Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Yéetel kiʼimak óolal binoʼob áantaj Taiwán

Yéetel kiʼimak óolal binoʼob áantaj Taiwán

TAK walajki cinco jaʼaboʼobaʼ, Choong Keon yéetel Julie, u yataneʼ, táan u beetik u precursoriloʼob Sydney (Australia). Letiʼobeʼ yaan kex 35 jaʼaboʼob tiʼob. Choong Keoneʼ ku yaʼalik: «Chéen chúumuk semana k-meyaj kaʼachi, tsʼoʼoleʼ maʼalob bix kuxlikoʼon. Teʼ tuʼux kajaʼanoʼon kaʼachoʼ jach maʼalob le climaoʼ yéetel tranquilo. Naatsʼ yaniloʼon xan tiʼ k-familia bey xan tiʼ k-amigoʼob. Leloʼ jach uts t-tʼaan». Kex beyoʼ Choong Keon yéetel Julieeʼ ku yuʼubikoʼob kaʼach bey maʼ jach kiʼimak u yóoloʼobeʼ. ¿Baʼaxten? Tumen u yojloʼob jeʼel u páajtal u maas meyajtikoʼob Jéeobaeʼ, baʼaleʼ mix baʼal ku beetkoʼob utiaʼal u kʼexkoʼob bix u kuxtaloʼob.

Tiʼ junpʼéel asamblea anchaj tu jaʼabil 2009, Choong Keon yéetel Julieeʼ tu yuʼuboʼob junpʼéel tsoltʼaan kʼuch tu puksiʼikʼaloʼob. Le sukuʼun máans le tsoltʼaanoʼ táan kaʼach u tʼaan tiʼ le máaxoʼob u kʼáat u maas meyajtoʼob Jéeobaoʼ. Letiʼeʼ tu yaʼalaj: «Junpʼéel camioneʼ chéen jeʼel u páajtal a bisik ta x-tsʼíik wa ta x-noʼoj wa tsʼoʼok u káajal u bineʼ. Bey xan u yúuchul t-éeteloʼ, Jesuseʼ chéen jeʼel u nuʼuktikoʼon yéetel u yáantkoʼon k-maas meyajt Dios wa ku yilik táan k-tsʼáaik k-óol utiaʼal ka béeychajak le baʼax k-chʼaʼtukultmaj k-beetkoʼ». * Choong Keon yéetel Julieeʼ tu yuʼuboʼob bey tiʼ letiʼob ku yaʼalaʼaleʼ. Teʼ asambleaoʼ entrevistartaʼab xan juntúul sukuʼun yéetel u yatan misioneroʼob tu luʼumil Taiwán. Letiʼobeʼ tu yaʼaloʼobeʼ kiʼimak u yóoloʼob ikil u kʼaʼaytajoʼob yéetel tu yaʼaloʼobeʼ láayliʼ yaʼab máaxoʼob kʼaʼabéet u yáantaʼaloʼobeʼ. Choong Keon yéetel Julieeʼ tu kaʼa uʼuyoʼob bey tiʼ letiʼob aʼalaʼabeʼ.

Julieeʼ ku yaʼalik: «Ka tsʼoʼok le asambleaoʼ t-kʼáataj tiʼ Jéeoba ka u yáantoʼon utiaʼal maʼ k-chʼaʼik saajkil k-bin áantaj Taiwán». Ku yaʼalik xan: «Kex beyoʼ, láayliʼ saajkoʼon kaʼacheʼ. Le baʼax k-tuklik k-beetkoʼ bey jeʼex ka a pulaba tiʼ junpʼéel piscina jach taam tuʼux mix juntéen a pulabaeʼ». Junpʼéel teksto áant le sukuʼunoʼob utiaʼal u binoʼoboʼ Eclesiastés 11:4, le tekstoaʼ ku yaʼalik: «Máax táan óoltik bix u yustaj iikʼeʼ  maʼ bíin paakʼalnakiʼ, máax xan paktik múuyaleʼ maʼ bíin joochnakiʼ». Choong Keoneʼ ku yaʼalik: «Tu lugar k-kutal k-il baʼax kun úuchleʼ, t-chʼaʼtuklaj k-káajsik ‹k-paakʼal yéetel k-jooch›». ¿Baʼax tu beetaj le sukuʼunoʼobaʼ? Tu sen kʼáatoʼob u yáantaj Jéeoba, tu xokoʼob u experiencia jujuntúul misioneroʼob, tu sen túuxtoʼob correoʼob tiʼ jujuntúul sukuʼunoʼob táan u yáantajoʼob Taiwán, tu konoʼob u cocheʼob yéetel u nuʼukuloʼob. Tres meses tsʼoʼokok le asambleaoʼ, binoʼob Taiwán.

TU YILOʼOB U JATSʼUTSIL LE KʼAʼAYTAJOʼ

Bejlaʼeʼ tu luʼumil Taiwaneʼ yaan maas tiʼ cien sukuʼunoʼob táanxel luʼumiloʼob táan u kʼaʼaytajoʼob tuʼux maas kʼaʼabéet áantaj. Tiʼ le sukuʼunoʼobaʼ yaan kex 21 tak 73 jaʼaboʼob yéetel tiʼ u taaloʼob tiʼ jejeláas luʼumiloʼob jeʼex Australia, Canadá, Corea, España, Estados Unidos, Francia, Gran Bretaña yéetel Japón. Ichiloʼobeʼ yaan maas tiʼ cincuenta kiikoʼob maʼ tsʼokaʼan u beeloʼobiʼ. Koʼox ilik baʼax áant tuláakal le sukuʼunoʼob utiaʼal u binoʼob kʼaʼaytaj táanxel luʼumoʼ.

Laura

Laura, juntúul precursora maʼ tsʼokaʼan u beel, canadaileʼ, tiʼ ku yáantaj tu chikʼinil Taiwaneʼ. Walajki diez jaʼaboʼobaʼ letiʼeʼ maʼ jach jatsʼuts u yilik le kʼaʼaytajoʼ. Letiʼeʼ ku yaʼalik: «U jaajileʼ maʼatech in jach jóokʼol kaʼach kʼaʼaytaj, le oʼolaleʼ maʼ jach jatsʼuts in wilkiʼ». Baʼaleʼ invitartaʼab tumen jujuntúul sukuʼunoʼob canadailoʼob jach ku biskubaʼob tu yéetel utiaʼal ka xiʼikoʼob kʼaʼaytaj junpʼéel mes tu luʼumil México. Lauraeʼ ku yaʼalik: «Lelaʼ letiʼe yáax juntéen ka tin máansaj yaʼab tiempo táan in kʼaʼaytajoʼ, yéetel jach jatsʼuts tin wilil».

Tumen jatsʼuts tu yilil úuchik u kʼaʼaytajeʼ, le ka suunaj Laura Canadaeʼ tu chʼaʼtuklaj u kʼexikuba tiʼ junpʼéel múuchʼulil tuʼux ku tʼaʼanal yaanal idioma. Letiʼeʼ bin tiʼ junpʼéel curso ich chino, ka pʼáat junpʼéel tiempo tiʼ junpʼéel grupo ich chino. Tsʼoʼoleʼ tu chʼaʼtuklaj u bin áantaj Taiwán. Tu mesil septiembre tiʼ 2008, béeychaj le baʼax tu chʼaʼtukloʼ. Lauraeʼ ku yaʼalik: «Máan óoliʼ junpʼéel jaʼab tak ka suukchajen teʼ tuʼux binen áantajoʼ. Baʼaleʼ bejlaʼeʼ mix tu máan tin tuukul in suut Canadá». ¿Bix u yilik le kʼaʼaytaj bejlaʼoʼ? Letiʼeʼ ku yaʼalik: «Jach jatsʼuts in wilik. Ken a wil bix u kʼexik u kuxtal le máakoʼob jeʼex u bin u maas kʼaj óoltikoʼob  Jéeobaoʼ, ¡ku yantaltech junpʼéel kiʼimak óolal maʼ tu páajtal u keʼetel yéetel mix baʼal! Way Taiwaneʼ yaʼab u téenel tsʼoʼok in wuʼuyikinba beyaʼ».

U KANIK MÁAK ULÁAKʼ IDIOMA

Brian yéetel Michelle

Brian yéetel Michelle, u yataneʼ, óoliʼ treinticinco jaʼaboʼob yaantiʼob. Letiʼobeʼ kajaʼanoʼob kaʼach Estados Unidos yéetel tsʼoʼok óoliʼ ocho jaʼaboʼob xiʼikoʼob Taiwán. Tu káajbaleʼ tu yuʼuboʼob maʼ tu páajtal u jach áantajoʼob teʼ kʼaʼaytajoʼ. Baʼaleʼ juntúul sukuʼun úuch joʼopʼok u beetik u misioneroileʼ tu yaʼalajtiʼob: «Kʼaʼajakteʼexeʼ kex chéen junpʼéel tratado ka pʼateʼexeʼ, maʼ xaaneʼ u yuumil najeʼ yáax u yuʼubik u yúuchul tʼaan tiʼ Jéeobaoʼ. Le oʼolaleʼ le baʼax ka beetkeʼexoʼ ¡sen maʼalob!». Le baʼax aʼalaʼab tiʼ Brian yéetel Michelleaʼ, le áantoʼob utiaʼal maʼ u lúubul u yóoloʼob. Uláakʼ juntúul sukuʼuneʼ tu yaʼalajtiʼob: «Wa maʼ a kʼáateʼex ka lúubuk a wóoleʼexeʼ, maʼ sáamsamal unaj a wilkeʼex wa táan a kankeʼex chinoiʼ, baʼaxeʼ cada ken yanak asamblea». Brian yéetel Michelleeʼ bey tu beetiloʼoboʼ, bejlaʼeʼ jach maʼalob bix u yáantajoʼob.

¿Baʼax jeʼel u yáantkech a kan junpʼéel idiomaeʼ? Maʼalob ka xiʼikech a xíimbalt le luʼum tuʼux taak a bin áantajoʼ. Ilawil a bin teʼ muchʼtáambaloʼoboʼ, máans tiempo yéetel le sukuʼunoʼoboʼ yéetel láakʼintoʼob teʼ kʼaʼaytajoʼ. Brianeʼ ku yaʼalik: «Ken a wil jach yaʼab máaxoʼob u kʼáatoʼob kaanbal tiʼ u Reino Dios bey xan le yaabilaj ku yeʼesik le sukuʼunoʼoboʼ yaan u taaktal a suut áantajiʼ».

¿BIX U KAXTIK U KUXTALOʼOB?

Kristin yéetel Michelle

Jujuntúul precursoroʼob táan u yáantajoʼob Taiwaneʼ utiaʼal u náajaloʼobeʼ ku kaʼanskoʼob inglés. Kristin juntúul sukuʼun, yéetel Michelle, u yataneʼ, ku konkoʼob kay. Kristineʼ ku yaʼalik: «Mix juntéen in beet kaʼach le meyajaʼ, baʼaleʼ lelaʼ ku yáantken utiaʼal in pʼáatal áantaj wayeʼ». Ka máan kʼiineʼ anchaj máakoʼob suukchaj u maanoʼob tiʼ. Kristineʼ chéen wa jaypʼéel horaʼob ku meyaj utiaʼal u náajaltik le bukaʼaj kʼaʼabéettiʼoʼ, beyoʼ ku maas tsʼáaik u yóoloʼob teʼ meyaj bin u beetoʼoboʼ: u beetik u precursoriloʼob utiaʼal u ‹chukikoʼob wíinikoʼob›.

«ILAWIL U KIʼIMAKTAL A WÓOL»

William yéetel Jennifer, kajaʼanoʼob kaʼach Estados Unidoseʼ, tsʼoʼok siete jaʼaboʼob xiʼikoʼob Taiwán. Williameʼ ku yaʼalik: «U kanik máak junpʼéel idioma, u beetik u precursoril, u kanáantik le múuchʼulil yéetel u meyajeʼ jeʼel u beetik u jach kaʼanal máakeʼ». Le sukuʼunoʼobaʼ, kex yaʼab meyaj ku beetkoʼobeʼ, ¿baʼax áantkoʼob utiaʼal ka kiʼimakchajak u yóoloʼob? Letiʼe u chʼaʼtuklikoʼob baʼaloʼob jeʼel u páajtal u beetkoʼoboʼ. Jeʼex u tsʼáaikoʼob tu tuukuloʼob maʼ séebaʼan ken u jáan kaniloʼob le idioma chinooʼ. Beyoʼ maʼ kun lúubul u yóoloʼob wa ku yuʼubikoʼob bey maʼ táan u kaanbaloʼobeʼ.

William yéetel Jennifer

Williameʼ ku kʼaʼajsikeʼ juntúul superintendenteeʼ, tu yaʼalajtiʼ: «Ilawil u kiʼimaktal a wóol le táan a kaanbaloʼ». Le sukuʼunaʼ tu yóotaj u yaʼaleʼ le ken k-chʼaʼtukult k-beetik wa baʼax utiaʼal k-meyajtik Dioseʼ kʼaʼabéet k-beetik yéetel kiʼimak óolal tak ken k-tsʼoʼokse. Williameʼ ku yaʼalikeʼ le baʼax aʼalaʼabtiʼobaʼ tu yáantoʼob utiaʼal u suuktaloʼob teʼ tuʼux binoʼoboʼ, utiaʼal u beetkoʼob le baʼax ku yaʼalaʼaltiʼob tumen le sukuʼunoʼob yanoʼob teʼ múuchʼuliloʼ, yéetel ka u kʼexoʼob bix u beetkoʼob wa baʼax, beyoʼ jeʼel u maas áantajoʼobeʼ. Williameʼ ku yaʼalik xan: «Le baʼax tu yaʼalajtoʼon le sukuʼunaʼ tu yáantoʼon xan ka k-jóoʼs tiempo utiaʼal k-ilik le baʼaloʼob jatsʼutstak yaan teʼ islaoʼ».

Megan, juntúul precursora maʼ tsʼokaʼan u beel estados unidosileʼ, táan u tsʼáaik u yóol utiaʼal u maas maʼalobtal u tʼaan ich chino. Jeʼex William yéetel Jennifereʼ, letiʼeʼ ku yilik ‹u kiʼimaktal u yóol le táan u kaanbaloʼ›. Utiaʼal sábado yéetel domingoeʼ ku bin yéetel u jaats sukuʼunoʼob kʼaʼaytaj tiʼ junpʼéel territorio jach jatsʼuts: u puertoil Kaohsiung, le maas nojoch yaan Taiwanoʼ. Meganeʼ tsʼoʼok u kʼaʼaytaj tiʼ yaʼab j-chuk kayoʼob tiaʼanoʼob tu barcoʼobeʼ. Le j-chuk kayoʼobaʼ ku taaloʼob  tiʼ Bangladés, Filipinas, India, Indonesia, Tailandia yéetel Vanuatu. Meganeʼ ku yaʼalik: «Le j-chuk kayoʼobaʼ maʼ tu xáantaloʼob teʼ puertooʼ. Le oʼolaleʼ u taatsʼ k-ilik xook tu yéeteloʼob. Utiaʼal u páajtal u láaj xookoʼobeʼ, yaan horaeʼ ku yantal in muchʼik cuatro wa cinco máakoʼob». ¿Bix túun u bin u kaanbal Megan? Letiʼeʼ ku yaʼalik: «Loʼobaleʼ in kʼáat séeb kaanbal, baʼaleʼ mantatsʼ kin kʼaʼajsik le baʼax tu yaʼalajten juntúul sukuʼun juntéenjeakiloʼ: ‹Wa ka beetik baʼax ku páajtaleʼ, Jéeobaeʼ jeʼel u beetik a kaanbaleʼ›».

Megan

ÁANTAJNAJ TÁANXEL TUʼUX

Cathy, juntúul kiik maʼ tsʼokaʼan u beel gran bretañaileʼ, táanil tiʼ u bin táanxel luʼumileʼ, tu kʼáataj máakalmáak maʼ jach sajbeʼentsil utiaʼal juntúul kiik maʼ tsʼokaʼan u beeliʼ. Ka tsʼoʼok u payalchiʼ tiʼ Jéeobaeʼ, tsʼíibnaj tiʼ jujunpʼéel u najiloʼob Betel utiaʼal u kʼáatik wa maʼ jach sajbeʼentsil le kuxtal teʼ luʼumiloʼob utiaʼal ka xiʼikoʼ. Letiʼeʼ tu xakʼaltaj tuláakal le baʼaxoʼob aʼalaʼabtiʼoʼ, ka tu chʼaʼtuklaj u bin Taiwán.

Tu jaʼabil 2004, le yaan 31 jaʼaboʼob tiʼoʼ, bin Taiwán. Teʼeloʼ tsʼoʼok u kanik kuxtal chéen yéetel junpʼíit baʼal. Letiʼeʼ ku yaʼalik: «Tin kʼáataj tiʼ le sukuʼunoʼob tuʼux jeʼel u páajtal in manik frutaʼob yéetel verduraʼob maʼ sen koʼojtakiʼ. Lelaʼ tu yáanten utiaʼal in kanáantik le taakʼin in líiʼsmoʼ». ¿Baʼax áantik utiaʼal u kuxtal chéen yéetel baʼax kʼaʼabéettiʼ? Cathyeʼ ku yaʼalik: «Kin kʼáatik tiʼ Jéeoba ka kiʼimakchajak in wóol yéetel baʼax kin jaantik kex maʼ sen koʼojiʼ, bey xan yéetel in nookʼ kin manik kex barato. Jéeobaeʼ tsʼoʼok u yuʼubik in payalchiʼob. Tsʼoʼok u yáantken in wil baʼax maas kʼaʼabéetten yéetel u kiʼimaktal in wóol kex minaʼanten tuláakal le baʼax in kʼáatoʼ». Cathyeʼ ku yaʼalik xan: «Kiʼimak in wóol yéetel le kuxtal yaantenaʼ tumen ku yáantken in maas tsʼáa in wóol in meyajt Jéeoba».

Cathy

U kuxtal Cathy chéen yéetel baʼaxoʼob kʼaʼabéettiʼeʼ maʼ u kʼáat u yaʼal wa maʼ kiʼimak u yóoliʼ. Letiʼeʼ ku yaʼalik: «Wayeʼ yaʼab máax kʼamik le maʼalob péektsiloʼ. ¡Leloʼ jach jatsʼuts!». Teʼ kaaj tuʼux yáax kʼuch Cathy áantaj bey precursoraoʼ chéen kaʼapʼéel múuchʼulil ich chino yaan kaʼachiʼ; bejlaʼeʼ yaan sieteiʼ. Cathyeʼ ku yaʼalik: «In wilik bix tsʼoʼok u yaʼabtal le múuchʼuliloʼob yéetel in wáantaj teʼ meyajaʼ ku beetik u kiʼimaktal in wóol sáamsamal».

«¡JACH KʼAʼABÉET LE MEYAJ KIN BEETKOʼ!»

¿Bix tsʼoʼok u bin tiʼ Choong Keon yéetel Julie, le máaxoʼob tiʼ yáax tʼaanajoʼonoʼ? Tu káajbaleʼ, Choong Keoneʼ ku tuklikeʼ maʼ tu páajtal u jach áantaj teʼ múuchʼuliloʼ tumen maʼ jach u yojel chinoiʼ. Baʼaleʼ le sukuʼunoʼob teʼ múuchʼuliloʼ maʼ bey u tuukuloʼob kaʼachiʼ. Letiʼeʼ ku yaʼalik: «Le ka jaʼats k-múuchʼulileʼ, tsʼaʼabten uláakʼ meyajoʼob le táan in meyaj bey siervo ministerialoʼ. Teʼ tin wuʼuyaj jach táan in wáantaj tuʼux maas kʼaʼabéetoʼ». Yéetel kiʼimak óolaleʼ ku yaʼalik xan: «¡Tu líiʼsaj in wóol in wilik tak teen jeʼel u páajtal in wáantajeʼ yéetel kʼaʼabéet le meyaj kin beetkoʼ!». Bejlaʼeʼ Choong Keoneʼ anciano. Julie xaneʼ ku yaʼalik: «Mix juntéen kaʼach k-uʼuy le kiʼimak óolal yaantoʼon ikil k-meyaj utiaʼal k-áantik u maasiloʼ. Taaloʼon áantaj, baʼaleʼ k-ilkeʼ toʼon áantaʼaboʼon. Jach jatsʼuts le baʼaxoʼob tsʼoʼok k-ilik ichil k-kuxtalaʼ. ¡K-tsʼáaik nib óolal tiʼ Jéeoba ikil u chaʼik k-áantaj wayeʼ!».

¿Taʼaytak wa a tsʼoʼoksik a xook yéetel maʼ a wojel baʼax ken a beetiʼ? Beora maʼ tsʼokaʼan a beelaʼ, ¿a kʼáat wa maas áantaj ichil u kaajal Jéeoba? ¿A kʼáat wa ka yanak ichil a familia le kiʼimak óolal ku taasik u meyajtaʼal Jéeobaoʼ? ¿Tsʼoʼok wa a jubilartaʼal yéetel a kʼáat a wáant u maasil yéetel le baʼaxoʼob tsʼoʼok a kanik ichil a kuxtaloʼ? Yaʼab tuʼux kʼaʼabéet áantaj utiaʼal u kʼaʼaytaʼal le maʼalob péektsiloʼ. Maʼ a sen tuklik, wa ka chʼaʼtuklik a maas meyajtik Jéeoba yéetel ka bin áantaj táanxel tuʼuxeʼ, yaan a kʼamik yaʼab utsiloʼob.

^ xóot’ol 3 Ilawil le libro “Testimonio cabal” del Reino de Dios, xookil 16, xóotʼol 5 yéetel 6.