Jeʼex tsʼoʼok u yáax aʼalaʼal tiʼ jw.org, enero tiʼ 2025, kʼaʼal Vitali Kriúshenko Ucrania tumen maʼ tu yóotaj u beet u soldadoiliʼ. Vitali Kriúshenkoeʼ letiʼe máax yáax kʼaʼal Ucrania desde ka káaj le guerraoʼ. Desde teʼ kʼiinoʼ u gobiernoil Ucraniaeʼ tsʼoʼok u kʼalik uláakʼ seis u túulul sukuʼunoʼob tumen maʼ tu yóotik u beet u soldadoiloʼob.

Tu kʼiinil 3 tiʼ febrero tiʼ 2025, Andrí Jomenko yaan 50 años tiʼeʼ káaj u cumplirtik u condena de tres años. Antes u kʼaʼalaleʼ Andrí, máax tsʼokaʼan u beel yéetel Irina yéetel yaan kaʼatúul u paalaloʼobeʼ, tu yaʼalaj: «In wojleʼ kex jach difícil le baʼax kin máansik ichil in kuxtaloʼ Jéeobaeʼ maʼ ken u pʼaten, tsʼoʼoleʼ mantatsʼ ken u tsʼáaten jeetsʼelil».

Ka máan maas tiʼ junpʼéel semanaeʼ, tu kʼiinil 11 tiʼ febrero tiʼ 2025, Serguí Ivanushenko yaan 48 años tiʼeʼ káaj xan u cumplirtik u condena de tres años. Okjaʼanaj tu mesil noviembre tiʼ 2023, chéen jujunpʼéel meses máanakeʼ ka tʼaʼan u beet u soldadoil. Como u yojel de ke le máxoʼob meyajtik Dios maʼatech u táakpajloʼob teʼ guerraoʼ Serguíeʼ yéetel respeto tu yaʼalaj tiʼ le autoridadoʼoboʼ maʼ ken u beet u soldadoil (Isaías 2:4).

Tu kʼiinil xan 5 tiʼ marzo tiʼ 2025, le autoridadoʼoboʼ tu kʼaloʼob Serguí Nechayuk, juntúul Testigo yaan 35 años tiʼ, tsʼokaʼan u beel yéetel yaan kaʼatúul u paalal. Táanil tiʼ u cumplirtik u condena de tres añoseʼ Serguíeʼ tu yaʼalaj: «In wojleʼ Jéeobaeʼ tiaʼan tin wéeteleʼ, maʼ tin juunal yaneniʼ. Le sukuʼunoʼoboʼ jach táan u oraroʼob tin woʼolal».

Tu yáamil xan enero yéetel marzo tiʼ 2025, le soldadoʼoboʼ tu obligartoʼob Mijailo Adámovich, Yaroslav Bodnarchuk yéetel Olexánder Radashko (de 40, 28 yéetel 35 años tiʼob) ka xiʼikoʼob tu yéeteloʼob tiʼ junpʼéel base militar. Según le autoridadoʼoboʼ le kʼiin ka bisaʼaboʼoboʼ letiʼe kʼiin ka káaj u beetik u servicio militaroʼoboʼ. Como le sukuʼunoʼob maʼ tu yóotaj u tsʼáaʼob u uniformeʼob mix u chʼaʼik u tsʼoonoʼobeʼ aʼalaʼab táan u desobecerkoʼob junpʼéel ley, le oʼolal bisaʼaboʼob kʼalbil mientras u páaʼtik u juzgartaʼaloʼob. Mijailo yéetel Olexándereʼ táan u páaʼtkoʼob u juzgartaʼaloʼob. Yaroslaveʼ como tu boʼotaj junpʼéel multaeʼ chaʼabi, pero táan xan u páaʼtik ka juzgartaʼak. Wa ku yaʼalaʼal culpableʼobeʼ yaan u kʼaʼalaloʼob kex 5 wa 10 años cárcel.

Le baʼax ku beetaʼal tiʼ le sukuʼunoʼobaʼ ku bin tu contra le leyoʼob tsʼaʼan tumen jujunpʼéel luʼumiloʼoboʼ bey xan tumen le leyoʼob tsʼaʼan tumen u luʼumil Ucraniaoʼ. Jeʼex le baʼax ku yaʼalik le artículo 18 tiʼ le Declaración Universal de Derechos Humanosoʼ yéetel le artículo 9 tiʼ le Convenio Europeo de Derechos Humanosoʼ. Le leyoʼobaʼ ku yaʼalikoʼobeʼ juntúul máakeʼ jeʼel u páajtal u beetik yaanal meyaj tu lugar u beetik u servicio militareʼ. U Constituciónil Ucrania xaneʼ ku yaʼalikeʼ jeʼel u páajtal u beetaʼal uláakʼ meyaj tu lugar le servicio militaroʼ. U gobiernoil Ucraniaeʼ tu yaʼaleʼ yaan u tsʼoʼokbesik le leyoʼoboʼ.

Tuláakloʼoneʼ táan k-kʼáatik tiʼ Jéeoba ka u yáant yéetel ka u líiʼs u yóol le sukuʼunoʼobaʼ, bey xan le u maasiloʼob ku yilik u chúukpajal u yóoloʼob tiʼoʼ (Salmo 34:7).