Lucas 9:1-62
-
Bix unaj u tsikbaltikoʼob u tʼaan Dios (1-6)
-
Herodeseʼ ku tuklik tsʼoʼok u líiʼsaʼal Juan (7-9)
-
Jesúseʼ ku tséentik 5,000 máakoʼob (10-17)
-
Pedroeʼ ku yaʼalikeʼ Jesúseʼ Cristo (18-20)
-
Jesúseʼ ku yaʼalik yaan u kíimsaʼal (21, 22)
-
Baʼax unaj u beetik juntúul discípulo (23-27)
-
Jesúseʼ ku jelpajal bix u yilaʼal (28-36)
-
Ku jóoʼsik demonio tiʼ juntúul xiʼipal (37-43a)
-
Jesúseʼ ku kaʼa aʼalik yaan u kíimsaʼal (43b-45)
-
«Máax u maas nojchil ichiloʼob» (46-48)
-
‹Wa maʼ ta contraʼex yaneʼ ta favoreʼex yaan› (49, 50)
-
Samaritanoʼob maʼ tu kʼamoʼob Jesúsiʼ (51-56)
-
Bix unaj u tsaypachtaʼal Jesús (57-62)
9 Jesús túuneʼ tu muchʼaj le 12 apóstoloʼoboʼ ka tu tsʼáaj páajtalil tiʼob utiaʼal u jóoʼskoʼob demonioʼob+ yéetel utiaʼal u tsʼakikoʼob kʼojaʼaniloʼob.+
2 Tsʼoʼoleʼ ka tu túuxtoʼob u tsikbaltoʼob u Reino Dios yéetel u tsʼakoʼob le máakoʼoboʼ.
3 Letiʼeʼ tu yaʼalajtiʼob: «Maʼ a biskeʼex mix baʼal utiaʼal le viajeoʼ, mix xóolteʼ, mix sáabukaan, mix waaj, mix taakʼin,* mix xan kaʼapʼéel u yáalal a nookʼeʼex.+
4 Tiʼ jeʼel baʼalak najil ka ookkeʼexeʼ tiʼ unaj a pʼáatleʼex tak ken kʼuchuk u yorail a jóokʼleʼex tiʼ le kaajoʼ.+
5 Wa yaan tuʼux maʼ ta kʼaʼamleʼexeʼ le kéen jóokʼkeʼex tiʼ le kaajoʼ tíiteʼex u luʼumil a wookeʼex utiaʼal a weʼeskeʼex tiʼ le máakoʼob maʼ maʼalob le baʼax ku beetkoʼoboʼ».+
6 Letiʼob túuneʼ binoʼob teʼ tuʼux túuxtaʼaboʼoboʼ, binoʼob tiʼ tuláakal le mejen kajtaliloʼob táan u tsikbaltikoʼob le baʼaloʼob maʼalobtak kun úuchloʼ* yéetel táan u tsʼakikoʼob le kʼojaʼanoʼoboʼ.+
7 Herodes,* le máax gobernartik* u luʼumil Galileaoʼ, tu yuʼubaj tuláakal le baʼaxoʼob táan u yúuchloʼ yéetel jach jaʼakʼ u yóol tumen jujuntúul máakoʼobeʼ ku yaʼalikoʼob tsʼoʼok u líiʼsaʼal Juan ichil le kimenoʼoboʼ.+
8 Chéen baʼaleʼ uláakʼ máakoʼobeʼ ku yaʼalikoʼob Elías tsʼoʼok u líiʼsaʼal, uláakʼoʼob xaneʼ ku yaʼalikoʼob juntúul tiʼ le úuchben profetaʼob tsʼoʼok u líiʼsaʼaloʼ.+
9 Herodes túuneʼ tu yaʼalaj: «Si Juaneʼ teen kúulxotʼ u pool.+ ¿Máax túun le máak tiʼ le kin wuʼuyik u yúuchul tʼaanaʼ?». Ka túun káaj u kaxtik bix jeʼel u yilkeʼ.+
10 Le ka suunaj le apóstoloʼoboʼ tu tsikbaltoʼob tiʼ Jesús le baʼaxoʼob tu beetoʼoboʼ.+ Letiʼ túuneʼ bin tu yéeteloʼob tu kaajil Betsaida utiaʼal ka yanakoʼob tu juunaloʼob.+
11 Chéen baʼaleʼ ojéeltaʼab tumen yaʼab máakoʼobeʼ ka binoʼob teʼ tuʼux yanoʼoboʼ. Jesús túuneʼ jach maʼalob úuchik u kʼamkoʼob, ka joʼopʼ u tsikbaltik u Reino Dios tiʼob yéetel tu tsʼakaj le máaxoʼob kʼojaʼanoʼoboʼ.+
12 Le taʼaytak u tʼúubul kʼiinoʼ le 12 apóstoloʼoboʼ náatsʼoʼob yiknal Jesúseʼ ka tu yaʼaloʼobtiʼ: «Aʼal tiʼ le máakoʼob ka xiʼikoʼoboʼ, beyoʼ jeʼel u páajtal u binoʼob teʼ kaajoʼob yéetel teʼ mejen kajtaliloʼob yanoʼob naatsʼoʼ ka u manoʼob baʼal u jaantoʼob yéetel ka u kaxtoʼob tuʼux u pʼáatloʼob wenel, tumen wayeʼ mix máak kajaʼan».+
13 Chéen baʼaleʼ letiʼeʼ tu yaʼalajtiʼob: «Teʼex unaj a tsʼáaikeʼex baʼal u jaantoʼob».+ Letiʼobeʼ tu yaʼaloʼob: «Mix baʼal yaantoʼon, chéen cinco waajoʼob yéetel kaʼatúul kayoʼob, chéen jaʼaliʼ ka xiʼikoʼon k-man baʼal u jaantoʼobeʼ».
14 Tuláakal le xiiboʼob yanoʼob teʼeloʼ kex 5,000 u túulaloʼob. Jesús túuneʼ tu yaʼalaj tiʼ u discípuloʼob: «Aʼaleʼextiʼob ka kulakoʼob, kex a 50 u túulal ka u muchʼubaʼob».
15 Le discípuloʼob túunoʼ bey tu beetiloʼoboʼ, ka kulaj tuláakal le máakoʼoboʼ.
16 Ka túun tu chʼaʼaj le cinco waajoʼob yéetel le kaʼatúul kayoʼoboʼ, paakatnaj kaʼaneʼ ka tu beetaj junpʼéel oración, tsʼoʼoleʼ tu xetʼoʼobeʼ ka joʼopʼ u tsʼáaik tiʼ u discípuloʼob utiaʼal ka u tʼoxoʼob tiʼ le máakoʼoboʼ.
17 Bey túunoʼ tuláakloʼob jaanoʼob yéetel naʼajchajoʼob. Le ka moʼol le u xéexetʼal pʼáatoʼ chuʼup 12 xaakoʼob.+
18 Ku tsʼoʼokoleʼ le táan kaʼach u orar tu juunaloʼ u discípuloʼobeʼ taaloʼob tu yiknal; Jesús túuneʼ tu kʼáatajtiʼob: «Le máakoʼoboʼ, ¿máaxen u yaʼalikoʼob?».+
19 Letiʼobeʼ tu núukoʼob: «Yanoʼobeʼ ku yaʼalikoʼobeʼ Juan Bautista, uláakʼoʼobeʼ Elías, uláakʼoʼob xaneʼ ku yaʼalikoʼobeʼ juntúul tiʼ le úuchben profetaʼob tsʼoʼok u líiʼsaʼaloʼ».+
20 Ka túun tu yaʼalajtiʼob: «Kux túun teʼex, ¿máaxen a waʼalikeʼex?». Pedroeʼ tu núukaj: «Teech le Cristo túuxtaʼan tumen Diosoʼ».+
21 Jesús túuneʼ tu sen aʼalajtiʼob maʼ u máan u tsikbaltoʼob tiʼ mix máak.+
22 Tu yaʼalaj xan: «U Paal máakeʼ yaʼab baʼaloʼob ken u muʼyajte, yaan u pʼektaʼal tumen u nuuktakil le kaajoʼ, tumen u nuuktakil le sacerdoteʼoboʼ bey xan tumen le escribaʼoboʼ, yéetel yaan u kíimsaʼal,+ chéen baʼaleʼ tu yóoxpʼéel kʼiineʼ yaan u líiʼsaʼal».+
23 Letiʼ túuneʼ seguernaj u yaʼalik tiʼ tuláakal: «Wa yaan máax u kʼáat taal tin paacheʼ u pʼektuba+ yéetel u chʼaʼ u cheʼil u muʼyaj* sáamsamal, ka taalak mantatsʼ tin paach.+
24 Tumen le máax u kʼáat u salvart u kuxtaleʼ yaan u perdertik, chéen baʼaleʼ le máax ku perdertik u kuxtal tin woʼolaleʼ yaan u salvartik.+
25 U jaajileʼ, ¿baʼax utsil jeʼel u jóoʼsik máak wa ku tiaʼalintik tuláakal yóokʼol kaab, chéen baʼaleʼ ku bin kʼaasil tiʼ, wa ku boʼotik yéetel u kuxtal?+
26 Tumen le máax ku suʼlaktal tin woʼolal bey xan tu yoʼolal baʼax kin waʼalikeʼ u Paal máakeʼ yaan xan u suʼlaktal tu yoʼolal le kéen taalak yéetel u poder, le kéen taalak yéetel u poder u Taata bey xan yéetel le páajtalil yaan tiʼ le ángeloʼob u yéeymoʼ.+
27 Chéen baʼaleʼ tu jaajil kin waʼalikteʼexeʼ yaan jujuntúul tiʼ le máaxoʼob waʼalakbaloʼob wayoʼ maʼ kun kíimloʼob táanil tiʼ u yilkoʼob u kʼuchul u Reino Dios».+
28 Ka máan kex ocho kʼiinoʼob u yaʼal le tʼaanoʼobaʼ naʼak teʼ montaña yéetel Pedro, Juan yéetel Santiago utiaʼal ka orarnakoʼ.+
29 Le táan kaʼach u oraroʼ jelpaj u táan u yich, yéetel u nookʼeʼ jach táaj sakchaji.
30 Teʼ súutukoʼ chíikpaj kaʼatúul máakoʼobeʼ ka joʼopʼ u tsikbaloʼob tu yéetel. Le jeʼeloʼobaʼ Moisés yéetel Elías.
31 Le ka chíikpajoʼobeʼ táan kaʼach u léembaloʼob, ka túun joʼopʼ u tsikbaltikoʼob bix kun lukʼul Jesús way yóokʼol kaabeʼ. Tu yaʼaloʼob xaneʼ lelaʼ yaan u yúuchul tu kaajil Jerusalén.+
32 Pedro túun yéetel le uláakʼ kaʼatúul discípuloʼoboʼ táan kaʼach u weenloʼob, le ka aajoʼob tubeeleʼ tu yiloʼob táan u léembal+ Jesús bey xan le kaʼatúul máakoʼob waʼalakbaloʼob tu yiknaloʼ.
33 Le táan u bin u náachtal le kaʼatúul máakoʼob teʼ tuʼux yaan Jesúsoʼ Pedroeʼ tu yaʼalajtiʼ: «J-Kaʼansaj, yaaske tiaʼanoʼon wayeʼ, koʼoneʼex beetik óoxpʼéel najoʼob de nookʼ: junpʼéel a tiaʼaliʼ, junpʼéel u tiaʼal Moisésiʼ yéetel junpʼéel u tiaʼal Elíasiʼ». Pedroeʼ tu yaʼalaj lelaʼ tumen maʼ tu tsʼáaik cuenta baʼax ku yaʼalik kaʼachi.
34 Le táan túun u tʼaan Pedrooʼ chíikpaj junpʼéel múuyaleʼ ka piʼixoʼob. Le tiaʼanoʼob ichil le múuyaloʼ jach sajakchajoʼob.
35 Ichil le múuyal túunoʼ jóokʼ le tʼaanaʼ:+ «Lelaʼ in Hijo, le máax tsʼoʼok in yéeyikoʼ.+ Uʼuyeʼex u tʼaan».+
36 Le táan u yuʼubaʼal le tʼaanoʼ letiʼobeʼ tu yiloʼob chéen tu juunal yaan Jesús. Chéen baʼaleʼ maʼ tu jáan tsikbaltoʼob tiʼ mix máak le baʼaxoʼob tu yiloʼoboʼ.+
37 Le ka sáaschajeʼ letiʼobeʼ éemoʼob teʼ montañaoʼ, ka túun taal yaʼabkach máakoʼob u yiloʼob Jesús.+
38 Ichil le máakoʼob túunoʼ juntúul máakeʼ tu kʼaʼam aʼalaj: «J-Kaʼansaj, kin much kʼáatiktech ka a wáant* in paal tumen chéen le jaaj yaantenoʼ.+
39 Letiʼeʼ ku chuʼukul tumen juntúul demonio, ku beetaʼal u yawat yéetel ku beetaʼal u pʼuʼupʼuchkuba táan u yóomankil u chiʼ. Le demonio túunoʼ istikyaj u yóotik jóokʼol tiʼ letiʼ, yéetel le kéen jóokʼokeʼ tsʼoʼok u sen loobiltik.
40 Teneʼ tin sen kʼáataj tiʼ a discípuloʼob ka u jóoʼsoʼob le demonio tiʼoʼ, chéen baʼaleʼ maʼ páajchaj u beetkoʼobiʼ».
41 Jesúseʼ tu yaʼalaj tiʼ le máakoʼoboʼ: «J-kʼeban máakeʼex*+ minaʼan a fejeʼex, ¿tak baʼax kʼiin kʼaʼabéet in wantal ta wéeteleʼex? ¿Tak baʼax kʼiin kʼaʼabéet u chúukpajal in wóol in wáanteʼex? Taas a hijo wayeʼ».+
42 Le táan u náatsʼal le xiʼipaloʼ, le demoniooʼ tu píikchʼintaj luʼum yéetel tu beetaj u sen pʼuʼupʼuchkuba. Jesús túuneʼ tu kʼeyaj le demoniooʼ yéetel tu tsʼakaj le xiʼipaloʼ, ka túun tu kʼubaj tiʼ u taata.
43 Le máakoʼob yanoʼoboʼ jach jaʼakʼ u yóoloʼob yoʼolal le nojoch páajtalil yaan tiʼ Diosoʼ.
Letiʼobeʼ jach jaʼakʼ u yóoloʼob yoʼolal tuláakal le baʼaxoʼob ku páajtal u beetik Jesúsoʼ, teʼ súutuk jeʼeloʼ Jesúseʼ tu yaʼalaj tiʼ u discípuloʼob:
44 «Jach chʼenxikinteʼex le baʼax kin waʼalikaʼ yéetel maʼ u tuʼubulteʼex, tumen u Paal máakeʼ yaan u kʼuʼubul tu kʼab le máaxoʼob pʼekmiloʼ».+
45 Chéen baʼaleʼ letiʼobeʼ láayliʼ maʼ tu naʼatoʼob le baʼax tu yaʼalajtiʼoboʼ, tumen taʼakaʼabtiʼob utiaʼal maʼ u naʼatkoʼob, tsʼoʼoleʼ saajkoʼob kaʼach u kʼáatoʼob tiʼ Jesús baʼax u kʼáat u yaʼale.
46 Le discípuloʼob túunoʼ káaj u baʼateltʼantikoʼob máax u maas nojchil ichiloʼob.+
47 Jesúseʼ tumen u yojel baʼax yaan tu puksiʼikʼaloʼobeʼ tu chʼaʼaj juntúul chan xiʼipaleʼ ka tu tsʼáaj tu tséel,
48 ka tu yaʼalajtiʼob: «Jeʼel máaxak ka u kʼam tin kʼaabaʼ juntúul chan xiʼipal jeʼex lelaʼ teen xan ku kʼamken yéetel jeʼel máaxak ka u kʼameneʼ ku kʼamik xan le Máax túuxtenoʼ.+ Tumen le máax maas chichan u yuʼubikuba ichileʼexeʼ letiʼ u nojchil».+
49 Juaneʼ tu yaʼalaj: «J-Kaʼansaj, t-ilaj juntúul máak ku jóoʼsik demonioʼob ta kʼaabaʼ, chéen baʼaleʼ t-aʼalajtiʼ ka xuʼuluk u beetik tumen letiʼeʼ maʼatech u máan t-éetel».+
50 Chéen baʼaleʼ Jesúseʼ tu yaʼalajtiʼ: «Maʼ a waʼalikeʼextiʼ ka xuʼuluk u beetik, tumen le máax maʼ ta contraʼex yaneʼ ta favoreʼex yaan».
51 Le ka náatsʼ u kʼiinil u bin kaʼan tu kaʼatéeneʼ+ Jesúseʼ tu chʼaʼtuklaj u bin Jerusalén.
52 Le oʼolal tu túuxtaj jujuntúul discípuloʼob táanil tiʼ letiʼ. Letiʼobeʼ binoʼobeʼ ka ookoʼob tiʼ junpʼéel chan kaaj tuʼux kajaʼan le samaritanoʼobo’, bin u kaxtoʼob tuʼux u pʼáatal Jesús.
53 Chéen baʼaleʼ le máakoʼoboʼ maʼ tu kʼamoʼob Jesúsiʼ+ tumen letiʼeʼ u chʼaʼtukultmaj u bin Jerusalén.
54 Santiago yéetel Juaneʼ+ le ka tu yiloʼob le baʼax úuchaʼ tu yaʼaloʼob: «Yuumtsil, ¿a kʼáat wa ka k-aʼal ka éemek kʼáakʼ desde teʼ kaʼan utiaʼal ka xuʼulsaʼakoʼoboʼ?».+
55 Jesús túuneʼ tu sutubaeʼ ka tu yaʼalajtiʼob maʼ maʼalob bix u tuukuloʼobiʼ.
56 Ka túun binoʼob tiʼ uláakʼ kaaj.
57 Le táan túun u binoʼob teʼ bejoʼ yaan máax aʼal tiʼ Jesús: «Yaan in bin ta paach jeʼel tuʼuxak ka xiʼikecheʼ».
58 Chéen baʼaleʼ Jesúseʼ tu yaʼalajtiʼ: «Le chʼomakoʼoboʼ yaan u saajkaboʼob, yéetel le chʼíichʼoʼob ku máanoʼob teʼ kaʼanoʼ yaan u kʼuʼob, chéen baʼaleʼ u Paal máakeʼ minaʼan mix tuʼux u tʼalkúuntik u pool».+
59 Tsʼoʼoleʼ ka tu yaʼalaj tiʼ uláakʼ máak: «Koʼoten tin paach». Le máakoʼ tu yaʼalaj: «Yuumtsil, yáaxeʼ chaʼa in bin in muk in taata».+
60 Chéen baʼaleʼ Jesúseʼ tu yaʼalajtiʼ: «Chaʼa tiʼ le kimenoʼob+ ka u muk u yéet kimeniloʼoboʼ, chéen baʼaleʼ techeʼ xeen tuláakal tuʼux a tsikbalt u Reino Dios».+
61 Uláakʼ juntúuleʼ tu yaʼalaj: «Yuumtsil, jeʼel in taal ta paacheʼ, chéen baʼaleʼ yáaxeʼ chaʼa in bin in despedirtinba tiʼ le máaxoʼob yaan tin wotochoʼ».
62 Jesúseʼ tu yaʼalajtiʼ: «Le máax ku machik u nuʼukul utiaʼal u bukʼlik le luʼum ku tsʼoʼokoleʼ ku sutkuba u pakt le baʼaxoʼob tu pʼataj paachiloʼ+ maʼ maʼalob utiaʼal u Reino Diosiʼ».+
Notas
^ Ich griegoeʼ ku yaʼalaʼal kaʼach «plata».
^ Wa «le maʼalob péektsiloʼ».
^ Lelaʼ Herodes Antipas.
^ Ich griegoeʼ ku yaʼalaʼal kaʼach «tetrarca», juntúul príncipe ku gobernartik junmúuchʼ kaajoʼob yéetel tiaʼan kaʼach yáanal u páajtalil u emperadoril Romaeʼ.
^ Ilawil «U cheʼil muʼyaj», página 2584.
^ Ich griegoeʼ ku yaʼalaʼal kaʼach «ka a wil».
^ Ich griegoeʼ ku yaʼalaʼal kaʼach «generación».
