Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 LE BAʼAXOʼOB K-LÍIʼSMOʼ

«Jéeoba taaseʼex Francia utiaʼal a kʼaj óoltikeʼex u jaajil»

«Jéeoba taaseʼex Francia utiaʼal a kʼaj óoltikeʼex u jaajil»

TU PAALILEʼ, Antoine Skalecki ku meyaj kaʼach tiʼ junpʼéel mina. Lelaʼ jach éeʼjochʼeʼen yéetel kex 500 metros yáanal luʼum. Letiʼeʼ ku yáantaʼal kaʼach tumen juntúul chan tsíimin utiaʼal u jóoʼsik le baʼaxoʼob ku páanik teʼ minaoʼ. Antoineeʼ anchaj u túuxtaʼal meyaj 9 horas sáamsamal teʼeloʼ, tumen u papaeʼ maʼ tu páajtal u meyaj úuchik u níikil junpʼéel mina yóokʼol. Tsʼoʼoleʼ juntéenjeakileʼ, Antoine xaneʼ óolak kíimik úuchik u níikil junpʼéel mina yóokʼol.

Nuʼukuloʼob meyajnaj tiʼ le polacoʼoboʼ; u minail Dechy, naatsʼ tiʼ Sin-le-Noble, tuʼux meyajnaj Antoine Skalecki.

Antoineeʼ juntúul tiʼ le yaʼabkach paalaloʼob síijoʼob Francia tu añoil 1920 tak 1939, u papá le paalaloʼobaʼ polacoʼob. ¿Bix úuchik u bin kajtal yaʼab polacoʼob Francia? Tumen le ka tsʼoʼok le Primera Guerra Mundialoʼ, Poloniaeʼ xuʼul u nuʼuktaʼal tumen uláakʼ luʼumiloʼob yéetel tiʼ jujunpʼéel u kaajiloʼobeʼ jach táaj yaʼab máakoʼob kajaʼanoʼobiʼ. Chéen baʼaleʼ tu luʼumil Franciaeʼ kíim maas tiʼ junpʼéel millón máakoʼob yoʼolal le guerra anchajoʼ, le oʼolal jach kʼaʼabéet kaʼach máaxoʼob utiaʼal u meyajoʼob teʼ minaʼoboʼ. Tu añoil 1919, u gobiernoil Francia yéetel u gobiernoil Poloniaeʼ tu beetoʼob junpʼéel acuerdo utiaʼal ka xiʼik le polacoʼob meyaj Franciaoʼ. Le oʼolaleʼ tu añoil 1931 tu chukaj 507,800 polacoʼob kajaʼanoʼob Francia yéetel u maas yaʼabileʼ kajlajoʼob tu xamanil, naatsʼ teʼ tuʼux yaan le minaʼoboʼ.

Le ka binoʼob kajtal Franciaeʼ, le polacoʼoboʼ seguernaj u kuxtaloʼob jeʼex suukil tiʼobeʼ yéetel tu seguertoʼob le religión yaantiʼob kaʼachoʼ. Antoine, yaan 90 años tiʼ bejlaʼeʼ ku yaʼalik: «In abuelo Josepheʼ jach ku respetartik baʼax ku yaʼalik le Bibliaoʼ, lelaʼ junpʼéel baʼax tu kanaj tiʼ u papá». Cada domingoeʼ le polacoʼoboʼ jach jatsʼuts u vestirkubaʼob utiaʼal u binoʼob iglesia jeʼex suukil u beetkoʼob kaʼach Poloniaoʼ. Lelaʼ seguernaj u beetkoʼob kex ku tsʼáaikoʼob cuenta pʼektaʼanoʼob tumen jujuntúul máaxoʼob kajaʼanoʼob Francia, tumen le máakoʼobaʼ maʼ jach religiosoʼobiʼ.

Le polacoʼob kajaʼanoʼob Nord-Pas-de-Calaisoʼ tiʼ tu yáax uʼuyoʼob baʼax ku kaʼansik le j-Xoknáaloʼob tiʼ le Bibliaoʼ, letiʼobeʼ desde 1904 joʼopʼok u bin u kaʼansoʼob baʼax ku yaʼalik le Biblia teʼeloʼ. Tu añoil 1915 jóoʼsaʼab le revista The Watch Tower (U Pʼíich Tulumil Kanan) ich polacooʼ yéetel tu añoil 1925 jóoʼsaʼab xan le revista The Golden Age (¡Despertad!). Yaʼab familiaʼobeʼ jatsʼuts tu yilil u xokikoʼob le revistaʼobaʼ, bey xan le libro El Arpa de Dios ich polacooʼ.

Juntúul u tío Antoineeʼ u kʼaj óol kaʼach le j-Xoknáaloʼob tiʼ le Bibliaoʼ yéetel tu añoil 1924, letiʼeʼ yáax bin tiʼ junpʼéel muchʼtáambal tu yéeteloʼob. Yoʼolal túun u tíoeʼ, Antoine yéetel u láakʼtsiloʼobeʼ tu kʼaj  óoltoʼob xan le j-Xoknáaloʼob tiʼ le Bibliaoʼ. Teʼ año jeʼeloʼ le sukuʼunoʼoboʼ tu beetoʼob le yáax asamblea ich polaco tu kaajil Bruay-en-Artois. Mix junpʼéel mes tsʼoʼokok lelaʼ, sukuʼun Joseph Rutherford, le máax nuʼuktik u najil Betel teʼ kʼiinoʼob jeʼeloʼ, tu máansaj junpʼéel discurso tu táan dos mil máakoʼob muchʼlajoʼob láayliʼ teʼ kaajoʼ. Letiʼeʼ jach péeknaj u yóol ka tu yilaj maases polacoʼob le máakoʼob binoʼoboʼ. Le oʼolal le sukuʼun Rutherfordoʼ tu yaʼalaj: «Jéeoba taaseʼex Francia utiaʼal a kʼaj óoltikeʼex u jaajil. Beoraaʼ teʼex yéetel a paalaleʼexeʼ kʼaʼabéet a wáantkeʼex le máakoʼob kajaʼanoʼob Franciaoʼ. Jach kʼaʼabéet u kaʼansaʼal le máakoʼoboʼ, le oʼolal Jéeobaeʼ yaan u beetik u yantal uláakʼ máakoʼob áantkeʼex».

Le baʼax tu yaʼalaj le sukuʼunoʼ jach béeychaji. Le sukuʼunoʼob polacoʼoboʼ jach tu tsʼáaj u yóol u tsikbaltoʼob u Tʼaan Dios jeʼex tu tsʼáajil u yóoloʼob meyaj teʼ minaʼoboʼ. Yanoʼobeʼ suunajoʼob Polonia utiaʼal u tsikbaltikoʼob le jatsʼuts baʼaloʼob tu kanoʼob Franciaoʼ. Ichil le máaxoʼob suunajoʼob Poloniaoʼ tiaʼan Teofil Piaskowski, Szczepan Kosiak yéetel Jan Zabuda.

Le sukuʼunoʼob pʼáatoʼob Franciaoʼ seguernaj u tsikbaltikoʼob u Tʼaan Dios junmúuchʼ yéetel le sukuʼunoʼob yanoʼob Franciaoʼ. Tu añoil 1926, beetaʼab junpʼéel asamblea tu kaajil Sin-le-Noble, teʼeloʼ bin 1,000 u túulal polacoʼob yéetel 300 u túulal franciailoʼob. Le Yearbook (Anuario) jóoʼsaʼab tu añoil 1929, tu yaʼalaj: «Teʼ añoaʼ 332 sukuʼunoʼob polacoʼob tsʼoʼok u yokjaʼob utiaʼal u kʼubik u kuxtaloʼob tiʼ Dios». Táanil tiʼ u káajal le Segunda Guerra Mundialoʼ yaan 84 múuchʼuliloʼob tu luʼumil Francia, 32 tiʼ le múuchʼuliloʼobaʼ ku tʼanaʼal polacoiʼ.

Sukuʼunoʼob polacoʼob kajaʼanoʼob Francia táan u binoʼob asamblea. Le letrerooʼ ku yaʼalik: «U j-Jaajkunajoʼob Jéeoba».

Tu añoil 1947, u gobiernoil Poloniaeʼ tu invitartaj le polacoʼob binoʼob meyaj Francia utiaʼal ka suunakoʼob Poloniaoʼ, yaʼab túun tiʼ le sukuʼunoʼoboʼ suunajoʼob tu kaajaloʼob. Chéen baʼaleʼ úuchik u múul meyajoʼob yéetel le sukuʼunoʼob yanoʼob Franciaoʼ, teʼ año jeʼeloʼ maas yaʼabchaj le sukuʼunoʼoboʼ. Ichil le uláakʼ tres años máanoʼ seguernaj u maas yaʼabtaloʼob. Tu añoil 1948, u Betelil Franciaeʼ tu yéeyaj cinco u túulal superintendenteʼob tiʼ circuito utiaʼal ka xiʼik u yáantoʼob le máaxoʼob táan u káajal u meyajtikoʼob Jéeobaoʼ. Cuatro tiʼ le superintendenteʼobaʼ polacoʼob, ichiloʼobeʼ tiaʼan Antoine Skaleckiiʼ.

Le máakoʼob binoʼob meyaj Franciaoʼ jach tu tsʼáaj u yóoloʼob meyaj teʼ minaʼoboʼ, tsʼoʼoleʼ le ka tu kanoʼob u jaajil yoʼolal Dioseʼ jach tu tsʼáaj u yóol u kaʼansoʼob tiʼ u maasil. Úuchik u beetkoʼob beyoʼ, bejlaʼeʼ tsʼoʼok u yaʼabtal le sukuʼunoʼob polacoʼob yanoʼob Franciaoʼ. Teʼ kʼiinoʼobaʼ láayliʼ yaan máaxoʼob ku binoʼob meyaj Franciae yéetel tiʼ ku káajal u meyajtikoʼob Diosiʼ. Yaan tiʼ le sukuʼunoʼobaʼ tsʼoʼok u suutoʼob tu kaajaloʼob, uláakʼoʼobeʼ pʼaatloʼob Francia. Kex beyoʼ láayliʼ u tsʼaamaj u yóol u kaʼansoʼob u Tʼaan Dios jeʼex tu beetil le sukuʼunoʼob yáax kʼuchoʼob Franciaoʼ. (Le baʼaxoʼob k-líiʼsmaj tu luʼumil Franciaoʼ.)