«Le baʼax maas koʼoj yaantoʼonoʼ letiʼe k-bisikba yéetel Jéeobaoʼ»

PAX ICH

Tu kʼiinil 28 tiʼ enero tiʼ 2025, le Tribunal Municipal de Fokino tu territorioil Primorieeʼ, tu yaʼaleʼ le sukuʼun Alexánder Sayinoʼ yaan u máansik tres años cárcel. Maʼ jáan bisaʼab cárceliʼ chéen baʼaleʼ yaan baʼaxoʼob maʼ tu chaʼabal u beetik.

Máax Alexánder Sayin

Alexánder Sayin

Síij tu añoil: 1971 (Fokino).

Okjaʼanaj tu añoil: 2008.

Uláakʼ datos: Ku meyaj bey taxistaeʼ. Tsʼoʼok u beel yéetel Irina tu añoil 1993 yéetel yaan juntúul u hijaʼob.

Baʼaxten culpartaʼabi: Tumen ku nuʼuktik le reuniónoʼob ku beetik u testigoʼob Jéeobaoʼ yéetel ku kaʼansik tiʼ u maasil le baʼax ku yaʼalik le Bibliaoʼ.

Jaypʼéel años kun kʼalbil: Tres años. Maʼ jáan bisaʼab cárceliʼ chéen baʼaleʼ yaan baʼaxoʼob maʼ tu chaʼabal u beetik.

Baʼaxoʼob tsʼoʼok u sen aktáantik

Alexánder, ¿bix a wuʼuyikaba úuchik u luʼsaʼaltech tuláakal le baʼaxoʼob yaantechoʼ?

Le ka káaj in juzgartaʼaleʼ luʼsaʼabten meyaj tsʼoʼoleʼ maʼ chaʼab in jóoʼsik le taakʼin yaanten teʼ bancooʼ. Teʼ súutukiloʼobaʼ tsʼoʼok k-ilik u kʼaab Jéeoba tumen tsʼoʼok u yáantkoʼon utiaʼal maʼ k-náachtal tiʼ letiʼ yéetel tsʼoʼok u tsʼáaiktoʼon tuláakal le baʼaxoʼob kʼaʼabéettoʼonoʼ. Le baʼax úuchtenoʼ ku kʼaʼajsikten le baʼax tu yaʼalaj Pablo tiʼ le sukuʼunoʼob chʼaʼpachtaʼaboʼob Jerusalénoʼ. Teʼ Hebreos 10:34, tu yaʼalajtiʼob: «Teʼexeʼ ta chʼaʼajeʼex óotsilil tiʼ le máaxoʼob oksaʼanoʼob kaʼach cárceloʼ, tsʼoʼoleʼ tumen a wojleʼex yaanteʼex junpʼéel baʼal maas maʼalob yéetel maʼ tu kʼastaleʼ yéetel kiʼimak óolal ta chaʼajeʼex u toʼokol le baʼaxoʼob yaanteʼexoʼ». Bejlaʼeʼ kin naʼatik le baʼax tu yuʼubaj le sukuʼunoʼob teʼ yáax siglo le ka tu perdertoʼob le baʼaxoʼob yaantiʼoboʼ. Letiʼobeʼ tu tsʼáajoʼobtoʼon junpʼéel maʼalob ejemplo tumen maʼ xuʼul u kiʼimaktal u yóoloʼobiʼ. Le baʼaxoʼob tsʼoʼok in máansik ichil in kuxtaloʼ tu yáanten in tsʼáaj cuentaeʼ le baʼax maas koʼoj yaantoʼonoʼ letiʼe k-bisikba yéetel Jéeobaoʼ.

Wa ka úuchuk toʼon le baʼax úuch tiʼ Alexánderoʼ Jéeobaeʼ maʼ ken u pʼatoʼon. K-ojleʼ maʼ kun xuʼulul u kiʼimaktal k-óol ‹tumen nojoch baʼax kun siʼibiltoʼon tumen Dios› (Mateo 5:12).

Ilawil xan

U NOTICIAILOʼOB YÓOKʼOL KAAB

U testigoʼob Jéeoba kʼalaʼanoʼob yoʼolal baʼaxoʼob ku creerkoʼob (jejeláas luʼumiloʼob)

Le tuʼuxoʼob ku kʼaʼalal u testigoʼob Jéeobaoʼ jach kʼaas yéetel jach sucio, letiʼobeʼ chéen ku kʼaloʼob ikil u beetkoʼob baʼax ku kaʼansik le Bibliaoʼ.