Números 11:1-35
11 Junpʼéel kʼiineʼ le kaajoʼ káaj u tsʼíikil yéetel u quejarkuba tu táan Jéeoba. Le ka tu yuʼubaj Jéeoba bix u quejarkubaʼobeʼ jach pʼuʼuji. Le beetik Jéeobaeʼ tu túuxtaj junpʼéel kʼáakʼ tu yóokʼoloʼob, le kʼáakʼ túunoʼ joʼopʼ u xuʼulsik tiʼ jujuntúul tiʼ le máaxoʼob yanoʼob paachil tiʼ le tuʼux jelekbal le israelitaʼoboʼ.
2 Le kaaj túunoʼ káaj u yaʼalik tiʼ Moisés ka áantaʼakoʼob, le oʼolal letiʼeʼ orarnaj tiʼ Jéeoba tu yoʼolaloʼob,+ le kʼáakʼ túunoʼ tuʼupi.
3 Le oʼolal tiʼ le lugar jeʼeloʼ tsʼaʼab u kʼaabaʼt Taberá,* tumen teʼeloʼ Jéeobaeʼ tu túuxtaj junpʼéel kʼáakʼ tu yóokʼoloʼob.+
4 Le yaʼabkach máakoʼob+ jejeláas tuʼux u taaloʼob* kajaʼanoʼob ichil le israelitaʼoboʼ joʼopʼ xan u quejarkubaʼob yoʼolal janal.+ Le israelitaʼob xanoʼ káaj u yokʼoloʼob tu kaʼatéen táan u yaʼalikoʼob: «¿Máax ken u tsʼáatoʼon bakʼ utiaʼal k-jaante?+
5 ¡Jach kʼajaʼantoʼon bix u siʼibiltoʼon kay utiaʼal k-jaant tu luʼumil Egipto, teʼeloʼ k-jaantik xan pepinoʼob, sandíaʼob, cebollaʼob bey xan ajoʼob!+
6 Pero beoraaʼ táan k-jach débiltal. Mix baʼal uláakʼ k-ilik, chéen maná».*+
7 Le maná+ kaʼachoʼ bey u semillail cilantroeʼ+ yéetel u coloreʼ chíikaʼan tiʼ le bedeliooʼ.*
8 Le kaajoʼ ku jóokʼol kaʼach utiaʼal u molik, yéetel ku juchʼikoʼob tiʼ molino de mano wa ku muxikoʼob tiʼ junpʼéel kaʼ. Le kéen tsʼoʼokkeʼ ku chakikoʼob tiʼ ollas wa ku beetkoʼob waajoʼob wóolistak+ tu yéetel, u saboreʼ bey jeʼex chʼujuk waaj yaan u aceiteileʼ.
9 Le kéen kʼáaxak le sereno de áakʼab teʼ tuʼux yanoʼoboʼ le manáoʼ ku kʼáaxal xaniʼ.+
10 Moiséseʼ tu yuʼubaj bix u yokʼol le kaajoʼ. Tuláakal le familiaʼoboʼ táan u yokʼoloʼob, cada máak tu entradail u yotoch. Jéeoba túuneʼ jach pʼuʼuji,+ yéetel Moisés xaneʼ jach tsʼíikilnaji.
11 Moisés túuneʼ tu yaʼalaj tiʼ Jéeoba: «¿Baʼaxten tsʼoʼok a beetik in muʼyaj?* ¿Baʼaxten maʼ tin lúubul utsil tiʼ teech? ¿Baʼaxten ka tsʼáaik in kuch tuláakal u kuuch le kaajoʼ?+
12 ¿Teen wa beet u yantal le kaajaʼ? ¿Teen wa beet u síijil utiaʼal ka a waʼalten: ‹Méekʼe, beet jeʼex u beetik le máax kanáantik juntúul chaambal* ku chuʼuchoʼ›, utiaʼal ka in bis teʼ luʼum a waʼalmaj a tsʼáaik tiʼ u yúuchben láakʼtsiloʼoboʼ?+
13 ¿Tuʼux ken in chʼaʼ bakʼ utiaʼal in tsʼáa tiʼ tuláakal le kaajoʼ? Tumen táan u yokʼoloʼob táan u yaʼalikoʼobten: ‹¡Tsʼáatoʼon bakʼ utiaʼal k-jaante!›.
14 Chéen tin juunaleʼ maʼ tu páajtal in nuʼuktik le kaajaʼ, jach yaʼab meyaj in tiaʼal.+
15 Wa bey ken a tratartilenoʼ beet uts a xuʼulsikten beoraaʼ.+ Wa tsʼoʼok in lúubul utsil tiʼ techeʼ maʼ a chaʼik u seguer in muʼyaj».
16 Jéeoba túuneʼ tu yaʼalaj tiʼ Moisés: «Ichil le máakoʼob a wojel u nuuktakil le kaajoʼ yéetel ichil le máakoʼob tsʼaʼantiʼob autoridad yóokʼol le kaajoʼ,+ muchʼkíint 70 xiiboʼob tiʼ u kaajil Israeleʼ ka a bisoʼob teʼ najil reuniónoʼ yéetel aʼaltiʼob ka waʼalakoʼob ta wéetel teʼeloʼ.
17 Teneʼ yaan in wéemel teʼeloʼ+ yéetel yaan in tʼaan ta wéetel,+ yaan in chʼaʼik junpʼéel parte tiʼ le poder+ yaan ta wóokʼoloʼ yéetel yaan in tsʼáaik tu yóokʼoloʼob, letiʼob túuneʼ yaan u yáantkechoʼob utiaʼal ka a bis u kuuch le kaajoʼ, beyoʼ maʼ ken a bis ta juunal.+
18 Techeʼ unaj a waʼalik tiʼ le kaajoʼ: ‹Limpiokíintabaʼex utiaʼal sáamal+ tumen yaan a jaantikeʼex bakʼ. Tumen tsʼoʼok a wokʼoleʼex tu táan Jéeoba+ táan a waʼalikeʼex: «¿Máax ken u tsʼáatoʼon bakʼ utiaʼal k-jaante?, maas maʼalob yaniloʼon kaʼach Egipto».+ Jéeobaeʼ yaan u tsʼáaikteʼex bakʼ, yéetel teʼexeʼ yaan a jaantikeʼex.+
19 Yaan a jaantikeʼex bakʼ, maʼ chéen junpʼéel díaiʼ, mix chéen 2 díasiʼ, mix chéen 5 díasiʼ, mix chéen 10 díasiʼ, mix chéen 20 díasiʼ.
20 Baʼaxeʼ yaan a jaantikeʼex junpʼéel túulis mes, yaan a jaantikeʼex hasta ken jóokʼok ta niʼex yéetel hasta ken taakak a xejeʼex,+ tumen teʼexeʼ ta rechazarteʼex Jéeoba, le máax yaan chúumuk tiʼ teʼexoʼ, yéetel okʼolnajeʼex tu táan, táan a waʼalikeʼex: «¿Baʼaxten jóokʼoʼon tu luʼumil Egipto?»›».+
21 Moisés túuneʼ tu yaʼalaj: «Teʼ kaaj tuʼux yanenaʼ yaan 600,000 xiiboʼob+ yaantiʼob u jaʼabil utiaʼal u binoʼob baʼateʼel. ¡Kex beyoʼ tsʼoʼok a waʼalik: ‹Yaan in tsʼáaiktiʼob bakʼ yéetel yaan u jaantikoʼob bakʼ junpʼéel túulis mes›!
22 Wa ka kíimsaʼak tuláakal le wakaxoʼob yéetel le tamanoʼoboʼ, ¿suficiente wa utiaʼaloʼob? Wa ka chuʼukuk tuláakal u kayiloʼob le kʼáaʼnáaboʼ, ¿suficiente wa utiaʼaloʼob?».
23 Jéeoba túuneʼ tu yaʼalaj tiʼ Moisés: «¿Jéeobaeʼ maʼ wa tu páajtal u beetik lelaʼ?*+ Beora ken a wil wa yaan u yúuchul wa maʼ le baʼax tsʼoʼok in waʼaliktechoʼ».
24 Moisés túuneʼ jóokʼeʼ ka tu yaʼalaj tiʼ le kaaj le baʼax tsʼoʼok u yaʼalik Jéeobaoʼ. Tu muchʼaj xan 70 xiiboʼob tiʼ u nuuktakil le kaajoʼ ka tu beetaj u waʼataloʼob tu baʼpach le tabernáculooʼ.+
25 Jéeoba túuneʼ éem tiʼ junpʼéel múuyaleʼ+ ka tu tʼanaj Moisés,+ ka tu chʼaʼaj junpʼéel parte tiʼ le poder+ yaan tu yóokʼoloʼ ka tu tsʼáaj tu yóokʼol cada juntúul tiʼ le 70 u nuuktakil le kaajoʼ. Jach teʼ súutuk ka tsʼaʼab le poder tiʼoboʼ joʼopʼ u beetkoʼob le baʼax ku beetik le profetaʼoboʼ,*+ chéen baʼaleʼ maʼ suunaj u beetoʼob tu kaʼatéeniʼ.
26 Yaan kaʼach kaʼatúul xiiboʼob teʼ kaajoʼ. U kʼaabaʼ le máakoʼobaʼ Eldad yéetel Medad. U poder Dioseʼ joʼopʼ u yéemel tu yóokʼoloʼob tumen tiaʼanoʼob ichil le máaxoʼob tsʼíibtaʼab u kʼaabaʼoboʼ, chéen baʼaleʼ maʼ jóokʼoʼob utiaʼal u binoʼob teʼ tabernáculooʼ. Letiʼob túuneʼ, le tiaʼanoʼob ichil le kaajoʼ, joʼopʼ u beetkoʼob le baʼax ku beetik le profetaʼoboʼ.
27 Juntúul xiʼipal túuneʼ bin áalkabil u yaʼal tiʼ Moisés: «¡Eldad yéetel Medadeʼ táan u beetkoʼob ichil le kaaj le baʼax ku beetik le profetaʼoboʼ!».
28 Josué+ u hijo Nun, le máax desde tu táankelmil ku yáantik Moisésoʼ, tu núukeʼ ka tu yaʼalaj: «¡Moisés, in yuum, maʼ a chaʼik u beetkoʼob leloʼ!».+
29 Chéen baʼaleʼ Moiséseʼ tu yaʼalajtiʼ: «¿Celosoech wa tin woʼolal? Maʼ a wuʼuyikaba beyoʼ, ¡kexiʼ wa tuláakal u kaajal Jéeoba ka u beet u profetaileʼ yéetel ka u tsʼáa Jéeoba u poder tu yóokʼoloʼobeʼ!».
30 Le ka tsʼoʼokeʼ Moiséseʼ suunaj ichil le kaaj junmúuchʼ yéetel u nuuktakil u kaajil Israeloʼ.
31 Jéeoba túuneʼ tu beetaj u taal junpʼéel iikʼeʼ ka joʼopʼ u taasik beechʼoʼob desde teʼ kʼáaʼnáaboʼ ka tu beetaj u jáayloʼob tu baʼpach le kaajoʼ.+ Tiʼ jeʼel baʼaxak direcciónil ka xíimbalnak máakeʼ junpʼéel kʼiin jeʼel u bisik tiʼ u kʼáatmáansik le tuʼux jáayoʼoboʼ yéetel óoliʼ junpʼéel metro* u kaʼanliloʼob yóokʼol le luʼumoʼ.
32 Le oʼolaleʼ teʼ día jeʼeloʼ, bul kʼiin yéetel bul áakʼabeʼ bey xan bul kʼiin tiʼ le uláakʼ díaoʼ, le máakoʼoboʼ maʼ xuʼul u juntarkoʼob beechʼoʼobiʼ. Mix máak tu juntartaj menos tiʼ diez homeresiʼ* yéetel seguernaj u jaykoʼob tu baʼpach le kaajoʼ.
33 Chéen baʼaleʼ le jach táant u níichʼikoʼob le bakʼoʼ, antes u káajal u jachʼkoʼobeʼ, Jéeobaeʼ jach pʼuʼuj tu contra le kaajoʼ, Jéeoba túuneʼ joʼopʼ u castigartik le kaajoʼ ka tu beetaj u kíimil yaʼabkach máakoʼob.+
34 Le oʼolal tiʼ le lugar jeʼeloʼ tu tsʼáajoʼob u kʼaabaʼt Kibrot-ataavá,*+ tumen tiʼ tu mukoʼob le máakoʼob tu tsʼíiboltoʼob chéen janaloʼ.+
35 Le kaaj túunoʼ lukʼ Kibrot-ataaváeʼ ka bin Azerot+ yéetel teʼeloʼ tiʼ pʼáatiʼ.
Notas
^ U kʼáat u yaʼal «U Yelel» wa u tóochʼbal kʼáakʼ.
^ Maʼ xaaneʼ táan u yúuchul tʼaan tiʼ le máaxoʼob maʼ israelitaʼob yanoʼob ichiloʼoboʼ.
^ Ilawil página 2570.
^ Lelaʼ u yiits jujunpʼéel clase cheʼob jach kiʼiboktak.
^ Wa «in sufrir».
^ Tuláakʼ tuʼuxeʼ ku yaʼalaʼal «chaanpal».
^ Ich hebreoeʼ ku yaʼalaʼal kaʼach «¿Jach wa túun kóom u kʼab Jéeoba?».
^ Wa «joʼopʼ u profetizaroʼob». Ilawil «Profeta», página 2576.
^ Ich hebreoeʼ ku yaʼalaʼal kaʼach «dos codos». Ilawil «Codo», página 2559.
^ Junpʼéel homereʼ letiʼe bukaʼaj ku bisik junpʼéel nuʼukul de 220 litrosoʼ.
^ U kʼáat u yaʼal «Lugaroʼob Utiaʼal u Muʼukul le ku Tsʼíibolaloʼoboʼ».
