Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

«Maʼ a péekeʼex tiʼ a fejeʼex»

«Maʼ a péekeʼex tiʼ a fejeʼex»

«Maʼ a péekeʼex tiʼ a fejeʼex [...] muʼukʼaʼanchajkeʼex.» (1 COR. 16:13)

KʼAAYOʼOB: 60, 64

1. 1) ¿Baʼax úuch tiʼ Pedro le tiaʼan tu Kʼáaʼnáabil Galileaoʼ? (Ilawil le dibujo yaan tu káajbal le xookaʼ.) 2) ¿Baʼaxten káaj u búulul Pedro?

JUNPʼÉEL áakʼab le tiaʼan apóstol Pedro yéetel u maasil disipuloʼob tu chúumuk u Kʼáaʼnáabil Galileaeʼ taal junpʼéel kʼaʼamkach iikʼ. Teʼ súutukoʼ chéen ka tu yiloʼobeʼ táan u taal u xíimbal Jesús yóokʼol le jaʼoʼ. Pedroeʼ tu yaʼalajtiʼ: «Wa jaaj teecheʼ, aʼalten ka taalaken ta wiknal tu yóokʼol le jaʼoʼ». Jesuseʼ tu yaʼalajtiʼ: «¡Koʼoten!». Le ka tu yuʼubaj lelaʼ tu puluba ichil le jaʼoʼ ka joʼopʼ u xíimbal tu yóokʼol. Chéen baʼaleʼ chéen wa jaypʼéel xáakʼab tu tsʼáajeʼ le ku káajal u búulul. ¿Baʼaxten káaj u búulul? Tumen letiʼeʼ joʼopʼ u paktik le iikʼ yéetel le olasoʼ ka sajakchaji. Pedroeʼ joʼopʼ u yawtik ka áantaʼak, Jesús túuneʼ tu macheʼ ka tu yaʼalajtiʼ: «Jach túun junpʼíit a fe, ¿baʼaxten kaʼapʼéelchaj a tuukul?» (Mat. 14:24-32).

2. ¿Baʼax ken k-il teʼ xookaʼ?

2 Teʼ xookaʼ yaan k-tʼaan tiʼ le fejoʼ yéetel yaan k-ilik óoxpʼéel baʼaloʼob jeʼel k-kanik tiʼ le baʼax úuch tiʼ Pedrooʼ. Yáaxeʼ yaan k-ilik bix tu yeʼesil Pedro jach ku creertik jeʼel u yáantaʼal tumen Jéeobaeʼ, u kaʼapʼéeleʼ bix úuchik u xuʼulul u yantal u fe yéetel u yóoxpʼéeleʼ baʼax áant utiaʼal u kaʼa antal u fe. Le baʼax ken k-ilaʼ yaan u yáantkoʼon utiaʼal ka maas nojochchajak k-fe (1 Cor. 16:13).

 YANAK A FE TIʼ DIOS

3. 1) ¿Baʼaxten tu puluba Pedro ichil le jaʼoʼ? 2) Jeʼex Pedroeʼ, ¿baʼax tsʼoʼok k-beetik xan toʼon?

3 Pedroeʼ jach yaan u fe kaʼachi. ¿Baʼaxten k-aʼalik lelaʼ? Tumen le ka tʼaʼan tumen Jesuseʼ tu séebaʼanil tu puluba teʼ jaʼoʼ ka joʼopʼ u xíimbal tu yóokʼol. Tumen jach nojoch u fejeʼ u yojel kaʼach yaan u yáantaʼal tumen Dios utiaʼal ka xíimbalnak yóokʼol le jaʼ jeʼex úuchik u yáantaʼal Jesusoʼ. Toʼon xaneʼ ka tsʼoʼok k-beetikba disipuloil tiʼ Jesuseʼ, t-kʼubaj k-kuxtal tiʼ Jéeobaeʼ ka okjaʼanajoʼon. ¿Baʼaxten? Tumen yaan k-fe tiʼ Jéeoba yéetel tiʼ Jesús tsʼoʼoleʼ k-creertik de ke letiʼob kun áantkoʼon (Juan 14:1; xok 1 Pedro 2:21).

4, 5. ¿Baʼaxten jach kʼaʼabéet le fejoʼ?

4 Le fejoʼ junpʼéel jatsʼuts regalo. Tumen jach nojoch u fe Pedroeʼ páajchaj u xíimbal yóokʼol le jaʼoʼ, lelaʼ junpʼéel baʼal maʼ tu páajtal u beetik wíinik. Jeʼex túun k-ilkoʼ le fejoʼ jeʼel u yáantik máak u beet tak baʼaxoʼob ku tuklik maʼ tu páajtal u beetkeʼ (Mat. 21:21, 22). Jujuntúul tiʼ toʼoneʼ tu yoʼolal le fejoʼ tsʼoʼok u kʼexik bix u kuxtal yéetel bix u modos, le oʼolaleʼ yaan horaeʼ hasta ku jaʼakʼal u yóol le máaxoʼob u yojloʼob bix k-kuxtal kaʼachoʼ. Toʼoneʼ t-kʼexaj k-kuxtal tumen k-yaabiltmaj Jéeoba yéetel tumen tu yáantoʼon xan ka k-beete (xok Colosasiloʼob 3:5-10). Le fejoʼ tu yáantoʼon utiaʼal k-kʼubik k-kuxtal tiʼ Jéeoba yéetel utiaʼal k-beetikba u amigo, lelaʼ chéen páajchaj k-beetik yéetel u yáantaj (Efe. 2:8).

5 Le fejoʼ ku yáantkoʼon utiaʼal maʼ k-chʼaʼik saajkil ken u beettoʼon wa baʼax Satanás (Efe. 6:16). Ku yáantkoʼon xan confiar tiʼ Jéeoba, le oʼolal maʼatech k-chʼíikil chéen tuukul tiʼ le problemaʼob yaantoʼonoʼ. Jéeobaeʼ u yaʼalmaj yaan u tsʼáaiktoʼon tuláakal baʼax kʼaʼabéet wa k-tsʼáaik táanil u Reino (Mat. 6:30-34). Tsʼoʼoleʼ wa yaan k-fejeʼ Jéeobaeʼ yaan u tsʼáaiktoʼon junpʼéel jatsʼuts regalo, le kuxtal minaʼan u xuuloʼ (Juan 3:16).

KANÁANT A FE

6, 7. 1) ¿Tiʼ baʼax chíikaʼan le iikʼ yéetel le olas tu beetaj u sajaktal Pedrooʼ? 2) ¿Baʼax maʼ unaj u tuʼubultoʼoniʼ?

6 Le táan u xíimbal Pedro tu yóokʼol le jaʼoʼ káaj u sajaktal. ¿Baʼaxten? Tumen tu yilaj bix kʼaʼamil le iikʼ yéetel bix nuuktakil le olasoʼ. Le iikʼ yéetel le olasoʼ jeʼel u páajtal u keʼetel yéetel le túuntajiloʼob bey xan le chiʼichnakiloʼob ku yantaltoʼon teʼ kʼiinoʼobaʼ. Kex jach yaj baʼax táan u yúuchultoʼoneʼ jeʼel u páajtal k-aktáantik yéetel u yáantaj Jéeobaeʼ. Pero maʼ unaj u tuʼubultoʼon baʼax úuch tiʼ Pedroiʼ. Letiʼeʼ maʼ búul tumen táan u jaʼatsʼal tumen le iikʼ yéetel le olasoʼ. Baʼaxeʼ le Bibliaoʼ ku yaʼalikeʼ «ka tu yuʼubaj jach kʼaʼam le iikʼoʼ sajakchaji» (Mat. 14:30). Lelaʼ u kʼáat u yaʼaleʼ Pedroeʼ maas chʼíik u yil bukaʼaj kʼaʼamil le iikʼoʼ ka xuʼul u paktik Jesús. Lelaʼ letiʼe baʼax beet u pʼáatal minaʼan u fejoʼ. Toʼon xaneʼ wa chéen k-chʼíikil tuukul tiʼ le problemaʼob yaantoʼonoʼ yaan u xuʼulul k-creertik yaan u yáantkoʼon Jéeoba.

7 Maʼ unaj u tuʼubultoʼoneʼ wa maʼ t-kanáantikbaeʼ jeʼel u pʼáatal minaʼan k-fejeʼ. ¿Baʼaxten? Tumen le Bibliaoʼ ku yaʼalikeʼ u pʼáatal minaʼan k-fejeʼ letiʼe «kʼeban séeb jeʼel u baʼaytikoʼonoʼ» (Heb. 12:1). Jeʼex Pedroeʼ wa k-chʼíikil k-il chéen le baʼaxoʼob maʼ maʼalobtakoʼ jeʼel u beetik u pʼáatal minaʼan k-fejeʼ. ¿Bix jeʼel k-ojéeltik wa táan u káajal u pʼáatal minaʼan k-fejeʼ? Le kʼáatchiʼob ken k-il beoraaʼ yaan u yáantkoʼon k-il bix yanil k-fe.

8. ¿Baʼax jeʼel u beetik u xuʼulul k-creertik u promesaʼob Dioseʼ?

8 «¿Láayliʼ wa kin jach creertik u promesaʼob Dios jeʼex ka káaj in meyajtikeʼ?» Toʼoneʼ k-ojleʼ Dioseʼ u yaʼalmaj yaan u xuʼulsik u yóokʼol kaab Satanás. Chéen baʼaleʼ, ¿chʼiikiloʼon wa chéen tiʼ le náaysaj óoloʼob yaan teʼ yóokʼol kaabaʼ? Wa bey kuxlikoʼonaʼ jeʼel u tuʼubultoʼon wa jach taʼaytak u xuʼulsaʼal le yóokʼol kaabaʼ (Hab. 2:3). Tuukulnakoʼon xan tiʼ lelaʼ. Jéeobaeʼ tu túuxtaj u Hijo u kʼub u kuxtal  t-oʼolal utiaʼal ka perdonartaʼak k-kʼebanoʼob. Chéen baʼaleʼ wa k-chʼíikil tuukul chéen tiʼ le baʼaxoʼob maʼ maʼalobtak k-beetmoʼ, jeʼel u káajal k-creertik maʼ u perdonartoʼon Jéeobaeʼ (Bax. 3:19). Lelaʼ jeʼel u beetik u xuʼulul k-meyajtik Dios yéetel kiʼimak óolaleʼ yéetel jeʼel u xuʼulul k-kʼaʼaytajeʼ.

9. ¿Baʼax jeʼel u yúuchul wa ku joʼopʼol k-kaxtik chéen k-utsileʼ?

9 «¿In tsʼaamaj wa in wóol in meyajt Jéeoba?» Wa k-tsʼaamaj k-óol k-meyajt Jéeobaeʼ maʼ ken k-tuʼubs le baʼaxoʼob u yaʼalmaj u tsʼáaiktoʼonoʼ. Chéen baʼaleʼ, ¿kux túun wa chéen k-utsil k-kaxtik ichil k-kuxtal? Maʼ xaaneʼ yaan horaeʼ jeʼel k-kʼamik junpʼéel meyaj maʼalob u náajalileʼ pero maʼ tu yantaltoʼon tiempo utiaʼal k-meyajtik Jéeoba. Lelaʼ jeʼel u beetik u pʼáatal minaʼan k-fejeʼ, jeʼel u beetik ‹k-maʼakʼóoltaleʼ› yéetel jeʼel u beetik maʼ k-tsʼáaik k-óol k-meyajt Jéeobaeʼ (Heb. 6:10-12).

10. ¿Baʼax k-eʼesik ken k-perdonart u maasil?

10 «¿Ku talamtal wa in perdonar?» Ken beetaʼaktoʼon wa ken aʼalaʼaktoʼon wa baʼax tumen wa máaxeʼ, ¿k-tsʼíikil wa?, ¿ku xuʼulul wa k-tʼanik? Wa bey k-beetkoʼ maʼ xaaneʼ chéen k-tuukul tiʼ bix k-uʼuyikba. Toʼoneʼ k-eʼesik bukaʼaj nojchil k-fe tiʼ Jéeoba ken k-perdonart u maasil. ¿Baʼaxten? Tumen ken beetaʼaktoʼon wa baʼaxeʼ, le máax beettoʼonoʼ bey men cuentaeʼ ku yantal u pʼaax tiʼ toʼoneʼ. Toʼon xaneʼ ken k-beet baʼax kʼaas tu táan Jéeobaeʼ ku yantal k-pʼaax tiʼ letiʼ (Luc. 11:4). Bey túunoʼ ken k-perdonart u maasileʼ k-eʼesik táan k-confiar tiʼ Jéeoba. Toʼoneʼ k-ojel yaan u bendecirkoʼon ikil k-perdonar, tsʼoʼoleʼ u yantaltoʼon u bendición Jéeobaeʼ maas maʼalob ke u vengarkuba máak. U disipuloʼob Jesuseʼ tu kanoʼobeʼ kʼaʼabéet u yantal fe tiʼ máak utiaʼal u páajtal u perdonartik u maasil. Ka tu yaʼalaj Jesús tiʼ u disipuloʼob ka u perdonartoʼob tuláakal le baʼaxoʼob ku beetaʼaltiʼoboʼ, le disipuloʼoboʼ tu yaʼaloʼob: «Beet u maas nojochtal k-fe» (Luc. 17:1-5).

11. ¿Baʼax unaj k-beetik ken tsʼaʼabaktoʼon consejo?

 11 «¿Kin tsʼíikil wa ken tsʼaʼabakten consejo?» Wa ku tsʼaʼabaltoʼon consejoeʼ unaj k-ilik k-kaanbal tiʼ baʼax ku yaʼalaʼal. Maʼ unaj k-tuklik maʼ maʼalob baʼax aʼalaʼabtoʼoniʼ mix unaj k-ilik le baʼax maʼ maʼalob ku beetik le máax tsʼáatoʼon le consejooʼ (Pro. 19:20). Wa k-kʼamik le consejo ku tsʼaʼabaltoʼonoʼ yaan k-kanik tuukul jeʼex Jéeobaeʼ.

12. ¿Baʼaxten maʼ maʼalob ka k-criticart le máaxoʼob nuʼuktik le múuchʼuliloʼ?

12 «¿Kin criticartik wa le máaxoʼob nuʼuktik le múuchʼuliloʼ?» Ka tu yuʼubaj le israelitaʼob baʼax tu yaʼalaj le diez máakoʼob túuxtaʼab u yiloʼob le kaaj aʼalaʼan u tsʼaʼabaltiʼoboʼ joʼopʼ u criticarkoʼob Moisés yéetel Aarón. Jéeoba túuneʼ tu yaʼalaj tiʼ Moisés: «¿Tak baʼax kʼiin bíin u kaʼa yoksaj óoltenoʼob[?]» (Núm. 14:2-4, 11). Jéeobaeʼ u yojel maʼatech u confiar le israelitaʼob tiʼ letiʼoʼ, le oʼolal joʼopʼ u tʼaanoʼob tu contra Moisés yéetel Aarón, le máaxoʼob u tsʼaamaj utiaʼal u nuʼuktik le kaajoʼ. Bejlaʼa xaneʼ wa cada táan k-criticartik le máaxoʼob u tsʼaamaj Jéeoba utiaʼal nuʼuktik u kaajaloʼ, jeʼel u páajtal u yaʼalaʼaleʼ táan u pʼáatal minaʼan k-fe.

13. ¿Baʼaxten maʼ unaj u lúubul a wóol wa ka wilik maʼ jach yaan a fejiʼ?

13 Beora tsʼoʼok k-xakʼaltik le kʼáatchiʼobaʼ maʼ xaaneʼ ta tsʼáaj cuentaeʼ maʼ jach yaan a fe jeʼex a tuklik kaʼachoʼ. Pero maʼ unaj u lúubul a wóoliʼ. Kʼaʼajaktecheʼ tak le apóstol Pedro kex yaan u fejeʼ tu chʼaʼaj saajkil yéetel kaʼapʼéelchaj u tuukul. Tak Jesuseʼ yaʼab u téenel tu tsolaj u nuʼuk tiʼ u disipuloʼob tumen tu yileʼ jach ‹junpʼíit u fejoʼob› (Mat. 16:8). Kex beyoʼ yaan uláakʼ baʼax jeʼel k-kanik tiʼ Pedroeʼ. Koʼox ilik baʼax úuchtiʼ le ka káaj u búululoʼ.

CHʼIK A PAAKAT TIʼ JESÚS

14, 15. 1) ¿Baʼax tu beetaj Pedro ka káaj u búulul? 2) ¿Bix jeʼel k-chʼikik k-paakat tiʼ Jesuseʼ?

14 ¿Baʼax tu beetaj Pedro ka káaj u búulul? Pedroeʼ jach u yojel nadar kaʼachi, le oʼolal wa u kʼáateʼ jeʼel kaʼach u suut teʼ barcooʼ (Juan 21:7). ¿Baʼaxten túun maʼ tu beetiʼ? Tumen letiʼeʼ maʼ tu beetaj chéen le baʼax ku tuklik maʼaloboʼ. Baʼaxeʼ tu chʼikaj u paakat tiʼ Jesús yéetel tu yóotaj ka áantaʼak. Wa k-ilik maʼ jach yaan k-fejeʼ unaj k-beetik jeʼex Pedroeʼ. ¿Bix jeʼel k-beetkeʼ?

15 Jeʼex Pedroeʼ, toʼon xaneʼ «unaj k-chʼikik k-paakat tiʼ Jesús» (xok Hebreoʼob 12:2, 3). Chéen baʼaleʼ toʼoneʼ maʼ tu páajtal k-paktik Jesús jeʼex tu beetil Pedroeʼ. ¿Bix túun jeʼel k-chʼikik k-paakat tiʼ Jesuseʼ? Letiʼe ken k-xok le baʼaxoʼob tu kaʼansaj yéetel tu beetoʼ bey xan ken kuxlakoʼon jeʼex kuxlajikoʼ. Wa k-beetkeʼ yaan u nojochtal k-fe tu kaʼatéen. Koʼox ilik bix jeʼel k-seguertik u ejemplo Jesuseʼ.

Wa k-chʼikik k-paakat tiʼ Jesús yéetel k-seguertik u ejemploeʼ yaan u maas nojochtal k-fe (Ilawil xóotʼol 15)

16. ¿Bix jeʼel u yáantkoʼon le Biblia utiaʼal ka maas nojochchajak k-fejoʼ?

16 Confiarnen tiʼ baʼax ku yaʼalik le Bibliaoʼ. Jesuseʼ u yojel kaʼacheʼ jach jaaj baʼax ku kaʼansik u Tʼaan Dios yéetel jach maʼalob consejos ku tsʼáaik tiʼ máak (Juan 17:17). Utiaʼal k-seguertik u ejemplo Jesuseʼ, unaj k-xokik le Biblia sáamsamaloʼ yéetel k-tuukul tiʼ le baʼaxoʼob ku kaʼansiktoʼonoʼ. Wa yaan xan wa baʼax maʼ t-naʼatikeʼ unaj k-kaxtik tuʼux ku maas tsoʼolol utiaʼal ka k-naʼate. Por ejemploeʼ, ¿ka creertik wa kuxaʼanech tu tsʼook kʼiinoʼob? Utiaʼal a maas creertikeʼ xok le profecíaʼob yaan teʼ Biblia ku yeʼeskoʼob kuxaʼanoʼon tu tsʼook kʼiinoʼoboʼ. ¿A kʼáat wa a maas tsʼáa a fe tiʼ le baʼaxoʼob u yaʼalmaj u beetik Dios maʼ kun xáantaloʼ? Wa beyoʼ xok le profecíaʼob tsʼoʼok u béeytaloʼoboʼ. ¿Ka creertik wa jach jeʼel u yáantkech le baʼax ku yaʼalik le Bibliaoʼ? Wa maʼeʼ, xok bix tsʼoʼok u yáantaʼal yaʼab sukuʼunoʼob yéetel kiikoʼob tumen le Bibliaoʼ (1 Tes. 2:13). *

17. ¿Baʼax áant Jesús utiaʼal ka chúukpajak u yóol, yéetel bix jeʼel u páajtal k-seguertik u ejemploeʼ?

17 Chʼik a tuukul tiʼ le bendicionoʼob u yaʼalmaj  Jéeoba u tsʼáaikoʼ. Jesuseʼ tuukulnaj tiʼ le bendicionoʼob kun tsʼaabiltiʼoʼ, leloʼ le áant utiaʼal ka chúukpajak u yóol kex jach yaj baʼax tu muʼyajtaj (Heb. 12:2). Letiʼeʼ mix juntéen tu tuklaj u bin tu paach le baʼaxoʼob ku tsʼáaik le yóokʼol kaabaʼ (Mat. 4:8-10). ¿Bix jeʼel k-seguertik u ejemploeʼ? Letiʼe ken tuukulnakoʼon tiʼ le jatsʼuts baʼaloʼob u yaʼalmaj Jéeoba u tsʼáaik maʼ kun xáantaloʼ. Tukult tiaʼanech teʼ túumben luʼumoʼ. Maʼalob ka a tsʼíibt wa ka a dibujart le baʼaxoʼob a kʼáat a beet teʼ Paraísooʼ. Jeʼel xan u páajtal a beetik junpʼéel lista tiʼ le máaxoʼob taak a kʼaj óoltik teʼ Paraíso ken kaʼa kuxkíintaʼakoʼ yéetel tsʼíibt xan baʼax a kʼáat a waʼaltiʼob. Tsʼoʼoleʼ tuukulnen tiʼ le bendicionoʼob kun tsʼaabiltechoʼ.

18. Le oracionoʼ, ¿bix jeʼel u yáantkoʼon utiaʼal u maas nojochtal k-fejeʼ?

18 Orarnen utiaʼal u maas nojochtal a fe. Jesuseʼ tu kaʼansaj tiʼ u disipuloʼob ka u kʼáatoʼob tiʼ Jéeoba ka tsʼaʼabak kiliʼich muukʼ tiʼob (Luc. 11:9, 13). Ken u kʼáat máak ich oración u yáantaj le kiliʼich muukʼoʼ maʼalob xan ka u kʼáat ka maas nojochchajak u fe. Jeʼex k-ojliloʼ le fejoʼ táakaʼan ichil u yich le kiliʼich muukʼoʼ. Pero ken u chʼaʼchiʼit máak le fe ichil u oracionoʼ táan u yaʼalik tiʼ Jéeoba jach baʼax kʼaʼabéettiʼ. Por ejemploeʼ wa ku talamtaltech a perdonartik u maasileʼ, kʼáat tiʼ Jéeoba ka u yáantech utiaʼal ka maas nojochchajak a fe, beyoʼ yaan a kanik a perdonart u maasil.

19. ¿Bix jeʼel k-yéeyik yéetel máax ken k-bisbaeʼ?

19 Bisaba yéetel máaxoʼob yaan u fejoʼob. Jesuseʼ tu kanáantaj máax yéetel tu bisuba. Letiʼeʼ tu bisuba yéetel u apostoloʼob tumen letiʼobeʼ chúukaʼan u yóoloʼob yéetel ku beetkoʼob kaʼach baʼaxoʼob ku yaʼalik (xok Juan 15:14, 15). Toʼon xaneʼ unaj k-yéeyik tubeel máax yéetel ken k-bisba. Unaj k-bisikba yéetel máaxoʼob yaan u fejoʼob yéetel ku beetkoʼob baʼax ku yaʼalik Jesús. Le maʼalob amigoʼoboʼ ku yaʼalikoʼob u jaajil tiʼ máak, tsʼoʼoleʼ ku kʼamkoʼob le consejoʼob k-tsʼáaiktiʼoboʼ (Pro. 27:9).

20. Wa k-beetik jeʼex Jesuseʼ, ¿baʼax utsil ken k-kʼame?

20 Áant u maasil utiaʼal ka nojochchajak u fe. Le baʼaxoʼob tu yaʼalaj yéetel tu beetaj Jesusoʼ tu yáantaj u disipuloʼob utiaʼal ka maas muʼukʼaʼanchajak u fejoʼob (Mar. 11:20-24). Toʼon xaneʼ unaj k-beetik jeʼex Jesuseʼ. Wa k-beetik beyaʼ yaan u maas nojochtal k-fe yéetel yaan xan k-áantik u maasil utiaʼal ka nojochchajak u fe (Pro. 11:25). ¿Bix jeʼel k-áantik le máaxoʼob yaan teʼ territorio utiaʼal ka nojochchajak u fejoʼoboʼ? Ken k-kaʼans tiʼ uláakʼ máakoʼob baʼax ku yaʼalik le Bibliaoʼ unaj k-tsoliktiʼob baʼax eʼesik jach tu jaajil yaan Dios, baʼaxten k-aʼalik u yaabiltmoʼon yéetel baʼaxten k-aʼalik le Bibliaoʼ u tʼaan Dios. ¿Bix jeʼel k-áantik le sukuʼunoʼob utiaʼal ka maas nojochchajak u fejoʼoboʼ? Ken a wuʼuy táan u criticartaʼal le máaxoʼob nuʼuktik le múuchʼulil tumen juntúul sukuʼunoʼ, maʼ a jáan lukʼul tu yiknal. Baʼaxeʼ kaxt bix jeʼel a wáantik utiaʼal u maas nojochtal u fejeʼ (Jud. 22, 23). Wa láayliʼ táan a bin escuelaeʼ ken káajak u tʼaan a wéet xookoʼob yéetel a maestroʼob tiʼ le evolucionoʼ maʼ a chʼaʼik saajkil a waʼaltiʼobeʼ techeʼ chéen ka creertik Dios beetmil tuláakal baʼal. Maʼ xaaneʼ jeʼel tak u kʼamkoʼob le baʼax ken a waʼaloʼ.

21. ¿Baʼax u yaʼalmaj Jéeoba u beetik?

21 Jéeoba yéetel Jesuseʼ tu yáantoʼob Pedro utiaʼal u xuʼulul u kaʼapʼéeltal u tuukul yéetel utiaʼal maʼ u sajaktal. Ka máan kʼiineʼ Pedroeʼ kʼuch kʼaj óoltbil yoʼolal le nojoch fe anchajtiʼoʼ. Teʼ kʼiinoʼob xanaʼ Jéeobaeʼ ku yáantkoʼon utiaʼal maʼ u pʼáatal minaʼan k-fe (xok 1 Pedro 5:9, 10). Jeʼex túun k-ilkoʼ wa k-ilik k-eʼesik junpʼéel nojoch fe kex maʼ chéen chʼaʼabileʼ, Jéeobaeʼ yaan u yáantkoʼon yéetel yaan u bendecirkoʼon.

^ xóot’ol 16 Ilawil le jaats ku kʼaabaʼtik «Kʼeʼex u kuxtaloʼob tumen le Bibliaoʼ», tiʼ U Pʼíich Tulumil Kanan utiaʼal k-kʼaʼaytajoʼ.