Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | ¿JEʼEL WA U PÁAJTAL K-KAʼA KUXTALEʼ?

¿Bix k-ojel wa tu jaajil yaan k-kaʼa kuxtal?

¿Bix k-ojel wa tu jaajil yaan k-kaʼa kuxtal?

¿Chéen wa máax minaʼan u naʼat jeʼel u creertik yaan k-kaʼa kuxtaleʼ? Maʼ, apóstol Pabloeʼ maʼ bey tu tukliloʼ, tumen tu tsʼíibtaj: «Wa le esperanza yaantoʼon tiʼ Cristo chéen utiaʼal le kuxtalaʼ, tiʼ tuláakal le máakoʼoboʼ tiʼ toʼon unaj u maas chʼaʼabal óotsilil. Baʼaleʼ jach u jaajileʼ Cristoeʼ tsʼoʼok u líiʼsaʼal ichil le kimenoʼoboʼ; Cristoeʼ letiʼe yáax máak kaʼa kuxkíintaʼab ichil le máaxoʼob kimenoʼoboʼ» (1 Corintoiloʼob 15:19, 20). Pabloeʼ u yojel jach tu jaajil yaan u kaʼa kuxtal le kimenoʼoboʼ. ¿Bix tu yojéeltil? Tumen tak Jesucristo kaʼa kuxkíintaʼabi; leloʼ junpʼéel garantía (Baʼaxoʼob [Hechos] 17:31). * Jesuseʼ kaʼa kuxlaji yéetel mix bikʼin kun kaʼa kíimil, le oʼolal Pabloeʼ tu yaʼaleʼ letiʼe «yáax máak kaʼa kuxkíintaʼaboʼ». Leloʼ ku yeʼesik xaneʼ yaan uláakʼ máakoʼob kun kaʼa kuxkíintbiloʼob.

Jobeʼ tu yaʼalaj tiʼ Dios: «Bíin wal a pakten yéetel yaakunajeʼ, tumen teech beetmilen». (Job 14:14, 15)

Yaan uláakʼ baʼax eʼesik jach tu jaajil yaan u kaʼa kuxkíintaʼal le kimenoʼoboʼ: Jéeoba, u Diosil le jaajoʼ, «maʼ tu páajtal u tuus» (Tito 1:2). Dioseʼ mix juntéen tuusnak yéetel mix bikʼin ken u beete. A tuklikeʼ ¿jeʼel wa u yaʼalik yaan u kaʼa kuxkíintik le kimenoʼob —wa u yeʼesik jeʼel u páajtal u beetkeʼ— yéetel ken tsʼoʼokkeʼ maʼ u béeykuntik? U jaajileʼ maʼatan.

Yoʼolal u yaabilajeʼ Jéeobaeʼ yaan u kaʼa kuxkíintik le kimenoʼoboʼ. Jobeʼ tu yaʼalaj: «¿Bíin kaʼa kuxlak wa le xiib ku kíimiloʼ? Techeʼ bíin a tʼanen, teen xaneʼ bíin in núuk a tʼaan; bíin wal a pakten yéetel yaakunajeʼ, tumen teech beetmilen» (Job 14:14, 15). Jobeʼ u yojel yaabiltaʼan tumen u Taata yaan teʼ kaʼanoʼ; u yojel Dioseʼ ku tsʼíiboltik u kaʼa kuxkíintik. ¿Láayliʼ wa bey u tuukul Diosoʼ? Letiʼeʼ ku yaʼalik: «Teen Yuumtsil [Jéeoba]. Maʼ kʼexpajakeniʼ» (Malaquías 3:6). Dioseʼ láayliʼ ku tsʼíiboltik u kaʼa kuxkíintik le kimenoʼoboʼ. ¿Máasaʼ letiʼe baʼax ku tsʼíiboltik u beetik juntúul  taatatsil ken kíimik juntúul u paaloʼ? U maʼalobileʼ Dioseʼ maʼ chéen u kʼáat u beetiʼ, baʼaxeʼ jeʼel u páajtal u beetkeʼ (Salmo 135:6).

Jach yaj u kíimil wa máax, baʼaleʼ Dioseʼ yaan baʼax ken u beet maʼ tun xáantal

Jéeobaeʼ yaan u tsʼáaik páajtalil tiʼ u Hijo utiaʼal u kaʼa kuxkíintik le kimenoʼoboʼ; leloʼ yaan u beetik u jach kiʼimaktal u yóol le máaxoʼob tsʼoʼok u kíimil u láakʼtsiloʼob wa u amigoʼoboʼ. Antes u kaʼa kuxkíintik Lázaroeʼ, le ka tu yilaj Jesús bix u yokʼol u láakʼtsiloʼob yéetel u amigoʼoboʼ, «káaj u yáalal u jaʼil u yich» (Juan 11:35). Le ka tu yilaj xan juntúul viuda táant u kíimil u juntúuliliʼ hijoeʼ, Jesuseʼ «tu chʼaʼaj óotsilil tiʼeʼ ka tu yaʼalajtiʼ: ‹Xuʼuluk a wokʼol›». Ka túun tu kaʼa kuxkíintaj le xiʼipaloʼ (Lucas 7:13). Jeʼex k-ilkoʼ Jesuseʼ ku yaatal u yóol ken u yil u kíimil wa máax. ¡Bukaʼaj wal kun kiʼimaktal u yóol u kaʼa kuxkíintik le kimenoʼob tiʼ tuláakal yóokʼol kaaboʼ!

¿Tsʼoʼok wa u kíimil wa máax tech? Maʼ xaaneʼ ka tuklikeʼ mix bikʼin kun páajtal a kaʼa ilik. Baʼaleʼ maʼ beyiʼ. Jéeobaeʼ tsʼoʼok u tsʼáaik páajtalil tiʼ Jesús utiaʼal u kaʼa kuxkíintik le kimenoʼoboʼ. Kʼaʼajaktecheʼ Jéeobaeʼ u kʼáat ka yanakech teech utiaʼal a kʼamik a láakʼtsiloʼob. Máans ta tuukul táan a méekʼikoʼob teʼ Paraísooʼ yéetel táan a tsikbaltik tu yéeteloʼob baʼax ken a beeteʼex, tumen mix bikʼin ken u kaʼa pʼatechoʼob.

Lionel, le máax tsʼoʼok k-yáax aʼalikoʼ, ku yaʼalik: «Le ka aʼalaʼabten yaan u kaʼa kuxtal le kimenoʼoboʼ, tin tuklaj chéen táan in tuʼusul. Maʼ tin jáan creertiʼ. Pero tin xokaj le Bibliaoʼ ka tin wileʼ jach jaaj. ¡Jach taak in kaʼa ilik in abuelo!».

¿A kʼáat wa a wojéelt u maasil? U j-jaajkunajoʼob Jéeobaeʼ yéetel kiʼimak óolal ken u yeʼesoʼobtech teʼ Biblia baʼaxten ku creertikoʼob yaan u kaʼa kuxkíintaʼal le kimenoʼoboʼ. *

^ xóot’ol 3 Utiaʼal a wilik jach tu jaajil kaʼa kuxkíintaʼab Jesuseʼ, ilawil le libro La Biblia... ¿la Palabra de Dios, o palabra del hombre?, táan juʼun 78 tak 86, beetaʼan tumen u j-jaajkunajoʼob Jéeoba.

^ xóot’ol 9 Ilawil u 7 xookil le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.