Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 KʼEʼEX U KUXTALOʼOB TUMEN LE BIBLIAOʼ

Teen kaʼach u maas kʼaʼanaʼanil

Teen kaʼach u maas kʼaʼanaʼanil
  • SÍIJ TU JAʼABIL: 1951

  • TUʼUX SÍIJI: ALEMANIA

  • KAʼACHEʼ: J-KAʼANAL ICH YÉETEL CHÉEN KU TUUKUL TU YOʼOLAL

BIX KUXLIKEN KAʼACHI:

Tin chichnileʼ kajaʼanen kaʼach naatsʼ Leipzig, tu lakʼinil Alemania, maʼ náach tiʼ u fronterail Polonia yéetel le tuʼux yaan República Checa bejlaʼoʼ. Le yaanten 6 jaʼabeʼ yoʼolal u meyaj in taataeʼ binoʼon kajtal Brasil, tsʼoʼoleʼ Ecuador.

Le ka tu tsʼáajten 14 jaʼabeʼ in taata yéetel in maamaeʼ tu túuxtenoʼob Alemania utiaʼal in xook tiʼ junpʼéel internado. Tumen náach yanilen tiʼ letiʼobeʼ chéen tin juunal kin chʼaʼtuklik baʼax kin beetik. Suukchaj in tuukul chéen tin woʼolal. Baʼax in kʼáajtiʼ wa ku tsʼíikil u maasil.

Ka suunaj in taata yéetel in maama tu luʼumil Alemaniaeʼ 17 jaʼab yaanten. Binen kajtal kaʼach tu yéeteloʼob. Baʼaleʼ yoʼolal bix in modoseʼ maʼ páajchaj in wuʼuyik u tʼaanoʼobiʼ. Ka tu tsʼáajten 18 jaʼabeʼ, binen kajtal yaanal tuʼux.

Jujunpʼíitileʼ pʼáat maʼ kiʼimak in wóol yéetel le kuxtaloʼ, ka joʼopʼ in wilik baʼax jeʼel u páajtal in beetkeʼ. Ka tin wilaj baʼax ku beetik jujuntúul máakoʼobeʼ tin chʼaʼtuklaj in viajar utiaʼal in kʼaj óoltik le jatsʼuts baʼaloʼob yaan way Luʼum, táanil tiʼ u láaj kʼaskúuntaʼal tumen wíinikoʼ.

Tin manaj junpʼéel motoeʼ ka lukʼen Alemania utiaʼal in bin África. Baʼaleʼ maʼ xáanchaj ka suunajen Europaiʼ tumen kʼaschaj le motooʼ. Ka tin wutskíinteʼ binen tiʼ junpʼéel u jáal jaʼil Portugal. Teʼeloʼ tin chʼaʼtuklaj in xúumpʼattik le motooʼ utiaʼal in viajar tiʼ barco.

Ka tin wilaj táan u líiʼskuba jujuntúul táankelmoʼob yéetel x-lóoʼbayanoʼob utiaʼal u kʼáatmáanoʼob teʼ Atlánticooʼ, binen yéeteloʼob. Tiaʼan kaʼach Lauri, le máax yéetel tsʼokaʼan in beel bejlaʼoʼ. Yáaxeʼ binoʼon teʼ islaʼob yaan teʼ Caribeoʼ, tsʼoʼoleʼ jáan pʼáatoʼon Puerto Rico, tu tsʼookeʼ suunajoʼob Europa. Teen yéetel Laurieʼ k-kʼáat kaʼach k-man junpʼéel velero (barco ku péek chéen yoʼolal le iikʼoʼ) utiaʼal k-sutik bey k-otocheʼ. Baʼaleʼ ka máan óoxpʼéel meseʼ tʼaʼanen utiaʼal in beetkinba soldadoil Alemania.

Quince meses tin beetaj teʼ Marinaoʼ. Teʼ kʼiinoʼob xan ka tsʼoʼok in beel yéetel Laurioʼ. K-tuukuleʼ u seguer k-viajar jejeláas  tuʼuxoʼob. Le jach taʼaytak in wokol kaʼach teʼ Marinaoʼ t-manaj junpʼéel chan lancha, yéetel le táan in beetik in soldadoiloʼ t-sutaj veleroil jujunpʼíitil. Le kun meyajtoʼon kaʼach utiaʼal k-kajtal yéetel utiaʼal k-viajaroʼ. Ka jóokʼen teʼ Marina, le jach taʼaytak in tsʼoʼoksik le velerooʼ, u j-jaajkunajoʼob Jéeobaeʼ tsikbalnajoʼob t-éeteleʼ ka joʼopʼ k-xokik le Biblia tu yéeteloʼoboʼ.

BIX TU KʼEXIL IN KUXTAL LE BIBLIAOʼ:

Kin tuklik kaʼacheʼ maʼ kʼaʼabéet in beetik yaʼab kʼeexoʼobiʼ: tsʼokaʼan in beel yéetel Lauri, yéetel tsʼokaʼaniliʼ in pʼatik le chamaloʼ (Efesoiloʼob 5:5). Kin tuklik xaneʼ maʼ kʼaas ka viajarnakoʼon jejeláas tuʼuxoʼob jeʼex k-yáax chʼaʼtukultmiloʼ, tumen beyoʼ yaan u páajtal k-chaʼantik le jatsʼuts baʼaloʼob u beetmaj Diosoʼ.

Baʼaleʼ u jaajileʼ láayliʼ yaan baʼaxoʼob unaj in kʼexik kaʼach ichil in kuxtaleʼ, maases le bix in modosoʼ. Jach kaʼanal in wich yéetel chéen kin tuukul tin woʼolal. Láalaj hora táan in tʼaan yoʼolal le baʼaxoʼob maʼalobtak kin beetkoʼ. Tiʼ tuláakal in kuxtaleʼ teen kaʼach u maas kʼaʼanaʼanil.

Junpʼéel kʼiineʼ tin xokaj le kaʼansaj tu beetaj Jesús teʼ puʼukoʼ (Mateo 5 tak 7). Ka káajeʼ jelaʼan tin wuʼuyil le baʼax tu yaʼalaj Jesús yoʼolal le kiʼimak óolaloʼ. Jeʼex le ka tu yaʼalaj kiʼimak u yóol le máaxoʼob wiʼijoʼob wa ukʼajoʼoboʼ (Mateo 5:6). Kin tuklikeʼ bix wal jeʼel u yantal kiʼimak óolal tiʼ juntúul máak wiʼij wa ukʼajeʼ. Ka seguernaj in xokik le Bibliaoʼ tin tsʼáaj cuentaeʼ tuláakal máak kʼaʼabéet u natsʼkuba tiʼ Dios, baʼaleʼ wa maʼ tu éejemtikeʼ maʼ tu páajtal u natsʼkuba tiʼ. Bey tu yaʼalil Jesusoʼ: «Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ» (Mateo 5:3).

Alemania káaj k-xokik le Bibliaoʼ, baʼaleʼ binoʼon kajtal Francia yéetel ka tsʼoʼokeʼ Italia. Tuláakal tuʼux yaan u j-jaajkunajoʼob Jéeoba. Jatsʼuts tin wilil le yaabilaj ku yeʼesik tu baatsiloʼoboʼ bey xan le bix u múul meyajoʼoboʼ. Jach tu jaajil bey sukuʼuntsiloʼobeʼ, kex jejeláas tuʼuxoʼob kajaʼanoʼob (Juan 13:34, 35). Ka máan kʼiineʼ okjaʼanajoʼon.

Kex tsʼoʼok in wokjaʼ kaʼacheʼ anchaj in beetik uláakʼ kʼeexoʼob ichil in kuxtal. Teen yéetel Laurieʼ k-chʼaʼtukultmaj k-viajar tiʼ tuláakal u jáal jaʼil África yéetel k-kʼáatmáansik le Atlántico tak ken kʼuchkoʼon Estados Unidosoʼ. Le tiaʼanoʼon tu chúumukil le kʼáaʼnáaboʼ, teʼ tin tsʼáaj cuenta mix baʼaloʼon tu tséel Dios, le Máax beetmil tuláakal baʼaloʼ. Bey jach yaʼab tiempo yaanteneʼ (tumen teʼ kʼáaʼnáaboʼ maʼ yaʼab baʼax ku páajtal u beetik máakiʼ), tin tsʼáaj in wóol in xokik le Bibliaoʼ. Le baʼaxoʼob tin xokaj yoʼolal u kuxtal Jesús way Luʼumoʼ jach tu beetaj in tuukul. Jesuseʼ minaʼan u kʼeban, tsʼoʼoleʼ yaʼab páajtalil yaantiʼ, baʼaleʼ kex beyoʼ mix juntéen tu nojbaʼalkúunsuba. Baʼax maas kʼaʼanaʼan ichil u kuxtaleʼ maʼ letiʼiʼ, baʼaxeʼ u Taata yaan teʼ kaʼanoʼ.

Tin naʼataj unaj in tsʼáaik táanil le Reino ichil in kuxtaloʼ

Ka tuukulnajen yoʼolal bix u modos Jesuseʼ, tin naʼataj unaj in tsʼáaik táanil le Reino ichil in kuxtaloʼ, maʼ le baʼaxoʼob in chʼaʼtukultmaj in beetkoʼ (Mateo 6:33). Ka kʼuchoʼon Estados Unidoseʼ, t-pʼataj le baʼaxoʼob k-tukultmaj k-beetik kaʼachoʼ ka chʼíikoʼon k-meyajt Dios.

UTSILOʼOB TSʼOʼOK U TAASIKTEN:

Le kaʼach kin tuukul chéen tin woʼolaloʼ mantatsʼ chiʼichnaken, tumen maʼ in wojel wa yaan u jóokʼol maʼalobil le baʼax kin beetkoʼ. Baʼaleʼ bejlaʼeʼ maʼ chiʼichnakeniʼ, tumen Dios máax nuʼuktiken ichil in kuxtal (Isaías 48:17, 18). Tsʼoʼoleʼ maas yaan u biilal in kuxtal, tumen táan in meyajtik Dios yéetel táan in wáantik uláakʼ máakoʼob u kʼaj óoltoʼob.

Le tsolnuʼukoʼob yaan teʼ Bibliaoʼ tsʼoʼok u yáantkoʼon: teen yéetel Laurieʼ maas maʼalob k-bisikba bejlaʼeʼ. Tsʼoʼoleʼ Jéeobaeʼ tu síiajtoʼon juntúul k-hija. Letiʼeʼ u kʼaj óol xan Jéeoba yéetel u yaabiltmaj.

Le kuxtal yaantoʼonoʼ maʼ jeʼex u máan máak yóokʼol junpʼéel jejetsʼkil kʼáaʼnáabeʼ. Baʼaleʼ yéetel u yáantaj Jéeobaeʼ yaan u chúukpajal k-óol yéetel mantatsʼ ken k-chaʼa u nuʼuktikoʼon (Proverbios 3:5, 6).