Jeremías 31:1-40
31 Jéeobaeʼ ku yaʼalik: «Teʼ kʼiinoʼob jeʼeloʼ teneʼ yaan in beetkinba u Dios tuláakal le familiaʼob yaan Israeloʼ, yéetel letiʼobeʼ yaan u beetkubaʼob in kaajal».+
2 Lelaʼ letiʼe baʼax ku yaʼalik Jéeobaaʼ:
«Le kaaj maʼ kíimsaʼab yéetel espadaoʼ lúub utsil tiʼ Dios teʼ desiertooʼ.
Israeleʼ táan kaʼach u bin teʼ tuʼux kun jeʼeleloʼ».
3 Desde náach lukʼ Jéeoba utiaʼal u taal u yaʼalten:
«Teneʼ tsʼoʼok in yaabiltikech yéetel junpʼéel yaabilaj minaʼan xuʼulul tiʼ.
Tu yoʼolal in nojoch yaabilajeʼ tsʼoʼok in beetik a náatsʼal tin wiknal.*+
4 Teneʼ yaan in beetik a kaʼa líikʼil, techeʼ yaan a jel líiʼsaʼal.+
U hija Israel, techeʼ yaan a kaʼa chʼaʼik a panderetaʼob,le kéen jóokʼkecheʼ yaan a wóokʼot yéetel kiʼimak óolal.*+
5 Techeʼ yaan a kaʼa pakʼik uva tu montañailoʼob Samaria.+
Le máax ku paakʼaloʼ yaan u jaantik u yich le baʼax ku pakʼikoʼ.+
6 Le máaxoʼob ku kananoʼob tu montañailoʼob Efraínoʼ yaan u kʼuchul u kʼiinil u kʼaʼam aʼalikoʼob:
‹Líikʼeneʼex, koʼoneʼex Sión, koʼoneʼex tu yiknal Jéeoba k-Dios›».+
7 Lelaʼ letiʼe baʼax ku yaʼalik Jéeobaaʼ:
«Yéetel kiʼimak óolal ka kʼaaynakeʼex u yuʼub Jacob.
Awatnakeʼex yéetel kiʼimak óolal tumen maas kaʼanal yanileʼex tiʼ le kaajoʼoboʼ.+
Tsʼáaʼex ojéeltbil tuláakal tuʼux. Alabarteʼex Dios, aʼaleʼex:
‹Jéeoba Dios, salvart a kaajal, salvart u yalab u kaajil Israel›.+
8 Utiaʼal u suutoʼob wayeʼ yaan in beetik u lukʼloʼob tu luʼumil xaman.+
Teneʼ yaan in máan in kaxtoʼob tak tu xuul yóokʼol kaab utiaʼal in muchʼkíintikoʼob.+
Tu yéeteloʼobeʼ yaan u taal chʼóopoʼob bey xan móochoʼob,+koʼoleloʼob embarazadaʼob bey xan koʼoleloʼob taʼaytak u síijil u chaambaloʼob.
Yaʼaboʼob kun suutoʼob wayeʼ, junmúuchʼ kun taaloʼob.+
9 Letiʼobeʼ táan u yokʼoloʼob le kéen suunakoʼob.+
Teneʼ yaan in nuʼuktikoʼob mientras táan u kʼáatkoʼob ka in chʼaʼ óotsilil tiʼob.
Teneʼ yaan in biskoʼob tak tuʼux yaan u sayabiloʼob jaʼ,+yéetel utiaʼal maʼ u tʼóochpajloʼobeʼ yaan in biskoʼob tiʼ junpʼéel táax bej.
Tumen teneʼ beyen juntúul Taatatsil utiaʼal Israeleʼ, yéetel Efraíneʼ in yáax paal».+
10 Kaajeʼex, uʼuyeʼex baʼax ku yaʼalik Jéeoba,yéetel aʼaleʼex tiʼ le islaʼob náach yaniloʼoboʼ:+
«Le Máax kʼiʼitbes Israeloʼ yaan u kaʼa muchʼkíintik.
Letiʼeʼ yaan u kanáantik jeʼex u beetik juntúul j-kanan tamaneʼ.+
11 Jéeobaeʼ yaan u salvartik Jacob,+yaan u tokik tu kʼab le máax maas muʼukʼaʼan tiʼ Jacoboʼ.+
12 Le kéen taalakoʼobeʼ yaan u yawatoʼob yéetel kiʼimak óolal tu kaʼanlil Sión,+yaan u disfrutartik u kuxtaloʼob tu yoʼolal u yutsil* Jéeoba,tu yoʼolal le trigooʼ,* tu yoʼolal le túumben vinooʼ,+ tu yoʼolal le aceiteoʼbey xan tu yoʼolal u mejnil le tamanoʼob yéetel le wakaxoʼoboʼ.+
Letiʼobeʼ yaan u pʼáatloʼob jeʼex junpʼéel jardín maʼalob jóoyabtaʼanileʼ,+mix bikʼin u kaʼa pʼáatal minaʼan u muukʼoʼob».+
13 «Teʼ kʼiinoʼob jeʼeloʼ le x-chʼúupalaloʼoboʼ yaan u yóokʼotoʼob yéetel kiʼimak óolal,bey xan le táankelmoʼob yéetel le chʼijaʼanoʼoboʼ.+
Teneʼ yaan in beetik u xuʼulul u yaatal u yóoloʼob,+yaan in líiʼsik u yóoloʼob, maʼ ken in beet u yaatal u yóoloʼob, baʼaxeʼ yaan in kiʼimakkúuntik u yóoloʼob.+
14 Teneʼ yaan in tsʼáaik yaʼab baʼal u jaant le sacerdoteʼoboʼ,in kaajaleʼ yaan u sen kiʼimaktal u yóol tu yoʼolal in wutsil»,+ leloʼ bey u yaʼalik Jéeoba.
15 «Lelaʼ letiʼe baʼax ku yaʼalik Jéeobaaʼ:
‹Yaan baʼax ku yuʼubaʼal tu kaajil Ramá,+ táan u yuʼubaʼal u yawat okʼol máax yaachajaʼan u yóol:
Raqueleʼ táan u yoʼtik u paalal.+
Letiʼeʼ maʼ tu yóotik ka kiʼimakkúuntaʼak u yóol,tumen tsʼoʼok u pʼáatal minaʼan u paalal›».+
16 Lelaʼ letiʼe baʼax ku yaʼalik Jéeobaaʼ:
«‹Xuʼuluk a wokʼol yéetel xuʼuluk u yáalal u jaʼil a wich,tumen yaan a kʼamik u boʼolil le baʼax ka beetkoʼ.
A paalaleʼ yaan u jóokʼloʼob teʼ luʼum tuʼux yaan u enemigoʼoboʼ›,+ leloʼ bey u yaʼalik Jéeoba.
17 Jéeobaeʼ ku yaʼalik: ‹Yaan baʼax maʼalob ku taal u kʼiin,+a paalaleʼ yaan u suutoʼob tu luʼumoʼob›».+
18 «Teneʼ tsʼoʼok in wuʼuyik u yáakam Efraín, letiʼeʼ ku yaʼalik:
‹Techeʼ tsʼoʼok a nuʼuktiken yéetel tsʼoʼok a tojkíintikenjeʼex u beetaʼal tiʼ juntúul chan wakax jach kʼoʼoxeʼ.
Jéeoba, tsʼáaten u páajtalil in suut, teen túuneʼ tu séebaʼanil kin taal,tumen teech in Diosech.
19 Le ka tsʼoʼok in suuteʼ yaachaj in wóol yoʼolal baʼax in beetmaj.+
Le ka áantaʼaben in naʼat maʼ maʼalob baʼax in beetmeʼ, jach yaachaj tin wóol baʼax in beetmaj.*
Tu yoʼolal le baʼaxoʼob tin beetaj tin táankelmiloʼ,jach suʼlakchajen yéetel tin wuʼuyaj mix baʼal in biilal›».+
20 Jéeobaeʼ ku yaʼalik: «Efraíneʼ juntúul kiʼichkelem paal jach in yaabiltmaj.+
Jeʼel jaytéen ka tʼaanaken tu contraeʼ, le jaytéen xan kin tʼaan maʼalob tu yoʼolal.
Tu yoʼolaleʼ péeknajaʼan u yóol in puksiʼikʼal,+le oʼolal yaan in chʼaʼik óotsilil tiʼ».+
21 «Waʼakúunt señaloʼob teʼ bejoʼyéetel tsʼáa xuʼukʼoʼob bey señaleʼ.+
Jach ilawil le bejoʼ, le bej tuʼux unaj a binoʼ.+
U hija Israel, suunen, suunen teʼ kaajoʼob tuʼux kajaʼanech kaʼachoʼ.
22 Satal óol koʼolel, ¿baʼax kʼiin u xuʼulul a traicionar?
Jéeobaeʼ tsʼoʼok u beetik junpʼéel túumben baʼal teʼ luʼumoʼ:
juntúul koʼoleleʼ yaan u máan tu paach juntúul xiib».
23 Jéeoba u Dios Israel, le máax gobernartik le ángeloʼoboʼ, ku yaʼalik: «Le kéen in kaʼa taas le máaxoʼob bisaʼanoʼob táanxel luʼumiloʼ, letiʼobeʼ yaan u kaʼa aʼalikoʼob tu luʼumil Judá yéetel tu kaajiloʼob: ‹Ka u bendecirtech Jéeoba, teech le lugar tuʼux ku kaxtaʼal justicia tumen le máakoʼoboʼ,+ le santa montañaoʼ›.+
24 Tu luʼumil Judá yéetel tiʼ tuláakal u kaajiloʼobeʼ tiʼ kun kajtal le j-kolnáaloʼoboʼ bey xan le j-kanan tamanoʼoboʼ.+
25 Teneʼ yaan in tsʼáaik baʼax kʼaʼabéet tiʼ le máax kaʼanaʼanoʼ yéetel yaan in tsʼáaik u muukʼ le máax tsʼoʼok u pʼáatal minaʼan u muukʼoʼ».+
26 Tiʼ leloʼ téek aajeneʼ ka tin pʼilaj in wich, jach kiʼ úuchik in wenel.
27 Jéeobaeʼ ku yaʼalik: «¡Ilawile! Bíin kʼuchuk u kʼiinil in beetik u yaʼabtal máakoʼob bey xan baʼalcheʼob+ tu luʼumil Israel yéetel tu luʼumil Judá».
28 Jéeobaeʼ ku yaʼalik: «Jeʼex úuchik in kaxtik u súutukil in jóokpaytikoʼob, in nikikoʼob, in jutikoʼob, in xuʼulskoʼob yéetel in beetiktiʼob loobeʼ+ bey xan ken in kaxt u súutukil in jel líiʼskoʼob yéetel in kaʼa pakʼikoʼob.+
29 Teʼ kʼiinoʼob jeʼeloʼ letiʼobeʼ maʼ ken u yaʼaloʼob: ‹Letiʼe taatatsiloʼob jaant suʼutsʼ uvaoʼ, pero u paalaloʼob chaʼajchaj* u kojoʼob›.+
30 Teʼ kʼiinoʼob jeʼeloʼ cada juntúuleʼ yaan u kíimil tu yoʼolal baʼax maʼ maʼalob u beetmiʼ. Le máax kun jaantik suʼutsʼ uvaeʼ letiʼ kun chaʼajtal u kojoʼob».
31 Jéeobaeʼ ku yaʼalik: «¡Ilawile! Yaan u kʼuchul u kʼiinil in beetik junpʼéel túumben pacto yéetel u kaajil Israel bey xan yéetel u kaajil Judá.+
32 Le pactoaʼ maʼ jeʼex le tin beetaj yéetel u yúuchben láakʼtsiloʼob teʼ kʼiin ka tin machaj u kʼaboʼob utiaʼal ka in jóoʼsoʼob tu luʼumil Egiptooʼ,+ ‹le pacto maʼ chúukpaj u yóol u tsʼoʼokbesoʼob+ kex teen kaʼach u yuumiloʼoboʼ›,* leloʼ bey u yaʼalik Jéeoba».
33 Jéeobaeʼ ku yaʼalik: «Lelaʼ letiʼe pacto ken in beet yéetel u kaajil Israel le kéen tsʼoʼokok le kʼiinoʼob jeʼeloʼ. Yaan in tsʼáaik in leyoʼob tu tuukuloʼob+ yéetel yaan in tsʼíibtik tu puksiʼikʼaloʼob.+ Teen túuneʼ yaan in beetkinba u Diosoʼob, yéetel letiʼobeʼ yaan u beetkubaʼob in kaajal».+
34 Jéeobaeʼ ku yaʼalik: «Mix juntúul tiʼ letiʼob kun kʼaʼabéettal u kaʼansik u yéet máakil bey xan u kaʼansik u sukuʼun, táan u yaʼalik: ‹¡Kʼaj óolt Jéeoba!›.+ Tumen tuláakloʼob ken u kʼaj óoltenoʼob, desde u maas chichnil tak u maas nojchil.+ Teneʼ yaan in perdonartik le baʼax maʼ maʼalob u beetmoʼoboʼ yéetel maʼ ken in kaʼa kʼaʼajs u kʼebanoʼob».+
35 Lelaʼ letiʼe baʼax ku yaʼalik Jéeoba,le máax tsʼaamil le Kʼiin utiaʼal u juul de díaoʼ,le máax tsʼaamil le leyoʼob nuʼuktik le Luna yéetel le estrellaʼob ku juuloʼob de áakʼaboʼ,le máax woʼoltik le kʼáaʼnáab yéetel ku beetik u juum u olasiloʼ,u kʼaabaʼeʼ Jéeoba, le máax gobernartik le ángeloʼoboʼ,+ letiʼeʼ ku yaʼalik:
36 «‹Wa ka kʼuchuk u kʼiinil u fallar le leyoʼob in tsʼaamoʼchéen jaʼaliʼ bey jeʼel u xuʼulul le kaaj mantatsʼ tiaʼan tin táanoʼ, u kaajal u paalal Israel›,+ leloʼ bey u yaʼalik Jéeoba».
37 Lelaʼ letiʼe baʼax ku yaʼalik Jéeobaaʼ: «‹Wa ka béeyak u pʼiʼisil le kaʼanoʼoboʼ yéetel ka béeyak u xakʼaltaʼal tak u chuunpakʼiloʼob le luʼumoʼ teen túuneʼ jeʼel u xuʼulul in kʼamik tuláakal u paalal Israel tu yoʼolal le baʼaxoʼob u beetmoʼoboʼ›, leloʼ bey u yaʼalik Jéeoba».+
38 Jéeobaeʼ ku yaʼalik: «¡Ilawile! Yaan u kʼuchul u kʼiinileʼ le kaajaʼ yaan u jel líiʼsaʼal+ utiaʼal Jéeoba, lelaʼ yaan u káajal desde teʼ lugar ku kʼaabaʼtik u Torreil Ananel+ tak teʼ lugar ku kʼaabaʼtik u Joonajil le Esquinaoʼ.+
39 Le hilo ikil u yúuchul pʼiisoʼ+ toj kun bin tak teʼ kaʼanal lugar ku kʼaabaʼtik Gareboʼ, le kéen tsʼoʼokkeʼ ku lóochol tu tojil Goaj.
40 Tuláakal le táax luʼum tuʼux ku tsʼaʼabal le kimenoʼob yéetel tuʼux ku puʼulul u taʼanil kʼáakʼ,* yéetel tuláakal le luʼum tuʼux ku yúuchul paakʼal ku kʼuchul tak tu Táax Luʼumil Cedrón+ tak tu tiʼits le joonaj ku kʼaabaʼtik u Joonajil Tsíiminoʼob+ yaan lakʼinoʼ, yaan u pʼáatloʼob junpʼéel baʼal santo tu táan Jéeoba,+ mix bikʼin kun kaʼa juʼujutbiloʼob, mix bikʼin kun kaʼa kʼaskúuntbiloʼob».
Notas
^ Wa «Maʼ xuʼuluk in weʼesiktech nojoch yaabilajiʼ».
^ Wa «yaan a wóokʼot yéetel le máaxoʼob ku cheʼejoʼoboʼ».
^ Wa maʼ xaaneʼ cebada.
^ Wa «le maʼalob baʼaloʼob ku tsʼáaik».
^ Wa «tin lajaj u muukʼ in wook».
^ Ich hebreoeʼ ku yaʼalaʼal kaʼach «bóol».
^ Uláakʼ bix u traducirtaʼaleʼ «u yíichamoʼob».
^ Wa «chʼachʼalkil taʼan», lelaʼ letiʼe taʼan xaʼakʼpajaʼan yéetel u tsaatsel le baʼalcheʼob ku kʼuʼubloʼoboʼ.
