¿AWOJEL wa máax le chaambalaʼ? Jesús. Táant u síijil teʼ tuʼux ku kʼalaʼal baʼalcheʼoboʼ. Maríaeʼ táan u chikúuntik Jesús tuʼux ku tsʼaʼabal u yoʼoch le baʼalcheʼoboʼ. Baʼaleʼ ¿baʼaxten tiaʼanoʼob María yéetel José teʼ kúuchilaʼ? Lelaʼ maʼ u kúuchil utiaʼal u síijil chaambaliʼ, ¿máasaʼ?

U jaajileʼ maʼatech. Baʼaleʼ, letiʼobeʼ tiaʼanoʼob teʼelaʼ tumen César Augusto, u jalaʼachil Romaeʼ, tiaʼalaj tiʼe máakoʼob ku gobernartikoʼ ka suunakoʼob tu kaajaloʼob u tsʼíibt u kʼaabaʼob tiʼ upʼéel libro. Joseiʼ tiʼ sijnal tu kaajil Beleneʼ. Baʼaleʼ, ka kʼuch yéetel Maríaeʼ, maʼ yanchaj naj utiaʼal u kʼubéentkubaʼobiʼ. Le beetik yanchaj u taaloʼob teʼ tuʼux yaan le baʼalcheʼobaʼ. ¡Jach tiʼe kʼiin jeʼeloʼ síij Jesús! Kex beyoʼ Jesuseʼ jach tʼaʼaj u yilaʼal.

¿Táan wa wilik le j-kanan tamanoʼob ku taal u yiloʼob Jesusoʼ? Tiʼe áakʼaboʼ, letiʼobeʼ tiaʼanoʼob kaʼach teʼ kʼáax tuʼux ku kanáantik u yalakʼ tamanoʼoboʼ, chéen ka tu yiloʼob u chíikpajal upʼéel sáasil tu baʼpaachoʼob. ¡Utúul ángel! Le j-kanan tamanoʼob túunoʼ jach jaʼakʼ yóoloʼob. Baʼaleʼ le ángeloʼ tiaʼalajtiʼob: ¡Maʼ sajaktaleʼex! Tin taasaj teʼex maʼalob péektsiloʼob. Bejlaʼa tu kaajil Beleneʼ, tsʼoʼok u síijil Cristo, le Yuumtsiloʼ. ¡Letiʼ kun salvartik le kaajoʼ! Yaan a wilkeʼex báatsʼtepʼtaʼan yéetel nookʼoʼob yéetel chikúuntaʼan teʼ tuʼux ku tsʼaʼabal yoʼoch le baʼalcheʼoboʼ. Teʼ súutuk xanoʼ kʼuch yaʼab ángeloʼobeʼ ka joʼopʼ u kiʼikiʼtʼantkoʼob Dios. Le j-kanan tamanoʼob túunoʼ binoʼob tu séebaʼanil u kaxtoʼob Jesús, jeʼex a wilik teʼ dibujoaʼ tsʼoʼok u kʼuchloʼobiʼ.

¿A wojel wa baʼaxten minaʼan uláakʼ máak jeʼex Jesuseʼ? ¿A wojel wa máax tu jaajil letiʼ? Kʼaʼajaktecheʼ, teʼ yáax tsikbalil yaan teʼ libroaʼ t-kanaj tiʼ u yáax Paal Dios. Letiʼeʼ múul meyajnaj yéetel Jéeoba ka tu beetoʼob le Luʼum yéetel u maasil baʼaloʼoboʼ. ¡Le yáax Paalaʼ, Jesús!

Jéeobaeʼ tu chʼaʼaj u kuxtal u Paal teʼ kaʼanoʼ ka tu máansaj tu jobnel María. Bey túunoʼ ich u jobnel Maríaeʼ, joʼopʼ u nojochtal utúul chaambal jeʼex u nojochtal u maasil chaambaloʼob ich u jobnel u mamaʼobeʼ. Baʼaleʼ, le chaambalaʼ u Paal Dios. Letiʼeʼ síij tiʼ upʼéel kúuchil tuʼux ku kʼalaʼal baʼalcheʼob tu kaajil Belén. ¿Táan wa naʼatik túun baʼaxten jach kiʼimak u yóol le ángeloʼob ka tu yaʼaloʼob tiʼe máakoʼob tsʼoʼok u síijil Jesusoʼ?