Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TSIKBAL YÉETEL JUNTÚUL J-JAAJKUNAJ

¿Baʼaxten ku chaʼik Dios k-muʼyaj?

¿Baʼaxten ku chaʼik Dios k-muʼyaj?

Lelaʼ junpʼéel tsikbal jeʼex le suuk u beetik u j-jaajkunajoʼob Jéeoba yéetel a vecinoʼoboʼ. Koʼox tuklikeʼ juntúul x-jaajkunaj ku kʼaabaʼtik Michelleʼ ku xíimbaltik juntúul koʼolel ku kʼaabaʼtik Sofía.

¿BIX U YUʼUBIKUBA DIOS KEN MUʼYAJNAKOʼON?

Michelle: Jach kiʼimak in wóol in kaʼa xíimbaltikech, Sofía. ¿Bix a beel?

Sofía: Maʼalob.

Michelle: Máanikjeakeʼ tsikbalnajoʼon yoʼolal bix u yuʼubikuba Dios ken muʼyajnakoʼon. * Ta waʼaleʼ úuch káajak a tuklik leloʼ, maases le ka accidentarnaj a maamaoʼ. Jaaji, ¿bix u beel letiʼ?

Sofía: Yaan kʼiineʼ maʼalob, yaan kʼiin xaneʼ maʼ. Bejlaʼeʼ chan maʼalob u yuʼubikuba.

Michelle: Yaaske. In tuklikeʼ maʼ chéen chʼaʼabil a wilik maʼ u lúubul a wóoliʼ, ¿máasaʼ?

Sofía: Jaaj, beyoʼ. Yaan horaeʼ kin tuklik tak baʼax kʼiin ken xuʼuluk u muʼyaj.

Michelle: Bey in waʼalikoʼ. ¿Kʼajaʼan wa tech le kʼáatchiʼ tin waʼalajtech yaan k-núukikoʼ? T-aʼaleʼ wa nojoch u páajtalil Dioseʼ, ¿baʼaxten maʼ u xuʼuls le muʼyajiloʼ?

Sofía: Jaaj, kʼajaʼanten.

Michelle: Táanil tiʼ k-ilik u núukil teʼ Bibliaoʼ, ¿bix a wilik ka k-kʼaʼajs le baʼax t-tsikbaltoʼ?

Sofía: Maʼalob.

Michelle: T-kaneʼ tak juntúul profeta úuchjeakileʼ taakchaj u yojéeltik baʼaxten ku chaʼik Dios k-muʼyaj. Baʼaleʼ Dioseʼ maʼ tu kʼeyajiʼ, mix tu yaʼalajtiʼ wa minaʼan u fejiʼ.

Sofía: Kʼajaʼanten. Leloʼ junpʼéel baʼal maʼ in wojel kaʼachiʼ.

Michelle: T-kanaj xaneʼ Dioseʼ u pʼeek u yilik k-muʼyaj. Jeʼex u yaʼalik le Bibliaoʼ, le ka muʼyajnaj u kaajaleʼ tu «jáalkʼabtoʼob tu yoʼolal u yaabilaj yéetel u chʼaʼ óotsilil». * ¿Máasaʼ ku líiʼsik k-óol k-ojéeltik Dioseʼ ku chʼaʼiktoʼon óotsilil ken muʼyajnakoʼon?

Sofía: Jaaj, beyoʼ.

Michelle: Tu tsʼookeʼ t-aʼaleʼ yéetel le nojoch páajtalil yaan tiʼ Diosoʼ jeʼel u luʼsik le muʼyajil le kʼiin u kʼáatoʼ.

Sofía: Letiʼe baʼax maʼ tin naʼatikoʼ. ¿Baʼaxten ku chaʼik Dios u yúuchul baʼaloʼob kʼaastak wa jeʼel u páajtal u xuʼulsikeʼ?

¿MÁAX AʼALIK U JAAJIL?

Michelle: Utiaʼal k-ilik u núukil le kʼáatchiʼaʼ, koʼox ilik Génesis, u yáax libroil le Bibliaoʼ. ¿A wuʼuymaj wa u tsikbalil Adán yéetel Eva?

Sofía: Jaaj, tin kanaj teʼ catecismooʼ. Dios bineʼ tu yaʼalajtiʼob maʼ u jaantkoʼob u yich junkúul cheʼ, baʼaleʼ kex beyoʼ tu jaantoʼob.

Michelle: Jach beyoʼ. Baʼaleʼ koʼox ilik baʼax beet u kʼebantaloʼob. Beyoʼ yaan k-kanik baʼaxten k-muʼyaj bejlaʼeʼ. ¿Jeʼel wa a much xokik Génesis, capítulo 3, versículo 1 tak 5?

Sofía: Jeʼeleʼ. «Le kaanoʼ asab yaan kaʼach u  naʼat tiʼ tuláakal u baʼalcheʼiloʼob kʼáax beetaʼanoʼob tumen [...] Yuumtsil. Le kaanoʼ tu kʼáatchiʼitaj tiʼ le x-koʼoleloʼ: ¿Bey túunoʼ, [Dioseʼ] tu yaʼalajteʼex maʼ a jaantkeʼex u yich mix junkúul cheʼ yaan tu kúuchil le paakʼalaʼ? Le koʼoleloʼ tu núukajtiʼ: Jeʼel u páajtal k-jaantik u yich jeʼel baʼalak cheʼileʼ, baʼaleʼ maʼ u najmal k-jaantik u yich le cheʼ yaan tu chúumuk le paakʼalaʼ. [Dioseʼ] tu yaʼalaj tiʼ toʼoneʼ maʼ u najmal k-jaantikiʼ, mix k-machik u yich le cheʼoʼ, tumen wa k-beetkeʼ, k-kíimil. Baʼaleʼ le kaanoʼ tu yaʼalaj tiʼ le koʼoleloʼ: Maʼ jaajiʼ. Maʼ ta kíimleʼex. [Dioseʼ] u sen ojel, le kʼiin bíin a jaanteʼex u yich le cheʼoʼ yaan u kʼuchul a wojéelteʼex baʼax uts yéetel baʼax kʼaas; bey túunoʼ bíin pʼáatkeʼex beyeʼex [Dioseʼ]».

Michelle: Diosboʼotik. Koʼox naʼatik le tekstoaʼ. Teʼelaʼ ku yaʼalikeʼ tʼaʼan Eva tumen juntúul kaan. Uláakʼ tekstoeʼ ku yaʼalikeʼ le kaanoʼ letiʼe Kʼaasilbaʼal wa Satanasoʼ. * U jaajileʼ letiʼ tʼan Eva tu chiʼ juntúul kaan. Satanaseʼ tu kʼáataj tiʼ Eva baʼax u yaʼalmaj Dios yoʼolal u yich le cheʼoboʼ. Tsʼoʼoleʼ ¿ta wilaj wa baʼax tu yaʼalaj Dios kun úuchul tiʼ Adán yéetel Eva wa ka u jaantoʼob u yich le cheʼ yaan tu chúumuk le paakʼaloʼ?

Sofía: Yaan u kíimloʼob.

Michelle: Beyoʼ. Baʼaleʼ Satanaseʼ tu yaʼalaj junpʼéel baʼal jach kʼaas tu contra Dios. Tu yaʼalaj tiʼ Eva: «Maʼ jaajiʼ. Maʼ ta kíimleʼex». ¿Ka wilik? ¡Tu yaʼalaj chéen táan u tuus Dios!

Sofía: Mix juntéen in wuʼuy kaʼach wa bey úuchikoʼ.

Michelle: Utiaʼal u yilaʼal wa jaaj le baʼax tu yaʼalaj Satanasoʼ, anchaj u páaʼtaʼal u máan kʼiin. ¿A wojel wa baʼaxten?

Sofía: Umm. Maʼ jach in wojliʼ.

Michelle: Koʼox ketik beyaʼ. Koʼox aʼalikeʼ junpʼéel kʼiineʼ kin taaleʼ kin waʼalikeʼ maas yaan in muukʼ ke teech. ¿Bix jeʼel a weʼesikten maʼ jaajeʼ?

Sofía: Maʼ xaaneʼ yéetel junpʼéel prueba.

Michelle: Jach beyoʼ. Maʼ xaaneʼ k-yéeyik junpʼéel baʼal aaleʼ, k-ilik máax tiʼ toʼon jeʼel u páajtal u chʼúuyikoʼobeʼ. U jaajileʼ maʼ talam jeʼel u yilaʼal máax maas yaan u muukʼeʼ.

Sofía: Aan, tsʼoʼok in naʼatik.

Michelle: Baʼaleʼ ¿kux túun wa tu lugar in waʼalik maas yaan in muukʼeʼ, kin waʼalikeʼ maas utsen ke teech? ¿Máasaʼ jeʼel u talamtal u yilaʼal u jaajileʼ?

Sofía: Míin jeʼeleʼ.

Michelle: Beyoʼ, tumen u jaajileʼ chéen ikil u chʼúuyik máak junpʼéel baʼal aaleʼ, maʼ tu páajtal u yojéeltaʼal wa uts.

Sofía: Aan, leloʼ maʼ.

Michelle: U jaajileʼ utiaʼal u páajtal u yilaʼal máax tiʼ toʼon maas utseʼ kʼaʼabéet u chaʼabal u máan kʼiin.

Sofía: Jaaj a tʼaan.

Michelle: Beoraaʼ koʼox ilik tu kaʼatéen baʼax ku yaʼalik u libroil Génesis. ¿Tu yaʼalaj wa Satanás maas yaan u muukʼ ke Dios?

Sofía: Maʼ.

Michelle: Wa ka u yaʼal kaʼach beyoʼ chéen chʼaʼabil ken u yeʼes Dios máax maas yaan u muukʼ. Baʼaleʼ Satanaseʼ tu yaʼaleʼ maas uts ke Dios. Bey ka u yaʼal kaʼach tiʼ Evaeʼ: «Dioseʼ táan u tuskech, baʼaleʼ teneʼ táan in waʼaliktech u jaajil».

Sofía: Leloʼ jaaj.

Michelle: Dioseʼ, tumen jach yaan u naʼateʼ, tu yileʼ maas maʼalob ka u chaʼa u máan kʼiin. Beyoʼ tuláakal máak kun ilik máax aʼalik u jaajil.

JUNPʼÉEL BAʼAX KʼAʼANAʼAN

Sofía: Baʼaleʼ le ka kíim Evaoʼ, ¿maʼ wa chíikpaj maʼ táan u tuus Diosiʼ?

Michelle: Beyoʼ. Baʼaleʼ yaan uláakʼ baʼax tu tsʼáaj naʼatbil Satanás. Ilawil tu kaʼatéen le versículo 5. ¿Ka wilik wa baʼax uláakʼ tu yaʼalaj Satanás tiʼ Eva?

 Sofía: Tu yaʼaleʼ wa ka u jaant u yich le cheʼoʼ yaan u kʼuchul u yojéelt baʼax uts yéetel baʼax kʼaas.

Michelle: Jaaj, tsʼoʼoleʼ yaan bin ‹u pʼáatloʼob beyoʼob Dioseʼ›. Satanás túuneʼ tu tsʼáaj naʼatbileʼ yaan baʼax uts táan u taʼakik Dios tiʼ le wíinikoʼoboʼ.

Sofía: Jaaji.

Michelle: Leloʼ maas talam xan.

Sofía: ¿Baʼaxten túun?

Michelle: Tumen yéetel le baʼax tu yaʼalaj Satanasoʼ tu tsʼáaj naʼatbileʼ Eva, bey xan tuláakal le wíinikoʼoboʼ, maas jeʼel u bin utsil tiʼob wa maʼ tu gobernartaʼaloʼob tumen Dioseʼ. Yoʼolal le jeʼel xanaʼ, Jéeobaeʼ u yojel maas maʼalob ka u chaʼa tiʼ Satanás ka u yeʼes wa jaaj le baʼax ku yaʼalikoʼ. Le oʼolal tu chaʼaj tiʼ Satanás u gobernartik le yóokʼol kaab tak bejlaʼaʼ. Le beetik xan yaʼab muʼyajil yaan bejlaʼeʼ, tumen letiʼe Kʼaasilbaʼal gobernartik le yóokʼol kaabaʼ, maʼ Diosiʼ. * Baʼaleʼ yaan kaʼapʼéel baʼaloʼob jatsʼutstak ku yaʼalik le Bibliaoʼ.

Sofía: ¿Baʼax túuniʼ?

Michelle: Yáaxeʼ ku yaʼalikeʼ Jéeobaeʼ jeʼel u yáantkoʼon ken muʼyajnakoʼoneʼ. Koʼox ilik baʼax tu yaʼalaj rey David teʼ Salmo 31:7. Davideʼ yaʼab baʼaxoʼob tu muʼyajtaj. Kex beyoʼ, ilawil baʼax tu yaʼalaj tiʼ Dios teʼ tekstoaʼ. ¿Jeʼel wa a much xokikeʼ?

Sofía: Maʼalob. Ku yaʼalik: «A yaakunajeʼ ku taasikten kiʼ óolal yéetel kiʼimak óolal. Techeʼ tsʼoʼok a wilik in okʼom óolaloʼob, a kʼaj óol in muʼyajoʼob».

Michelle: Jeʼex k-ilkoʼ, kex jach muʼyajnajeʼ Davideʼ kiʼimakchaj u yóol u yojéeltik Jéeobaeʼ tu yilaj tuláakal le baʼax úuchtiʼoʼ. ¿Máasaʼ ku líiʼsik k-óol k-ojéeltik Jéeobaeʼ ku yilik tak le baʼaxoʼob chéen toʼon k-ojel táan k-muʼyajtikoʼ?

Sofía: Beyoʼ.

Michelle: U kaʼapʼéel baʼax maʼalob ku yaʼalik le Bibliaoʼ, Dioseʼ maʼ ken u chaʼa k-muʼyaj utiaʼal mantatsʼ; maʼ kun xáantaleʼ yaan u xuʼulsik u kʼasaʼan yóokʼol kaab Satanás. Dioseʼ yaan u luʼsik tuláakal le baʼaxoʼob kʼaastak ku yúuchloʼoboʼ, tak le baʼaxoʼob ka muʼyajtik yéetel a maamaoʼ. ¿Bix a wilik ka suunaken tuláakʼ semana utiaʼal in weʼesiktech bix k-ojéeltik jach tu jaajil yaan u séeb luʼsaʼal le muʼyajil tumen Diosoʼ? *

Sofía: Maʼalob.

¿Yaan wa baʼax ku yaʼalik le Biblia maʼ ta jach naʼatikoʼ? ¿Yaan wa baʼax taak a wojéeltik yoʼolal le baʼaxoʼob ku creertik wa ku beetik u j-jaajkunajoʼob Jéeobaoʼ? Wa beyoʼ tsikbalnen yéetel juntúul u j-jaajkunaj Jéeoba. Letiʼeʼ yéetel kiʼimak óolal kun tsikbal ta wéetel tu yoʼolal leloʼ.

^ xóot’ol 7 Ilawil le xook «Tsikbal yéetel juntúul j-Jaajkunaj: ¿Chéen wa táan u yilik Dios k-muʼyaj?», jóokʼ teʼ revista 1 tiʼ julio tiʼ 2013.

^ xóot’ol 17 Ilawil Isaías 63:9.

^ xóot’ol 61 Utiaʼal a wojéeltik u maasileʼ ilawil u 9 xookil le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.