juan 6:60, 66).

3. ¿Bix jejeláas úuchik u yáantaʼal Pedro tumen u fe?

³ Pedro yéetel le uláakʼ apostoloʼoboʼ maʼ chéen chʼaʼabil xan tu kʼamiloʼob le baʼax tu yuʼuboʼoboʼ. Pedroeʼ maʼ tu jach naʼataj le baʼax tu kaʼansaj Jesusoʼ. Maʼ xaaneʼ tak letiʼ ileʼ wa maʼ tu jach naʼatik máak le baʼax tu kaʼansaj Jesusoʼ jeʼel u tʼóochpajleʼ. ¿Baʼax ken u beet kaʼach Pedro? Jeʼex tsʼoʼok u yáax beetkeʼ unaj u seguer u yeʼesik chúukaʼan óolal. Koʼox ilik bix úuchik u yáantaʼal Pedro tumen u fe utiaʼal ka u aktáant le baʼax táan u yúuchloʼ yéetel ka u yeʼes chúukaʼan óolal.

4, 5. ¿Baʼaxten k-aʼalik le baʼaxoʼob tu yaʼalaj yéetel tu beetaj Jesusoʼ maʼ bey jeʼex u páaʼtik kaʼach le máakoʼoboʼ?

⁴ Maʼ chéen juntéen péeknaj u yóol Pedro yoʼolal le baʼax tu yaʼalaj yéetel tu beetaj u j-kaʼansajoʼ. Jesuseʼ yaʼab u téenel tu yaʼalaj yéetel tu beetaj baʼaloʼob maʼ bey jeʼex u páaʼtik kaʼach le máakoʼoboʼ.  Junpʼéel kʼiin táanil tiʼ lelaʼ, tu beetaj junpʼéel milagro utiaʼal u tséentik u milesil máakoʼob. Letiʼob túuneʼ tu yóotaj u beetoʼob reyil, baʼaleʼ Jesuseʼ tu beetaj junpʼéel baʼax maʼ táan u páaʼtkoʼobiʼ, púutsʼtiʼob yéetel tu yaʼalaj tiʼ u disipuloʼob ka naʼakakoʼob teʼ barcooʼ yéetel ka xiʼikoʼob Capernaum. Le táan u binoʼob de áakʼab teʼ kʼáaʼnáaboʼ, Jesuseʼ tu beetaj u kaʼa jaʼakʼal u yóol u disipuloʼob le ka tu yiloʼob táan u xíimbal yóokʼol u jaʼil u Kʼáaʼnáabil Galilea táan u woʼoltikubaoʼ. Teʼeloʼ tu kaʼansaj tiʼ Pedro u kʼaʼanaʼanil u yantal u fe.

⁵ Ka sáaschajeʼ tu séebaʼanil tu yiloʼob tsaypachtaʼaboʼob tumen le yaʼabkach máakoʼoboʼ. Baʼaleʼ tuláakloʼobeʼ binoʼob chéen tumen u kʼáatoʼob ka u beet Jesús uláakʼ milagro utiaʼal u kaʼa tséentaʼaloʼob, maʼ binoʼob tumen u kʼáatoʼob kaanbaliʼ. Le oʼolal Jesuseʼ tu kʼeʼeyoʼob tumen chéen táan kaʼach u kaxtik u yutsiloʼob (Juan 6:25-27). Tu sinagogail Capernaumeʼ, Jesuseʼ seguernaj u tʼaan tiʼ le baʼax tu yaʼalajtiʼoboʼ yéetel tu kaʼansaj junpʼéel baʼax beet u tsʼíikil le máakoʼoboʼ.

6. ¿Baʼax kettʼaanil tu beetaj Jesús, yéetel baʼax tu beetaj le máakoʼob uʼuyoʼ?

⁶ Jesuseʼ maʼ u kʼáat kaʼach ka tsaypachtaʼak tumen le máakoʼob chéen tumen jeʼel u tsʼáaik baʼal u jaantoʼobeʼ. Baʼaxeʼ u kʼáat kaʼach ka u naʼatoʼobeʼ Dioseʼ jeʼel u tsʼáaiktiʼob kuxtal minaʼan u xuul wa ku tsʼáaik u fejoʼob tiʼ u kuxtal Jesús ken u kʼuboʼ bey xan wa ku kuxtaloʼob jeʼex letiʼeʼ. Le oʼolal tu ketuba yéetel le maná wa waaj túuxtaʼab tumen Jéeoba desde teʼ kaʼan tu kʼiiniloʼob Moisesoʼ. Le ka tu yilaj yaan jujuntúuloʼob táan u tʼaanoʼobeʼ, ichil le kettʼaanoʼ tu yaʼaleʼ utiaʼal u yantal kuxtal minaʼan u xuul tiʼ máakeʼ unaj u jaantkoʼob u bakʼel yéetel u yukʼikoʼob u kʼiʼikʼel. Le ka tu yuʼubaj le máakoʼob lelaʼ jach pʼuʼujoʼob. Jujuntúuloʼobeʼ tu yaʼaloʼob: «Le kaʼansaj ku beetik le máakaʼ jach kʼaas u yuʼubaʼal, ¿máax jeʼel u páajtal u yuʼubikeʼ?». Yaʼab xan tiʼ u disipuloʼobeʼ xuʼul u tsaypachtikoʼob (Juan 6:48-60, 66). a

7, 8. 1) ¿Baʼax maʼ u naʼat kaʼach Pedro yaan yil yéetel Jesusiʼ? 2) ¿Bix tu núukil Pedro le baʼax tu kʼáataj Jesús tiʼ tuláakal le apostoloʼoboʼ?

⁷ ¿Baʼax tu beetaj Pedro? Maʼ xaaneʼ mix letiʼ naʼatik kaʼach le baʼax tu yaʼalaj Jesusoʼ, maʼ tu naʼatik unaj kaʼach u kíimil Jesús utiaʼal u béeytal le baʼax u tukultmaj Diosoʼ. ¿Tu tuklaj wa Pedro u xuʼulul u tsaypachtik Jesús jeʼex tu beetil le u maasil disipuloʼoboʼ? Maʼatech. Tiʼ Pedroeʼ yaan kaʼach junpʼéel jatsʼuts modos minaʼan tiʼ le uláakʼ máakoʼoboʼ, ¿máakalmáakiʼ?

⁸ Jesuseʼ tu paktaj u apostoloʼobeʼ ka tu kʼáatajtiʼob: «Teʼexeʼ maʼ a kʼáateʼex bin xaniʼ, ¿máasaʼ?» (Juan 6:67). Lelaʼ tiʼ le 12 apostoloʼob tu kʼáatoʼ, baʼaleʼ Pedro núuke. Tiʼ tuláakal le apostoloʼoboʼ, Pedroeʼ letiʼ le máax ku yáax tʼaanoʼ. Maʼ xaaneʼ bey u beetkoʼ tumen letiʼ le máax  maas yaan u jaʼabiloʼ. Jeʼel baʼaxak oʼolal ka u beeteʼ, maases letiʼ ku tʼaan. Chéen wa baʼax kʼiin maʼatech u yaʼalik baʼax ku tuklik. Teʼ kʼiinoʼ Pedroeʼ tu yaʼalaj le baʼax ku tuklikoʼ yéetel le baʼax tu yaʼaloʼ tak bejlaʼa ku kʼaʼajsaʼaleʼ: «Yuumtsil, ¿máax yiknal jeʼel k-bineʼ? Techeʼ ka kaʼansik baʼaloʼob ku bisik máak tiʼ kuxtal minaʼan u xuul» (Juan 6:68).

9. ¿Bix tu yeʼesil Pedro chúukaʼan u yóol tiʼ Jesús?

⁹ ¿Máasaʼ jach jatsʼuts le baʼax tu yaʼalaj le apóstol Pedrooʼ? Le fe yaan kaʼach tiʼoʼ le áant utiaʼal u yantaltiʼ le jatsʼuts modosaʼ: chúukaʼan óolal, lelaʼ junpʼéel baʼax jach kʼaʼanaʼan. Pedroeʼ tu tsʼáaj cuentaeʼ Jesuseʼ letiʼ le máax tsʼaʼan tumen Jéeoba utiaʼal u salvartik le máakoʼoboʼ yéetel utiaʼal u salvarkuba xaneʼ unaj kaʼach u chʼenxikintik u maʼalob péektsilil le Reinooʼ. Le oʼolaleʼ kex tumen yaan kʼiin maʼ tu naʼatik le baʼax ku yuʼubikoʼ, Pedroeʼ u yojleʼ chéen yéetel u yáantaj Jesús jeʼel u maas natsʼkuba tiʼ Dioseʼ yéetel chéen bey jeʼel u yantal kuxtal minaʼan u xuul tiʼoʼ.

10. ¿Bix jeʼel k-eʼesik chúukaʼan óolal jeʼex le tu yeʼesaj Pedrooʼ?

¹⁰ ¿Bey wa k-tuukul jeʼex Pedrooʼ? U jaajileʼ, teʼ kʼiinoʼobaʼ yaʼab máakoʼob ku yaʼalikoʼob u yaabiltmoʼob Jesús, baʼaleʼ maʼ chúukaʼan u yóoloʼob tiʼiʼ. Utiaʼal u chúukpajal k-óol k-tsaypachteʼ, unaj k-yaabiltik u kaʼansajoʼob jeʼex tu beetil Pedrooʼ. Utiaʼal leloʼ unaj k-kaanbal tiʼ, k-ilik k-naʼatik u kaʼansajoʼob yéetel k-kuxtal jeʼex letiʼ, kex tumen yaan hora maʼ t-jach naʼatik baʼax ku kaʼansik wa kex tumen bey maʼ jach maʼalob k-uʼuyikeʼ. Utiaʼal u tsʼaʼabaltoʼon le kuxtal minaʼan u xuul tumen Jesusoʼ, unaj u chúukpajal k-óol tiʼ yéetel k-kʼubik k-óol tiʼ letiʼ (xok salmo 97:10).

11. ¿Baʼax viajeil tu beetaj Jesús yéetel u disipuloʼob?

¹¹ Maʼ sáam tiʼ leloʼ, Jesús, u apostoloʼob yéetel jujuntúul tiʼ u disipuloʼobeʼ káaj u viajaroʼob tu bejil xaman. Desde tu azul jaʼiloʼob u Kʼáaʼnáabil Galileaeʼ ku páajtal u yilaʼal kaʼach u punta u puʼukil Hermón. Lelaʼ tiʼ yaan tu jáal u xamanil le Luʼum Aʼalaʼan u Tsʼaʼabal tiʼ le israelitaʼoboʼ. Jeʼex u bin u naʼakloʼob teʼ bejoʼob ku bisik máak tak teʼ mejen kaajoʼob yanoʼob naatsʼ tiʼ Cesarea tiʼ Filipoeʼ, bey xan u bin u yilkoʼob bukaʼaj nojchil le puʼukoʼ. Teʼ puʼukaʼ, le táan u yilkoʼob le Luʼum Aʼalaʼan u Tsʼaʼabaloʼ, Jesuseʼ tu beetaj junpʼéel jach maʼalob kʼáatchiʼ tiʼ u disipuloʼob.

12, 13. 1) ¿Baʼaxten u kʼáat kaʼach u yojéelt Jesús baʼax ku tuklik le máakoʼob tu yoʼolaloʼ? 2) ¿Bix tu yeʼesil Pedro jach tu jaajil yaan u fe yéetel le baʼax tu núukajoʼ?

¹² Jesuseʼ tu kʼáataj tiʼ u disipuloʼob: «Le máakoʼoboʼ, ¿máaxen u yaʼalikoʼob?». Máans ta tuukul bix u paktik Pedro u yich Jesús, letiʼeʼ ku páajtal u yilik kaʼach le naʼatil, le chʼaʼ óotsilil yéetel le nojoch páajtalil yaantiʼoʼ. Jesuseʼ u kʼáat u yojéelt baʼax ku yaʼalik le máakoʼob  tu yoʼolaloʼ. Le disipuloʼoboʼ tu núukoʼob le kʼáatchiʼoʼ, ka joʼopʼ u yaʼalikoʼob le jejeláas baʼaloʼob ku yaʼalaʼal yoʼolal máax Jesusoʼ. Baʼaleʼ letiʼeʼ yaan uláakʼ baʼax taak u yojéeltik. ¿Jach wa u yojel u disipuloʼob máax jach tu jaajil letiʼ? Letiʼeʼ tu kʼáatajtiʼob: «Baʼaleʼ teʼexeʼ, ¿máaxen a waʼalikeʼex?» (Luc. 9:18-20).

¹³ Jeʼex suuk u beetkeʼ, Pedroeʼ tu séebaʼanil tu núukaj le kʼáatchiʼoʼ. Le baʼax tu yaʼaloʼ, tu chíikbesaj le baʼax ku tuklik yaʼab tiʼ le yanoʼob kaʼach teʼeloʼ. Letiʼeʼ tu yaʼalaj: «Teech le Cristooʼ, u Paal le kuxaʼan Diosoʼ». Máans ta tuukul bix úuchik u paktaʼal Pedro yéetel kiʼimak óolal bey xan yéetel yaabilaj tumen Jesús, yéetel u yaʼalaʼal tiʼ jach maʼalob bix úuchik u núukil le kʼáatchiʼoʼ. Tsʼoʼoleʼ kʼaʼajsaʼab tiʼeʼ, chéen Jéeoba beetik u yojéeltik le máaxoʼob jach tu jaajil yaan u fejoʼob máax Jesusoʼ. Tsʼaʼab tiʼ Pedro u páajtalil u naʼatik junpʼéel tiʼ le kaʼansajoʼob maas kʼaʼanaʼantakoʼoboʼ: u yojéeltaʼal máax le Cristooʼ, le Mesías aʼalaʼan kun taaloʼ (xok Mateo 16:16, 17).

14. ¿Baʼax nojoch meyajil tsʼaʼab tiʼ Pedro tumen Jesús?

¹⁴ Le Cristoaʼ letiʼ le tuunich ku yaʼalik le profecíaʼob pʼektaʼab tumen le máaxoʼob beetik najoʼoboʼ (Sal. 118:22; Luc. 20:17). Tumen u kʼaj óol le profecíaʼoboʼ, Jesuseʼ tu yaʼaleʼ Jéeobaeʼ yaan u líiʼsik u múuchʼulil yóokʼol le nojoch tuunichoʼ. Jeʼex tu yaʼalaj Pedrooʼ le nojoch tuunichoʼ Cristo. Letiʼ túuneʼ tu tsʼáaj nojoch meyajoʼob u beet Pedro teʼ múuchʼuliloʼ. Jesuseʼ maʼ tu tsʼáaj Pedro u beet u maas nojchil ichil le apostoloʼob, jeʼex u kaʼansik u nuuktakil le religionoʼoboʼ, baʼaxeʼ tu tsʼáaj maas yaʼab meyaj u beete. Le Bibliaoʼ ku yaʼalikeʼ tu tsʼáajtiʼ «u llaveiloʼob u Reinoil kaʼan» (Mat. 16:18, 19). Lelaʼ u kʼáat u yaʼaleʼ Pedro kun tsʼáaik u páajtalil u yokol tu Reino Dios le óoxpʼéel jaats máakoʼobaʼ: yáaxeʼ le judíoʼob yéetel le máaxoʼob síijoʼob bey judíoʼoboʼ, uláakʼoʼ letiʼ le samaritanoʼoboʼ yéetel u tsʼookeʼ le maʼ judíoʼoboʼ (gentiloʼob).

15. Pedroeʼ, ¿baʼaxten tu kʼeyaj Jesús yéetel baʼax tu yaʼalajtiʼ?

¹⁵ Baʼaleʼ ka máan kʼiineʼ Jesuseʼ tu yaʼaleʼ tiʼ tuláakal le máax ku tsʼaʼabal yaʼab baʼaloʼoboʼ, maas yaʼab baʼaxoʼob xan kun kʼáatbiltiʼ, Pedroeʼ juntúul tiʼ le máakoʼobaʼ (Luc. 12:48). Jesuseʼ seguernaj u tsolik tiʼ u disipuloʼob baʼaloʼob jach jaajtak yéetel kʼaʼanaʼantak yaan yil yéetel le Mesíasoʼ. Tu yaʼalajtiʼobeʼ yaan u beetaʼal u muʼyaj yéetel yaan u kíimsaʼal tu kaajil Jerusalén. Le baʼax tu yaʼalaj Jesusoʼ maʼ maʼalob uʼuyaʼabik tumen Pedroiʼ. Letiʼ túuneʼ tu bisaj junpáayil Jesuseʼ ka joʼopʼ u kʼeyik táan u yaʼaliktiʼ: «Yuumtsil, chʼaʼtech óotsilil, lelaʼ junpuliʼ maʼ kun úuchultech» (Mat. 16:21, 22).

16. ¿Baʼax tu yaʼalaj Jesús tiʼ Pedro, yéetel baʼax k-kanik tiʼ le baʼax tu yaʼaloʼ?

 ¹⁶ Pedroeʼ tu tuklaj táan kaʼach u yáantik Jesuseʼ, le oʼolal jaʼakʼ u yóol le ka tu yuʼubaj le baʼax núukaʼabtiʼoʼ. Tu sutaj u paach tiʼeʼ, tu paktaj u maasil u disipuloʼob, maʼ xaaneʼ keet u tuukuloʼob yéetel Pedro, ka tu yaʼalaj: «¡Tselaba tin táan, Satanás! Techeʼ chéen táan a kʼatkaba tin beel tumen maʼ ta tuukul jeʼex u tuukul Dioseʼ, baʼaxeʼ jeʼex u tuukul wíinikeʼ» (Mat. 16:23; Mar. 8:32, 33). Yaʼab baʼaxoʼob jeʼel k-kanik tiʼ le baʼax tu yaʼalaj Jesusaʼ. Tu séebaʼanil jeʼel u xuʼulul k-tuukul jeʼex Dioseʼ ka joʼopʼok k-tuukul jeʼex máakoʼobeʼ. Wa ku yúuchultoʼon beyoʼ, kex tumen k-kʼáat áant wa máaxeʼ maʼ xaaneʼ jeʼel k-péeksik u beet baʼax uts tu tʼaan Satanaseʼ, maʼ baʼax u kʼáat Diosiʼ. Baʼaleʼ ¿baʼax tu beetaj Pedro úuchik u kʼeʼeyel?

17. ¿Baʼax tu yóotaj u yaʼal Jesús tiʼ Pedro le ka tu yaʼalajtiʼ: «tselaba tin táan»?

¹⁷ Pedroeʼ tu tsʼáaj cuenta maʼ táan u yaʼalaʼaltiʼ tumen Jesús jach letiʼ le Satanasoʼ. K-aʼalik beyaʼ tumen tiʼ Satanaseʼ, Jesuseʼ tu yaʼalaj: «Xeen»; baʼaleʼ tiʼ Pedroeʼ tu yaʼalaj: «Tselaba tin táan» (Mat. 4:10). Jesuseʼ maʼ táan kaʼach u yaʼalik tiʼ Pedro wa yaan u xuʼulul u beetik u apostolil kex tumen yaan baʼax maʼ maʼalob tu yilajtiʼiʼ, baʼaxeʼ chéen táan kaʼach u yáantik u kʼex le bix u tuukuloʼ. Jeʼex k-ilkoʼ le apostoloʼ unaj kaʼach u xuʼulul u kʼatik u beel Jesús yéetel unaj u líiʼsik u yóol u tsʼoʼokbes le baʼax túuxtaʼab u beetoʼ.

18. ¿Bix úuchik u yeʼesik chúukaʼan óolal Pedro, yéetel bix jeʼel k-beetik jeʼex letiʼeʼ?

¹⁸ ¿Tsʼíikilnaj wa Pedro, tu jóonkíintaj wa u yich, joʼopʼ wa tak u baʼateltʼaan yéetel Jesús? Maʼatech; letiʼeʼ yéetel kabal óolal tu kʼamaj le tsolnuʼuk tsʼaʼabtiʼoʼ. Tuláakal le máaxoʼob tsaypachtik Cristooʼ yaan kʼiineʼ ku kʼaʼabéettal u tsolnuʼuktaʼaloʼob. Utiaʼal k-jach maʼalob bisikba yéetel Jesucristo bey xan yéetel u Taataeʼ, unaj k-kʼamik le tsolnuʼukoʼob ku tsʼaʼabaltoʼonoʼ yéetel unaj k-ilik k-kaanbal tiʼob (xok Proverbios 4:13).

19. ¿Baʼax tu yaʼalaj Jesús tu beetaj u jaʼakʼal u yóol le disipuloʼoboʼ, yéetel baʼax wal tu tuklaj Pedroeʼ?

¹⁹ Jesuseʼ maʼ xáanchaj ka tu beetaj u kaʼa jaʼakʼal u yóol u disipuloʼob le ka tu yaʼalaj: «Tu jaajil kin waʼalikteʼexeʼ, yaan jujuntúul tiʼ le máaxoʼob waʼalakbaloʼob wayeʼ maʼ kun kíimloʼob táanil tiʼ u yilkoʼob u taal u Paal máak yéetel u Reino» (Mat. 16:28). Pedroeʼ jach tu yóotaj wal u yojéelt le máaxoʼob kun ilkoʼ. ¿Baʼax túun tu yóotaj u yaʼal Jesús? Tumen táant u kʼeʼeyleʼ, maʼ xaaneʼ Pedroeʼ tu tukleʼ maʼ kun antal ichil le máaxoʼob tu yaʼalaj Jesusoʼ.

20, 21. 1) Tsol baʼax tu yilaj Pedro u yúuchul. 2) Le baʼax tu tsikbaltaj Jesús yéetel le kaʼatúul máakoʼoboʼ, ¿bix tu yáantil Pedro u kʼex le bix u tuukuloʼ?

 ²⁰ Baʼaleʼ ka máan junpʼéel semanaeʼ, Jesuseʼ tu bisaj Pedro, Santiago yéetel Juan «tiʼ junpʼéel kaʼanal puʼuk», maʼ xaaneʼ tu puʼukil Hermón yaan kex 25 kilómetros náachil. Maʼ xaaneʼ lelaʼ tu beetaj de áakʼab, tumen le óoxtúul disipuloʼobaʼ jach táan kaʼach u kíimloʼob yéetel wenel. Baʼaleʼ le táan kaʼach u payalchiʼ Jesusoʼ, yaan junpʼéel baʼal úuch tu bisaj u weenloʼob (Mat. 17:1; Luc. 9:28, 29, 32).

²¹ Tu táanoʼobeʼ káaj u kʼexpajal le bix u yilaʼal Jesusoʼ. U táan u yicheʼ káaj u léembal, tak ka joʼopʼ u juul jeʼex le kʼiinoʼ. U nookʼ xaneʼ pʼáat jach sak táan u léembal. Tsʼoʼoleʼ ka chíikpaj bey kaʼatúul máakoʼobeʼ, juntúuleʼ chíikaʼan tiʼ Moisés yéetel uláakʼeʼ tiʼ Elías. Letiʼobeʼ táan kaʼach u tsikbaltikoʼob yéetel Jesús «le baʼaxoʼob ken u béeykunt [...] tu kaajil Jerusalén yaan yil yéetel u lukʼul way yóokʼol kaabeʼ», wa u kíimil yéetel u kaʼa kuxkíintaʼaloʼ. Pedroeʼ tu tsʼáaj cuenta maʼ maʼalob úuchik u tuklik maʼ tsaaj u muʼyaj yéetel u kíimil Jesusiʼ (Luc. 9:30, 31).

22, 23. 1) ¿Bix tu yeʼesil Pedro uts u puksiʼikʼal yéetel maʼ xuʼul u tsʼáaik u yóol u muʼukʼaʼankúunt u fejiʼ? 2) ¿Baʼax uláakʼ tu yiloʼob u yúuchul Pedro, Santiago yéetel Juan teʼ puʼukoʼ?

 ²² Pedroeʼ jach taakchaj u táakpajal ichil le baʼax táan kaʼach u yilkoʼ, yéetel maʼ xaaneʼ maʼ u kʼáat ka séeb tsʼoʼokkiʼ. Baʼaleʼ Moisés yéetel Elíaseʼ káaj bey u pʼatkoʼob Jesús, le oʼolal Pedroeʼ tu yaʼalaj: «J-Kaʼansaj, jach kiʼimak k-óol k-antal wayeʼ, le oʼolaleʼ koʼoneʼex beetik óoxpʼéel najoʼob de nookʼ: junpʼéel a tiaʼaliʼ, junpʼéel u tiaʼal Moisesiʼ, yéetel junpʼéel u tiaʼal Elíasiʼ». Baʼaleʼ le kaʼatúul máakoʼob tu yilaj Pedro teʼ náayoʼ, chéen táan kaʼach u chíikbeskoʼob kaʼatúul máaxoʼob tu meyajtoʼob Dios úuch kíimkoʼob, yéetel maʼ tsaaj u beetaʼal tuʼux u pʼáatloʼobiʼ. Pedroeʼ maʼ tu tsʼáaj cuenta baʼax ku yaʼalikiʼ. Kex beyoʼ, ¿máasaʼ k-yaabiltmaj tumen tu yeʼesaj uts u puksiʼikʼal yéetel maʼ xuʼul u tsʼáaik u yóol u muʼukʼaʼankúunt u fejiʼ? (Luc. 9:33).

²³ Láayliʼ teʼ áakʼaboʼ, Pedro, Santiago yéetel Juaneʼ yaan uláakʼ baʼax tu yiloʼob u yúuchul. Teʼ puʼukoʼ, tu yóokʼol u pooloʼobeʼ chíikpaj junpʼéel múuyaliʼ. Tiʼ le múuyaloʼ jóokʼ junpʼéel tʼaan tu yaʼalaj: «Lelaʼ in Paal, le máax tsʼoʼok u yéeyaʼaloʼ. Uʼuyeʼex u tʼaan». Le tʼaan uʼuyaʼaboʼ, u tʼaan Jéeoba Dios. Bey tsʼoʼokik túun le náayoʼ, yéetel le óoxtúul disipuloʼobaʼ pʼáatoʼob tu juunaloʼob tu kaʼatéen yéetel Jesús teʼ puʼukoʼ (Luc. 9:34-36).

24. 1) ¿Bix áantaʼabik Pedro tumen le chíikulal tu yiloʼ? 2) Le chíikulal tu yilaj Pedrooʼ, ¿bix u yáantkoʼon bejlaʼeʼ?

²⁴ Le chíikulal tu yilaj Pedrooʼ, ¡bey junpʼéel nojoch siibal tu yilileʼ yéetel bey xan k-ilik toʼonoʼ! Ka máan yaʼab jaʼaboʼobeʼ tsʼíibnaj yoʼolal le jatsʼuts páajtalil tsʼaʼabtiʼ utiaʼal u yilik bix le nojoch páajtalil kun tsʼaabil tiʼ Jesús ken u beet u Reyil teʼ kaʼanoʼ; letiʼeʼ tu yaʼalaj: «Yéetel k-ich t-ilaj le u kiʼichkelmil Yuumtsil táan k-tsikbaltikoʼ». Le chíikulaloʼ tu béeykuntaj yaʼab tiʼ le profecíaʼob ku chíikpajloʼob teʼ Bibliaoʼ yéetel tu maas muʼukʼaʼankúuntaj u fe Pedro utiaʼal u chúukpajal u yóol u aktáant le uláakʼ túuntajiloʼob ken u máansoʼ (xok 2 Pedro 1:16-19). Le chíikulaloʼ jeʼel u yáantkoʼon jeʼex tu beetil yéetel Pedrooʼ. Tsʼoʼoleʼ yaan k-kʼamik le utsiloʼob ken u taas u Reino Dios wa ku chúukpajal k-óol bey xan wa k-kaambal tiʼ Jesús, le máax tsʼaʼan tumen Jéeoba utiaʼal u nuʼuktikoʼonoʼ. Tsʼoʼoleʼ unaj xan k-kʼamik u tsolnuʼukoʼob yéetel maʼ u xuʼulul k-tsaypachtik yéetel kabal óolal.