Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | MAʼ A SEN CHIʼICHNAKTAL

Tuláakal tuʼux yaan chiʼichnakil

Tuláakal tuʼux yaan chiʼichnakil

«Ka binen in man janaleʼ chéen galletas tin kaxtaj, tsʼoʼoleʼ ¡diez mil u téenel maas koʼoj! Tuláakʼ kʼiineʼ mix baʼal yaan teʼ tiendaʼoboʼ.» (Paul, Zimbabue)

«In wíichameʼ tu yaʼalajten nukaʼaj u pʼatoʼon. Tin wuʼuyaj nikaʼaj kíimil. ¿Baʼax kun úuchul yéetel k-paalal?» (Janet, Estados Unidos)

«Ken in wuʼuy le alarmaʼoboʼ kin jáan taʼakkinba yéetel kin jáaychʼintkinba luʼum tak ken tsʼoʼokok u wáakʼal le bombaʼoboʼ. Kex ku máan le horaʼoboʼ láayliʼ táan in kikilankileʼ.» (Alona, Israel)

Bejlaʼeʼ táan k-ilik «yaayaj kʼiinoʼob yéetel istikyaj» u kuxtal máak (2 Timoteo 3:1). Yaʼabeʼ ku chiʼichnaktal yoʼolal taakʼin, u familia, baʼateltáambaloʼob, kʼaakʼas kʼojaʼaniloʼob, nukuch loobiloʼob, wa yoʼolal uláakʼ baʼaloʼob. Uláakʼoʼobeʼ ku yaʼalikoʼob: «¿Yaan wa ten cáncer?», «¿Bix kun bin tiʼ in paalal yéetel tiʼ in wáabiloʼob ken nojochchajkoʼob?».

Maʼ kʼaas u tuklik máak le baʼaloʼobaʼ. Natural k-sajaktal yoʼolal junpʼéel examen, tumen yaan k-tʼaan tu táan uláakʼ máakoʼob, wa tumen yaan k-bin k-kʼáat meyaj. Le saajkiloʼ yaan horaeʼ jeʼel u yáantkoʼon utiaʼal maʼ k-oksikba tiʼ problemaʼobeʼ. Baʼaleʼ wa mantatsʼ chiʼichnakoʼoneʼ jeʼel u bintoʼon kʼaasileʼ. Maʼ sen úucheʼ beetaʼab estudios tiʼ 68,000 máakoʼob, ka ilaʼabeʼ u chiʼichnaktal máakeʼ jeʼel u kóomkintik u kuxtaleʼ. Le oʼolal túun Jesucristoeʼ tu yaʼalaj: «¿Máax tiʼ teʼex ikil u sen chiʼichnaktaleʼ, jeʼel u chowakkíintik junpʼíit maas u kuxtaleʼ?». U jaajileʼ mix máak. Le beetik tu yaʼalaj Jesús: «Xuʼuluk a chiʼichnaktaleʼex» (Mateo 6:25, 27). ¿Jeʼel wa túun u xuʼulul k-chiʼichnaktaleʼ?

Jeʼeleʼ. Baʼaleʼ kʼaʼabéet u yantaltoʼon naʼat, k-kʼáatik tiʼ Dios ka u yáantoʼon yéetel k-confiar tiʼ le baʼaxoʼob u yaʼalmaj u beetkoʼ. Kex maʼ chiʼichnakoʼon beoraaʼ maʼ k-ojel baʼax jeʼel u yúuchul sáamaleʼ. Le oʼolaleʼ koʼox ilik baʼax áant Paul, Janet yéetel Alona utiaʼal maʼ u sen chiʼichnaktaloʼob.