¿Baʼax jach tu jaajil ku kaʼansik le Bibliaoʼ?

Le adoración kʼamaʼan tumen Diosoʼ

maaya
Le adoración kʼamaʼan tumen Diosoʼ
https://cms-imgp.jw-cdn.org/img/p/1102005145/univ/art/1102005145_univ_sqr_xl.jpg
bh xookil 15

U QUINCE XOOKIL

Le adoración kʼamaʼan tumen Diosoʼ

Le adoración kʼamaʼan tumen Diosoʼ
  • ¿Kʼamaʼan wa tuláakal religión tumen Dios?

  • ¿Bix jeʼel k-kʼaj óoltik máakalmáak le religión kʼamaʼan tumen Diosoʼ?

  • Teʼ kʼiinoʼobaʼ, ¿máaxoʼob meyajtik Dios jeʼex utstutʼaaneʼ?

1. ¿Baʼax utsiloʼob ken k-kʼam wa k-adorartik Dios jeʼex utstutʼaaneʼ?

 JÉEOBAEʼ jach u yaabiltmoʼon yéetel u kʼáat ka k-jóoʼs utsil tiʼ u nuʼuktaj. Wa k-adorartik jeʼex utstutʼaaneʼ, jach yaan u yantaltoʼon kiʼimak óolal yéetel yaan k-náachtal tiʼ yaʼab talamiloʼob. Yaan xan k-kʼamik u yáantaj (Isaías 48:17). Baʼaleʼ jach yaʼabach religionoʼob yaan. Kex tuláakloʼob aʼalik ku kaʼanskoʼob u jaajileʼ, maʼ upʼéeliliʼ baʼax ku kaʼanskoʼob yoʼolal Diosiʼ mix bix unaj u adorartaʼaliʼ.

2. ¿Bix jeʼel a wojéeltik bix unaj u adorartaʼal Jéeobaeʼ, yéetel bix jeʼel a ketikeʼ?

2 ¿Bix jeʼel a wojéeltik bix kʼaʼabéet u adorartaʼal Jéeobaeʼ? Maʼ kʼaʼabéet a kanik baʼax ku kaʼansik tuláakal religión utiaʼal a ketik u kaʼansajoʼobiʼ. Chéen unaj a kanik jach baʼax ku kaʼansik le Biblia tiʼ bix le adoración kʼamaʼan tumen Diosoʼ. Koʼox ketik beyaʼ: yaʼab tuʼuxeʼ jach yaan taakʼin falsotak. Tukult túuneʼ ku yaʼalaltech ka yéey le jach taakʼin tiʼ le maʼ jaajtakoʼ. ¿Bix jeʼel a kʼaj óoltik máakalmáak le jach taakʼin tiʼ le maʼatechoʼ? ¿Kʼaʼabéet wa a kanik jach bix cada upʼéel taakʼin falso? Maʼatech. Maas maʼalob ka kan a kʼaj óolt bix le jach taakʼinoʼ. Ken a kan a beeteʼ yaan u páajtal a kʼaj óoltik le jach taakʼin tiʼ le maʼatechoʼ. Ken xan a kʼaj óolt bix le adoración kʼamaʼan tumen Diosoʼ yaan xan u páajtal a kʼaj óoltik máakalmáak le maʼ kʼamaʼanoʼ.

3. ¿Baʼax tu yaʼalaj Jesús unaj k-beetik utiaʼal k-kʼaʼamal tumen Dios?

3 Jach kʼaʼabéet k-adorartik Jéeoba jeʼex utstutʼaaneʼ. Yaʼab máax tuklikeʼ tuláakal le religionoʼoboʼ kʼamaʼanoʼob tumen Dios, baʼaleʼ maʼ bey u kaʼansik le Bibliaoʼ. Maʼ xan chéen unaj k-aʼalik k-creertik Cristoiʼ, tumen letiʼeʼ tu yaʼalaj: «Maʼ tuláakal le máaxoʼob ku yaʼalikoʼob ten: Yuumtsil, Yuumtsil, bíin oojkoʼob tu [reinoi kaʼaniʼ], baʼaleʼ chéen le máaxoʼob ku beetikoʼob [baʼax u kʼáat] in Taata yaan teʼ j-kaʼanoʼ». Le beetikeʼ utiaʼal k-kʼaʼamal tumen Dioseʼ kʼaʼabéet k-kanik yéetel k-beetik baʼax u kʼáat. Jesuseʼ tu yaʼaleʼ, máaxoʼob maʼ tu beetkoʼob baʼax u kʼáat Dioseʼ, táan u beetkoʼob «baʼaloʼob kʼaastak» (Mateo 7:21-23). Jeʼex upʼéel taakʼin falso maʼ tu kʼaʼamleʼ, bey xan le religionoʼob minaʼan u jaajil tiʼoboʼ. Baʼaleʼ maʼ chéen leloʼ, jach ku beetkoʼob kʼaas tiʼ máak.

4. ¿Baʼax u kʼáat u yaʼal le kaʼapʼéel bej tu yaʼalaj Jesusoʼ, yéetel cada upʼéeleʼ tuʼux ku bisik máak?

4 Jéeobaeʼ u kʼáat ka yanak kuxtal minaʼan u xuul tiʼ tuláakal máak. Baʼaleʼ utiaʼal ka kuxlakoʼon teʼ Paraíso utiaʼal minaʼan u xuuloʼ, unaj k-beetik baʼax utstutʼaan. Yaʼab máakeʼ maʼ tu yóotik u beet lelaʼ, le oʼolal Jesuseʼ tu yaʼalaj: «Ookeneʼex tiʼ le nuʼunutʼ jool najoʼ. Tumen kóoch le jool naj bey xan le bej ku bíin tiʼ xuʼulsajiloʼ, yéetel yaʼab máakoʼob ku yookloʼobiʼ; baʼaleʼ nuʼutʼ le jool naj bey xan le bej ku bin tiʼ kuxtaloʼ, yéetel jach jumpʼíit máakoʼob [kaxtik]» (Mateo 7:13, 14). Lelaʼ ku yeʼesikeʼ le adoración kʼamaʼan tumen Diosoʼ ku bisik máak tiʼ kuxtal, le maʼatechoʼ tiʼ kíimil. Baʼaleʼ Jéeobaeʼ maʼ u kʼáat ka kíimik mix máakiʼ, le oʼolal táan u yáantik tuláakal máak utiaʼal ka kʼaj óoltaʼak (2 Pedro 3:9). K-ilik túuneʼ le bix k-adorartik Diosoʼ jeʼel u biskoʼon tiʼ kuxtal wa tiʼ kíimileʼ.

¿BIX JEʼEL K-KʼAJ ÓOLTIK MÁAKALMÁAK LE RELIGIÓN KʼAMAʼAN TUMEN DIOSOʼ?

5. ¿Bix jeʼel k-kʼaj óoltik máaxoʼob beetik baʼax utstutʼaan Dioseʼ?

5 ¿Bix jeʼel k-kʼaj óoltik «le bej ku bin tiʼ kuxtaloʼ»? Jesuseʼ tu yaʼaleʼ jeʼel u páajtal k-kʼaj óoltik máaxoʼob beetik baʼax utstutʼaan Dios wa k-ilik bix u kuxtaloʼobeʼ. Jesuseʼ tu yaʼalaj: «Jeʼel u páajtal a kʼaj óoltikeʼexoʼobeʼ tu yoʼolal baʼax ku beetikoʼob», tumen «tuláakal maʼalob cheʼeʼ ku tsʼáaik maʼalob ich» (Mateo 7:16, 17). Máaxoʼob túun beetik baʼax utstutʼaan Dioseʼ séeb u kʼaj óoltaʼaloʼob yoʼolal baʼax ku kaʼanskoʼob yéetel yoʼolal baʼax ku beetkoʼob. Kex kʼeban wíinkoʼob yéetel yaan xan kʼiin ku beetkoʼob baʼax maʼ maʼalobeʼ, tuláakloʼob táan u yilik u beetkoʼob baʼax u kʼáat Dios. Koʼox ilik seis baʼaloʼob jeʼel u yáantkoʼon kʼaj óoltoʼobeʼ.

6, 7. ¿Bix u yilaʼal le Biblia tumen máaxoʼob meyajtik Dios jeʼex utstutʼaanoʼ, yéetel tuʼux tu jóoʼsaj u kaʼansajoʼob Jesús?

6 U kaʼansajoʼobeʼ teʼ Biblia u taaloʼ. U Tʼaan Dioseʼ ku yaʼalik: «Tuláakal Kiliʼich Tsʼíibeʼ Jajal Dios j-tsáaj tiʼ tuukul utiaʼal ka tsʼíibtaʼak, maʼalob xan utiaʼal kaʼansaj, utiaʼal kʼeyaj, utiaʼal tojkinaj yéetel utiaʼal tsol xikin tiʼ jumpʼéel toj kuxtal, utiaʼal beyoʼ le máak utiaʼal Jajal Diosoʼ ka utsil chúukaʼanchajak yéetel nuʼukaʼan[chajak] utiaʼal [...] tuláakal [...] maʼalob meyaj» (2 Timoteo 3:16, 17). Le apóstol Pablooʼ tu tsʼíibtaj tiʼ le tesalonicailoʼoboʼ: «Le ka ta wuʼuyajeʼex u maʼalob péektsil Jajal Dioseʼ, [...] ta kʼamajeʼex jeʼel bix u maʼalob péektsil [wa u tʼaan] Jajal Dioseʼ maʼ jeʼel bix u maʼalob péektsil [wa u tʼaan] máakoʼobeʼ» (1 Tesalonicailoʼob 2:13). Le beetik túuneʼ le baʼaxoʼob ku kaʼansik yéetel ku beetik máaxoʼob meyajtik Dios jeʼex utstutʼaaneʼ maʼ chéen tiʼ u tuukul wíinikoʼob u taaliʼ mix chéen tiʼ baʼaloʼob suukaʼan u beetaʼaliʼ. Tiʼ u taal tiʼ u Tʼaan Dios, le Bibliaoʼ.

7 Jesuseʼ tiʼ u Tʼaan Dios tu jóoʼsaj baʼax tu kaʼansaj. Utéenjeakileʼ tu yaʼalaj tiʼ u Taata yaan teʼ kaʼanoʼ: «A tʼaaneʼ letiʼ u jaajil» (Juan 17:17, Le Tumben Nuptʼan, LTN). Jesús kaʼacheʼ u yojel jaaj baʼax ku yaʼalik le Kiliʼich Tsʼíiboʼoboʼ, yéetel mix utéen tu kaʼansaj upʼéel baʼal tiaʼan tu contra u Tʼaan Dioseʼ. Suuk u yaʼalik kaʼachi: «Le Kiliʼich Tsʼíiboʼ ku yaʼalik», tsʼoʼoleʼ ku chʼaʼachiʼitik upʼéel teksto tiʼ le Bibliaoʼ (Mateo 4:4, 7, 10). Bejlaʼa xaneʼ máaxoʼob meyajtik Dios jeʼex utstutʼaaneʼ maʼ chéen tu tuukul ku jóoʼskoʼob baʼax ku kaʼanskoʼobiʼ; teʼ Biblia ku jóoʼskoʼoboʼ, tumen u yojloʼobeʼ u Tʼaan Dios.

8. ¿Baʼax ku beetik máaxoʼob meyajtik Dios jeʼex utstutʼaaneʼ?

8 Chéen Jéeoba ku adorartikoʼob, yéetel ku tsʼáaikoʼob kʼaj óolbil u kʼaabaʼ. Jesuseʼ tu kaʼansaj: «[Adorart] Yuumtsil [wa «Jéeoba», Nuevo Mundo, NM] a Jajal Dios, meyajt xan chéen letiʼ» (Mateo 4:10). Máaxoʼob túun beetik baʼax utstutʼaan Dioseʼ ku adorarkoʼob chéen Jéeoba, mix máak uláakʼ. Ku tsʼáaikoʼob xan kʼaj óoltbil u kʼaabaʼ yéetel bix letiʼ. Salmo 83:18 (NM) ku yaʼalik: «A kʼaabaʼeʼ Jéeoba, chéen teech u Sen Kaʼanlil yóokʼol tuláakal le luʼumaʼ». Jesuseʼ tu tsʼáaj kʼaj óolbil u kʼaabaʼ Dios. Letiʼeʼ tu yaʼalaj tiʼ u Taata: «Tsʼoʼok in chíikbes[i]k [wa in tsʼáaik kʼaj óolbil] a kʼaabaʼ tiʼ le máakoʼob ta tsʼáajoʼob ten way yóokʼol kaab[eʼ]» (Juan 17:6). Jeʼex xan Jesuseʼ, le máaxoʼob beetik baʼax utstutʼaan Dioseʼ, ku tsʼáaikoʼob kʼaj óolbil u kʼaabaʼ Dios, baʼaxoʼob ken u beete yéetel bix letiʼ.

9, 10. Le máaxoʼob meyajtik Dios jeʼex utstutʼaaneʼ, ¿bix u yeʼesik u yaabilaj ichiloʼob?

9 Ku yaabiltikubaʼob jach tu jaajil, minaʼan pʼektajil ichiloʼob. Jesuseʼ tu yaʼalaj: «Wa ka yaabiltkabaʼex ta baatsileʼexeʼ tuláakal yóokʼol kaab [ken] u kʼaj óolteʼ teʼexeʼ in j-kaambaleʼex» (Juan 13:35). U yáax disipuloʼob Cristoeʼ bey u yaabilkubaʼob kaʼachoʼ. Le yaabilaj túun yaan ichil le máaxoʼob meyajtik Dios jeʼex utstutʼaanoʼ ku beetik maʼ u pʼektikubaʼob yoʼolal mix baʼal yéetel ku beetik u yilkubaʼob jach bey sukuʼuntsiloʼobeʼ (Colosailoʼob 3:14). Ichil le religionoʼob minaʼan u jaajil tiʼoboʼ, maʼ tu yilaʼal le yaabilaj jeʼelaʼ. Wa u yaabiltmubaʼobeʼ bejlaʼa maʼ tu paklan kíimskubaʼob yoʼolal tumen yaanal u luʼumoʼob wa u razaʼobeʼ. Le máaxoʼob meyajtik Dios jeʼex utstutʼaanoʼ maʼatech u kíimsik u yéet religioniloʼob mix xan uláakʼ máakoʼob. Le Bibliaoʼ ku yaʼalik: «Ojéelaʼan máaxoʼob u paalaloʼob Jajal Dios yéetel máaxoʼob u paalaloʼob kʼaasibaʼal, tumen jeʼel máaxak maʼ táan u beetik baʼax tojeʼ, mix táan u yaabiltik u sukuʼuneʼ, maʼ utiaʼal Jajal Diosiʼ [...]. Maʼ unaj k-béeytal jeʼel bix Caineʼ máax utiaʼal kʼaasibaʼaleʼ ka tu kíimsaj u yíitsʼin» (1 Juan 3:10-12; 4:20, 21).

10 Baʼaleʼ le máaxoʼob meyajtik Dios jeʼex utstutʼaaneʼ maʼ chéen maʼ tu kíimskoʼob u yéet máakiloʼobiʼ, ku yeʼesik u yaabilaj ichiloʼob. Ku paklan áantikubaʼob yéetel ku paklan líiʼsik u yóoloʼob. (Hebreob 10:24, 25). Ku yáantkubaʼob ken máankoʼob tiʼ nojoch talamiloʼob yéetel maʼatech u tuusoʼob mix xan tu yookoloʼob. Ku beetkoʼob xan «uts tiʼ tuláakal» máak, tumen bey u yaʼalik le Bibliaoʼ (Galaciailoʼob 6:10).

11. ¿Baʼaxten kʼaʼabéet kʼamik Jesucristoeʼ letiʼ le máax tsʼaʼan tumen Dios utiaʼal u salvarkoʼonoʼ?

11 Ku kʼamkoʼob Jesucristo letiʼ le máax tsʼaʼan tumen Dios utiaʼal u salvartaʼaloʼoboʼ. Le Bibliaoʼ ku kaʼansikeʼ «minaʼan uláakʼ máak ku tsʼáaik» salvación, tumen minaʼan «uláakʼ kʼaabaʼ way yóokʼol kaab» tsʼaʼan utiaʼal u salvarkoʼoneʼ (Beetaʼanoʼob 4:12). Jeʼex t-ilaj teʼ 5 xookoʼ, Jesuseʼ tu tsʼáaj u kuxtal utiaʼal u salvartik tuláakal máak ku yuʼubik u tʼaan Dios (Mateo 20:28). Jéeoba xaneʼ tsʼoʼok u beetik reyil Jesús teʼ kaʼan utiaʼal u gobernartik tuláakal le Luʼumaʼ. Le oʼolal ku páaʼtik ka k-beet baʼax ku yaʼalik Jesús. Chéen jaʼali bey jeʼel k-kʼamik le kuxtal minaʼan u xuuloʼ. Le Bibliaoʼ ku yaʼalik: «Le máax ku yoksik u yóol tiʼ le Paal[oʼ], yaan kuxtal [minaʼan u xuul tiʼ]; baʼaleʼ le máax ku maʼ uʼuyajtʼantik le Paal[oʼ], maʼ bin u yilaʼa kuxtaliʼ» (Juan 3:36, LTN).

12. ¿Bix jeʼel k-eʼesik maʼatech k-táakpajal teʼ yóokʼol kaabaʼ?

12 Maʼ tu táakpajloʼob teʼ yóokʼol kaabaʼ. Le táan kaʼach u juzgartaʼal Jesús tumen Pilato, u gobernadori Romaeʼ, Jesuseʼ tu yaʼalaj tiʼ: «In [reinoeʼ] maʼ yóokʼol kaabiliʼ» (Juan 18:36). Le máaxoʼob meyajtik Dios jeʼex utstutʼaaneʼ, kex jeʼel tuʼuxak kajaʼanoʼobeʼ, ku yantaloʼob yáanal u Reino Cristo. Le oʼolal maʼ tu yokskubaʼob tiʼ política mix tiʼ u baʼateliloʼob le yóokʼol kaabaʼ, mix xan tu tsʼáaikubaʼob tu tséel wa tu contra mix máak. Baʼaleʼ wa yaan máax u kʼáat u yoksuba tiʼ upʼéel partido, wa u báaxtik política wa u jóokʼol votareʼ, letiʼobeʼ maʼ tu tsʼáaikubaʼob tu contra. Kex xan maʼ tu tsʼáaikubaʼob tu tséel wa tu contra le gobiernoʼoboʼ, ku beetkoʼob baʼax ku yaʼalik. ¿Baʼaxten? Tumen le Bibliaoʼ ku yaʼalik: «Tuláakal máak unaj u yantal tu yáanal u páajtalil le jalach wíinikoʼoboʼ» (Romailoʼob 13:1). Baʼaleʼ wa le gobiernoʼob ku kʼáatkoʼob upʼéel baʼal tiaʼan tu contra baʼax ku yaʼalik Dioseʼ, letiʼobeʼ ku beetkoʼob jeʼex le apostoloʼob le ka tu yaʼaloʼob: «Unaj k-uʼuyik u tʼaan Jajal Dios, táanil tiʼ u tʼaan máakoʼob» (Beetaʼanoʼob 5:29; Marcos 12:17).

13. Le máaxoʼob táan u kuxtaloʼob jeʼex tu kaʼansil Cristoeʼ, ¿baʼax u yojloʼob tiʼ u Reino Dios, yéetel baʼax ku beetkoʼob?

13 Ku kʼaʼaytikoʼob chéen u Reino Dios kun utskíintik u talamiloʼob wíinik. Jesuseʼ tu yaʼalaj: «U maʼalob péektsil le [reinooʼ] bíin [kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14). Máaxoʼob táan u kuxtaloʼob jeʼex tu kaʼansil Cristoeʼ maʼ tu yaʼalkoʼob tiʼ le máakoʼob wa le gobiernoʼob kun utskíintik u talamiloʼob wíinikoʼ. Baʼaxeʼ ku kʼaʼaytikoʼob chéen u Reino Dios kun utskíintik le talamiloʼoboʼ (Salmo 146:3). Jesuseʼ tu kaʼansoʼon k-kʼáat ka taalak le jach maʼalob gobiernoaʼ. Letiʼeʼ tiaʼalaj: «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ j-kaʼanoʼ» (Mateo 6:10). Le Bibliaoʼ ku yaʼalikeʼ u Reino Dios yaan teʼ kaʼanoʼ «yaan u xuʼulsik jumpuliʼ» tuláakal le gobiernoʼob yaan teʼ kʼiinoʼobaʼ yéetel «bíin pʼáatak utiaʼal minaʼan u xuul» (Daniel 2:44).

14. Techeʼ, ¿máaxoʼob ka wilik táan u beetkoʼob le baʼax ku páaʼtaʼal tiʼ le religión kʼamaʼan tumen Diosoʼ?

14 Yoʼolal le baʼaxoʼob tsʼoʼok k-ilkaʼ, jeʼel u páajtal a beetik le kʼáatchiʼobaʼ: «¿Máaxoʼob teʼ Biblia u taal tuláakal baʼax ku kaʼanskoʼoboʼ yéetel ku tsʼáaikoʼob ojéelbil u kʼaabaʼ Dioseʼ Jéeoba? ¿Máaxoʼob ka wilik jach u yaabiltmubaʼob tu baatsiloʼob, jach u yoksmaj u yóoloʼob tiʼ Jesús yéetel maʼatech u táakpajloʼob teʼ yóokʼol kaabaʼ? ¿Máaxoʼob kʼaʼaytik chéen u Reino Dios kun luʼsik le talamiloʼoboʼ? Tiʼ tuláakal le religionoʼoboʼ, ¿chéen máaxoʼob beetik lelaʼ?». Tuláakal eʼesikeʼ chéen u j-jaajkunajoʼob Jéeoba (Isaías 43:10-12).

TECHEʼ, ¿BAʼAX KEN A BEETE?

15. ¿Baʼaxten maʼ chéen unaj k-ojéeltik yaan Diosiʼ?

15 Maʼ chéen unaj k-ojéeltik yaan Diosiʼ. Le Bibliaoʼ ku yaʼalikeʼ le kʼasaʼan angeloʼoboʼ u yojloʼob yaan Dios, baʼaleʼ maʼatech u beetkoʼob baʼax utstutʼaan mix xan kʼamaʼanoʼob tumen letiʼ (Santiago 2:19). Utiaʼal túun kiʼimakkúuntik u yóol Dioseʼ maʼ chéen unaj k-ojéeltik yaniʼ, kʼaʼabéet k-beetik baʼax u kʼáat. Kʼaʼabéet xan k-jóokʼol tiʼ le adoración maʼ kʼamaʼan tumen Diosoʼ yéetel k-okol ichil le kʼamaʼanoʼ.

16. ¿Baʼax unaj k-beetik utiaʼal maʼ k-táakpajal ichil le adoración maʼ kʼamaʼan tumen Diosoʼ?

16 Le apóstol Pablooʼ tu yaʼalaj maʼ unaj k-táakpajal tiʼ le adoración maʼ kʼamaʼan tumen Diosoʼ. Letiʼeʼ tu tsʼíibtaj: «Jóokʼeneʼex ichiloʼob yéetel tselabaʼexiʼ; maʼ a machikeʼex baʼal [kʼaschajaʼan], bey túunoʼ teneʼ jeʼel in kʼamikeʼexeʼ» (2 Corintoiloʼob 6:17; Isaías 52:11). Le máaxoʼob túun beetik baʼax utstutʼaan Dioseʼ maʼatech u táakpajloʼob tiʼ mix baʼal yaan u yil yéetel le adoración maʼ kʼamaʼan tumen letiʼoʼ.

17, 18. ¿Baʼax le «nojoch Babiloniaoʼ», yéetel baʼaxten jach kʼaʼabéet u séeb jóokʼol máak ichil?

17 Le Bibliaoʼ ku yeʼesikeʼ tuláakal le religionoʼob minaʼan u jaajil tiʼoboʼ táakaʼanoʼob ichil «le nojoch Babilonia[oʼ]» (Apocalipsis 17:5). a Le kʼaabaʼ jeʼelaʼ ku kʼaʼajsiktoʼon u yúuchben kaajil Babilonia, le tuʼux káaj le adoración maʼ kʼambeʼen tu táan Dios le ka tsʼoʼok le Búulkabal tu kʼiiniloʼob Noeoʼ. Yaʼab kaʼansajoʼob yéetel baʼaxoʼob suukaʼan u beetaʼal ichil le religionoʼob bejlaʼoʼ tiʼ u taaloʼob tiʼ le úuchben kaajaʼ. U kajnáaliloʼob kaʼacheʼ ku adorarkoʼob trinidadoʼob wa óoxtúul diosoʼob ichil utúul; bejlaʼa xaneʼ u nojoch kaʼansaj yaʼab religionoʼobeʼ letiʼe u kaʼansajil le Trinidadoʼ. Baʼaleʼ le Bibliaoʼ ku kaʼansikeʼ chéen utúul u Dios yaan: Jéeoba, yéetel Jesucristoeʼ u Hijo (Juan 17:3). Le babilonioʼob xanoʼ ku tuklikoʼob kaʼacheʼ yaan baʼax ku pʼáatal kuxaʼanil tiʼ máak ken kíimik le wíinkliloʼ yéetel jeʼel bin u muʼyaj tiʼ upʼéel infiernoeʼ. Bejlaʼa xaneʼ óoliʼ tuláakal le religionoʼoboʼ bey xan u kaʼanskoʼoboʼ.

18 Le kaʼansajoʼob yaan kaʼach tu yúuchben kaajil Babiloniaoʼ kʼiʼitpaj tuláakal tuʼux way Luʼumeʼ. Le oʼolal k-aʼalikeʼ le Nojoch Babilonia bejlaʼoʼ letiʼe tuláakal le religionoʼob minaʼan u jaajil tiʼoboʼ. Baʼaleʼ Dioseʼ tsʼoʼok u yaʼalik chéen ken jáan xuʼulsaʼak le Nojoch Babiloniaoʼ (Apocalipsis 18:8). ¿Ka naʼatik wa túun baʼaxten jach kʼaʼabéet maʼ u yantal mix baʼal a wil tu yéetel? Jéeobaeʼ u kʼáat ka séeb jóoʼkech ichil, utiaʼal maʼ kʼamik le xuʼulsajil ku taal tu yóokʼoloʼ (Apocalipsis 18:4).

Ken joʼopʼok a múul meyajtik Jéeoba yéetel u kaajaleʼ, maas yaʼab baʼaloʼob ken a kʼam tiʼ le jeʼel a peʼertikoʼ

19. ¿Baʼax ken a kʼam wa ku káajal a meyajtik Jéeoba?

19 Ken a tukult a pʼatik le adoración maʼ kʼamaʼan tumen Diosoʼ, maʼ xaaneʼ yaan máaxoʼob kun jáawal u biskubaʼob ta wéetel. Baʼaleʼ wa ku káajal a múul meyajtik Jéeoba yéetel u kaajaleʼ, maas yaʼab baʼaloʼob ken a kʼam tiʼ le jeʼel a peʼertikoʼ. Jeʼex úuch yéetel u yáax disipuloʼob Jesuseʼ, teech xaneʼ kex ka yanak a pʼatik yaʼab baʼaloʼobeʼ, ken a nupaba yéetel le máaxoʼob táan u meyajtikoʼob Dios jeʼex utstutʼaanoʼ yaan u yantal yaʼab a sukuʼunoʼob yéetel a kiikoʼob. Yaan a wokol bey tiʼ upʼéel nojoch familia tuʼux táakaʼan u millonesi máakoʼob táan u kuxtaloʼob jeʼex u kʼáat Dioseʼ yéetel yaan u yeʼeskoʼobtech u yaabilajoʼob. Jeʼel xan u páajtal a páaʼtik a kuxtal utiaʼal mantatsʼ teʼ túumben yóokʼol kaab kun yantaloʼ (Marcos 10:28-30). Maʼ xaan xaneʼ, ken máanak kʼiineʼ, le máaxoʼob jeʼel u náachtaloʼob tiʼ teech yoʼolal baʼaxoʼob ka creertik bejlaʼeʼ, jeʼel u kankoʼob baʼax ku kaʼansik le Bibliaoʼ yéetel jeʼel u káajal u meyajkoʼob Jéeobaeʼ.

20. ¿Baʼax ku páaʼtik máaxoʼob beetik baʼax utstutʼaan Dios?

20 Le Bibliaoʼ ku kaʼansikeʼ Dioseʼ taʼaytak u xuʼulsik le kʼasaʼan yóokʼol kaabaʼ, yéetel yaan u tsʼáaik upʼéel túumben yóokʼol kaab yáanal u Reino Cristo (2 Pedro 3:9, 13). ¡Bukaʼaj wal jaʼtsil le túumben yóokʼol kaab kun antaloʼ! Ichileʼ chéen upʼéel religión kun antaliʼ, chéen le adoración kʼamaʼan tumen Diosoʼ. A tuklikeʼ, ¿maʼ wa maʼalob ka káajak a muchʼkaba yéetel le máaxoʼob táan u beetkoʼob baʼax utstutʼaan Diosoʼ?

a Teʼ tipʼaʼanil «¿Baʼax le Nojoch Babiloniaoʼ?», ku tsoʼolol baʼaxten le Nojoch Babiloniaoʼ u kʼáat u yaʼal tuláakal le religionoʼob minaʼan u jaajil tiʼoboʼ.