2 Pedro 3:1-18
3 In yaabilaj sukuʼuneʼex, lelaʼ letiʼ le u kaʼapʼéel carta kin tsʼíibtikteʼexaʼ. Jeʼex tin beetaj teʼ yáax junpʼéeloʼ táan in wilik in wajsik a tuukuleʼex ikil in kʼaʼajsikteʼex le baʼaloʼobaʼ.+
2 Teneʼ in kʼáat ka kʼaʼajakteʼex le baʼaxoʼob tu yaʼalaj u profetaʼob Dios úuchjeakiloʼ, bey xan le baʼaxoʼob tu kaʼansaj Yuumtsil le Máax Salvarkoʼonoʼ. Le baʼaloʼobaʼ letiʼe baʼax ta wuʼuyeʼex u kaʼansik le apóstoloʼoboʼ.
3 Chéen baʼaleʼ jach unaj a wojéeltikeʼexeʼ tu tsʼook kʼiinoʼobeʼ yaan u yantal máakoʼob uts tu tʼaan u pʼaʼastajoʼob, letiʼobeʼ yaan u yaʼalikoʼob baʼal jeʼex u túulchʼintaʼaloʼob tumen u tsʼíibolaloʼobeʼ,+
4 yaan u yaʼalikoʼob: «¿Baʼax túun úuch yéetel le kʼiinoʼob way yaan Cristooʼ?+ Tumen desde le kʼiin ka kíim* k-úuchben láakʼtsiloʼobeʼ tuláakal le baʼaloʼoboʼ láayliʼ bey yaniloʼob jeʼex tu káajbal yóokʼol kaabeʼ».+
5 Le máakoʼobaʼ ku tuʼubsikoʼobeʼ úuchjeakileʼ yanchaj junpʼéel kaʼan bey xan junpʼéel luʼum etsʼekbal tubeel yéetel maʼ tʼuubul ich jaʼiʼ, chéen baʼaleʼ baʼpachtaʼan tumen jaʼ jeʼex u yaʼalmil Diosoʼ.+
6 Tuláakal le jaʼoʼ letiʼe baʼax meyajnaj utiaʼal u xuʼulsaʼal tiʼ le úuchben yóokʼol kaab le ka beetaʼab u búululoʼ.+
7 Tu yoʼolal xan u tʼaan Dioseʼ le kaʼan yéetel le luʼum yaan bejlaʼaʼ tsʼaʼanoʼob junpáayil utiaʼal u xuʼulsaʼaloʼob yéetel kʼáakʼ tu kʼiinil le juiciooʼ bey xan tu kʼiinil u xuʼulsaʼal tiʼ le kʼasaʼan máakoʼoboʼ.+
8 Chéen baʼaleʼ, in yaabilaj sukuʼuneʼex, bik tuʼubukteʼex lelaʼ: utiaʼal Jéeobaeʼ junpʼéel kʼiineʼ bey 1,000 añoseʼ yéetel 1,000 añoseʼ bey junpʼéel kʼiineʼ.+
9 Jéeobaeʼ maʼ xaan utiaʼal u béeykuntik baʼax u yaʼalmiʼ,+ jeʼex u tuklaʼal tumen jujuntúul máakoʼobeʼ, baʼax ku yúuchleʼ chúukaʼan u yóol tiʼ teʼex* tumen maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak.+
10 Kex beyoʼ u kʼiinil Jéeobaeʼ+ yaan u taal jeʼex u taal juntúul j-ookoleʼ.+ Teʼ kʼiin jeʼeloʼ le kaʼanoʼ yaan u yáambal le kéen xuʼulsaʼaktiʼ,+ chéen baʼaleʼ le baʼaxoʼob yanoʼob ichiloʼ yaan u sen chokotaloʼob tak ken yíibikoʼob. Le luʼum yéetel le baʼaxoʼob beetaʼan tu yóokʼoloʼ yaan u chíikpajloʼob.+
11 Wa tuláakal le baʼaloʼob bey kun beetbil u yíibilaʼ jach kʼaʼabéet a wilik a biskeʼex junpʼéel kuxtal limpio tu táan Dios yéetel a tsʼáaik a wóol a meyajteʼex.
12 Mientras táan a beetkeʼex le baʼaloʼobaʼ unaj a páaʼtkeʼex u kʼuchul u kʼiinil Jéeoba,+ yéetel unaj a tsʼáaik ta tuukuleʼex yaan u kʼuchul* le kʼiinaʼ. Teʼ kʼiin jeʼeloʼ yaan u tóokaʼal le kaʼanoʼ,+ tsʼoʼoleʼ tuláakal le baʼaloʼoboʼ yaan u yíibiloʼob le kéen sen chokochajkoʼob.
13 Chéen baʼaleʼ toʼoneʼ táan k-páaʼtik junpʼéel túumben kaʼan yéetel junpʼéel túumben luʼum u yaʼalmaj Dios u tsʼáaiktoʼon.+ Teʼeloʼobaʼ mantatsʼ yaan u yantal justiciaiʼ.+
14 Le oʼolaleʼ, in yaabilaj sukuʼuneʼex, tumen táan a páaʼtkeʼex le baʼaloʼobaʼ beeteʼex tuláakal le ku páajtal utiaʼal a pʼáatleʼex limpioil tu táan Dios, utiaʼal maʼ u yantal a kʼasaʼanileʼex yéetel utiaʼal u yantalteʼex jeetsʼelil.+
15 Tsʼoʼoleʼ maʼ u tuʼubulteʼexeʼ yoʼolal le paciencia yaan tiʼ Diosoʼ jeʼel u páajtal u salvarkuba máakeʼ. Sukuʼun Pablo, le máax jach k-yaabiltmoʼ, bey xan úuchik u tsʼíibtikteʼex tu yoʼolal le naʼat tsʼaʼab tiʼoʼ.+
16 Letiʼeʼ ichil tuláakal u cartaʼob tʼaanaj tiʼ le baʼaloʼobaʼ, chéen baʼaleʼ jujunpʼéel tiʼ le baʼaloʼobaʼ maʼ chéen chʼaʼabil u naʼataʼaloʼobiʼ. Le jeʼeloʼobaʼ letiʼe baʼaloʼob ku jelbesaʼal tumen le máaxoʼob mix baʼal u yojloʼob yéetel maʼ jeetsʼel u tuukuloʼoboʼ. Le máakoʼobaʼ bey xan u beetkoʼob yéetel le uláakʼ baʼaloʼob yaan ichil u Tʼaan Diosoʼ. Ikil u beetkoʼob beyaʼ ku náajaltikoʼob ka xuʼulsaʼakoʼob.
17 Teʼex túuneʼ, in yaabilaj sukuʼuneʼex, tumen tsʼoʼok a wojéeltikeʼex baʼax ku taal u kʼiinil u yúuchleʼ kanáantabaʼex tiʼ le kʼasaʼan máakoʼoboʼ utiaʼal maʼ u jíiltkeʼexoʼob tu yoʼolal le baʼaloʼob kʼaastak ku beetkoʼoboʼ, tumen wa maʼeʼ jeʼel a kʼéechleʼex tiʼ le maʼalob bej ka biskeʼexoʼ.+
18 Teneʼ in kʼáateʼ ka seguernak a kʼamkeʼex u nojoch utsil k-Yuumtsil yéetel k-Salvador Jesucristo bey xan ka seguernak a kʼaj óoltikeʼex. Alabartaʼak bejlaʼeʼ bey xan utiaʼal kʼiinoʼob minaʼan u xuul. Ka béeyak.*
