Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Yéetel kiʼimak óolal binoʼob áantaj Micronesia

Yéetel kiʼimak óolal binoʼob áantaj Micronesia

KATHERINE, kajaʼan kaʼach Estados Unidoseʼ, 16 jaʼaboʼob yaantiʼ ka okjaʼanaji. Letiʼeʼ jach tu tsʼáaj u yóol kʼaʼaytaj, baʼaleʼ teʼ tuʼux ku kʼaʼaytajoʼ óoliʼ mix máak kʼamik u maʼalob péektsilil le Reinooʼ. Letiʼeʼ ku yaʼalik: «Teʼ jóoʼsaʼaniloʼoboʼ kin xokik kaʼach experienciaʼob tu yoʼolal máaxoʼob ku payalchiʼob utiaʼal ka túuxtaʼak wa máax áantkoʼob u kʼaj óoltoʼob Dios. Teneʼ kin tsʼíiboltik in wáantik juntúul máax beyaʼ, baʼaleʼ mix juntéen béeychaj in beetik».

Katherineeʼ máan yaʼab jaʼaboʼob táan u kʼaʼaytaj teʼ tuʼux kajaʼanoʼ, baʼaleʼ joʼopʼ u tuklik wa jeʼel u páajtal u bin áantaj tuʼux maas jeʼel u kʼaʼamal le maʼalob péektsiloʼ. Baʼaleʼ yaan baʼax ku tuklik kaʼachi. Chéen juntéen tsʼoʼok u náachtal tiʼ u láakʼtsiloʼob yéetel le ka tu beeteʼ sáamsamal ku sen tuklikoʼob. ¡Tsʼoʼoleʼ chéen kaʼapʼéel semanaʼob bini! Baʼaleʼ beoraaʼ, ¿jeʼel wa ta tʼaan u páajtal u náachtal tiʼ u láakʼtsiloʼobeʼ? Tumen jach ku tsʼíiboltik u yáantaj táanxel tuʼuxeʼ, tu chʼaʼtuklaj u bin. Ka tsʼoʼok u yilik tuʼuxoʼob maas kʼaʼabéet áantajeʼ, tsʼíibnaj tiʼ u najil Betel yaan tu islail Guam, tsʼoʼoleʼ aʼalaʼabtiʼ tuʼux jeʼel u páajtal u bineʼ. Tu mesil julio tiʼ 2007, le yaan 26 jaʼaboʼob tiʼoʼ, bin Saipán. Lelaʼ junpʼéel isla yaan teʼ Pacificooʼ, kex 2,500 leguas (10,000 kilómetros) náachil tiʼ u yotoch. ¿Bix úuchik u bin tiʼ?

KU NÚUKAʼAL KAʼAPʼÉEL PAYALCHIʼ

Maʼ úuch kʼuchuk teʼ túumben múuchʼuliloʼ Katherineeʼ káaj u tsʼáaik xook tiʼ Doris, juntúul koʼolel yaan kex 45 jaʼaboʼob tiʼ. Le ka tsʼoʼok u xokikoʼob u yóoxpʼéel xookil le libro ¿Baʼax ku kaʼansik le Bibliaoʼ?, Katherineeʼ joʼopʼ u tuklik junpʼéel baʼal. Letiʼeʼ ku yaʼalik: «Doriseʼ jach maʼalob u bin u kaanbal kaʼachi le oʼolal teneʼ saajken maʼ in kaʼansik maʼalob. Mix juntéen xáanchajak táan in tsʼáaik xook tiʼ wa máax yéetel kin tuklik kaʼacheʼ maas maʼalob ka tsʼaʼabak xook tiʼ tumen juntúul kiik maas u yojel kaʼansaj yéetel u yéet jaʼabil». Yoʼolal lelaʼ Katherineeʼ tu kʼáataj tiʼ Jéeoba ka áantaʼak u kaxt juntúul kiik tsʼáaik xook tiʼ Doris. Ka tsʼoʼokeʼ tu tuklaj u yaʼalik tiʼ Doris baʼax ken u beete.

Katherineeʼ ku yaʼalik: «Táanil tiʼ in waʼalik tiʼ Doriseʼ, letiʼeʼ tu yaʼalajten yaan baʼax taak u tsikbaltikten. Tin jach chʼenxikintaj baʼax ku tuklik, tsʼoʼoleʼ ka tin waʼalajtiʼ bix tu yáantilen Jéeoba ka úuchten junpʼéel baʼal chíikaʼan tiʼ le baʼax ku yúuchultiʼoʼ». Doriseʼ tu tsʼáaj u diosboʼotikil tiʼ Katherine, tu yaʼalajtiʼ: «Jéeoba túuxtech. Le kʼiin ka yáax tʼaanajech tin wéeteloʼ máan yaʼab horaʼob táan in xokik le Bibliaoʼ. Táan kaʼach in  wokʼol yéetel táan in kʼáatik tiʼ Dios ka u túuxt wa máax áantken in naʼat baʼax ku yaʼalik le Bibliaoʼ. Maʼ sáam tiʼ leloʼ, tʼaanajech tin wotoch. ¡Tu yuʼubaj Jéeoba in payalchiʼ!». Katherineeʼ ku yáalal u jaʼil u yich ken u kʼaʼajs le baʼax úuchaʼ. Letiʼeʼ ku yaʼalik: «Le baʼax tu yaʼalaj Dorisoʼ letiʼe baʼax úuch joʼopʼok in kʼáatik tiʼ Jéeobaoʼ, Jéeobaeʼ tu yáanten in wileʼ jeʼel u páajtal u seguer in kaʼansikeʼ».

Doriseʼ okjaʼanaj tu jaʼabil 2010, bejlaʼeʼ táan u tsʼáaik xook tiʼ yaʼab máakoʼob. Katherineeʼ ku yaʼalik: «¡Jach kiʼimak in wóol tumen le baʼax úuch joʼopʼok in tsʼíiboltikoʼ tsʼoʼok u béeytal!». Bejlaʼeʼ Katherineeʼ kiʼimak u yóol, táan u beetik u precursora especialil tu islail Kosrae, lelaʼ tiaʼan teʼ Pacificooʼ.

ÓOXPʼÉEL BAʼAX KU YÚUCHUL, ¿BIX JEʼEL U AKTÁANTAʼALEʼ?

Maas tiʼ cien sukuʼunoʼob yéetel kiikoʼob yaan kex 19 tak 79 jaʼaboʼob tiʼobeʼ, tsʼoʼok u binoʼob áantaj tu luʼumil Micronesia. Ericaeʼ 19 jaʼaboʼob yaantiʼ ka bin tu islail Guam tu jaʼabil 2006. Letiʼeʼ ku yaʼalik bix u yuʼubikuba le precursoroʼob ku binoʼob áantajoʼ: «Ken xiʼik juntúul precursor áantaj tuʼux yaan máaxoʼob taak u kaanbaloʼobeʼ, jach ku kiʼimaktal u yóol. Kin tsʼáaik yaʼab nib óolal tiʼ Jéeoba ikil u chaʼik in wáantaj beyaʼ. ¡Minaʼan uláakʼ baʼal jeʼex lelaʼ!». Bejlaʼeʼ Ericaeʼ kiʼimak u yóol yéetel táan u beetik u precursora especialil tu islail Ebeye (Islas Marshall). U jaajileʼ u bin máak áantaj táanxel luʼumileʼ maʼ chéen chʼaʼabiliʼ. Koʼox ilik óoxpʼéel baʼax ku talamtal tiʼ máak yéetel bix úuchik u aktáantik le sukuʼunoʼob tsʼoʼok u binoʼob áantaj Micronesiaoʼ.

Erica

U kuxtal máak chéen yéetel junpʼíit baʼal. Simon, 22 jaʼaboʼob yaantiʼeʼ, bin áantaj Palaos tu jaʼabil 2007. Ka kʼuch teʼeloʼ tu tsʼáaj cuentaeʼ le bukaʼaj ken u náajaltoʼ chéen jun chan pʼíit tiʼ le bukaʼaj ku náajaltik kaʼach tu luʼumil Inglaterra, le tuʼux u taaloʼ. Letiʼeʼ ku yaʼalik: «Tin tsʼáaj cuentaeʼ maʼ tu páajtal in manik tuláakal baʼax in kʼáat. Bejlaʼeʼ kin yéeyik baʼax ken in man in jaante yéetel yáax táanil kin máan in wil tuʼux maas barato. Wa ku kʼastal ten junpʼéel in nuʼukuleʼ, kin manik medio uso le baʼax kʼaschajtiʼoʼ yéetel kin kaxtik máax jeʼel u yáantken in wutskíinteʼ». ¿Baʼax tu kanaj Simon úuchik u kuxtal beyaʼ? Letiʼeʼ ku yaʼalik: «Tin kanaj baʼax jach kʼaʼabéet tiʼ máak utiaʼal u kuxtal yéetel tin kanaj kuxtal chéen yéetel junpʼíit baʼal. Yaʼab u téenel tsʼoʼok in wilik bix u yáantken Jéeoba. Tiʼ le siete jaʼaboʼob anaken weyaʼ mix juntéen pʼáatak minaʼan baʼal in jaant wa tuʼux in wenel». Jeʼex k-ilkoʼ Jéeobaeʼ ku yáantik le máaxoʼob táan u yilik u kuxtaloʼob chéen yéetel junpʼíit baʼal utiaʼal u maas kʼaʼaytikoʼob le Reinooʼ (Mat. 6:32, 33).

U tuklik máak u láakʼtsiloʼob. Ericaeʼ ku yaʼalik: «Jach suuken yéetel in láakʼtsiloʼob, le oʼolal kin tuklik maʼ tu páajtal in bin áantaj táanxel tuʼux». ¿Baʼax tu beetaj Erica? Letiʼeʼ ku yaʼalik: «Táanil tiʼ in bineʼ tin xokaj le jaatsoʼob ku taasik U Pʼíich Tulumil Kanan ku tsolkoʼob baʼax jeʼel u beetik máak utiaʼal maʼ u sen tuklik u láakʼtsiloʼoboʼ. Tiʼ junpʼéel tiʼ le jaatsoʼobaʼ ku  tsolik baʼax tu yaʼalaj juntúul maamatsil tiʼ u hija: ‹Teneʼ kin kanáantkech, baʼaleʼ Jéeobaeʼ maas maʼalob jeʼel u kanáantkecheʼ›. Le baʼax tin xokaʼ jach tu líiʼsaj in wóol». Hannah yéetel Patrick, u yíichameʼ, tiaʼanoʼob Majuroeʼ (Islas Marshall). Utiaʼal maʼ u sen tuukuleʼ Hannaheʼ ku yilik bix jeʼel u maas áantik le sukuʼunoʼob yéetel le kiikoʼob yanoʼob tu múuchʼuliloʼ. Letiʼeʼ ku yaʼalik: «Jach kin tsʼáaik u nib óolalil tiʼ Jéeoba yoʼolal le sukuʼunoʼoboʼ. Letiʼobeʼ in láakʼtsiloʼob xan. Wa maʼ yoʼolal u yáantajoʼobeʼ bejlaʼa minaʼanen way tuʼux maas kʼaʼabéet j-kʼaʼaytajoʼobeʼ».

Simon

U kanik u bisuba máak. Simoneʼ ku yaʼalik: «Ken kʼuchuk máak táanxel luʼumileʼ tuláakal jelaʼan u yilik. Yaan horaeʼ ku lúubul in wóol ken in tsikbalt junpʼéel chiste ichil le tʼaan ku beetaʼaloʼ tumen mix máak naʼatik». Ericaeʼ ku yaʼalik: «Ka káajeʼ kin wuʼuyik mix máak chʼaʼiken en cuentail, baʼaleʼ tin kʼaʼajseʼ maʼ binen chéen utiaʼal in kaxtik in wutsiliʼ baʼaxeʼ binen utiaʼal in maas meyajtik Jéeoba». Tu yaʼalaj xan: «Ka máan kʼiineʼ anchajten maʼalob amigoʼob. Teneʼ jach in yaabiltmoʼob». Simon xaneʼ tu tsʼáaj u yóol u kan tʼaan ich palauano, leloʼ le áant utiaʼal u biskuba yéetel le sukuʼunoʼob kajaʼanoʼob teʼeloʼ (2 Cor. 6:13). Úuchik u tsʼáaik u yóol u kan le tʼaanaʼ jach yaabiltaʼab tumen le sukuʼunoʼoboʼ. Wa le máaxoʼob ku binoʼob áantaj ku múul meyajoʼob yéetel le sukuʼunoʼob teʼ tuʼux ku kʼuchloʼoboʼ ku yantal kiʼimak óolal yéetel yaabilaj ichiloʼob. ¿Baʼax uláakʼ utsiloʼob ku kʼamik le máaxoʼob ku binoʼob áantaj táanxel tuʼuxoʼ?

YAʼAB UTSILOʼOB KU TAASIK

Apóstol Pabloeʼ tu yaʼalaj: «Le máax [...] yaʼab baʼax ku pakʼikeʼ yaʼab baʼax xan ken u joche» (2 Cor. 9:6). Le baʼax tu yaʼalaj Pabloaʼ jeʼel u páajtal u yilik le máaxoʼob ku binoʼob áantaj táanxel tuʼuxoʼ. ¿Baʼax utsiloʼob tsʼoʼok u kʼamkoʼob le máaxoʼob binoʼob áantaj Micronesiaoʼ?

Patrick yéetel Hannah

Tu luʼumil Micronesiaeʼ láayliʼ yaan máaxoʼob u kʼáatoʼob ka tsʼaʼabak xook tiʼob yéetel le Bibliaoʼ. Le máakoʼobaʼ jeʼel tak u kʼuchul u kʼex u kuxtaloʼob ken u kanoʼob baʼax ku kaʼansik Dioseʼ. Patrick yéetel Hannaheʼ kʼaʼaytajnajoʼob xan Angaur, junpʼéel chan isla tuʼux kajaʼan 320 máakoʼob. Letiʼobeʼ dos meses kʼuchukoʼob ka tsikbalnajoʼob yéetel juntúul maamatsil ku líiʼsik tu juunal u chan hijo. Le maamatsilaʼ tu séebaʼanil tu kʼamaj junpʼéel xook yéetel tu kʼexaj u kuxtal. Hannaheʼ ku yaʼalikeʼ le táan u suutoʼob yóoʼ bicicleta cada ken tsʼoʼokok u tsʼáaikoʼob xook tiʼ le koʼoleloʼ, ku paktikubaʼobeʼ yéetel ku yaʼalikoʼob: «¡Nib óolal Jéeoba!». Ku yaʼalik xan: «In wojel deporsi yaan u yilik Jéeoba bix ken u natsʼil le ‹chan taman› ichil u kaajaloʼ, baʼaleʼ tumen tiaʼanoʼon teʼ tuʼux maas kʼaʼabéet j-kʼaʼaytajoʼoboʼ, tiʼ toʼon tu tsʼáaj u páajtalil k-kaxtik yéetel k-áantik u kʼaj óolt Jéeoba. ¡Mix baʼal uláakʼ u taastoʼon kiʼimak óolal jeʼex lelaʼ!». Ericaeʼ ku yaʼalik xan: «Maʼ tu páajtal u tsolik máak bix le kiʼimak óolal ku taasik u yáantaʼal juntúul máax u kʼaj óolt Jéeobaoʼ».

¿JEʼEL WA U PÁAJTAL A BINEʼ?

Tiʼ yaʼab luʼumiloʼobeʼ kʼaʼabéet máaxoʼob kʼaʼaytik le Reinooʼ. ¿Jeʼel wa u páajtal a bin áantajeʼ? Kʼáat tiʼ Jéeoba ka u tsʼáa ta puksiʼikʼal u tsʼíibolil a bin áantaj táanxel tuʼux. Tsʼoʼoleʼ tsikbalnen yéetel le ancianoʼob, yéetel le superintendente tiʼ circuito wa yéetel le sukuʼunoʼob tsʼoʼok u binoʼob áantaj táanxel luʼumiloʼ. Wa ka chʼaʼtuklik a bineʼ, tsʼíibt junpʼéel carta tiʼ le najil Betel ilik le kʼaʼaytaj teʼ tuʼux taak a binoʼ yéetel kʼáat baʼaxoʼob kun kʼaʼabéettal a beetik. * Maʼ xaaneʼ jeʼel u páajtal a wantal ichil le u milesil sukuʼunoʼob táankelmoʼob, yaan u jaʼabiloʼob bey xan le tsʼokaʼan u beeloʼob táan u kʼamkoʼob yaʼab utsiloʼob yéetel kiʼimak u yóoloʼob ikil u yáantajoʼob táanxel tuʼuxoʼ.

^ xóot’ol 17 Ilawil le xook «¿Jeʼel wa u páajtal a máan Macedoniaeʼ?», jóokʼ tiʼ K-meeyjil tiʼ le Reinooʼ, tiʼ agosto tiʼ 2011.