Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

¿Bix jeʼel k-eʼesik k-yaabiltmaj Jéeobaeʼ?

¿Bix jeʼel k-eʼesik k-yaabiltmaj Jéeobaeʼ?

«Toʼoneʼ k-eʼesik yaabilaj tumen Dios yáax yaabiltoʼon.» (1 JUAN 4:19)

KʼAAYOʼOB: 56, 138

1, 2. Jéeobaeʼ, ¿bix tsʼoʼok u kaʼanskoʼon k-eʼes yaabilaj?

LE PAALALOʼOBOʼ maas séeb u kaanbaloʼob yéetel le baʼaxoʼob ku yilik u beetik u taataʼoboʼ. Le ken u yeʼes yaabilaj le taatatsiloʼob tiʼ u paalaloʼoboʼ, u jaajileʼ táan xan u kaʼanskoʼobtiʼob bix unaj u yeʼeskoʼob yaabilaj. Mix máak u yeʼestoʼon yaabilaj jeʼex u beetik Jéeobaeʼ. Jeʼex túun k-ilkoʼ «Dios yáax yaabiltoʼon», le oʼolal tsʼoʼok k-kanik bix unaj k-eʼesik yaabilaj (1 Juan 4:19).

2 Jéeobaeʼ, ¿bix tsʼoʼok u yeʼesiktoʼon letiʼ «yáax yaabiltoʼon»? Tumen «kex j-kʼeban máakoʼon kaʼacheʼ, Cristoeʼ kíim t-oʼolal» (Rom. 5:8). K-Taata Jéeobaeʼ jach u yaabiltmoʼon le oʼolal tu tsʼáaj u Hijo utiaʼal u tokikoʼon tiʼ le kʼeban yéetel tiʼ le kíimiloʼ. Le u kuxtal Jesús tu kʼuboʼ ku tsʼáaik u páajtalil k-náatsʼal tiʼ Jéeoba yéetel k-eʼesik bukaʼaj k-yaabiltmil. Lelaʼ junpʼéel jach nojoch ejemplo. Yéetel lelaʼ tu kaʼansajtoʼoneʼ ken k-eʼes yaabilajeʼ unaj k-beetik tu jaajil k-óol (1 Juan 4:10).

3, 4. ¿Bix k-eʼesik k-yaabiltmaj Dios?

3 Le yaabilajoʼ letiʼe modos maas ku yeʼesik Jéeobaoʼ. Le oʼolal k-naʼatik baʼaxten tu yaʼalaj Jesús lelaʼ: «Kʼaʼabéet xan a yaabiltik Jéeoba a Dios yéetel tuláakal a puksiʼikʼal, yéetel tuláakal a kuxtal, yéetel tuláakal a tuukul bey xan yéetel tuláakal a muukʼ» (Mar. 12:30). Jéeobaeʼ u kʼáat ka k-yaabilt yéetel ‹tuláakal  k-puksiʼikʼal›. Jeʼel u yaatal u yóol wa ka k-maas yaabilt uláakʼ máak wa uláakʼ baʼal ke letiʼeʼ. Chéen baʼaleʼ maʼ chéen unaj k-aʼalik k-yaabiltmaj Jéeobaiʼ. Letiʼeʼ u kʼáat ka k-yaabilt yéetel tuláakal k-tuukul bey xan yéetel tuláakal k-muukʼ. Lelaʼ u kʼáat u yaʼaleʼ le yaabilaj k-uʼuyik tu yoʼolaloʼ letiʼe baʼax unaj u nuʼuktik baʼaxoʼob k-tuklik yéetel baʼaxoʼob k-beetkoʼ (xok Miqueas 6:8).

4 Jeʼex túun k-ilkoʼ kʼaʼabéet k-eʼesik k-yaabiltmaj Jéeoba jach tu jaajil k-óol. Wa k-tsʼáaik táanil ichil k-kuxtal k-meyajtikeʼ k-eʼesik k-yaabiltmaj jach tu jaajil. Teʼ xook máanikoʼ t-ilaj kanpʼéel baʼaxoʼob eʼesik jach u yaabiltmoʼon Jéeoba. Teʼ xookaʼ yaan k-ilik kanpʼéel baʼaloʼob jeʼel u páajtal k-beetik utiaʼal k-eʼesik jach tu jaajil k-yaabiltmeʼ.

UNAJ K-TSʼÁAIK GRACIAS TIʼ JÉEOBA

5. Ken tuukulnakoʼon tiʼ tuláakal le baʼaxoʼob ku tsʼáaiktoʼon Jéeobaoʼ, ¿baʼax ku taaktal k-beetik?

5 ¿Máasaʼ ken tsʼaʼabaktoʼon junpʼéel regaloeʼ u suukileʼ k-tsʼáaik u diosboʼotikil? Tsʼoʼoleʼ k-ilik k-usartik tumen k-apreciartik úuchik u tsʼaʼabaltoʼon. Santiagoeʼ tu tsʼíibtaj: «Tuláakal baʼal maʼalob yéetel utsil chúukaʼan ku siʼibiltoʼoneʼ kaʼan u taal; tiʼ ku lukʼloʼob yiknal u Taatail le sáasiloʼob yanoʼob teʼ kaʼanoʼ, máax maʼ tu péek yéetel maʼ tu kʼexpajal jeʼex u yúuchul yéetel le boʼoyoʼ» (Sant. 1:17). Toʼoneʼ jach k-tsʼáaik gracias tiʼ Jéeoba ikil u tsʼáaiktoʼon tuláakal baʼax kʼaʼabéet utiaʼal k-kuxtal yéetel kiʼimak óolal. Ken tuukulnakoʼon tiʼ lelaʼ k-tsʼáaik cuenta jach yaabiltaʼanoʼon tumen Jéeoba le oʼolal k-kʼáat xan k-eʼes tiʼ letiʼ jach k-yaabiltmaj. Techeʼ, ¿ka weʼesik wa a yaabiltmaj Jéeoba?

6. ¿Baʼax unaj u beetik kaʼach le israelitaʼob wa u kʼáatoʼob ka seguernak u bendecirtaʼaloʼob tumen Jéeobaoʼ?

6 Le israelitaʼoboʼ yaʼab baʼaloʼob maʼalobtak tsʼaʼabtiʼob tumen Jéeoba. Máan yaʼab tiempo táan u nuʼuktikoʼob yéetel u leyoʼob, tsʼoʼoleʼ tu tsʼáaj tuláakal baʼax kʼaʼabéettiʼob utiaʼal u kuxtaloʼob (Deu. 4:7, 8). Le israelitaʼoboʼ utiaʼal u tsʼáaikoʼob u graciasil tiʼ Jéeobaeʼ chéen unaj u beetkoʼob le baʼaxoʼob ku yaʼalik le leyoʼob tsʼaʼabtiʼoboʼ. Ken u kʼuboʼob u siibaloʼob tiʼ Jéeobaeʼ letiʼobeʼ unaj kaʼach u tsʼáaikoʼobtiʼ u maas «maʼalobil u yáax ich a paakʼaloʼob» (Éxo. 23:19). U yojloʼobeʼ utiaʼal u seguer u bendecirtaʼaloʼob tumen Jéeobaeʼ kʼaʼabéet u beetkoʼob baʼax ku yaʼalik yéetel u tsʼáaikoʼob u maas maʼalobil tiʼ (xok Deuteronomio 8:7-11).

7. ¿Bix jeʼel u páajtal u meyajtoʼon le baʼaxoʼob yaantoʼon utiaʼal k-eʼesik tiʼ Jéeoba k-yaabiltmeʼ?

7 Jeʼel xan u páajtal k-eʼesik tiʼ Jéeoba k-yaabiltmaj ken k-tsʼáa baʼaxoʼob yaantoʼon tiʼ letiʼeʼ (Pro. 3:9). Junpʼéel bix jeʼel k-beetik lelaʼ letiʼe ken meyajnaktoʼon le baʼaxoʼob yaantoʼon utiaʼal k-adorartikoʼ. Ken k-tsʼáa k-donacioneʼ táan k-áantaj teʼ múuchʼuliloʼ yéetel táan k-áantaj xan utiaʼal ka maas tsʼaʼabak ojéeltbil le Reino tiʼ tuláakal yóokʼol kaaboʼ. Kex wa yaʼab baʼax yaantoʼon bey xan wa maʼeʼ, jeʼel u páajtal u meyajtoʼon utiaʼal k-eʼesik k-yaabiltmaj Jéeobaeʼ (2 Cor. 8:12). Chéen baʼaleʼ yaan uláakʼ bix jeʼel u páajtal k-eʼesik tiʼ Jéeoba k-yaabiltmeʼ.

8, 9. 1) ¿Bix uláakʼ jeʼel u páajtal k-eʼesik k-yaabiltmaj Jéeobaeʼ? 2) ¿Baʼax tu beetaj Mike yéetel u familia?

8 Jesuseʼ tu kaʼansajtoʼoneʼ kʼaʼabéet k-kaxtik táanil u Reino Dios yéetel maʼ unaj k-chiʼichnaktal yoʼolal baʼax ken k-jaant wa baʼax ken k-búukintiʼ. Jéeobaeʼ ku yaʼalik u tsʼáaiktoʼon tuláakal baʼax kʼaʼabéettoʼon (Mat. 6:31-33). Toʼoneʼ k-confiar tiʼ Jéeoba yéetel k-ojel jach yaan u béeykuntik le baʼax u yaʼalmoʼ. Wa k-yaabiltmaj wa máaxeʼ u kʼáat u yaʼaleʼ k-confiar  xan tiʼ letiʼ. Toʼon xaneʼ mientras k-maas confiar tiʼ Jéeobaeʼ, maas yaan k-eʼesik k-yaabiltmaj (Sal. 143:8). Le oʼolaleʼ maʼalob ka tuukulnakoʼon tiʼ lelaʼ: «¿Kin weʼesik wa in yaabiltmaj Jéeoba yéetel le baʼaxoʼob kin beetkoʼ? Le bix in xupik in tiempo yéetel in muukʼoʼ, ¿táan wa u yeʼesik in yaabiltmaj Jéeoba? ¿Kin creertik wa yaan u tsʼáaikten Jéeoba baʼaxoʼob kʼaʼabéetten?».

9 Mike yéetel u familiaeʼ jach ku confiaroʼob tiʼ Jéeoba. Desde tu táankelmileʼ taak kaʼach u bin kʼaʼaytaj táanxel luʼumil. Tak ka tsʼoʼok u beel yéetel ka tsʼoʼok u yantal kaʼatúul u paalaleʼ láayliʼ taak u bin kʼaʼaytaj táanxel luʼumileʼ. Mike yéetel u familiaeʼ tu xokoʼob u experiencia le sukuʼunoʼob yéetel le kiikoʼob táan u yáantajoʼob táanxel tuʼuxoʼ, lelaʼ le áantoʼob utiaʼal u chʼaʼtuklikoʼob u kuxtaloʼob chéen yéetel junpʼíit baʼaloʼob. Yáaxeʼ tu konaj u yotochoʼobeʼ ka binoʼob kajtal tiʼ junpʼéel naj maas chichan. Tsʼoʼoleʼ tu chʼaʼtuklaj maʼ u sen meyaj yaʼab tiempo. Úuchik u beetkoʼob lelaʼ Mike yéetel familiaeʼ binoʼob kajtal táanxel luʼumil yéetel bejlaʼeʼ jach kiʼimak u yóoloʼob ikil u yáantajoʼob teʼeloʼ. Mikeeʼ ku yaʼalik: «Tsʼoʼok k-ilkeʼ jach jaaj le baʼax tu yaʼalaj Jesús teʼ Mateo 6:33».

TUUKULNEN TIʼ BIX U KAʼANSIKECH JÉEOBA

10. Jeʼex Davideʼ, ¿baʼaxten maʼalob ka tuukulnakech tiʼ baʼaxoʼob ku kaʼansiktech Jéeoba?

10 Juntéenjeakeʼ rey Davideʼ tu yaʼalaj: «Le kaʼanoʼoboʼ ku kʼaʼaytikoʼob u nojbeʼenil [Dios]; tu yoʼolal baʼaxoʼob u beetmajoʼ ku tʼaan u nakʼ kaʼan». Tu yaʼalaj xan: «Jach utsil chúukaʼan u kaʼanbesaj Yuumtsil, tumen ku tsʼáaik túumben kuxtal. U tusbej tʼaan Yuumtsileʼ jach maʼalob, tumen ku beetik u yantal naʼat tiʼ le máax óotsil u naʼateʼ». Ken tuukulnak kaʼach David tiʼ le leyoʼob jach maʼalobtak u tsʼaamaj Jéeoba bey xan tiʼ le jatsʼuts baʼaloʼob u beetmoʼ, ku maas náatsʼal tiʼ letiʼ yéetel ku maas taaktal u yeʼesik jach u yaabiltmaj. Davideʼ tu yaʼalaj: «Ka kʼambeʼenchajak tiʼ teech in tʼaanoʼob yéetel in tuukuloʼob, Yuumtsil u kúuchil in taʼakbeskinba, in j-toksajil xan» (Sal. 19:1, 7, 14).

11. Le baʼaxoʼob u kaʼansmajtoʼon Jéeobaoʼ, ¿bix jeʼel u meyajtoʼon utiaʼal k-eʼesik k-yaabiltmeʼ? (Ilawil le foto yaan tu káajbal le xookaʼ.)

11 Teʼ kʼiinoʼobaʼ Jéeobaeʼ táan u kaʼansiktoʼon yaʼab baʼaloʼob yoʼolal bix letiʼ, baʼax u tukultmaj u beetik, yoʼolal le baʼaxoʼob u beetmoʼ yéetel yoʼolal u Tʼaan. Le yóokʼol kaabaʼ maases ku kaʼansik ka kaʼanchajak u xook máak, pero lelaʼ jeʼel u beetik u xuʼulul k-yaabiltik Dioseʼ. Jéeobaeʼ maʼ chéen u kʼáat ka kaanbalnakoʼoniʼ, baʼaxeʼ ku yáantkoʼon xan utiaʼal ka yanaktoʼon naʼat. Letiʼeʼ u kʼáat ka k-jóoʼs u yutsil le baʼaxoʼob ku kaʼansiktoʼonoʼ yéetel ka meyajnaktoʼon utiaʼal k-kaʼansik u maasil (Pro. 4:5-7). Jéeobaeʼ u kʼáat ka k-áant u maasil utiaʼal «ka kʼuchuk u chúukaʼan kʼaj óoltoʼob le jaajoʼ» utiaʼal ka u salvartubaʼob (1 Tim. 2:4). Toʼoneʼ k-eʼesik k-yaabiltmaj Jéeoba bey xan le máakoʼob ken k-tsʼáa k-óol k-kaʼans u Reino Dios yéetel le baʼax u tukultmaj u beetik tu yoʼolal wíinikoʼ (xok Salmo 66:16, 17).

12. ¿Bix tu yuʼubiluba Shannon yoʼolal le jatsʼuts regalo tsʼaʼabtiʼob tumen Jéeobaoʼ?

12 Wa táankelmecheʼ láayliʼ xan jeʼel u páajtal a tuukul tiʼ tuláakal le baʼaxoʼob tsʼoʼok u tsʼáaiktech yéetel tsʼoʼok u kaʼansiktech Jéeobaoʼ. Shannoneʼ láayliʼ kʼajaʼantiʼ bix tu yuʼubiluba ka bin tiʼ junpʼéel asamblea le yaan 11 años tiʼ yéetel 10 años yaan tiʼ u yíitsʼinoʼ. Teʼ asamblea tiʼ distrito tu kʼaabaʼtaj «Devoción Piadosaoʼ» tiʼ tuláakal le táankelmoʼob, tak Shannon yéetel u yíitsʼinoʼ, aʼalaʼabtiʼob ka kulakoʼob tiʼ u jaats sillaʼob separartaʼan. Tu káajbaleʼ Shannoneʼ jach nerviosa. Pero jach  kiʼimakchaj u yóol ka tsʼaʼabtiʼob le libro Lo que los jóvenes preguntan. Respuestas prácticas. ¿Bix tu yuʼubilubaʼob yoʼolal le jatsʼuts regalo tsʼaʼabtiʼob tumen Jéeobaoʼ? Shannoneʼ ku yaʼalik: «Teʼ kʼiin jeʼeloʼ tin tsʼáaj cuenta jach tu jaajil yaan Jéeoba yéetel jach u yaabiltmen. Jach kiʼimak k-óol tumen Jéeobaeʼ ku tsʼáaiktoʼon jatsʼuts regaloʼob».

KʼAM LE TSOLXIKINOʼOB KU TSʼÁAIK JÉEOBAOʼ

13, 14. ¿Baʼax unaj k-beetik wa ku tsolxikintikoʼon Jéeoba, yéetel baʼaxten?

13 Le Bibliaoʼ ku yaʼalik: «Yuumtsileʼ ku yaʼalik u nuʼuk tiʼ máax u yaabilmaj, bey juntúul taata ku yaʼalik u nuʼuk tiʼ u yaabilaj paaleʼ» (Pro. 3:12). U jaajileʼ, «mix junpʼéel castigo ku kiʼimakkúuntik u yóol máak, baʼaxeʼ ku beetik u yaatal u yóol» (Heb. 12:11). Chéen baʼaleʼ ken k-kʼam le tsolxikinoʼob ku tsʼáaiktoʼon Jéeoba yéetel ken k-chaʼa u kaʼanskoʼoneʼ k-kanik k-beet baʼax maʼalob yéetel ku yantaltoʼon jeetsʼelil. Bey túunoʼ, ¿baʼax unaj k-beetik wa k-tsolxikintaʼal? Mix juntéen unaj k-tsʼíikil, baʼaxeʼ unaj k-kʼamik le tsolxikin ku tsʼaʼabaltoʼonoʼ. Toʼoneʼ k-yaabiltmaj Jéeoba le oʼolal k-beetik baʼax ku yaʼalik yéetel k-utskíintik baʼax k-beetik.

14 Tu kʼiiniloʼob Malaquíaseʼ yaʼab judíoʼob maʼ tu yóotoʼob u yuʼuboʼob u tʼaan Jéeobaiʼ. Letiʼobeʼ maʼ tu tukloʼob wa maʼ maʼalob baʼax ku beetkoʼob ikil u kʼubkoʼob tiʼ Jéeoba baʼalcheʼob kʼojaʼanoʼobiʼ. Le oʼolal kʼeʼeyoʼob tumen Jéeoba (xok Malaquías 1:12, 13). Jéeobaeʼ yaʼab u téenel tu tsolxikintoʼob, chéen baʼaleʼ maʼ tu beetoʼob u cuentailiʼ. Le oʼolal aʼalaʼabtiʼob: «Teneʼ bíin in loolob tʼanteʼex. Bey tumen maʼ a tsʼáaʼex a wóoleʼex a tsikikeneʼexoʼ» (Mal. 2:1, 2). Bey túunoʼ wa maʼatech k-kʼamik le tsolnuʼukoʼob ku tsʼáaiktoʼon Jéeoba yéetel k-tuklik maʼ jach kʼaʼabéettoʼobeʼ, maʼ ken u kʼamoʼon.

Tukult baʼax uts tu tʼaan Jéeoba maʼ le baʼax uts tu tʼaan le yóokʼol kaabaʼ (Ilawil xóotʼol 15)

15. ¿Baʼax clase tuukulil maʼ unaj yantaltoʼoniʼ?

15 U yóokʼol kaab Satanaseʼ ku túulchʼintik máak utiaʼal ka u nojbaʼalkúuntuba yéetel ka u kaxt chéen u yutsil. Yaʼab máakoʼobeʼ maʼ uts tu tʼaanoʼob u tsolkintaʼaloʼob yéetel u yaʼalaʼaltiʼob baʼax unaj u beetkoʼobiʼ. Yaan máaxeʼ chéen tumen  u yojel kʼaʼabéet u yuʼubikeʼ ku chaʼik u tsolxikintaʼal. Pero toʼoneʼ maʼ unaj u yantaltoʼon le tuukul beyoʼ. Le Bibliaoʼ ku yaʼalikeʼ unaj u ‹xuʼulul k-kuxtal jeʼex u máakiloʼob le yóokʼol kaabaʼ›, baʼaxeʼ unaj k-kuxtal jeʼex uts tu tʼaan Jéeobaeʼ yéetel k-beetik baʼax ku yaʼalik (Rom. 12:2). Yéetel u kaajaleʼ Jéeobaeʼ ku tsʼáaiktoʼon le tsolnuʼukoʼob jach teʼ súutuk kʼaʼabéettoʼonoʼ. Ku yaʼaliktoʼoneʼ kex tsʼokaʼan k-beel bey xan wa maʼeʼ unaj k-kanáantik bix k-tratartik le kiikoʼob yéetel le sukuʼunoʼob utiaʼal maʼ k-tsʼáaik naʼatbil yaanal baʼal, bix unaj k-yéeyik k-amigoʼob yéetel bix unaj k-náaysik k-óol. Wa k-kʼamik yéetel kiʼimak óolal u tsolxikin Jéeoba yéetel k-beetik tuláakal le ku páajtal utiaʼal k-lúubul utsil tiʼeʼ, k-eʼesik k-tsʼáaik gracias tiʼ yoʼolal u nuʼuktaj yéetel k-eʼesik xan k-yaabiltmaj (Juan 14:31; Rom. 6:17).

CREERT JACH TU JAAJIL YAAN U YÁANTKECH YÉETEL U KANÁANTKECH JÉEOBA

16. ¿Baʼaxten maʼalob ka k-chʼaʼ en cuenta baʼax ku tuklik Jéeoba?

16 Le mejen paalaloʼoboʼ u yojloʼob jach jeʼel u kanáantaʼaloʼob yéetel u yáantaʼaloʼob tumen u taataʼobeʼ. Yaan horaeʼ tak ken nuukchajkoʼobeʼ ku kʼáatkoʼob áantaj tiʼob. U yojloʼobeʼ kex ku páajtal u chʼaʼtuklikoʼob tu juunaloʼob baʼax ken u beetoʼobeʼ, jeʼel xan u páajtal u tsʼaʼabal maʼalob consejo tiʼob tumen u taataʼobeʼ. Jéeoba xaneʼ ku chaʼik k-chʼaʼtuklik t-juunal baʼax ken k-beete. Chéen baʼaleʼ tumen k-confiar tiʼ letiʼ yéetel k-yaabiltmeʼ, k-kʼáatik u yáantaj yéetel k-ilik wa uts tu tʼaan le baʼax taak k-beetkoʼ. Wa k-confiar tiʼ Jéeobaeʼ, letiʼeʼ yaan u tsʼáaiktoʼon u kiliʼich muukʼ utiaʼal k-beetik baʼax maʼalob (Fili. 2:13).

17. ¿Baʼax tu beetaj le israelitaʼoboʼ?

17 Tu kʼiiniloʼob Samueleʼ le israelitaʼoboʼ ganartaʼaboʼob tumen le filisteoʼoboʼ. Ka tsʼoʼok lelaʼ tu lugar u kʼáatkoʼob tiʼ Jéeoba baʼax unaj u beetkoʼobeʼ, tu chʼaʼtukloʼob u binoʼob Siló u chʼaʼob u arca Dios utiaʼal maʼ u kaʼa ganartaʼaloʼob tumen u enemigoʼob. ¿Bix biniktiʼob úuchik u beetkoʼob lelaʼ? Le Bibliaoʼ ku yaʼalikeʼ kíimsaʼab treinta mil u soldadoʼob yéetel chʼaʼab xan tiʼob u arca Dios (1 Sam. 4:2-4, 10, 11). Le israelitaʼoboʼ tu tukloʼobeʼ chéen yéetel ka anak le arca ichiloʼoboʼ jeʼel u yáantaʼaloʼob yéetel u kanáantaʼaloʼob tumen Jéeobaeʼ. Letiʼobeʼ maʼ tu kʼáatoʼob u yáantaj Jéeobaiʼ mix tu yiloʼob wa uts tu tʼaan Jéeoba le baʼax ken u beetoʼoboʼ. Baʼaxeʼ tu beetoʼob chéen le baʼax ku tuklikoʼob maʼaloboʼ, le oʼolal bin kʼaasiltiʼob (xok Proverbios 14:12).

18. ¿Baʼax ku yaʼalik le Biblia unaj k-beetkoʼ?

18 Le salmistaoʼ tumen jach u yaabiltmaj Jéeoba yéetel ku confiar tiʼ letiʼeʼ ken lúubuk kaʼach u yóoleʼ ku kaxtik u yáantaj Jéeoba: «In páajtalileʼ in tsʼaamaj tiʼ [Dios], máax láayliʼ bíin in kiʼikiʼtʼanteʼ. ¡Letiʼeʼ letiʼ in [Dios] yéetel in toksajil!» (Sal. 42:5, 6). ¿Ka wilik wa Jéeoba jeʼex u yilik kaʼach le salmistaaʼ? ¿Jach wa ka confiar tiʼ Jéeoba? Wa maʼatecheʼ, ilawil bix jeʼel u páajtal a maas confiar tiʼeʼ. Le Bibliaoʼ ku yaʼalik: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej» (Pro. 3:5, 6).

19. Techeʼ, ¿bix ken a weʼes tiʼ Jéeoba jach a yaabiltmaj?

19 Jeʼex túun k-ilkoʼ «Dios yáax yaabiltoʼon», le oʼolaleʼ tsʼoʼok k-kanik bix unaj k-yaabiltik. Maʼalob ka tuukulnakoʼon tiʼ le baʼaxoʼob tsʼoʼok u beetik t-oʼolaloʼ yéetel tiʼ bukaʼaj u yaabiltmiloʼon. Le oʼolaleʼ koʼox eʼesik k-yaabiltmaj Jéeoba yéetel tuláakal k-puksiʼikʼal, k-kuxtal, k-tuukul yéetel k-muukʼ (Mar. 12:30).