Tu kʼiinil 9 tiʼ abril tiʼ 2025, jáalkʼabtaʼab le sukuʼunoʼob Vladímir Mélnik, Vladímir Piskariov yéetel Artur Putíntsevoʼ. Trece tiʼ octubre tiʼ 2023, aʼalaʼab culpableʼob yéetel aʼalaʼab seis años kun kʼalbiloʼob. Como desde diciembre tiʼ 2020 ka maʼachoʼobeʼ aʼalaʼab tsʼoʼok u cumplirtik u condenaʼob.

Vladímir Mélnikeʼ bisaʼab tiʼ junpʼéel cárcel óoliʼ 1,400 kilómetros u náachil tiʼ le tuʼux beetaʼab le juiciooʼ, le oʼolal maʼ chéen chʼaʼabil u bin xíimbaltbil tumen u familiaiʼ. Tsʼoʼoleʼ kʼaʼal tu juunal tiʼ junpʼéel celda. Irina, u yatan Vladímireʼ, tu tsikbaltaj baʼax áant utiaʼal ka aguantarnak. Tu yaʼalaj: «Vladímireʼ jach muʼukʼaʼan u fe tiʼ u promesaʼob Jéeoba, le oʼolal páajchaj u aktáantik le baʼaxoʼob tu muʼyajtoʼ. Letiʼeʼ ku orar mantatsʼ, le oʼolal maʼ tuʼubtiʼ le esperanza yaantiʼoʼ».

Le óoxtúul sukuʼunoʼobaʼ óoliʼ cuatro años y medio separartaʼakoʼob tiʼ u familiaʼob. Pero tiʼ Vladímir Piskarioveʼ maʼ tsʼoʼokok le problemaoʼ. Tatiana, u yataneʼ, desde 1 tiʼ marzo tiʼ 2024, castigartaʼab yéetel yaayaj meyajoʼob, lelaʼ yaan u beetik ich dos años yéetel seis meses, tsʼoʼoleʼ jach vigilartaʼan. Yoʼolal le baʼax ku aktáantkoʼoboʼ, Tatianaeʼ ku yaʼalik: «Le pruebaʼob k-máansikoʼ tsʼoʼok u beetik k-maas yaabiltik Jéeoba, k-maas yaabiltik t-éet máakil yéetel tsʼoʼok xan u maas muʼukʼantal le yaabilaj kin wuʼuyik yoʼolal in wíichamoʼ. Le yaabilajaʼ mix máak jeʼel u páajtal u luʼsiktoʼoneʼ».

U kuxtal jeʼex u yaʼalik Diosoʼ le áant Artur Putíntsev u aktáant le baʼaxoʼob tu muʼyajtaj le kʼalaʼan cárceloʼ. Liudmila, u yataneʼ ku yaʼalik: «Wa ku káajal u kʼuuxil le máakoʼob kʼalaʼanoʼob tu yéeteloʼ letiʼeʼ ku yeʼesik jatsʼuts modos tiʼob, hasta ku síik u yoʼochtiʼob. Jach ku yilik ka yanak jeetsʼelil». Tsʼoʼoleʼ Artur yéetel Liudmilaeʼ tu yiloʼob jach yaabiltaʼanoʼob tumen Jéeoba úuchik u yáantaʼaloʼob tumen le sukuʼunoʼoboʼ. Liudmilaeʼ ku yaʼalik: «Jéeobaeʼ mix juntéen tu pʼatoʼon t-juunal yéetel le problemasoʼ. Le baʼax t-aktáantoʼ tu yeʼesajtoʼoneʼ kex ka téek kʼexpajak k-kuxtaleʼ Jéeobaeʼ yaan u yáantkoʼon utiaʼal maʼ u xuʼulul k-meyajtik. Chéen kʼaʼabéet u seguer k-confiar tiʼ letiʼ».

Jach k-tsʼáaik gracias tiʼ Jéeoba yoʼolal le áantaj ku tsʼáaik tiʼ le sukuʼunoʼoboʼ yéetel yoʼolal le yaabilaj ku yeʼesiktiʼoboʼ. K-ojleʼ yaan u seguer u chúukpajal u yóoloʼob tumen «Jéeobaeʼ ku beetik justicia bey xan baʼax maʼalob tu favor le máaxoʼob táan u muʼyajoʼoboʼ» (Salmo 103:6).