Génesis 6:1-22
6 Le ka káaj u yaʼabtal máakoʼob way yóokʼol kaab yéetel le ka yanchaj u hijaʼobeʼ,
2 le ángeloʼoboʼ*+ tu yiloʼobeʼ jach kiʼichpantak le x-chʼúupalaloʼoboʼ. Letiʼob túuneʼ éemoʼob way luʼumeʼ ka kajlajoʼob yéetel le jaytúul utschaj tu yichoʼoboʼ.
3 Jéeoba túuneʼ tu yaʼalaj: «Maʼ mantatsʼ chéen ken in wil baʼax ku beetik máakiʼ,+ tumen letiʼeʼ chéen kʼeban wíinik.* Le oʼolal chéen 120 años kun kuxtal».+
4 Le ka tu yaʼalaj Dios lelaʼ, yaan kaʼach giganteʼob* way luʼumeʼ. Teʼ kʼiinoʼob jeʼeloʼ le ángeloʼoboʼ yanchaj baʼal u yiloʼob yéetel le koʼoleloʼoboʼ ka yanchaj u paalaloʼob. U paalaloʼobeʼ jach yaan kaʼach u muukʼoʼob yéetel jach kʼaj óoltaʼaboʼob.
5 Jéeoba túuneʼ tu yileʼ tsʼoʼok u jach yaʼabtal u beetaʼal baʼaloʼob kʼaastak way yóokʼol kaab tumen wíinikeʼ. Tu yilaj xaneʼ mantatsʼ chéen baʼaloʼob kʼaastak yaan tu puksiʼikʼaloʼob.+
6 Yoʼolal leloʼ Jéeobaeʼ yaachaj u yóol* úuchik u beetik máak way yóokʼol kaabeʼ yéetel jach tristechaji.+
7 Le beetik Jéeobaeʼ tu yaʼalaj: «Nikaʼaj in xuʼuls tiʼ le máakoʼob in beetmaj teʼ luʼumoʼ, paʼteʼ yéetel le baʼalcheʼob ku yalakʼtaʼaloʼoboʼ, le baʼalcheʼob ku jíiltikubaʼoboʼ, yéetel le baʼalcheʼob ku xikʼnaloʼoboʼ,* tumen yaj tin wóol úuchik in beetkoʼob».
8 Chéen baʼaleʼ Noéeʼ lúub utsil tiʼ Jéeoba.
9 Lelaʼ u tsikbalil u kuxtal Noé.
Noéeʼ juntúul utsul máak.+ Letiʼeʼ tu beetaj baʼax maʼalob,* maʼ jeʼex le máakoʼob kuxlajoʼob tu kʼiiniloʼ. Tsʼoʼoleʼ mantatsʼ tu beetaj baʼax uts tu tʼaan le u jaajil Diosoʼ.+
10 Ka máan tiempoeʼ Noéeʼ yanchaj óoxtúul u hijoʼob: Sem, Cam yéetel Jafet.+
11 Teʼ kʼiinoʼob jeʼeloʼ le máakoʼoboʼ táan kaʼach u beetkoʼob baʼaloʼob kʼaastak tu táan le u jaajil Diosoʼ. Le luʼum túunoʼ chuʼup yéetel baʼaloʼob kʼaastak.
12 Dios túuneʼ paakatnaj way luʼumeʼ ka tu yileʼ tsʼoʼok u jach kʼastal,+ tu yileʼ tuláakal máakeʼ tsʼoʼok u jach kʼaskúuntik u kuxtal.+
13 Ka tsʼoʼokeʼ Dioseʼ tu yaʼalaj tiʼ Noé: «Tsʼoʼok in chʼaʼtuklik in xuʼulsik tiʼ tuláakal máak, tumen tu culpaʼobeʼ le luʼumoʼ chuup yéetel baʼaloʼob kʼaastak, le oʼolal yaan in xuʼulskoʼob yéetel yaan in kʼaskúuntik le luʼumoʼ.+
14 Beet junpʼéel arca* yéetel cheʼob yaan u yiitsoʼob.+ Yaan a beetik cuartoʼob ichil le arcaoʼ. Tsʼoʼoleʼ ichil yéetel paachileʼ yaan a tsʼáaik chapopoteiʼ.*+
15 Bey ken a beetilaʼ: u chowakileʼ 133 metros y medio,* u kóochileʼ 22 metros y medio,* yéetel u kaʼanlileʼ 13 metros y medio.*
16 Yaan xan a tsʼáaik u ventanail utiaʼal ka okok le sáasiloʼ.* Lelaʼ 44 centímetros y medio* u kaʼanlil desde tu techoil le arcaoʼ. Óoxpʼéel piso kun antaltiʼ yéetel tiʼ junpʼéel tséel ken a tsʼáa u joonajil.+
17 Teneʼ yaan in beetik u búulul+ le luʼum utiaʼal ka in xuʼuls tiʼ tuláakal baʼal ku chʼaʼik u yiikʼoʼ. Tuláakal baʼal yaan teʼ luʼumoʼ yaan u kíimil.+
18 Teneʼ kin beetik junpʼéel pacto* ta wéetel, teech túuneʼ kʼaʼabéet a wokol ichil le arcaoʼ bey xan a hijoʼob, a watan yéetel a wiliboʼob.+
19 Ichil le arcaoʼ kʼaʼabéet xan a woksik kaʼatúul tiʼ tuláakal u clasesil baʼalcheʼob yanoʼ,+ juntúul u xiibil yéetel juntúul u x-chʼuupil+ utiaʼal maʼ u kíimloʼob.
20 Tiʼ le u clasesil baʼalcheʼob ku xikʼnaloʼoboʼ,* tiʼ le u clasesil baʼalcheʼob ku yalakʼtaʼaloʼoboʼ, yéetel tiʼ le u clasesil baʼalcheʼob ku jíiltikubaʼoboʼ yaan a woksik kaʼatúul tiʼ letiʼob utiaʼal maʼ u kíimloʼob.+
21 Teech xaneʼ kʼaʼabéet a juntartik yéetel a woksik teʼ arcaoʼ jejeláas baʼaloʼob utiaʼal a jaante+ bey xan utiaʼal u jaant le baʼalcheʼoboʼ».
22 Noé túuneʼ tu beetaj tuláakal le baʼax aʼalaʼabtiʼ tumen Diosoʼ. Tu beetaj jach jeʼex úuchik u yaʼalaʼaltiʼoʼ.+
Notas
^ Ich hebreoeʼ ku yaʼalaʼal kaʼach «u paalal Dios».
^ Wa «ku beetik chéen le baʼax ku tsʼíiboltik u kʼeban wíinkliloʼ».
^ Ich hebreoeʼ ku yaʼalaʼal kaʼach «nefilimoʼob». Maʼ xaaneʼ u kʼáat u yaʼaleʼ «Le Máaxoʼob ku Lúuʼskoʼob Máakoʼ». Ilawil «Nefilim», página 2573.
^ Wa «arrepentirnaji».
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
^ Wa «maʼ yanchaj u culpaiʼ».
^ Tuláakʼ tuʼuxeʼ ku yaʼalaʼal «chapapote».
^ Ich hebreoeʼ ku yaʼalaʼal kaʼach «junpʼéel caja»; junpʼéel nuxiʼ barco.
^ Ich hebreoeʼ ku yaʼalaʼal kaʼach «300 codos». Ilawil «Codo», página 2559.
^ Ich hebreoeʼ ku yaʼalaʼal kaʼach «50 codos».
^ Ich hebreoeʼ ku yaʼalaʼal kaʼach «30 codos».
^ Ich hebreoeʼ ku yaʼalaʼaltiʼ tsóhar. Lelaʼ ku tuklaʼal xaneʼ junpʼéel techo de óoliʼ medio metro u decliveil, maʼ junpʼéel jool wa ventana utiaʼal u yokol sáasiliʼ.
^ Ich hebreoeʼ ku yaʼalaʼal kaʼach «junpʼéel codo».
^ Wa «acuerdo».
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
