Tu kʼiinil 9 tiʼ noviembre tiʼ 2024, kaaj u yelel le kʼaaxoʼob tu kaajil Warwick, Nueva Yorkoʼ, lelaʼ kex 2 kilómetros yanil tiʼ u xaman-chikʼinil le central mundial tiʼ u testigoʼob Jéeobaoʼ. Kex tumen maʼ jach séebaʼan u bin u yelel le kʼaaxoʼoboʼ, tak beoraaʼ tsʼoʼok u yelel kex 2.000 hectáreaʼob. Le autoridadoʼoboʼ ku yaʼalikoʼobeʼ chéen wa ka kʼáaxak junpʼéel kʼaʼamkach cháakeʼ jeʼel u béeytal u controlartaʼal le kʼáakʼoʼ.

Le central mundial yaan Warwick, le construcción yaan Ramapo yéetel le estudio tuʼux ku yúuchul grabar yaan Tuxedo Parkoʼ naatsʼ yanikoʼob teʼ tuʼux ku yelel le kʼaaxoʼ pero tak beoraaʼ minaʼan mix junpʼéel peligro tiʼob. Kex beyoʼ le sukuʼunoʼoboʼ jach pendienteʼob tiʼ le baʼax ku yúuchloʼ yéetel táan u yilkoʼob bix jeʼel u kanáantkoʼob u najil Betel bey xan le máaxoʼob ku meyajoʼob teʼeloʼ (Proverbios 22:3). Luke Saladino, juntúul sukuʼun ku meyaj tu Comitéil u Sucursalil Estados Unidoseʼ, tu yaʼalaj: «Le ka t-ojéeltaj táan u káajal u yelel le kʼaaxoʼoboʼ tu séebaʼanileʼ t-beetaj junpʼéel programa utiaʼal k-vigilartik tuláakal súutukil. T-kʼáataj xan tiʼ le Equipos de Emergencia ka u míistoʼob tubeel le tuʼux ku tsʼoʼokol le jardínoʼoboʼ, bey xan ka u jóoyaʼabtoʼob le baʼaxoʼob pakʼaʼanoʼob tu techoil le edificioʼoboʼ. T-aʼalaj xan tiʼ le sukuʼunoʼob yanoʼob tu Betelil Warwickoʼ ka u preparartoʼob u mochilaʼob wa ku kʼaʼabéettal u jóokʼloʼob. U maʼalobileʼ tak beoraaʼ maʼ kʼaʼabéetchajak u jóokʼol le sukuʼunoʼoboʼ».

Le bomberoʼob yéetel le autoridadoʼoboʼ táan u beetkoʼob tuláakal le ku páajtal utiaʼal u tupikoʼob le kʼáakʼoʼ. Utiaʼal u agradecertaʼal tiʼobeʼ yaʼab departamentoʼob tiʼ u najil Beteleʼ táan u tsʼáaikoʼob janal, jaʼ yéetel uláakʼ baʼaxoʼob kʼaʼabéet tiʼ le máakoʼob ku meyajoʼoboʼ. Le sukuʼun Saladinooʼ, ku yaʼalik: «K-tsʼáaik u graciasil tiʼ tuláakal le máaxoʼob táan u sen meyajoʼob utiaʼal u tupikoʼob le kʼáakoʼ. Yoʼolal le baʼax ku beetkoʼobaʼ táan u kanáantkonoʼob».

Yaan u seguer k-kʼáatik tiʼ Jéeoba ka u tsʼáa naʼatil yéetel junpʼéel maʼalob tuukul tiʼ le máaxoʼob táan u aktáantkoʼob le problemaaʼ (Proverbios 3:21).