Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 KʼEʼEX U KUXTALOʼOB TUMEN LE BIBLIAOʼ

Tin kaneʼ Jéeobaeʼ uts yéetel ku perdonar

Tin kaneʼ Jéeobaeʼ uts yéetel ku perdonar
  • SÍIJ TU JAʼABIL: 1954

  • TUʼUX SÍIJI: CANADÁ

  • KAʼACHEʼ: KU TUUS, KU YOOKOL YÉETEL KU APOSTAR

BIX KUXLIKEN KAʼACHI:

Líikʼen ich óotsilil tu kaajil Montreal. Ocho u túulaloʼon; teen u j-tʼuupil. Seis meses yaanten ka kíim in papá, le oʼolal chéen in maama líiʼsoʼon.

Desde tin chichnil tin woksinba tiʼ drogaʼob, tiʼ apuestaʼob yéetel tiʼ baʼateloʼob. Kuxaʼanen kaʼach ich kʼaakʼas máakoʼob. Le yaanten kaʼach 10 añosoʼ kin tusbeltaʼal tumen prostitutaʼob bey xan tumen le ku páay taakʼinoʼoboʼ. Suunaj vicioil in tusik yéetel in woklik le máakoʼoboʼ.

Le ka tin cumplirtaj 14 añoseʼ chéen chʼaʼabil in woklik máak. Kin manik yaʼab relojoʼob, esclavaʼob, yéetel anilloʼob yaan baño de oro tiʼob. Kin tsʼáaik le sello tiʼobaʼ: «14 quilates», tsʼoʼoleʼ kin konik teʼ calleʼoboʼ, teʼ estacionamientoʼoboʼ yéetel teʼ nukuch tiendaʼoboʼ. ¡Séeb in náajal! Juntéeneʼ tin náajaltaj 10,000 dólares canadienses chéen tiʼ junpʼéel kʼiin.

Le yaanten 15 añosoʼ jóoʼsaʼaben teʼ correccionaloʼ ka pʼáat minaʼan tuʼux in kajtal. Kin wenel kaʼach teʼ calleʼoboʼ, teʼ parqueʼoboʼ wa tu yotoch jeʼel máaxak kʼamkeneʼ.

Yaan kʼiineʼ tu machen le policíaʼob utiaʼal u kʼáatkoʼobten baʼax kin beetik. Como le baʼaxoʼob kin konik maʼ okoltbil in beetmoʼ maʼ oksaʼaben carceliʼ. Baʼaleʼ yaʼab multas tin boʼotaj tumen kin tusik le máakoʼoboʼ, kin falsificartik juʼunoʼob, yéetel minaʼanten u permisoil koonol. Junpuliʼ maʼ saajkeniʼ; hasta meyajnajen bey cobratario tiʼ le máaxoʼob ku páaykoʼob taakʼinoʼ. Tumen sajbeʼentsil in meyajeʼ in wéet máan in tsʼoon. Meyajnajen tak yéetel le mafiosoʼoboʼ.

BIX TU KʼEXIL IN KUXTAL LE BIBLIAOʼ:

Diecisiete años yaanten ka tin yáax uʼuyaj u yúuchul tʼaan tiʼ le Bibliaoʼ. Kajaʼanen kaʼach yéetel in novia ku xook yéetel u j-jaajkunajoʼob Jéeoba. Como maʼ tin wóotaj kuxtal jeʼex u yaʼalik le Bibliaoʼ tin pʼataj le x-chʼúupaloʼ, ka binen kajtal yéetel uláakʼ.

U tsʼookeʼ le x-chʼúupal xanaʼ káaj u xook yéetel le j-Jaajkunajoʼoboʼ. Péeknaj in wóol úuchik in wilik bix u kʼexpajal  u modos: maas uts yéetel maas yaan u paciencia. Juntéeneʼ tu invitarten le j-Jaajkunajoʼob teʼ tuʼux ku muchʼkubaʼoboʼ ka bineniʼ. Le máakoʼob tin kʼaj óoltoʼ jach utsoʼob, maʼalob tu kʼamilenoʼob. Mix juntéen in wuʼuyinba kaʼach jach maʼalob. Tin paalileʼ maʼ eʼesaʼabten yaabilajiʼ. In láakʼtsiloʼobeʼ mix juntéen tu chʼaʼenoʼob en cuenta. Le yaabilaj eʼesaʼabten tumen le j-Jaajkunajoʼoboʼ jach letiʼe baʼax kʼaʼabéetten kaʼachoʼ. Ka kʼáataʼabten wa in kʼáat in xok le Bibliaoʼ, tin waʼalaj in kʼáat.

Le baʼaxoʼob tin kanoʼ tu salvartaj in kuxtal. Juntéenjeakeʼ in tsʼaaminba kaʼach de acuerdo in wookol yéetel uláakʼ kaʼatúul máakoʼob, tumen kʼaʼabéetten 50,000 dólares utiaʼal in boʼotik in pʼaax ikil in apostar. Yaaske maʼ binen yéeteloʼobiʼ. Juntúuleʼ kíimsaʼabi, le uláakʼoʼ oksaʼab cárcel.

In xokik le Bibliaoʼ tu yáanten in wileʼ yaʼab baʼax kʼaʼabéet in kʼexik ichil in kuxtal. Yáax tiʼ Corintoiloʼob 6:10, ku yaʼalik: «Le ku yookoloʼoboʼ, le ku píitmáan u tsʼíiboltkoʼob wa baʼaxoʼ, le ku káaltaloʼoboʼ, le ku poochʼiloʼoboʼ, bey xan le máaxoʼob ku tokikoʼob le baʼax yaan tiʼ uláakʼ máakoʼ, mix juntúul tiʼ letiʼob ken u tiaʼalintoʼob u Reino Diosiʼ». Okʼolnajen ka tin xokaj le tekstoaʼ tumen tin tsʼáaj cuentaeʼ jach kʼaʼabéet in kʼexik in kuxtal (Romailoʼob 12:2). Séeb in pʼuʼujul kaʼachi, puro tuus kin beetik yéetel jach kʼaas in kuxtal.

Baʼaleʼ tin kaneʼ Jéeobaeʼ uts yéetel ku perdonar (Isaías 1:18). Orarnajen tiʼ Dios yéetel u jaajil in wóol utiaʼal in kʼáatiktiʼ ka u yáanten in pʼat in vicios yéetel ka in kʼex in kuxtal. Yéetel u yáantajeʼ jujunpʼíitil tin pʼataj le baʼaloʼob kʼaastakoʼ. Yáax baʼax tin beeteʼ letiʼe u tsʼoʼokol in beel yéetel in noviaoʼ.

Kuxaʼanen tumen tin beetaj le baʼaxoʼob tin kanaj teʼ Bibliaoʼ

Kex chéen 24 años yaanten teʼ kʼiinoʼoboʼ óoxtúul in paalal. Kʼaʼabéetchaj in kaxtik junpʼéel maʼalob meyaj utiaʼal in tséentik in paalal. Baʼaleʼ maʼ xooknajaʼaneniʼ yéetel maʼ yaʼab baʼax in wojel in beetiʼ. Tin kaʼa kʼáataj u yáantaj Jéeobaeʼ ka jóokʼen in kaxt meyaj. Le ken in kʼáat meyajeʼ kin waʼalik in kʼáat in kʼex in kuxtal yéetel in kʼáat meyaj utiaʼal in náajal. Yaan horaeʼ kin waʼalik táan in xokik le Biblia utiaʼal ka ilaʼak juntúul utsul máaken. Baʼaleʼ mix tuʼux ku tsʼaʼabalten meyaj. U tsʼook tuʼux binen in kʼáat meyajeʼ, ka tsʼoʼok in tsikbaltik tuláakal le baʼax uchaʼantenoʼ, le máakoʼ tu yaʼalajten: «Maʼ in wojel baʼaxteniʼ, pero kin wuʼuyikeʼ kʼaʼabéet in tsʼáaiktech meyaj». In waʼalikeʼ letiʼe bix núukaʼabik in oracionoʼ. Ka máan le kʼiinoʼoboʼ teen yéetel in wataneʼ, okjaʼanajoʼon bey u j-jaajkunajoʼon Jéeobaeʼ.

UTSILOʼOB TSʼOʼOK U TAASIKTEN:

Kuxaʼanen tumen tin beetaj le baʼaxoʼob tin kanaj teʼ Bibliaoʼ. Bejlaʼeʼ jatsʼuts bix in biskinba yéetel in watan bey xan yéetel in paalal. Beoraeʼ limpio in conciencia tumen in wojel tsʼoʼok u perdonartiken Dios.

Tsʼoʼok catorce años káajak in maas máansik tiempo táan in kaʼansik tiʼ uláakʼ máakoʼob le baʼax ku yaʼalik le Bibliaoʼ. Maʼ úucheʼ in watan xaneʼ káaj u láakʼintiken. Tsʼoʼoleʼ teʼ tu tsʼook treinta añosaʼ tsʼoʼok in wáantik 22 u túulal in wéet meyajoʼob u beetubaʼob j-Jaajkunajil. Bejlaʼeʼ láayliʼ kin bin teʼ nukuch tiendaʼoboʼ, baʼaleʼ maʼ utiaʼal in tusik yéetel in woklik in wéet máakiloʼobiʼ. Kin aprovechartik jeʼel baʼalak súutukil utiaʼal in tsikbaltik le jatsʼuts kuxtal kun antaltoʼon teʼ túumben luʼum tuʼux maʼ tun antal j-ookoloʼoboʼ (Salmo 37:10, 11).