Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 KʼEʼEX U KUXTALOʼOB TUMEN LE BIBLIAOʼ

In kaanbal yoʼolal le Paraísooʼ tu kʼexaj in kuxtal

In kaanbal yoʼolal le Paraísooʼ tu kʼexaj in kuxtal
  • SÍIJ TU JAʼABIL 1974

  • TUʼUX SÍIJI LETONIA

  • KAʼACHEʼ MOTOCICLISTA KU TÁAKPAJAL TIʼ KETLANOʼOB

BIX KUXLIKEN KAʼACHI:

Síijen tu noj kaajil Riga, u capitalil Letonia. Teen yéetel in kiikeʼ chéen yéetel in maama kaʼach kajaʼanoʼon. Kex católica in maamaeʼ chéen utiaʼal kʼiinbesaj ku biskoʼon kaʼach iglesia. Desde tin chichnil kin creertik yaan junpʼéel baʼax maas nojoch u páajtalil tiʼ wíinik, baʼaleʼ tin táankelmileʼ chʼíiken tiʼ yaanal baʼaloʼob.

In maamaeʼ tu yilaj jach uts tin tʼaan in jubik yéetel in jel beetik jeʼel baʼaxakeʼ. Sajak u pʼatken tin juunal, tumen u yojel yaʼab baʼax jeʼel in kʼaskúuntik tin wotocheʼ. Utiaʼal in náaysik in wóoleʼ tu síiajten junpʼéel báaxal de metal ku páajtal u juʼubul yéetel u jel beetaʼal. Jach uts tin tʼaan in báaxtik. Baʼaleʼ yaan uláakʼ baʼax uts tin tʼaan kaʼachi: in máan yóoʼ moto. In maama túuneʼ tu tsʼíibtaj in kʼaabaʼ tiʼ junpʼéel ketlan ku kʼaabaʼtik «El ciclomotor de oro» (Zelta Mopēds). Káajen yéetel mejen motoʼob, ka tsʼoʼokeʼ joʼopʼ in natʼik le nuuktakoʼoboʼ.

Séeb úuchik in kaanbal yéetel joʼopʼ u binten utsil teʼ sajbeʼentsil deporteaʼ. Óoxtéen tin ganartaj le ketlan superbikes tu luʼumil Letoniaoʼ, yéetel kaʼatéen teʼ luʼumoʼob balticoʼoboʼ.

BIX TU KʼEXIL IN KUXTAL LE BIBLIAOʼ:

Teʼ kʼiinoʼob maʼalob u bintenoʼ, in novia Evija, le máax yéetel tsʼoʼok in beeloʼ, tu kʼaj óoltaj u j-jaajkunajoʼob Jéeoba. Tu kaxtaj junpʼéel jóoʼsaʼanil ku taasik junpʼéel cupón utiaʼal u kʼáataʼal xook yéetel le Bibliaoʼ. Tu chupajeʼ ka tu túuxtaj. Maʼ úuch tiʼ leloʼ taal kaʼatúul x-Jaajkunajoʼobeʼ ka joʼopʼ u tsʼáaikoʼob xook tiʼ. Teneʼ maʼ in pʼeekiʼ, baʼaleʼ teʼ kʼiinoʼoboʼ maʼ jach taak in kaanbal yoʼolal Diosiʼ.

Ka máan kʼiineʼ invitartaʼaben kutal in wuʼuy le xookoʼ. Utschaj tin tʼaan le baʼaxoʼob tin wuʼuyoʼ. Junpʼéel baʼax jach kʼuch tin puksiʼikʼaleʼ letiʼe in wojéeltik yaan u yantal junpʼéel paraíso way Luʼumoʼ. Kʼajaʼanten le ka  eʼesaʼabten Salmo 37:10 yéetel 11. Teʼeloʼ ku yaʼalik: «Ichil junpʼíit kʼiineʼ yaan u minaʼantal loolob máakoʼob; kex bukaʼaj ka a beet utiaʼal a kaxantikoʼobeʼ maʼ bíin suunakech a nuptáantoʼob. Baʼaleʼ le j-kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jeetsʼel óolal». Jach jatsʼuts tin wuʼuyil le tekstoaʼ.

Taakchaj in maas kaanbal tiʼ le Bibliaoʼ, yéetel tin tsʼáaj cuentaeʼ yaʼab religionoʼob kaʼansik baʼaloʼob maʼ jaajtakiʼ. Baʼaleʼ tin wileʼ le baʼaxoʼob ku yaʼalik le Bibliaoʼ jach maʼalobtak yéetel maʼ talam u naʼataʼaliʼ.

Teʼ Bibliaoʼ tin kanaj xaneʼ Jéeobaeʼ nojoch baʼal u yilik le kuxtaloʼ (Salmo 36:9). Le oʼolaleʼ tin chʼaʼtuklaj in pʼatik le deporteoʼ utiaʼal u xuʼulul in tsʼáaik in kuxtal tu chiʼ kíimil. Káaj in tsʼíiboltik in nojbeʼenkúuntik Jéeoba. Le beetkeʼ xuʼul in tsʼíiboltik in sen kʼaj óoltaʼal yéetel in nojbeʼenkúuntaʼal tumen le máakoʼob ikil in ketlan yéetel motooʼ.

Yaan in kʼubik cuenta tiʼ Jéeoba, le Máax tsʼaamil in kuxtaloʼ

Tu jaʼabil 1996, binen tiʼ junpʼéel asamblea internacional tiʼ u j-jaajkunajoʼob Jéeoba tu kaajil Tallin (Estonia), naatsʼ tiʼ le estadio tuʼux kin bin ketlan kaʼachoʼ. Teʼ asambleaoʼ tin wilaj máakoʼob jejeláas tuʼux u taaloʼob jach maʼalob u biskubaʼob. Junpʼéel kʼiineʼ juntúul x-Jaajkunajeʼ tu sataj u bulto teʼ asambleaoʼ. In tsʼaamil maʼ ken u kaʼa il kaʼacheʼ. Baʼaleʼ maʼ sáam tiʼ leloʼ, uláakʼ juntúul x-Jaajkunajeʼ tu kaxtaj le bultooʼ ka tu sutajtiʼ. ¡Jaʼakʼ in wóol ka tin wilaj le baʼax úuchoʼ! Tiʼ tin tsʼáaj cuentaeʼ le j-Jaajkunajoʼoboʼ jach tu jaajil ku kuxtaloʼob jeʼex u yaʼalik le Bibliaoʼ. Teen yéetel Evijaeʼ seguernaj k-kaanbal, ka okjaʼanajoʼon tu jaʼabil 1997.

UTSILOʼOB TSʼOʼOK U TAASIKTEN:

Jujuntúul tiʼ in amigoʼobeʼ tsʼoʼok u kíimloʼob yoʼolal le deporte yéetel motooʼ. Baʼaleʼ teneʼ láayliʼ kuxaʼaneneʼ. Úuchik in xokik le Bibliaoʼ kʼuchen in naʼateʼ yaan in kʼubik cuenta tiʼ Jéeoba, le Máax tsʼaamil in kuxtaloʼ.

Tu yáamil kanpʼéel jaʼabeʼ teen yéetel Evijaeʼ anchajtoʼon u jatsʼuts páajtalil k-meyaj teʼ sucursal yaan tiʼ u j-jaajkunajoʼob Jéeoba tu kaajil Rigaoʼ. Bejlaʼeʼ jach kiʼimak k-óol k-múul áantik k-chan hija Alise utiaʼal u yaabiltik Jéeoba. Tsʼoʼoleʼ kin bin áantaj xan juntéen cada semana teʼ najil suttʼaan yaan Letoniaoʼ. Teʼeloʼ kin wutskíintik cocheʼob yéetel uláakʼ baʼaloʼob ku kʼastaloʼobiʼ. Jach kiʼimak in wóol in wilik yaan u biilal le baʼax tin kanaj desde tin chichniloʼ. Tak bejlaʼa kin jubik yéetel kin jel beetik jeʼel baʼaxakeʼ.

Yoʼolal le baʼax tsʼoʼok in kanik teʼ Bibliaoʼ, bejlaʼeʼ yéetel kiʼimak óolal kin nojbeʼenkúuntik le juntúuliliʼ jaajil Dios junmúuchʼ yéetel in familiaoʼ. ¡In kaanbal yoʼolal le Paraíso kun antal way Luʼumaʼ jach tu jaajil tu kʼexaj in kuxtal!