Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Maʼ u xuʼulul a kʼaʼaytaj yéetel kiʼimak óolal

Maʼ u xuʼulul a kʼaʼaytaj yéetel kiʼimak óolal

TOʼONEʼ kʼubéentaʼantoʼon tumen Dios junpʼéel meyaj jach kʼaʼabéet u beetaʼal tiʼ tuláakal yóokʼol kaab: u kʼaʼaytaʼal le maʼalob péektsiloʼ. Chéen baʼaleʼ yaan horaeʼ kex j-kʼaʼaytajoʼon wa kex precursoroʼoneʼ yaan baʼax beetik u xuʼulul k-kʼaʼaytaj yéetel kiʼimak óolal.

¿Baʼax jeʼel u yáantkech utiaʼal maʼ u xuʼulul u kiʼimaktal a wóol teʼ kʼaʼaytajoʼ?

Yaan j-kʼaʼaytajoʼobeʼ ku lúubul u yóoloʼob tumen istikyaj u yantal máax yéetel u tsikbaloʼob teʼ kʼaʼaytajoʼ. Yaan horaeʼ mix máak kulaʼan tu yotoch tsʼoʼoleʼ wa kulaʼaneʼ maʼ uts tu tʼaan u yuʼubik baʼax ku yaʼalik le Bibliaoʼ wa hasta ku kʼuuxiloʼob. Uláakʼoʼobeʼ yaʼab u territorioʼob yéetel yaʼab máax kʼamik baʼax ku yaʼalik le Bibliaoʼ, le oʼolal ku tuklikoʼob mix bikʼin ken u láaj kʼaʼaytoʼob. Uláakʼ sukuʼunoʼob xaneʼ tsʼoʼok u lúubul u yóoloʼob tumen tsʼoʼok u yúuchtal joʼopʼok u kʼaʼaytajoʼob, pero maʼ taalak le xuʼulsajiloʼ.

Yaan horaeʼ tumen táan k-meyajtik Dioseʼ k-tuklikeʼ mix juntéen kun lúubul k-óol. Chéen baʼaleʼ unaj k-kʼaʼajsikeʼ le yóokʼol kaabaʼ táan u nuʼuktaʼal tumen Satanás. Le oʼolaleʼ maʼ chéen chʼaʼabil u kaʼansaʼal baʼax ku yaʼalik le Biblia tiʼ uláakʼ máakoʼoboʼ (1 Juan 5:19).

Kex jeʼel baʼaxak ka u beet u lúubul k-óol teʼ kʼaʼaytajoʼ maʼ u tuʼubultoʼoneʼ Jéeobaeʼ yaan u yáantkoʼon. ¿Baʼax jeʼel u yáantkoʼon utiaʼal maʼ u xuʼulul k-kʼaʼaytaj yéetel kiʼimak óolaleʼ? Koʼox ilik jujunpʼéel baʼaxoʼob jeʼel u páajtal k-beetkeʼ.

ÁANT LE TÚUMBEN J-KʼAʼAYTAJOʼOBOʼ

Cada añoeʼ u milesil sukuʼunoʼob ku yokjaʼob. Wa maʼ úuch okjaʼanakecheʼ, ¿máasaʼ jeʼel u kiʼimaktal a wóol wa ka áantaʼakech a maas maʼalobkíint a kʼaʼaytaj tumen juntúul sukuʼun úuch káajak u meyajtik Dioseʼ? Wa xan tsʼoʼok u yúuchtal joʼopʼok a kʼaʼaytajeʼ, ¿máasaʼ jach jeʼel u taasiktech utsil a wáantik juntúul j-kʼaʼaytaj túumbeneʼ?

Jesuseʼ u yojel kaʼacheʼ unaj u yáantik yéetel u kaʼansik u disipuloʼob utiaʼal ka kʼaʼaytajnakoʼob  tubeel (Luc. 8:1). Bejlaʼa xaneʼ yaʼab sukuʼunoʼob kʼaʼabéet áantajtiʼob utiaʼal u kaʼansajoʼob tubeel.

Juntúul túumben j-kʼaʼaytajeʼ maʼ ken u kan kaʼansaj chéen tumen yaʼab u jóokʼol kʼaʼaytaj. Kʼaʼabéet u kaʼansaʼal yéetel yaabilaj tumen juntúul máax úuch joʼopʼok u meyajtik Dios. Jeʼel u páajtal u kaʼansaʼaltiʼ 1) u líiʼsuba yéetel u ensayartik bix ken u káajs u tsikbal, 2) bix jeʼel u káajsik u tsikbal yéetel u yuumil naj wa yéetel máax ku yilik teʼ calleoʼ, 3) bix jeʼel u pʼatik le libroʼob wa revistaʼoboʼ, 4) bix jeʼel u beetik revisitaʼobeʼ yéetel 5) bix jeʼel u káajsik u tsʼáaik junpʼéel xookeʼ. Wa le túumben j-kʼaʼaytaj ku beetik le baʼax ku kaʼansaʼaltiʼoʼ, yaʼab utsiloʼob ken u kʼame (Luc. 6:40). Tsʼoʼoleʼ maʼ xan ken u chʼaʼ saajkil tumen u yojel yaan máax áantik wa ku kʼaʼabéettal. Jeʼex k-ilkoʼ yaʼab utsiloʼob ken u kʼam ikil u kaʼansaʼal yéetel u líiʼsaʼal u yóol (Ecl. 4:9, 10).

TSIKBALNEN YÉETEL LE MÁAX JOKʼAʼANECHOʼ

Kex a kʼáat tsikbal yéetel le máakoʼob teʼ kʼaʼaytajoʼ, yaan kʼiineʼ chéen yéetel a wéet j-kʼaʼaytaj kun béeytal a tsikbal. Kʼaʼajaktecheʼ Jesuseʼ tu túuxtaj u disipuloʼob kʼaʼaytaj «kaʼakaʼatúulil» (Luc. 10:1). Beyoʼ jeʼel kaʼach u paklan líiʼsik u yóoloʼobeʼ. Jeʼex k-ilkoʼ u jóokʼol kʼaʼaytaj máak kaʼakaʼatúulileʼ ku yáantaj utiaʼal «k-paklan líiʼsik k-óol» (Rom. 1:12).

¿Baʼax jeʼel a tsikbaltik yéetel a wéet kʼaʼaytajeʼ? Maʼ xaaneʼ jeʼel u páajtal a tsikbaltiktiʼ baʼax uchaʼantech teʼ kʼaʼaytajoʼ, baʼax jatsʼuts ta kanaj teʼ Adoración ich Familiaoʼ wa le táan a xakʼalxook ta juunaloʼ. Jeʼel xan u páajtal a tsikbaltiktiʼ junpʼéel baʼax jatsʼuts ta kanaj teʼ muchʼtáambaloʼ. Wa táan xan a kʼaʼaytaj yéetel máax maʼ suuk a jóokʼol tu yéeteleʼ kʼáattiʼ bix úuchik u kanik u jaajil, baʼaxten ku creertik tiaʼan ichil u jaajil religioneʼ, baʼax meyajiloʼob tsʼoʼok u beetik teʼ múuchʼuliloʼ yéetel baʼaxoʼob tsʼoʼok u yúuchultiʼ le táan u meyajtik Diosoʼ. Techeʼ jeʼel xan u páajtal a tsikbaltiktiʼ jujunpʼéel baʼaxoʼob uchaʼantech ichil a kuxtaleʼ. Kex wa k-uʼuyaʼal teʼ kʼaʼaytaj bey xan wa maʼoʼ, k-kʼaʼaytaj yéetel le sukuʼunoʼoboʼ jach jeʼel u líiʼsik k-óoleʼ (1 Tes. 5:11).

JÓOʼS TIEMPO UTIAʼAL A XOOK

Utiaʼal maʼ u xuʼulul a kʼaʼaytaj yéetel kiʼimak óolaleʼ, maʼalob ka suukak a xakʼalxook. «Le palitsil chúukaʼan u yóol yéetel yaan u naʼat[oʼ]» mantatsʼ táan u jóoʼsik jaatsoʼob ku tʼaanoʼob tiʼ jejeláas baʼaloʼob utiaʼal k-xakʼalte (Mat. 24:45). Maʼ xaaneʼ junpʼéel tiʼ le baʼaxoʼob jeʼel u páajtal a xakʼaltikoʼ letiʼ le kʼáatchiʼaʼ, ¿baʼaxten  jach kʼaʼabéet le kʼaʼaytajoʼ? Le cuadro yaan teʼ táan juʼun 16, ku kaʼansik jujunpʼéel baʼaloʼob utiaʼal k-ilik baʼaxten kʼaʼabéet le kʼaʼaytajoʼ.

K-xakʼaltik le baʼax ku yaʼalik le cuadrooʼ jeʼel u yáantkoʼon utiaʼal maʼ u xuʼulul k-kʼaʼaytaj yéetel kiʼimak óolaleʼ. Ken xakʼalxooknakecheʼ maʼalob ka a jóoʼs tiempo utiaʼal a tuukul tiʼ uláakʼ baʼax oʼolal jach kʼaʼabéet k-kʼaʼaytaj yéetel kaxt xan u tekstoiloʼob. Wa ka beetik beyoʼ maʼ kun lúubul a wóol teʼ kʼaʼaytajoʼ.

BEET BAʼAX KU KAʼANSIK U KAAJAL DIOS

U kaajal Dioseʼ mantatsʼ táan u kaʼansiktoʼon bix jeʼel k-maas maʼalobkíintik k-kʼaʼaytajeʼ. Toʼoneʼ jeʼel u páajtal k-kʼaʼaytaj joonaj joonajileʼ, yéetel cartaʼob, tiʼ teléfono, teʼ bejoʼoboʼ, teʼ tuʼux yaʼab u máan máakoʼ, teʼ negocioʼoboʼ wa k-kʼaʼaytaj xan kex maʼ le jokʼaʼanoʼon k-beetiʼ. Jeʼel u páajtal xan k-bin áantaj teʼ tuʼuxoʼob óoliʼ maʼatech u yúuchul kʼaʼaytajoʼ.

¿A kʼáat wa a kʼex bix a kʼaʼaytaj? ¿Baʼaxten maʼ ta tsʼáaik a wóol a beete? Yaʼab sukuʼunoʼobeʼ tsʼoʼok u tsʼáaik u yóol u beetoʼob yéetel yaʼab utsiloʼob tsʼoʼok u kʼamkoʼob. Koʼox ilik bix tsʼoʼok u kʼaʼaytaj jujuntúul sukuʼunoʼob.

Juntúul kiik ku kʼaabaʼtik Aprileʼ, tu yilaj u káajsik xookoʼob jeʼex u yaʼalik le K-meeyjil tiʼ le Reinooʼ. Letiʼeʼ tu kʼáataj tiʼ óoxtúul koʼoleloʼob u yéet meyaj wa jeʼel u xookoʼobeʼ. Le kiikoʼ jaʼakʼ u yóol tumen tu yóoxtúulal tu yóotoʼob xook yéetel ka tsʼoʼokeʼ káaj u binoʼob muchʼtáambal.

Uláakʼ bix tsʼoʼok u yaʼalik u kaajal Dios ka kʼaʼaytajnakoʼoneʼ, letiʼe ka k-kaxt máaxoʼob jatsʼuts u yilik u xokikoʼob jujunpʼéel jaatsoʼob ku jóokʼol teʼ revistaʼoboʼ. Juntúul superintendente tiʼ circuito estados unidosileʼ, meyajnajtiʼ junpʼéel  jaats tiʼ le ¡Despertad! ku tʼaan tiʼ le llantaʼob utiaʼal u kʼaʼaytaj teʼ tuʼux ku koʼonol refaccionoʼoboʼ. Uláakʼ juntéenjeakeʼ tiʼ letiʼ yéetel u yataneʼ meyajnajtiʼob le jaats «Los retos del médico de hoy» utiaʼal u kʼaʼaytajoʼob tiʼ maas tiʼ cien consultoriʼob. Le sukuʼunoʼ ku yaʼalik: «Ikil k-xíimbaltik le máakoʼob beyaʼ tsʼoʼok u kʼaj óoltikoʼonoʼob yéetel tsʼoʼok u kʼaj óoltikoʼob xan le publicacionoʼob ku meyajtoʼonoʼ. Desde ken yáax tsikbalnakoʼon yéetel le máakoʼoboʼ maas chéen chʼaʼabil k-kaʼa suut k-xíimbaltoʼob».

Juntúul kiik ku kʼaabaʼtik Judyeʼ tsʼíibnaj teʼ tuʼux ku nuʼuktaʼal le meyaj ku beetik le j-Jaajkunajoʼoboʼ. Le kiikaʼ tu tsʼáaj u diosboʼotikil yoʼolal le bix tsʼoʼok u yaʼalik u kaajal Jéeoba ka kʼaʼaytajnakoʼon tiʼ telefonooʼ. Kex u maama yaan 86 años tiʼ yéetel kʼojaʼaneʼ jach ku kiʼimaktal kaʼach u yóol tumen ku páajtal u kʼaʼaytaj tiʼ teléfono. Tsʼoʼoleʼ káaj tak u tsʼáaik xook tiʼ juntúul koʼolel yaan 92 años tiʼ.

Le baʼaxoʼob tsʼoʼok u jóoʼsik u kaajal Jéeoba utiaʼal k-maas maʼalobkíintik bix k-kʼaʼaytajoʼ jach jeʼel u yáantajeʼ, le oʼolaleʼ unaj k-ilik u meyajtoʼon. Wa k-beetik beyoʼ yaan u béeytal k-kʼaʼaytaj mantatsʼ yéetel kiʼimak óolal.

TUKULT BAʼAX JEʼEL U PÁAJTAL A BEETKEʼ

Yaan máaxeʼ ku pʼatik yaʼab libroʼob wa revistaʼob, yaʼab u xookoʼob yaan, yéetel yaʼab máaxoʼob tsʼoʼok u yáantik okol ichil u kaajal Jéeoba, pero lelaʼ maʼ chéen letiʼe baʼax kʼaʼabéet u beetik máax meyajtik Diosoʼ. Tuukulnen tiʼ lelaʼ: tu kʼiiniloʼob le Diluviooʼ chéen Noé yéetel u paalal tu salvartuba, ¿u kʼáat wa túun u yaʼaleʼ maʼ maʼalob bix úuchik u kʼaʼaytajiʼ? Maʼatech. Kʼaʼajaktoʼoneʼ le baʼax maas kʼaʼabéetoʼ letiʼe u chúukpajal u yóol máakoʼ yéetel u beetik le baʼax kʼubéentaʼantiʼ tumen Jéeobaoʼ (1 Cor. 4:2).

Yaʼab j-kʼaʼaytajoʼobeʼ tsʼoʼok u tsʼáaikoʼob cuentaeʼ u chʼaʼtuklik u beetkoʼob uláakʼ túumben baʼaloʼob teʼ kʼaʼaytajoʼ ku yáantaj utiaʼal maʼ u lúubul u yóoloʼob. ¿Baʼax jeʼel u páajtal u chʼaʼtuklik máak u beetkeʼ? Le cuadro yaan teʼ táan juʼunaʼ, ku yaʼalik jujunpʼéel baʼaloʼob jeʼel u páajtal u beetaʼaleʼ.

Kʼáat u yáantaj Jéeoba utiaʼal u kiʼimaktal a wóol teʼ kʼaʼaytajoʼ yéetel utiaʼal u maas maʼalobtal a kaʼansaj. Ken béeyak a beetik le baʼax ta chʼaʼtukloʼ maʼalob ken a wuʼuyilaba tumen a wojel letiʼe baʼax unaj a beetkoʼ. Pero maas yaan u kiʼimaktal a wóol tumen a wojel táan a tsʼáaik a wóol a maas kʼaʼayt le baʼax ku yaʼalik le Bibliaoʼ.

U jaajileʼ maʼ chéen chʼaʼabil u kʼaʼaytaj máakiʼ. Chéen baʼaleʼ jeʼex tsʼoʼok k-ilkoʼ yaan baʼaloʼob jeʼel u páajtal k-beetik utiaʼal maʼ u xuʼulul k-kʼaʼaytaj yéetel kiʼimak óolaleʼ. Jeʼex tsʼoʼok k-ilkoʼ jeʼel u yáantkoʼon k-tsikbal yéetel le máax jokʼaʼanoʼon kʼaʼaytajoʼ, k-jóoʼsik tiempo utiaʼal k-xook, k-kaʼansaj jeʼex u yaʼalik le palitsil chúukaʼan u yóol yéetel yaan u naʼatoʼ bey xan k-chʼaʼtuklik baʼax jeʼel u páajtal k-beetkeʼ. Maʼ u tuʼubultoʼoneʼ Jéeobaeʼ u kʼubéentmajtoʼon ka k-kʼaʼayt le maʼalob péektsiloʼ tumen u j-Jaajkunajoʼon (Isa. 43:10). Le beetkeʼ, ¡maʼ u xuʼulul k-kʼaʼaytaj yéetel kiʼimak óolal!