Baʼax ku taasik

•  U tʼaaniloʼob u káajbal 2

•  Jatsʼuts baʼaloʼob k-kanik teʼ Bibliaoʼ 3-5

  •  Discurso 3

  •  Baʼax jeʼel u páajtal k-kanikeʼ 4

  •  U xookil le Bibliaoʼ 5

•  Kaʼansajnakoʼon maʼalob 6-14

  •  Káajs a tsikbal 7

  •  Beet revisitaʼob 8

  •  Beet discípuloʼob 9

  •  Tsol baʼax ka creertik 10

  •  Discurso 11

  •  Tuʼux kun chʼaʼabil le informaciónoʼ 12

  •  Bix jeʼel u máansaʼal junpʼéel jaatseʼ 13

  •  Bix unaj u meyaj le videoʼob yéetel le publicaciónoʼoboʼ 14

•  Kuxlakoʼon jeʼex Cristoeʼ 15, 16

  •  U xookil le Biblia teʼ múuchʼuliloʼ 16

•  U tʼaaniloʼob u tsʼoʼokbal 17

•  Tsolnuʼuk yéetel u líiʼsaʼal u yóol máak 18

•  Tiempo 19

•  Superintendente tiʼ circuito 20

•  U semanail asamblea 21

•  U semanail Kʼaʼajsajil 22

•  U superintendenteil le reunión Kuxtal yéetel Meyajoʼ 23

•  Le sukuʼun nuʼuktik le reuniónoʼ 24

•  Máax tsʼáaik consejo 25

•  Sala B 26

•  Videoʼob 27

1. Le baʼax ku yaʼalaʼal teʼelaʼ yaan u yáantik le máaxoʼob ku táakpajloʼob teʼ reunión Kuxtal yéetel Meyaj jeʼex Cristoeʼ. Utiaʼal u yilik máak bix unaj u máansik le jaats tocado tiʼoʼ unaj u xakʼaltik le U juʼunil xookoʼ bey xan le baʼax ku yaʼalaʼal teʼelaʼ. Unaj u animartaʼal tuláakal le publicadoroʼob utiaʼal ka táakpajkoʼob teʼ jaatsoʼob utiaʼal u maas kanik máak predicaroʼ. Le máaxoʼob suuk u binoʼob reuniónoʼ jeʼel xan u páajtal u táakpajloʼob wa ku creerkoʼob baʼax ku yaʼalik le Biblia bey xan wa ku beetkoʼob le baʼax ku kankoʼoboʼ. Wa juntúul máax maʼ publicador ku yaʼalik taak u máansik junpʼéel jaatseʼ, u superintendenteil le reunión Kuxtal yéetel Meyajoʼ unaj u xakʼaltik le requisitos tu yéeteloʼ. Le kéen tsʼoʼokkeʼ unaj u yaʼaliktiʼ wa jeʼel u páajtaleʼ wa maʼ. Lelaʼ unaj u beetaʼal tu táan le máax tsʼáaik xooktiʼoʼ (wa tu táan u papá wa u maama ku meyajtik Jéeoba). Le requisitoʼoboʼ letiʼe ku kʼáatal xan tiʼ le máaxoʼob taak u jóokʼloʼob predicar kex maʼ okjaʼanakoʼoboʼ (od xook 8 párrafo 8).

 U TʼAANILOʼOB U KÁAJBAL

2. Junpʼéel minuto. Kéen tsʼoʼokok le kʼaay bey xan le oraciónoʼ, le sukuʼun nuʼuktik le reuniónoʼ yaan u yaʼalik le baʼaxoʼob maas kʼaʼanaʼantak kun kanbiloʼ.

 JATSʼUTS BAʼALOʼOB K-KANIK TEʼ BIBLIAOʼ

  3. Discurso (10 minutos). Meyajnaktech U juʼunil xook utiaʼal a wilik u kʼaabaʼ le discurso bey xan le baʼaxoʼob ken a tsoloʼ. Le jaatsaʼ unaj u máansaʼal tumen juntúul anciano wa juntúul siervo ministerial maʼalob u kaʼansaj. Cada ken káajak u xakʼaltaʼal junpʼéel u libroil le Bibliaoʼ yaan xan u tsʼaʼabal chaʼantbil u videoil. Le máax kun máansik le discursooʼ jeʼel u páajtal u chʼaʼchiʼitik jujunpʼéel baʼaxoʼob aʼalaʼab teʼ videooʼ. Chéen baʼaleʼ jach unaj u yilik u tsolik tuláakal le baʼaxoʼob ku taasik U juʼunil xookoʼ. Ichil le tiempo tsʼaʼan tiʼ máakoʼ maʼalob ka u yil u meyajtiʼ le dibujoʼob yéetel le cuadros tsʼaʼanoʼob utiaʼal u maas naʼataʼal le baʼax ku xakʼaltaʼaloʼ. Wa yaan uláakʼ baʼaloʼob ta xakʼalxoktaj jeʼel u yáantkech a tsol le puntos ku taasik le discursooʼ jeʼel u páajtal a chʼaʼchiʼitikeʼ.

 4. Baʼax jeʼel u páajtal k-kanikeʼ (10 minutos). Xakʼalxook yéetel preguntaʼob. Le jaatsaʼ unaj u káajsaʼal juntaatsʼ, mix baʼal uláakʼ unaj u tsoʼolol tu káajbal mix tu tsʼoʼokbal. Unaj u máansaʼal tumen juntúul anciano wa juntúul siervo ministerial maʼalob u kaʼansaj. Le sukuʼunoʼ unaj u meyajtiʼ le kaʼapʼéel preguntaʼob ku taasik le jaatsaʼ. Tsʼoʼoleʼ letiʼ xan kun ilik wa yaan u xoʼokol le textoʼoboʼ. Cada comentarioeʼ unaj u beetaʼal ich 30 segundos wa menos.

 5. U xookil le Bibliaoʼ (4 minutos). Le jaatsaʼ jeʼel u béeytal u máansaʼal tumen juntúul chan paal, juntúul xiʼipal wa juntúul sukuʼuneʼ. Unaj u káajsaʼal juntaatsʼ, mix baʼal uláakʼ unaj u tsoʼolol tu káajbal mix tu tsʼoʼokbal. Le sukuʼun nuʼuktik le reuniónoʼ letiʼ unaj u yáantik cada sukuʼun utiaʼal ka u naʼat le baʼax ken u xokoʼ, ka u xok jach jeʼex tsʼíibtaʼaniloʼ, maʼ u tʼiʼilil u xook, ka u kʼex u séebil bey xan u kʼaʼamil u tʼaan yéetel ka uʼuyaʼak bey junpʼéel tsikbaleʼ. Yaan kʼiineʼ u xookil le Bibliaoʼ chowak wa yaan horaeʼ kóom, le oʼolaleʼ u superintendenteil le reunión Kuxtal yéetel Meyajoʼ tu yorail u asignartik le jaatsaʼ unaj u chʼaʼik en cuenta wa séeb u xook le sukuʼunoʼoboʼ wa maʼ.

 KAʼANSAJNAKOʼON MAʼALOB

6. Quince minutos. Le jaatsaʼ beetaʼan utiaʼal u ensayartik máak bix jeʼel u predicareʼ yéetel bix jeʼel u maas maʼalobkíintik bix u tsikbaleʼ bey xan u kaʼansaj. Wa kʼaʼabéeteʼ tak le ancianoʼob jeʼel u páajtal u máanskoʼob junpʼéel tiʼ le jaatsoʼobaʼ. Le máax kun táakpajloʼ unaj u chʼaʼik en cuenta le xook wa le punto asignado tiʼ le folleto Kaʼansaj wa Eʼes yaabilajoʼ, lelaʼ tiaʼan ich paréntesis tiʼ U juʼunil xookoʼ. Yaan kʼiineʼ junpʼéel jaatseʼ ku yaʼalik ka xakʼaltaʼak yéetel le muchʼukbaloʼoboʼ, le jeʼelaʼ unaj u máansaʼal tumen juntúul anciano wa juntúul siervo ministerial maʼalob u kaʼansaj (ilawil le  párrafo 15 ku tsolik bix u máansaʼal le jaatsoʼob ku xakʼaltaʼal yéetel le muchʼukbaloʼoboʼ).

 7. Káajs a tsikbal: Le jaatsaʼ jeʼel u páajtal u máansaʼal tumen juntúul chan paaleʼ, juntúul sukuʼun wa juntúul kiikeʼ. Wa juntúul kiik kun máansikeʼ maʼ unaj u máansik yéetel juntúul sukuʼuniʼ chéen jaʼaliʼ wa u láakʼtsileʼ. Le máaxoʼob kun máansikoʼ jeʼel u páajtal u pʼaatloʼob waʼatalil wa u kutaloʼobeʼ (utiaʼal a wilik tuʼux ken a chʼaʼ le información yéetel bix ken a máansiloʼ ilawil le  párrafos 12 yéetel  13).

 8. Beet revisitaʼob: Le jaatsaʼ jeʼel u páajtal u máansaʼal tumen juntúul chan paaleʼ, juntúul sukuʼun wa juntúul kiikeʼ. Wa juntúul kiik kun máansikeʼ maʼ unaj u máansik yéetel juntúul sukuʼuniʼ (km-S 5/97 página 2). Le máaxoʼob kun máansikoʼ jeʼel u páajtal u pʼaatloʼob waʼatalil wa u kutaloʼobeʼ. Le máax kun máansikoʼ yaan u yeʼesik baʼax jeʼel u páajtal u yaʼalik máak ken suunak u xíimbalt le máax yéetel yáax tsikbalnajoʼ (utiaʼal a wilik tuʼux ken a chʼaʼ le información yéetel bix ken a máansiloʼ ilawil le  párrafos 12 yéetel  13).

 9. Beet discípuloʼob: Le jaatsaʼ jeʼel u páajtal u máansaʼal tumen juntúul chan paaleʼ, juntúul sukuʼun wa juntúul kiikeʼ. Wa juntúul kiik kun máansikeʼ maʼ unaj u máansik yéetel juntúul sukuʼuniʼ (km-S 5/97 página 2). Le máaxoʼob kun máansik le jaatsaʼ jeʼel u páajtal u pʼáatloʼob waʼatalil wa u kutaloʼobeʼ. Le máax kun máansikoʼ unaj u beetik bey tsʼoʼok u káajal le xookoʼ. Unaj u káajsaʼal juntaatsʼ, mix baʼal uláakʼ unaj u tsoʼolol tu káajbal mix tu tsʼoʼokbal, chéen jaʼaliʼ wa tiʼ aʼalaʼan ka meyajnakeʼ. Cada máak ken u yéey wa yaan u láaj xokik le párrafosoʼ.

 10. Tsol baʼax ka creertik: Wa junpʼéel discursoeʼ yaan u máansaʼal tumen juntúul sukuʼun. Wa junpʼéel demostracióneʼ jeʼel u páajtal u máansaʼal tumen juntúul chan paaleʼ, juntúul sukuʼun wa juntúul kiikeʼ. Wa juntúul kiik kun máansikeʼ maʼ unaj u máansik yéetel juntúul sukuʼuniʼ chéen jaʼaliʼ wa juntúul u láakʼtsileʼ. U suukileʼ u kʼaabaʼ le jaatsaʼ junpʼéel pregunta. Utiaʼal u núukik máakeʼ kʼaʼabéet u kanáantik bix ken u yaʼalil yéetel u yilik ka séeb naʼataʼak. U núukil le preguntaoʼ kʼaʼabéet u kaxtaʼal teʼ referencia ku taaskoʼ. Le máax kun máansik le jaatsoʼ letiʼ kun ilik wa yaan u chʼaʼchiʼitik u kʼaabaʼ le referenciaoʼ wa maʼ.

 11. Discurso: Le jaatsaʼ yaan u tsʼaʼabal tiʼ juntúul sukuʼun, letiʼeʼ yaan u máansik jeʼex suukil u máansaʼal junpʼéel discursoeʼ. Wa teʼ jaats utiaʼal xakʼalxook 1 yaan teʼ folleto Eʼes yaabilaj kun chʼaʼabil le baʼax kun tsolbiloʼ, le sukuʼun kun máansik le jaatsaʼ yaan u yeʼesik bix jeʼel u meyajtoʼon le textoʼob teʼ predicaciónoʼ. Por ejemploeʼ, jeʼel u páajtal u tsolik baʼax u kʼáat u yaʼal junpʼéel versículoeʼ, baʼax súutukil jeʼel u meyajtoʼoneʼ yéetel bix jeʼel u meyajtoʼon utiaʼal k-áantik juntúul máak u naʼat junpʼéel baʼax ku kaʼansik le Bibliaoʼ. Wa le baʼax kun aʼalbil yaan u jóoʼsaʼal tiʼ junpʼéel tiʼ le puntos ku taasik junpʼéel xook tiʼ le folleto Eʼes yaabilajoʼ, le máax kun máansikoʼ yaan u tsolik bix jeʼel u meyajtoʼon teʼ predicaciónoʼ. Wa maʼalob u yilkeʼ jeʼel u páajtal xan u meyajtiʼ le ejemplo ku taasik le punto 1, wa jeʼel u páajtal u meyajtiʼ le uláakʼ textoʼob ku taasik le xookoʼ.

   12. Tuʼux kun chʼaʼabil le informaciónoʼ: Le baʼax ku yaʼalaʼal teʼ párrafoaʼ yaan u meyaj utiaʼal le jaats «Káajs a tsikbal» yéetel «Beet revisitaʼob». Wa maʼ tu yaʼalaʼal yaanal baʼaleʼ, le máax kun máansik le jaatsaʼ yaan u yeʼesik bix jeʼel u kaʼansik máak junpʼéel baʼax ku yaʼalik le Biblia taak u yojéeltik u yuumil najoʼ. Tsʼoʼoleʼ yaan u tsʼáaik tuʼux u kaʼa tsikbal yéetel le máakoʼ. Le máax kun máansikoʼ unaj u tʼaan tiʼ junpʼéel baʼax ku yúuchul yéetel jeʼel u yáantik le máakoʼob teʼ tuʼux kajaʼanoʼ. Letiʼ ken u chʼaʼtukult wa yaan u yeʼesik junpʼéel publicación wa junpʼéel video yaan teʼ kit de enseñanzaoʼ. Tu lugar u kanik de memoriail le baʼax ken u yaʼaloʼ maas maʼalob ka u kan bix jeʼel u tsikbal jeʼex suukil u beetkeʼ yéetel ka tʼaanak tiʼ le baʼax jeʼel u taaktal u yuʼubaʼal tumen le máakoʼoboʼ.

   13. Bix jeʼel u máansaʼal junpʼéel jaatseʼ: Le máax kun máansik le jaatsoʼ maʼalob ka u chʼaʼ en cuenta bix kuxlik le máakoʼob teʼ territoriooʼ. Por ejemplo:

1.  (1) Joonaj joonajil: Le predicación jeʼelaʼ táakaʼan a tsikbal yéetel u yuumil naj tu yotoch, tiʼ teléfono wa tiʼ carta. Táakaʼan xan a kaʼa tsikbal yéetel juntúul máak tsʼoʼok a yáax tsikbal tu yotoch.

2.  (2) Predicación informal: Teʼelaʼ táakaʼan u aprovechartik máak jeʼel baʼaxak súutukil utiaʼal u predicar mientras táan u beetik uláakʼ wa baʼaxeʼ. Por ejemploeʼ jeʼel u páajtal u meyajtech baʼax ku yaʼalik junpʼéel texto utiaʼal a tsikbal yéetel wa máax teʼ tuʼux ka meyajoʼ, teʼ escuelaoʼ, teʼ tuʼux kajaʼanechoʼ, teʼ camión tuʼux ka viajaroʼ wa jeʼel tuʼuxak yanecheʼ.

3.  (3) Predicación pública: Teʼelaʼ táakaʼan u predicar máak yéetel carritoʼob, teʼ negocioʼoboʼ, teʼ calleʼoboʼ, teʼ parqueʼoboʼ, teʼ estacionamientoʼoboʼ wa uláakʼ lugar tuʼux yaan máakoʼob.

 14. Bix u usartaʼal le videoʼob yéetel le publicaciónoʼoboʼ: Le máax kun máansik le jaatsaʼ jeʼel u páajtal u chʼaʼchiʼitik junpʼéel video wa junpʼéel publicacióneʼ. Yaan hora xaneʼ deporsi ku yaʼalaʼal teʼ jaats ka meyajnak junpʼéel videooʼ. Pero maʼ ken u chaʼantoʼob, chéen ken u beetoʼob bey tu chaʼantoʼobeʼ, tsʼoʼoleʼ ku tsikbaltikoʼob.

  KUXLAKOʼON JEʼEX CRISTOEʼ

15. Le jaatsaʼ yaan u káajal yéetel junpʼéel kʼaay. Teʼ yáax 15 minutosoʼ yaan u máansaʼal junpʼéel wa kaʼapʼéel mejen jaatsoʼob utiaʼal u yilik máak bix jeʼel u tsʼáaik ichil u kuxtal le baʼax ku kanikoʼ. Wa u U juʼunil xook maʼ tu yaʼalik yaanal instruccióneʼ, le jaatsoʼobaʼ unaj u máansaʼal tumen juntúul anciano wa juntúul siervo ministerial maʼalob u kaʼansaj. Le jaats «Baʼax kʼaʼabéet tiʼ le múuchʼuliloʼ», chéen unaj u máansaʼal tumen ancianoʼob. Wa junpʼéel jaats yaan u xakʼaltaʼal yéetel le muchʼukbaloʼoboʼ, le sukuʼunoʼ jeʼel u páajtal u beetik uláakʼ preguntaʼob minaʼan teʼ xookoʼ. Utiaʼal ka yanak tiempo u xakʼaltik le baʼaloʼob maas importanteʼob bey xan utiaʼal ka yanak tiempo u comentar le sukuʼunoʼoboʼ maʼ unaj u sen aʼalik yaʼab baʼaloʼob tu káajbaliʼ. Wa ku páajtaleʼ le kéen entrevistartaʼak wa máaxeʼ tu lugar u beetaʼal desde teʼ tuʼux kulukbaloʼ maas maʼalob ka naʼakak teʼ plataformaoʼ.

  16. U xookil le Biblia teʼ múuchʼuliloʼ (30 minutos). Unaj u máansaʼal tumen juntúul anciano maʼalob u kaʼansaj. (Teʼ congregaciónoʼob tuʼux maʼ yaʼab ancianoʼob yanoʼ, jeʼel u páajtal u máansaʼal tumen juntúul siervo ministerial maʼalob u kaʼansajeʼ). Letiʼe múuchʼ ancianoʼob ken u yiloʼob máaxoʼob jeʼel u béeytal u nuʼuktikoʼob le xookaʼ. Kʼaʼabéet maʼ u máan u tiempo, ka u yéey le textoʼob kun xokbiloʼ yéetel ka u yáant le muchʼukbaloʼob u yiloʼob u kʼaʼanaʼanil le xookoʼ. Utiaʼal leloʼ jach maʼalob ka u xakʼaltoʼob le xook tuʼux ku tsoʼolol bix unaj u nuʼuktaʼal le jaatsoʼob ku taasik preguntaʼoboʼ (w23.04 página 24, cuadro). Wa tsʼoʼok u láaj xakʼaltaʼal le párrafosoʼ maʼ tsaaj u tsoʼolol u maasil baʼaloʼob chéen utiaʼal u chukik le 30 minutosoʼ. Wa ku béeytaleʼ cada semanaeʼ maʼalob ka nuʼuktaʼak yéetel ka xoʼokok le párrafos tumen yaanal sukuʼunoʼoboʼ. Wa le sukuʼun nuʼuktik le muchʼtáambal ku yilik unaj u kóomkintaʼal le jaatsaʼ, yaan u yaʼalik tiʼ le sukuʼun utiaʼal ka u yil bix ken u xotʼil u tiempooʼ. Maʼ xaaneʼ jeʼel u páajtal u yaʼalik maʼ u xoʼokol jujunpʼéel párrafoseʼ.

  U TʼAANILOʼOB U TSʼOʼOKBAL

17. Óoxpʼéel minutos. Le sukuʼun nuʼuktik le reuniónoʼ yaan u tʼaan tiʼ jujunpʼéel tiʼ le baʼaxoʼob maas kʼaʼanaʼantak ilaʼaboʼ. Según bukaʼaj tiempo pʼaatleʼ jeʼel xan u páajtal u invitartik le muchʼukbaloʼob utiaʼal ka u yaʼaloʼob le baʼaxoʼob jeʼel u yáantkoʼob ichil u kuxtaloʼoboʼ. Jeʼel xan u páajtal u yaʼalik jujunpʼéel baʼaloʼob kun ilbil teʼ reunión kun antal tuláakʼ semanaoʼ bey xan le máaxoʼob kun táakpajloʼoboʼ. Teʼ súutukaʼ tiʼ unaj xan u xoʼokol le anuncioʼob bey xan le cartaʼob túuxtaʼan tiʼ le congregaciónoʼ wa jach yaʼabeʼ, le sukuʼun nuʼuktik le reuniónoʼ yaan u yaʼalik tiʼ le sukuʼunoʼob ka u xotʼ u tiempoʼob teʼ jaats «Kuxlakoʼon jeʼex Cristoeʼ» (ilawil  párrafos 16 yéetel  19). Uláakʼ baʼaloʼob jeʼex le predicación yéetel le limpiezaoʼ, maʼ unaj u yaʼalaʼal teʼ plataformaoʼ, baʼaxeʼ unaj u tsʼaʼabal teʼ tablerooʼ. Le reuniónoʼ yaan u tsʼoʼokol yéetel kʼaay bey xan yéetel oración.

  TSOLNUʼUK YÉETEL U LÍIʼSAʼAL U YÓOL MÁAK

18. Cada kéen tsʼoʼokok u máansaʼal junpʼéel asignación tiʼ le jaats «Kaʼansajnakoʼon Maʼaloboʼ», le sukuʼun nuʼuktik le reuniónoʼ, ichil junpʼéel minuto wa menoseʼ, yaan u felicitartik le máax táakpajoʼ yéetel yaan u tsʼáaik consejo tiʼ. Le baʼax ken u yaʼaloʼ unaj u chʼaʼik tiʼ le baʼax ku yaʼalik le folleto ku chʼaʼchiʼitaʼaloʼ. Cada ken u yaʼal máax kun máansik le jaatsoʼ maʼ unaj u yaʼalik tiʼ baʼax puntoil táan u meyajiʼ. Chéen baʼaleʼ kéen tsʼoʼokok u máansaʼal le jaatsoʼ yaan u felicitartik le sukuʼun wa le kiikoʼ. Jeʼel u páajtal u yaʼalik tiʼ baʼax xookil táan u meyajeʼ, baʼaxten maʼalob le bix tu máansiloʼ tsʼoʼoleʼ yéetel utsileʼ yaan u yaʼaliktiʼ tuʼux kʼaʼabéet u mejorar yéetel bix jeʼel u beetkeʼ. Wa ku yilik jeʼel u yáantik le máax táakpajoʼ bey xan le muchʼukbaloʼoboʼ jeʼel xan u páajtal u yaʼalik uláakʼ baʼaloʼob tu yilaj maʼalob beetaʼabikeʼ. Wa yaan uláakʼ tuʼux maas kʼaʼabéet u meyajeʼ kéen tsʼoʼokok le reuniónoʼ wa tiʼ uláakʼ súutukileʼ jeʼel u páajtal u yaʼaliktiʼ yéetel yaabilajeʼ. Utiaʼal leloʼ jeʼel u páajtal u meyajtiʼ le xook tuʼux táan u meyaj le sukuʼun wa le kiikoʼ wa uláakʼ tiʼ le xookoʼob ku taasik le folleto Eʼes yaabilajoʼ, le folleto Kaʼansajoʼ wa le libro Escuela utiaʼal k-Kaʼansajoʼ (le  párrafos 19,  24 yéetel  25, ku maas tsolik baʼax meyajil ku beetik le sukuʼun nuʼuktik le reunión Kuxtal yéetel Meyajoʼ bey xan le máax tsʼáaik consejooʼ).

     TIEMPO

19. Mix junpʼéel xook unaj u máan u tiempoil (mix le tʼaanoʼob ken u yaʼal le sukuʼun nuʼuktik le reuniónoʼ). Kex U juʼunil xook ku yaʼalik bukaʼaj tiempo unaj u máansaʼal cada jaatseʼ, wa tsʼoʼok anteseʼ maʼ kʼaʼabéet a waʼalik u maasil baʼaloʼob chéen utiaʼal a chukik le tiempo tsʼaʼantechoʼ. Wa juntúul máax ku máan u tiempoeʼ, le sukuʼun nuʼuktik le reuniónoʼ wa le máax tsʼáaik consejooʼ kʼaʼabéet u tsikbal tu yéetel junpáayil (ilawil  párrafos 24 yéetel  25). Tuláakal le reuniónoʼ unaj u xáantal junpʼéel hora yéetel 45 minutos, ichileʼ táakaʼan tak le kʼaayoʼob bey xan le oraciónoʼoboʼ.

 SUPERINTENDENTE TIʼ CIRCUITO

20. Kéen xíimbaltaʼak le congregación tumen le superintendente tiʼ circuitooʼ yaan jujunpʼéel jaatsoʼob maʼ kun máansbil. Tu lugar u máansaʼal «U xookil le Biblia teʼ múuchʼuliloʼ», le superintendente tiʼ circuitooʼ yaan u máansik junpʼéel discurso de 30 minutos. Táanil tiʼ lelaʼ, le sukuʼun nuʼuktik le reuniónoʼ yaan u kʼaʼajsik baʼaxoʼob ilaʼabi yéetel baʼaxoʼob kun ilbil tuláakʼ semanaoʼ, yaan xan u xokik le anuncioʼoboʼ, le cartaʼoboʼ yéetel letiʼ xan ken u presentart le superintendente tiʼ circuitooʼ. Kéen tsʼoʼokok le discursooʼ, le superintendente tiʼ circuitooʼ yaan u tsʼoʼoksik le reunión yéetel le kʼaay u yéeymoʼ. Tsʼoʼoleʼ jeʼel u páajtal xan u invitartik uláakʼ sukuʼun utiaʼal u beetik u oraciónil u tsʼoʼokbaleʼ. Kéen xíimbaltaʼak le congregaciónoʼ maʼ unaj u máansaʼal uláakʼ jaatsoʼob teʼ sala B. Wa yaan junpʼéel grupo ichil uláakʼ idiomaeʼ jeʼel u páajtal u beetik u reuniónoʼob jeʼex suukileʼ. Chéen baʼaleʼ unaj u múul uʼuyikoʼob le discurso ken u máans le superintendente tiʼ circuitooʼ.

 U SEMANAIL ASAMBLEA

21. Tu semanail le asamblea de circuito wa regionaloʼ maʼ kun antal reunión. Kʼaʼabéet u kʼaʼajsaʼal tiʼ le sukuʼunoʼoboʼ le baʼax kun ilbil teʼ semanaoʼ cada familia wa cada juntúul ken u xokeʼ.

 U SEMANAIL KʼAʼAJSAJIL

22. Wa le Kʼaʼajsajil ku lúubul entre semanaoʼ maʼ kun antal le reunión Kuxtal yéetel Meyajoʼ.

 U SUPERINTENDENTEIL LE REUNIÓN KUXTAL YÉETEL MEYAJOʼ

23. Le superintendenteaʼ unaj u yéeyaʼal tumen le múuchʼ ancianoʼoboʼ. Letiʼ unaj u yilik ka jóokʼok maʼalobil le reuniónoʼ yéetel ka máansaʼak le jaatsoʼob jeʼex unajoʼ. Unaj xan u múul meyaj yéetel le máax yéeyaʼan utiaʼal u tsʼáaik consejooʼ. Chéen pʼel u jóokʼol le U juʼunil xookoʼ yaan u asignartik tuláakal le jaatsoʼob kun máansbil ichil dos mesesoʼ. Ichil lelaʼ táakaʼan le ken u máans le publicadoroʼoboʼ, le ken u máans le ancianoʼoboʼ wa le ministerialoʼoboʼ. Letiʼ xan unaj u asignartik le máaxoʼob kun nuʼuktik le reuniónoʼ, lelaʼ unaj u yéeyik ichil le máaxoʼob yéeyaʼanoʼob tumen le múuchʼ ancianoʼoboʼ (ilawil  párrafos 3 tak 16 yéetel  24). Le kéen u asignart le jaatsoʼoboʼ unaj u chʼaʼik en cuenta u edad le sukuʼunoʼoboʼ, le baʼax u yojloʼoboʼ yéetel wa jeʼel u páajtal u tʼaanoʼob tiʼ le baʼax kʼaʼabéet u tsoʼololoʼ. Le asignaciónoʼoboʼ kʼaʼabéet u kʼuʼubloʼob kex óoxpʼéel semanaʼob táanil tiʼ u máansaʼal le jaatsoʼ. Le máaxoʼob kun táakpajloʼob tiʼ le jaats «Kaʼansajnakoʼon Maʼaloboʼ», kʼaʼabéet u kʼuʼubultiʼob le chan juʼun Asignación utiaʼal le reunión Kuxtal yéetel Meyaj jeʼex Cristoeʼ (S-89). U superintendenteil le reunión Kuxtal yéetel Meyajoʼ kʼaʼabéet xan u tsʼáaik teʼ tablero u programail le reunión kun máansbil ichil le kaʼapʼéel mesoʼoboʼ. Le múuchʼ ancianoʼoboʼ jeʼel u páajtal u yaʼalikoʼob tiʼ uláakʼ juntúul anciano wa siervo ministerial ka u yáant u superintendenteil le reunión Kuxtal yéetel Meyajoʼ. Pero wa juntúul siervo ministerial kun áantkeʼ chéen jeʼel u páajtal u asignartik le jaatsoʼob yaan teʼ «Kaʼansajnakoʼon Maʼaloboʼ», le u maasil jaatsoʼoboʼ unaj u asignartaʼal tumen juntúul anciano.

    LE SUKUʼUN NUʼUKTIK LE REUNIÓNOʼ

24. Cada semanaeʼ juntúul anciano unaj u nuʼuktik le reuniónaʼ (teʼ congregaciónoʼob tuʼux maʼ yaʼab ancianoʼob yanoʼ, jeʼel u páajtal u nuʼuktaʼal tumen juntúul siervo ministerial maʼalob u kaʼansajeʼ). Letiʼ kun aʼalik u tʼaaniloʼob u káajbal bey xan u tʼaaniloʼob u tsʼoʼokbal le reuniónoʼ. Wa chéen junpʼíit ancianoʼob yaneʼ jeʼel u páajtal u máansik xan uláakʼ jaatsoʼobeʼ, maases le tuʼux chéen yaan u yeʼesaʼal junpʼéel video yéetel maʼatech u xakʼaltaʼaloʼ. Maʼ unaj u sen tʼaan táanil mix le kéen tsʼoʼokok le jaatsoʼoboʼ. Letiʼe múuchʼ ancianoʼob ken u yiloʼob máaxoʼob jeʼel u páajtal u nuʼuktikoʼob le reuniónoʼ. Cada semanaeʼ yaanal sukuʼun kun nuʼuktik, chéen baʼaleʼ tiʼ jujunpʼéel congregaciónoʼobeʼ maʼ xaaneʼ maases u superintendenteil le reunión kun nuʼuktikoʼ. U suukileʼ wa juntúul anciano ku páajtal u nuʼuktik «U xookil le Biblia teʼ múuchʼuliloʼ» jeʼel xan u páajtal u nuʼuktik le reunión Kuxtal yéetel Meyajoʼ. Chéen baʼaleʼ kʼaʼabéet u chʼaʼabal en cuentaeʼ le sukuʼun nuʼuktik le reuniónoʼ unaj maʼalob u kaʼansaj, tsʼoʼoleʼ unaj u tsolnuʼuk yéetel yaabilaj bey xan unaj u felicitartik le máaxoʼob ku táakpajloʼoboʼ. Kʼaʼabéet xan u yilik u tsʼoʼokol le reunión tu yorailoʼ (ilawil  párrafos 17 yéetel  19). Wa le sukuʼun nuʼuktik le reunión ku yilik kʼaʼabéet bey xan wa ku béeytaleʼ, jeʼel u páajtal u tsʼaʼabal uláakʼ micrófono teʼ plataforma utiaʼal u tʼaan mientras táan u tsʼaʼabal tu pʼiis le atril bey xan le micrófono tiʼ le máax kun máansik le jaats ku segueroʼ. Wa u kʼáat xaneʼ jeʼel u páajtal u kutal yiknal junpʼéel chan mesa le táan u máansaʼal «U Xookil le Bibliaoʼ» bey xan le jaats «Kaʼansajnakoʼon maʼaloboʼ».

   MÁAX TSʼÁAIK CONSEJO

25. Wa ku yilik kʼaʼabéeteʼ le sukuʼunaʼ unaj u tsolnuʼuktik junpáayil le ancianoʼob yéetel le siervo ministerialoʼob ku táakpajloʼob teʼ reunión Kuxtal yéetel Meyajoʼ, le ku máanskoʼob discursoʼoboʼ, le ku nuʼuktikoʼob U xookil Le Máax ku Kananoʼ wa «U xookil le Biblia teʼ múuchʼuliloʼ» bey xan le ku xokikoʼob le párrafosoʼ (ilawil  párrafo 19).

 SALA B

26. Wa nojoch le congregaciónoʼ jeʼel u páajtal u meyaj le sala B utiaʼal u máansaʼal uláakʼ jaatsoʼob tumen le máaxoʼob kun táakpajloʼob teʼ jaats Kaʼansajnakoʼon Maʼaloboʼ. Lelaʼ maases unaj u nuʼuktaʼal tumen juntúul anciano maʼalob u kaʼansaj. Wa minaʼaneʼ jeʼel u páajtal u nuʼuktaʼal tumen juntúul siervo ministerial maʼalob u kaʼansajeʼ. Letiʼe múuchʼ ancianoʼob ken u yaʼaloʼob máaxoʼob jeʼel u páajtal u beetkoʼob le meyajaʼ, bey xan wa cada kun tsʼaabil yaanal sukuʼun utiaʼal ka u yile. Le sukuʼun nuʼuktik le sala B, yaan u beetik baʼax ku yaʼalik le  párrafo 18. Tiʼ le máaxoʼob kun táakpajloʼoboʼ unaj u yaʼalaʼaltiʼob ka xiʼikoʼob teʼ sala B kéen tsʼoʼokok le jaats «Baʼax jeʼel u páajtal k-kanikeʼ», lelaʼ tiaʼan ichil le jaats «Jatsʼuts baʼaloʼob k-kanik teʼ Bibliaoʼ». Le kéen tsʼoʼokok u láaj máansaʼal le jaatsoʼoboʼ unaj u suutoʼob teʼ sala principaloʼ.

 VIDEOʼOB

27. Teʼ reunión ku beetaʼal entre semanaoʼ yaan u chaʼantaʼal videoʼobiʼ, lelaʼ jeʼel u páajtal u yéemsaʼal teʼ aplicación JW Library® tiʼ celular, tablet wa computadora.

© 2025 Watch Tower Bible and Tract Society of Pennsylvania

S-38-MAY 9/25