Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | ¿A KʼÁAT WA KAANBAL TIʼ LE BIBLIAOʼ?

Tuláakal máak táan u kaʼansaʼal yéetel le Bibliaoʼ

Tuláakal máak táan u kaʼansaʼal yéetel le Bibliaoʼ

Tuláakal tuʼux ojéelaʼaneʼ u j-jaajkunajoʼob Jéeobaeʼ suuk u kʼaʼaytajoʼob joonaj joonajil. Baʼaleʼ ¿a wojel wa tiʼ tuláakal yóokʼol kaab ku kaʼanskoʼob máak yéetel le Bibliaoʼ?

Tu jaʼabil 2014, le maas tiʼ 8,000,000 j-Jaajkunajoʼoboʼ cada mes tu tsʼáajoʼob xook tiʼ óoliʼ 9,500,000 máakoʼob kajaʼanoʼob tiʼ maas tiʼ 240 luʼumoʼob. * Yaan tak 140 luʼumoʼobeʼ u kajnáalil cada junpʼéeleʼ maʼ tu chukik le cantidad jeʼeloʼ.

Utiaʼal u kaʼansaʼal le bukaʼaj máakoʼobaʼ, cada jaʼabeʼ ku beetaʼal óoliʼ 1,500 millones jóoʼsaʼaniloʼob —Bibliaʼob, libroʼob, revistaʼob, yéetel uláakʼ baʼaloʼob— kex ich 700 idiomaʼob. Lelaʼ ku yáantaj utiaʼal u kaʼansaʼal máak ichil le idioma maas uts tu tʼaanoʼ.

 KʼÁATCHIʼOB SUUK U BEETAʼAL YOʼOLAL LE XOOK KU TSʼAʼABALOʼ

¿Bix u kaʼansaʼal máak?

Utiaʼal u kaʼansaʼal máakeʼ ku xakʼaltaʼal jejeláas baʼaxoʼob ku yaʼalik le Bibliaoʼ, jeʼex máax Dios, bix u modos, bix u kʼaabaʼ, tuʼux yaan yéetel wa jeʼel u páajtal k-bisikba tu yéeteleʼ. Teʼ xookoʼ ku kaʼansaʼal bix jeʼel u kaxtaʼal u núukil le kʼáatchiʼob teʼ Bibliaoʼ.

Utiaʼal leloʼ suuk u meyaj áantajoʼob jeʼex le libro ¿Baʼax jach tu jaajil ku kaʼansik le Bibliaoʼ? * Le libroaʼ beetaʼan utiaʼal u yáantik máak u naʼat le baʼaxoʼob maas kʼaʼanaʼantak ku yaʼalik le Bibliaoʼ. Yaan xookoʼob ku tʼaan yoʼolal Dios, Jesucristo, le muʼyajiloʼ, le kíimiloʼ, le oracionoʼ bey xan uláakʼ baʼaloʼob.

 ¿Tuʼux ku tsʼaʼabal le xookaʼ, yéetel baʼax hora?

Teech kan aʼalik tuʼux yéetel baʼax hora a kʼáat xook.

¿Bukaʼaj ku xáantal le xookoʼ?

Teech ken a waʼal bukaʼaj tiempo a kʼáat xook. Yaneʼ ku yóotik xook junpʼéel hora cada semana, uláakʼoʼobeʼ chéen 10 wa 15 minutos.

¿Bajux ku boʼotaʼal?

Mix baʼal. Maʼ tu cobrartaʼal le xookoʼ, mix le áantajoʼob kun meyajtechoʼ. Tak Jesús tu yaʼalaj tiʼ u disipuloʼob: «Siibil ta kʼamileʼex; siibil xan ka a tsʼáaʼex» (Mateo 10:8).

¿Bukaʼaj ku xáantal le táan u kaʼansaʼal máakoʼ?

Teech kan aʼalik bukaʼaj. Le libro ¿Baʼax jach tu jaajil ku kaʼansik le Bibliaoʼ? ku taasik 19 xookoʼob. Wa a kʼáateʼ jeʼel u páajtal a tsʼoʼoksik junpʼéel u xookileʼ wa tuláakal le librooʼ.

¿Kʼaʼabéet wa u beetkuba máak juntúul u j-jaajkunaj Jéeoba?

Maʼ. Toʼoneʼ k-respetartik baʼax ku creertik cada máak. Baʼaleʼ wa ka kanik baʼax ku yaʼalik le Bibliaoʼ, yaan a yéeyik maʼalob baʼax ken a creerte.

 ¿Tuʼux jeʼel u páajtal u yojéeltaʼal u maasileʼ?

Tiʼ Internet teʼ jw.org, jeʼel u páajtal a wilik u jaajil yoʼolal le baʼaxoʼob k-beetik yéetel k-creertikoʼ.

¿Tuʼux jeʼel u páajtal u kʼáataʼaleʼ?

  • Utiaʼal ka xíimbaltaʼakecheʼ ooken www.jw.org/yua, ka a túuxt a datos.

  •  
  • Tiʼ junpʼéel directorio telefonicoeʼ kaxt u númeroil u teléfono le j-Jaajkunajoʼob (Testigos de Jehová) yaan ta kaajaloʼ.

^ xóot’ol 4 Yaan tuʼuxeʼ junmúuchʼ u tsʼaʼabal xook tiʼ máak.

^ xóot’ol 9 Beetaʼan tumen u j-jaajkunajoʼob Jéeoba. Le libro de 224 táan juʼunoʼobaʼ tsʼoʼok u imprimirtaʼal maas tiʼ 230 millones u pʼéelal ich maas tiʼ 260 idiomaʼob.