Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 KʼEʼEX U KUXTALOʼOB TUMEN LE BIBLIAOʼ

Bejlaʼeʼ kin wuʼuyik jeʼel u páajtal in wáantajeʼ

Bejlaʼeʼ kin wuʼuyik jeʼel u páajtal in wáantajeʼ
  • SÍIJ TU JAʼABIL: 1981

  • TUʼUX SÍIJI: GUATEMALA

  • KAʼACHEʼ: JUNTÚUL PAAL JACH KU MUʼYAJ

BIX KUXLIKEN KAʼACHI:

Síijen Acul, junpʼéel náanach kaaj yaan tu chikʼinil Guatemala teʼ puʼukoʼoboʼ. In láakʼtsiloʼobeʼ ixiloʼob, junpʼéel chʼiʼibal maya. Tin kanaj tʼaan español bey xan ixil. Teneʼ líikʼen teʼ kʼiinoʼob táan u baʼateʼel le máakoʼob teʼ Guatemalaoʼ, junpʼéel baʼateʼel xáanchaj treintiséis años. Yaʼab ixiloʼob kíimoʼobiʼ.

Le yaanten cuatro añosoʼ, in sukuʼun de siete añoseʼ táan u báaxal yéetel junpʼéel granadaeʼ ka wáakʼi. Letiʼeʼ kíimi, teneʼ chʼóopchajen. Desde leloʼ bisaʼaben tuʼux ku yáantaʼal chʼóopoʼob tu noj kaajil Guatemala; teʼ tin kanaj brailleoʼ. Mix juntéen tin wojéeltaj baʼaxten maʼ tu chaʼabal in tsikbal yéetel uláakʼ mejen paalaloʼob; letiʼobeʼ mix tu náatsʼloʼob tin wiknal. Mantatsʼ tin juunal yanen, chéen kin páaʼtik u kʼuchul le dos meses vacaciones ku tsʼaʼabaltoʼonoʼ tumen kin bisaʼal tin wotoch yiknal in maama jach u yaabiltmen. U kʼaasileʼ kíim le yaanten 10 añosoʼ. Yaachaj in wóol tumen kíim le juntúuliliʼ máax u yaabiltmenoʼ.

Le yaanten 11 añosoʼ suunajen tin kaajal, ka pʼáaten kajtal tu yotoch in sukuʼun. U láakʼtsiloʼobeʼ jach tu kanáantenoʼob, baʼaleʼ maʼ páajchaj u líiʼskoʼob in wóoliʼ. Yaan horaeʼ kin wawtik tiʼ Dios: «¿Baʼaxten kíim in maama? ¿Baʼaxten chʼóopchajen?». Ku yaʼalaʼalteneʼ bey bin tu yóotilak Dios ka úuchkoʼ. Le oʼolal kin tuklik kaʼacheʼ Dioseʼ kʼasaʼan, yéetel ku beetik baʼaloʼob maʼ maʼalobtakiʼ. Wa ka béeyakeʼ jeʼel kaʼach in kíimskinbaeʼ.

Úuchik in chʼóoptaleʼ pʼáat maʼ tu páajtal in kanáantkinba tin juunal, le oʼolal tin paalileʼ violartaʼaben, tsʼoʼoleʼ maʼ chéen juntéeniʼ. Maʼ tin takaj u pool le máaxoʼob violartenoʼ tumen tin tuklaj maʼ tun beetbil u cuentail. Óoliʼ mix máak tʼanken kaʼachi. Mantatsʼ deprimidoen yéetel maʼ in kʼáat antal yéetel mix máakiʼ, tumen tiʼ mix máak kin confiar.

BIX TU KʼEXIL IN KUXTAL LE BIBLIAOʼ:

Le ka tin cumplirtaj 13 añoseʼ juntúul u j-jaajkunaj Jéeoba yéetel u yataneʼ náatsʼoʼob tsikbal tin wéetel tu yorail le recreooʼ. Juntúul maestra tu chʼaʼajten óotsilil aʼaltiʼob ka taalak u xíimbaltenoʼob. Tu tsikbaltoʼobteneʼ le Bibliaoʼ ku yaʼalik yaan u kaʼa kuxtal le kimenoʼoboʼ yéetel  yaan u kʼuchul u kʼiinil u kaʼa paakat le chʼóopoʼoboʼ (Isaías 35:5; Juan 5:28, 29). Uts tin tʼaan in wuʼuyik kaʼach u tsikbaloʼob, baʼaleʼ como maʼ suuk in tsikbaleʼ maʼ tin waʼalik mix baʼal. Kex beyoʼ tu yeʼesoʼob paciencia yéetel yaabilaj, ka seguernaj u taal u kaʼansenoʼob yéetel le Bibliaoʼ. Letiʼobeʼ ku xíimbaltikoʼob maas tiʼ 10 kilómetros teʼ puʼukoʼob utiaʼal u kóojloʼob tin kaajaloʼ.

Tu yaʼalajten in sukuʼuneʼ kex óotsiloʼobeʼ maʼalob u vestirtkubaʼob. Tsʼoʼoleʼ chíikaʼan u yaabiltmenoʼob tumen suuk u tsʼáaikoʼobten siibaloʼob. Tin tsʼáaj cuentaeʼ chéen u jaajil cristianoʼob ku yáantkoʼob máak beyaʼ.

Kin xokik le Biblia yéetel libroʼob ich brailleoʼ. Kin naʼatik le baʼaxoʼob ku kaʼansaʼaltenoʼ baʼaleʼ yaneʼ maʼ tin creertik. Jeʼex le ka tu yaʼaloʼobten yaabiltaʼanen tumen Dios bey xan tumen uláakʼ máakoʼobeʼ maʼ tin creertiʼ. Tin naʼataj baʼaxten Dioseʼ ku chaʼik u muʼyaj máak, pero xáanchaj utiaʼal in wilik bey juntúul taatatsil yaan u yaabilajeʼ. *

Jujunpʼíitileʼ le baʼaxoʼob in kanmaj teʼ Bibliaoʼ tu beetaj u kʼexpajal in tuukul. Por ejemploeʼ tin kaneʼ Dioseʼ ku yaatal u yóol ken u yil k-muʼyaj. Le oʼolal juntéenjeakeʼ tu yaʼalaj: «Tsʼoʼok in maʼalob ilik bix u muʼyaj in kaajal [...]. Jach maʼalob in wojlil baʼax ku muʼyajtikoʼob» (Éxodo 3:7). Le ka tin tsʼáaj cuenta bukaʼaj jatsʼutsil u modos Jéeobaeʼ taakchaj in kʼubik in kuxtal tiʼ letiʼ. Tu jaʼabil 1998, okjaʼanajen bey juntúul u j-jaajkunaj Jéeobaeʼ.

Yéetel le sukuʼun kʼamen tu yotochoʼ

Kex u año okjaʼanakeneʼ binen tiʼ junpʼéel xook beetaʼab naatsʼ tiʼ u kaajil Escuintla. Juntúul anciano tiʼ le múuchʼulil yaan teʼ kaajoʼ tu yojéeltaj istikyaj in bin teʼ muchʼtáambaloʼ: kʼaʼabéet in xíimbaltik le bukaʼaj ku xíimbaltaʼal kaʼach tumen le máaxoʼob tsʼáaten xookoʼ. Utiaʼal u yáantkeneʼ le ancianooʼ tu kaxtaj junpʼéel familia j-Jaajkunajoʼob utiaʼal in pʼáatal tu yotochoʼob. Tak bejlaʼeʼ ku kanáantkenoʼob yéetel ku yilkenoʼob bey juntúul u láakʼtsiloʼobeʼ.

Yaʼab uláakʼ bix tu yeʼesoʼobten yaabilaj le máaxoʼob yanoʼob teʼ múuchʼuliloʼ. Tuláakal lelaʼ tu yeʼesajteneʼ u j-jaajkunajoʼob Jéeobaeʼ u jaajil cristianoʼob (Juan 13:34, 35).

UTSILOʼOB TSʼOʼOK U TAASIKTEN:

Bejlaʼeʼ maʼ tin wuʼuyik wa chéen kunel in kuxtaliʼ, baʼaleʼ jach yaan u biilal. Tu lugar in chʼíikil in tukult chʼóopeneʼ, in tsʼaamaj in wóol meyaj bey precursor * utiaʼal in kaʼansik tiʼ uláakʼ máakoʼob le jatsʼuts baʼaloʼob ku yaʼalik le Bibliaoʼ. Tsʼoʼoleʼ juntúul u ancianoilen le múuchʼuliloʼ yéetel kin máan in tsol baʼax ku yaʼalik le Biblia tu táan le máaxoʼob ku muchʼkubaʼob yéetel le j-Jaajkunajoʼoboʼ. Tsʼoʼok xan u yantalten u privilegioil in máan kaʼansaj teʼ asamblea regionaloʼob, tuʼux ku bin u milesil máakoʼoboʼ.

Táan in kaʼansaj yéetel le Biblia ich brailleoʼ

Tu jaʼabil 2010, tin tsʼoʼoksaj in xook teʼ Escuela tiʼ Entrenamiento Ministerial (bejlaʼeʼ kʼaj óolaʼan Escuela utiaʼal Máaxoʼob Kʼaʼaytik le Reinooʼ) beetaʼab tu luʼumil El Salvadoroʼ. Teʼ escuelaaʼ tin kanaj bix jeʼel in meyaj maas maʼalob teʼ múuchʼuliloʼ. Úuchik in bineʼ tin wuʼuyaj jach u yaabiltmen Jéeoba yéetel koʼoj in tojol tu táan. Jéeobaeʼ jeʼel u kaʼansik jeʼel máaxak utiaʼal u beetik baʼax u kʼáateʼ.

Jesuseʼ tu yaʼalaj: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Baʼaxoʼob [Hechos] 20:35). Bejlaʼeʼ jach tu jaajil kiʼimak in wóol, mix in tukultmaj wa jeʼel u béeytal kaʼacheʼ. Tsʼoʼoleʼ kin wuʼuyik jeʼel u páajtal in wáantik uláakʼ máakoʼobeʼ.

^ xóot’ol 13 Wa a kʼáat a wojéelt u maasil yoʼolal baʼaxten ku chaʼik Dios u yantal muʼyajileʼ, ilawil u 11 xookil le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.

^ xóot’ol 17 Bey u yaʼalal tiʼ le máaxoʼob yanoʼob ichil u j-jaajkunajoʼob Jéeoba u yaʼalmoʼob bukaʼaj tiempo ken u máansoʼob teʼ kʼaʼaytajoʼ.