Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Kʼáatchiʼob ku núukik le Bibliaoʼ

Kʼáatchiʼob ku núukik le Bibliaoʼ

¿Baʼax tiaʼal kuxaʼanoʼon?

¿Máasaʼ bey jach séeb u máan le kuxtaloʼ?

¿A tukultmaj wa baʼax u biilal le kuxtaloʼ? ¿Chéen wa kuxaʼanoʼon utiaʼal k-báaxal, k-meyaj, u yantal k-paalal, yéetel k-chʼíijil? (Job 14:1, 2.) Le Bibliaoʼ ku yaʼalikeʼ tak máaxoʼob jach yaan u naʼatoʼob tuukulnajoʼob tiʼ leloʼ. (Xok Eclesiastés 2:11.)

¿Yaan wa u biilal le kuxtaloʼ? Yáaxeʼ kʼaʼabéet k-ojéeltik bix anchajik le kuxtaloʼ. Yoʼolal u jatsʼutsil bix u meyaj k-tsʼoʼomel bey xan tuláakal k-wíinklileʼ, yaʼab máakoʼobeʼ tsʼoʼok u tsʼáaikoʼob cuenta jach tu jaajil Dios beetmiloʼon. (Xok Salmo 139:14.) ¿Baʼaxten túun tu beetoʼon? Wa k-ojéeltikeʼ ku maas yantaltoʼon kiʼimak óolal.

¿Baʼax oʼolal beetaʼaboʼon?

Dioseʼ ka tu beetaj le yáax wíinikoʼoboʼ tu kʼubéentajtiʼob junpʼéel jatsʼuts meyaj. U tuukuleʼ ka yanak u paalaloʼob, ka u sutoʼob paraísoil tuláakal le Luʼumaʼ yéetel ka kuxlakoʼob minaʼan u xuul. (Xok Génesis 1:28, 31.)

Le baʼax u tukultmaj Diosoʼ maʼ séeb béeychajiʼ, tumen wíinikeʼ maʼ tu yuʼubaj u tʼaaniʼ. Baʼaleʼ Dioseʼ maʼ tu xúumpʼattoʼoniʼ. Le Bibliaoʼ ku yeʼesikeʼ Dioseʼ táan u salvartik máaxoʼob uʼuyik u tʼaan utiaʼal ka kuxlakoʼob minaʼan u xuul way Luʼum jeʼex u tukultmil kaʼachoʼ. Jeʼex a wilkoʼ Dioseʼ u kʼáat ka a disfrutart le kuxtaloʼ. (Xok Salmo 37:29.) Teʼ Bibliaoʼ jeʼel u páajtal k-kanik bix jeʼel k-kuxtal jeʼex uts tu tʼaan Dioseʼ.