Tu kʼiinil 21 tiʼ mayo tiʼ 2025, le Tribunal Supremo yaan Sri Lankaoʼ tʼaanaj tu favor u testigoʼob Jéeoba. Le jeʼeloʼ mix juntéen úuchuk kaʼachi pero jach yaan u yáantaj utiaʼal ka respetartaʼak le derecho yaan tiʼ le sukuʼunoʼob utiaʼal u adorarkoʼob Dios teʼ luʼumil jeʼeloʼ. Le Tribunaloʼ tsʼoʼok 11 años joʼopʼok u xakʼaltik u caso cuatro kiikoʼob tak ka tu yaʼalaj de ke maʼ respetartaʼab le derecho yaantiʼob utiaʼal u tsikbaltikoʼob baʼaxoʼob ku creerkoʼoboʼ. Le baʼax úuchaʼ jach yaan u taasik utsil tiʼ le sukuʼunoʼob kajaʼanoʼob Sri Lankaoʼ tumen beoraaʼ yaan u respetartaʼal le derecho yaantiʼob utiaʼal u tsikbaltikoʼob le baʼaxoʼob ku creerkoʼoboʼ. Tsʼoʼoleʼ yoʼolal le baʼax aʼalaʼabaʼ kʼaʼabéet xan u respetartaʼal u religión tuláakal le máaxoʼob kajaʼanoʼob tu noojolil Asiaoʼ.

Octubre tiʼ 2014, le táan kaʼach u predicar kantúul kiikoʼob tiʼ junpʼéel chan kaaj ku kʼaabaʼtik Kirama, tu noojolil Sri Lankaeʼ, junmúuchʼ máakoʼob jach pʼujaʼanoʼobeʼ joʼopʼ u yaʼalik tiʼ le kiikoʼob ka xuʼuluk u predicaroʼob. Le ka kʼuch le policíaʼoboʼ tu lugar u calmarkoʼob le máakoʼoboʼ tu bis u kʼaloʼob le kiikoʼoboʼ. Bul áakʼab kʼaʼal le kiikoʼobaʼ chéen baʼaleʼ maʼ junmúuchʼiʼ baʼaxeʼ cada juntúul tiʼ letiʼobeʼ kʼaʼaloʼob yéetel máakoʼob jach kʼasaʼanoʼob. Kex beyoʼ le kiikoʼoboʼ pʼáatoʼob tranquilaʼob yéetel confiarnajoʼob tiʼ Jéeoba. U maʼalobileʼ ka sáaschaj tuláakʼ kʼiineʼ chaʼab u jóokʼloʼob.

Tu mesil noviembre tiʼ 2014, juntúul juezeʼ tu yaʼaleʼ maʼ tun seguer u xakʼaltbil u caso le kiikoʼoboʼ. Chéen baʼaleʼ como u yojloʼob maʼ respetartaʼab u derechoʼobeʼ le kiikoʼoboʼ tu yoksoʼob junpʼéel queja teʼ Comisión de Derechos Humanos yéetel teʼ Tribunal Supremo yaan Sri Lankaoʼ. Tu mesil mayo tiʼ 2025, le tribunaloʼ tu yaʼaleʼ le autoridadoʼoboʼ maʼ tu respetartoʼob u derechoʼob le kiikoʼoboʼ. Le oʼolal tu yaʼalaj tiʼ u jefe le policíaʼob bey xan tiʼ le gobiernooʼ kʼaʼabéet u tsʼáaikoʼob taakʼin tiʼ le kiikoʼob yoʼolal le baʼax úuchoʼ. Kiik Malkanthieʼ tu yaʼalaj: «Le baʼax tu yaʼalaj le tribunaloʼ maʼ chéen toʼon tu yáantoʼoniʼ. Baʼaxeʼ yaan u yáantik tuláakal le sukuʼunoʼob kajaʼanoʼob Sri Lanka utiaʼal u adorarkoʼob Jéeoba ich jeetsʼeliloʼ. Teneʼ tin wilaj bix úuchik u béeytal le baʼax ku yaʼalik Jéeoba tiʼ Isaías 54:17: «Jeʼel baʼaxak nuʼukulil baʼateʼel ka beetaʼak ta contraeʼ maʼ kun páajtal ta wéetel».

Jach kiʼimak k-óol yoʼolal le sukuʼunoʼob kajaʼanoʼob Sri Lankaoʼ tumen yoʼolal le baʼax tu yaʼalaj le tribunaloʼ beoraaʼ yaan u páajtal u meyajtikoʼob Jéeoba ich jeetsʼelil (1 Timoteo 2:2).