Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | MAʼ A SEN CHIʼICHNAKTAL

Chiʼichnakil yoʼolal k-familia

Chiʼichnakil yoʼolal k-familia

«Le maʼ úuch kíimik in taataoʼ, in wíichameʼ tu yaʼalajten yaan uláakʼ koʼolel tiʼ. Junpʼéel kʼiineʼ sin ke u yaʼalik mix baʼaleʼ tu chʼaʼaj u nuʼukuloʼobeʼ ka bini. Tu xúumpʼatten yéetel in kaʼatúul paalal». Kex Janet tu kaxtaj meyajeʼ le taakʼin ku náajaltikoʼ maʼ tu chukik utiaʼal u gasto. Baʼaleʼ maʼ chéen leloʼ. «Jach chiʼichnakchajen yoʼolal tuláakal le baʼaloʼob anchaj in beetkoʼ —ku yaʼalik Janet—. Maʼ maʼalob in wuʼuyikinbaiʼ, tumen maʼ tin tsʼáaik tiʼ in paalal le baʼaxoʼob ku tsʼaʼabal tiʼ uláakʼ paalaloʼoboʼ. Tak bejlaʼa kin máansik tin tuukul baʼax wal ku yaʼalaʼal tin woʼolaleʼ. ¿Ku tuklaʼal wa mix baʼal tin beetaj utiaʼal maʼ u pʼatken in wíicham?»

Janet

Le oracionoʼ le áantik Janet utiaʼal maʼ u lúubul u yóol bey xan utiaʼal u yuʼubik naatsʼ yanil tiʼ Dios. Ku yaʼalik: «Maas kin chiʼichnaktal ken áakʼabchajak. Como chʼenchʼenkileʼ chéen ku máan tin tuukul baʼaloʼob kʼaastak. In orar yéetel in xokik le Bibliaoʼ ku yáantken wenel. Junpʼéel tiʼ le tekstoʼob maas uts tin wichoʼ Filiposiloʼob 4:6, 7, tuʼux ku yaʼalik: ‹Maʼ a sen chiʼichnaktaleʼex tu yoʼolal mix baʼal, baʼaxeʼ tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios baʼax a kʼáateʼex; bey túunoʼ u jeetsʼelil Dios ku táatsʼmáansik tuláakal tuukuloʼobeʼ, tu yoʼolal Cristo Jesuseʼ yaan u kanáantik a puksiʼikʼaleʼex yéetel a tuukuleʼex›. Yaʼab u téenel tsʼoʼok in orar bul áakʼab tiʼ Jéeoba. Leloʼ ku beetik in wuʼuyikinba maʼalobil».

Tu Kaʼansajil le Puʼukoʼ Jesuseʼ tu yaʼalaj junpʼéel baʼal yoʼolal le oración jeʼel u yáantik máak utiaʼal maʼ u sen chiʼichnaktaloʼ: «A Taataʼexeʼ u yojel baʼax kʼaʼabéetteʼex tak táanil tiʼ a kʼáatkeʼextiʼ» (Mateo 6:8). Dioseʼ kex u yojliliʼ baʼax ku yúuchultoʼoneʼ u kʼáat ka k-aʼaltiʼ. Tsʼoʼoleʼ le oracionoʼ letiʼe baʼax maas natsʼkoʼon tu yiknaloʼ. Le Bibliaoʼ ku yaʼalik «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Santiago 4:8).

Le oracionoʼ maʼ chéen utiaʼal ka k-aʼal tiʼ Dios bix k-uʼuyikbaiʼ. Jéeoba, máax uʼuyik «payalchiʼ» wa oracioneʼ,  ku kanáantik le máaxoʼob ku kʼubik u yóoloʼob tiʼ letiʼoʼ (Salmo 65:2). Le oʼolal Jesuseʼ tu kaʼansaj tiʼ u disipuloʼob ka orarnakoʼob «mantatsʼ yéetel maʼ u xuʼulul u beetkoʼob» (Lucas 18:1). Maʼ u xuʼulul k-kʼáatik u yáantaj Dios, tumen letiʼeʼ jach tu jaajil u kʼáat u yáantoʼon yéetel u kʼáat u tsʼáatoʼon le baʼax k-kʼáatiktiʼoʼ. Le oʼolaleʼ wa ‹maʼ tu jáawal k-orareʼ› yaan k-eʼesik nojoch k-fe tiʼ Dios (1 Tesalonicailoʼob 5:17).

¿BIX JEʼEL U YANTAL U FE MÁAKEʼ?

Utiaʼal u yantal k-fe tiʼ Dioseʼ kʼaʼabéet ‹k-kʼaj óoltik› tubeel (Juan 17:3). Ken k-xok le Bibliaoʼ k-kʼuchul k-ojéelt bix u modos yéetel bix u tuukul. K-kanikeʼ Dioseʼ jach u kʼáat u yáantoʼon. Maʼ chéen unaj k-ojéeltik jujunpʼéel baʼaloʼob yoʼolal Diosiʼ. Unaj k-kʼaj óoltik maʼalob jeʼex juntúul k-amigoeʼ. Jeʼex u yúuchul ken k-kʼaj óolt wa máaxeʼ, kʼaʼabéet u máan tiempo utiaʼal k-amigotik. Jeʼex u bin k-kʼaj óoltik Dioseʼ bey u bin k-confiar tiʼ letiʼ, ku maas nojochtal k-fe, «[k-]beetik le baʼaxoʼob uts tu tʼaanoʼ» yéetel k-ilik bix u yáantkoʼon (2 Corintoiloʼob 10:15; Juan 8:29). Le fejoʼ le áantik Janet utiaʼal maʼ u sen chiʼichnaktal.

«In wilik bix tsʼoʼok u kanáantkoʼon Jéeobaeʼ, tsʼoʼok u yáantken utiaʼal u maas nojochtal in fe —ku yaʼalik Janet—. Yaʼab u téenel beetaʼabtoʼon injusticiaʼob, le oʼolal tin tuklaj mix bikʼin kun xuʼulul k-muʼyaj. Baʼaleʼ ken tsʼoʼokok in sen orar tiʼ Jéeobaeʼ, letiʼeʼ ku yáantken jeʼex maʼ tin páaʼtik kaʼacheʼ. Ken orarnaken utiaʼal in tsʼáaik graciaseʼ kin máansik tin tuukul le baʼaxoʼob tsʼoʼok u beetik tin woʼolaloʼ. Mantatsʼ ku yáantkoʼon teʼ súutukil maas kʼaʼabéetoʼ, jach tu yorail. Jéeobaeʼ tsʼoʼok u bendecirtiken yéetel maʼalob amigoʼob ku múul meyajtikoʼob Dios tin wéetel. Letiʼobeʼ mantatsʼ ku yáantkenoʼob yéetel ku tsʼáaikoʼob maʼalob ejemplo tiʼ in paalal. *

»Beoraaʼ kin naʼatik baʼaxten Jéeobaeʼ u pʼekmaj le divorciooʼ (Malaquías 2:16). Tumen le máax ku tuʼusul tumen u núupoʼ ku yuʼubik jach traicionartaʼabi. Kex tsʼoʼok u máan yaʼab años u pʼaten in wíichameʼ, yaan kʼiineʼ kin wuʼuyik bey yaan baʼax ku bineltikteneʼ. Ken in wuʼuyinba beyoʼ kin wáantik uláakʼ máakoʼob; bey u tuʼubulten le baʼax uchaʼantenoʼ.» Jeʼex u yaʼalik le Bibliaoʼ, Janeteʼ ku kanáantik maʼ u jach pʼáatal tu juunal (Proverbios 18:1). *

Dioseʼ «u taata le j-maʼ taataʼoboʼ yéetel u [salvador] le x-kimen íichamoʼoboʼ». (Salmo 68:5)

Tu tsʼookeʼ Janeteʼ tu yaʼalaj: «In wojéeltik Jéeoba ‹letiʼ u taata le j-maʼ taataʼoboʼ yéetel u [salvador] le x-kimen íichamoʼoboʼ› ku líiʼsik in wóol. Jéeobaeʼ mix bikʼin ken u pʼatoʼon jeʼex tu beetil in wíichameʼ» (Salmo 68:5). Janeteʼ u yojel Dioseʼ maʼ tu «túuntik u yóol máak» yéetel baʼaloʼob kʼaastak. Tu lugar leloʼ ku tsʼáaiktoʼon le naʼat kʼaʼabéettoʼon utiaʼal maʼ k-sen k-chiʼichnaktal bey xan «le páajtalil ku píitmáan tiʼ u muukʼ wíinikoʼ» (Santiago 1:5, 13; 2 Corintoiloʼob 4:7).

Baʼaleʼ ¿kux túun wa chiʼichnakoʼon tumen saajkoʼon ka úuchuktoʼon loob?

^ xóot’ol 10 Utiaʼal a wojéeltik u maasileʼ ilawil le xook «Recupere el control de su vida» teʼ revista ¡Despertad! tiʼ julio tiʼ 2015, tiaʼan xan Internet teʼ www.jw.org.