Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | U REINO DIOS: ¿BAʼAX KEN U BEET TA WOʼOLAL?

¿Baʼaxten unaj a kaanbal tiʼ u Reino Dios?

¿Baʼaxten unaj a kaanbal tiʼ u Reino Dios?

U millonesil máakoʼobeʼ ku tsʼíiboltkoʼob ka taalak u Reino Dios. Jeʼex tu kaʼansilak Jesuseʼ, ku kʼáatkoʼob ich oración: «Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ» (Mateo 6:10).

Baʼaleʼ kex yaʼab máak taak u kaanbal yoʼolal u Reino Dioseʼ, u maas yaʼabil le religionoʼoboʼ maʼatech u jach tʼaanoʼob tu yoʼolal. Le historiador H. G. Wellsoʼ péeknaj u yóoleʼ tumen tu yileʼ «kex jach táaj kʼaʼanaʼan utiaʼal Jesús u kaʼansik u Reinoil le kaʼanoʼ, chíikaʼan yilaʼaleʼ u maas yaʼabil le iglesia cristianaʼoboʼ maʼ kʼaʼanaʼan u yilkoʼobiʼ».

Baʼaleʼ u j-jaajkunajoʼob Jéeobaeʼ ku tsʼáaik u yóol u tʼaanoʼob tiʼ u Reino Dios. Jeʼex le revista táan a xokikaʼ, ku jóoʼsaʼal ich 220 idiomaʼob yéetel ku imprimirtaʼal óoliʼ 46 millones u pʼéelaliʼ. Le oʼolal letiʼe revista maas kʼaj óolaʼanoʼ. Baʼaleʼ ¿baʼax tiʼ ku tʼaan? Tu kʼaabaʼeʼ ka yaʼalik: U Pʼíich Tulumil Kanan. Táan u kʼaʼaytik u Reino Jéeoba.  *

¿Baʼaxten u j-jaajkunajoʼob Jéeobaeʼ jach ku tsʼáaik u yóol u kʼaʼaytoʼob yéetel u kaʼansoʼob u Reino Dios? Tumen letiʼe baʼax maas ku kaʼansik le libro maas kʼaj óolaʼanoʼ: le Bibliaoʼ. Tsʼoʼoleʼ k-ojel chéen u Reino Dios kun utskíintik le baʼaxoʼob chiʼichnakkúuntikoʼon bejlaʼoʼ.

U j-jaajkunajoʼon Jéeobaeʼ k-beetik jeʼex Jesuseʼ. Baʼax maas kʼaʼanaʼan utiaʼal Jesús ka taal way Luʼumeʼ u kʼaʼaytik u Reino Dios (Lucas 4:43). ¿Baʼaxten jach kʼaʼanaʼan tu yilil? ¿Baʼax ken u beet u Reino Dios ta woʼolal? Utiaʼal a wojéeltikeʼ beet uts a wilik le uláakʼ xookoʼob ku taasik le revistaaʼ.

^ xóot’ol 5 Jeʼex u yaʼalik le Bibliaoʼ, u kʼaabaʼ Dioseʼ Jéeoba.